te bwabetito

Aokati 13

E kanga Iesu Kristo ni Buokai ni Bitaki?

I-Rom 1-6

te aikaon ibukin te uaia ni marooro

Te Uaia ni Marooro

E kairaki iroun te membwa n te kiraati ke te beretitentii n te kooram, e na kabanea 10–20 te miniti

Ni moan waakin te bootaki, ikotaki n taekina Aia Botoniango Ataeinnaine ke Aia Botoniango Kaain te Kooram n te Nakoanibonga ae te Aaron. Ngkanne kaira te marooro iaon te mwakuri ni kamaiu ao te karietataaki ni kabongana teuana ke e raka riki man titiraki aika inano ke aika bon am kario (taraa Aeniboki ni Kabuta,, 10.2, 11.2). Babaire ao mwakuria te bwai ae maroroakinaki.

• Maiuakina te euangkerio. N na kanga ni kunea te kimwareirei n iriiran Iesu Kristo?

• Tararuakiia naake iai kainnanoia. Antai inanon ara uoote ke n te komiuniti aika a kainnanoa ara ibuobuoki? Ti na kanga ni buokiia?

• Kaoia ni kabane bwa a na karekea te euangkerio. Ti na kanga ni buokiia tabeman ni katauraoi ibukin te mwakuri ni mitinare?

• Katiteuanakiia utu ibukin te maiu ae akea tokina. Ti na kanga n ibuobuoki nakon ana mwakuri ara uoote ni karaoa te riki n rongoronngon te utu ao te mwakuri n te tembora?

N tokin te reirei, ngkana e riai, karaoi waaki aikai:

• Kaota am koaua n reirei ake ko reiakin.

• Kauringiia kaain te kiraati ke te kooram iaon babaire ao kakao ake a karaoi n tain te bootaki.

te aikaon reirei te reirei

Reirei te Reirei

E kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

Ana euangkerio Iesu Kristo bon te euangkerio ni mwamwakuri!” Beretitenti Russell M. Nelson e a tia n taku (“Decisions for Eternity,” Riaona, Nob. 2013, 108). N aekakin naba anne, Abotoro Bauro e kamataata bwa ngkana ti bwabetitoaki, ti “nakonako inanon te maiu ae boou” (I-Rom 6:4). Ibukin Iesu Kristo, ni katoa bong—tiaki ti te bong are ti bwabetitoaki—ti kona n uota te “maiu ae boou” ke te tai n kararoaia man te bure ao ni kaanira nakon te Atua. Maiuakinan ana euangkerio Iesu Kristo e nanonaki n ae ti na rairi nanora ao ni kaaniaki riki nakon te Atua—n taai nako, tabetai e karaurau—ataakin ae na kairiira ara kekeiaki nakon te kimwareirei ae tabwanin.

Iangoa raoi bwa e kanga te Tia Kamaiu ni bitiko ao aomata ake ko reireiniia. Ko na kanga n tauraoi raoi n butimwaea mwaakan te Tia Kamaiu bwa e na bitiko? Iangoa te titiraki aei ngkana ko wareka I-Rom 1–6 ao n am tai ni katauraoi n angareirei. Ko kona naba n rinanon ana rongorongo Beretitenti Russell M. Nelson “Ti Kona n Karaoa ae Tamaroa ao ni Katamaroa Riki” (Riaona, Meei 2019, 67-69) ke ana rongorongo Titita Becky Craven “Kawakina te Bitaki” (Riaona, Nob. 2020, 58-60).

Te Uaia n Reirei

Irouia tabeman ibuakora, te “maiu ae boou” are anganiira Kristo (I-Rom 6:4) e matoa kinaakina bukina bwa e karaurau n riki, ma irouia tabeman, ao te bitaki aio e tawe n riki. Ko kona ni kaoia kaain te kiraati ke te kooram bwa a na tibaua nanon “te nakonako n te maiu ae boou” irouia. Tera tabeua taeka ao mwakoro n taeka man I-Rom 6 aika a kabwarabwara maiura ma ao n akean ana kairiiri te Tia Kamaiu? (Ngkana a kainnanoa buokaia, a kona n tarai kiibu 6, 11, 22–23.) Tera taeka ma mwakoro n taeka tabeua riki aika ti kona n iangoi riki? E kanga te Tia Kamaiu ni buokiira bwa ti na bitaki? Waaki ni kakukurei n aron aikai a kona n kairiira nakon te marooro ae nano iaon atuun te reirei aio.

• Ni buokiia kain te kiraati ke te kooram n iangoi bitaki ake e kona te Tia Kamaiu ni buokii ni karaoi, kaoia bwa a na wareka kabwabwaraan “Raira nanom, Rairannano” inanon Kairi nakon Koroboki aika a tabu (scripture.ChruchofJesusChrist.org). A kona naba ni marooroakina ana kabwarabwara Beretitenti Russell M. Nelson iaon te rairannano inanon taian moan barakirabu ake itiua n ana rongorongo “Ti Kona n Karaoa ae Tamarao ao n Katamaroa Riki.” Tera koaua aika kakawaki ae ti reiakinna ibukin te rairannano man kabwarabwara aikai? Ko kona n anganiia kaain te kiraati ke kooram aia tai n iangoi raoi bwaai ake e karinanii Beretitenti Nelson bwa e tangiria Iesu bwa ti na bitiaki (n te barakirabu nimaua n ana rongorongo). Kaungaia bwa a na korei bwaai a namakinna bwa a na bitia. Kaota am koaua ni mwaakan te Tia Kamaiu ni buokiira n raira nanora ao ni bitaki.

• E taku Titita Becky Craven bwa tabeman raoraona ngkoa a taetaekina “ Ko tuai naba man bitaki!” Ko kona n tibwauai ana taeka Titira Craven iaon aio (tara “Kawakina te Bitaki,” 59-60). Kaoia membwa n te kiraati ao kooram bwa a na katamneia irouia bwa inanon nimaua ke tebwina te ririki, ao a kaitiboo ma raoraoia ngkoa temanna. Tera bitaki aika a na kona n noria raoraora? N anga raa ae ti na kaantaningaia bwa ti na bitaki? E kanga te onimaki iroun Iesu Kristo n buokiira bwa tina bitaki? (tara Motiaea 5:2-5, 7; Aramwa 5:11-13; Ita 12:27, ke taian “banna ni bitaki ae reitinako” are e kabwarabwaraa Titira Craven n barakirabun ana rongorongo ake aua are moanaki ma “Ngke I Uarereke”). Ko kona n tuangiia kairake bwa a na tibwauai tabeua aia taneiai iaon taai ake e buokiia Iesu Kristo ni bitaki.

• Tabetai ti na taku bwa ti kaantaningaaki bwa ti na karaoi bitaki ma katamaroa ni maiura i bon iroura. Tera kaokoron aio ma te rairannano ni koaua? Ni buokiia kaain te kiraati ao kooram n marooroakinan te titiraki aio, ikotaki n rinanon rongorongo inanon “Reitan Bwaai ni Mwakuri.” Tera ae ti kona ni karaoia n ukera ana ibuobuoki te Tia Kamaiu bwa e aonga n ae bitaki ake ti karaoi a na teimatoa man kakukurei? Aio te tai ae tamaroa ibukiia kairake n iangoa katean oin aia kouru ae a na rikirake iai. Ti na kanga ni kaira te Tia Kamaiu ibuakon ara kouru?

ataeinnaine aika a rianna

Te Onimaki iroun Iesu Kristo e na buokiira n rairi nanora ao ni moanna n riki n ai Arona ni katoa bong.

Karaoia inanon te Onimaki

Kaunga te kiraati ke membwa n te kooram bwa a na iangoi man korei baike a na karaoi n mwakurii namakin ake a karekei n te bong aei. Ngkana a tangiria, a kona n tibwauai aia iango. Kaoiia n iangoa taekana bwa e kanga mwakurian aia namakina are e na kakorakorai reitakiia ma Tamara are i Karawa ao Iesu Kristo.

Reitan Bwaai ni Mwakuri

• Beretitenti Russell M. Nelson e reirei: “Ti kona ni bitii anuara. Nanora ake ti tatangirii a kona ni bitaki. Ni kanga? Bon ti teuana te kawai. Bitaki ni koaua—teimaan ni bitaki—e kona n roko ti rinanon te kamarurung, kaitiakaki, ao mwaakan ana Mwakuri ni Kamaiu Iesu Kristo. E Tangiriko-n tatabemanii ngkami! E kariaiakako bwa ko na karekea Mwaakana ngkana ko kawakin Ana tua, ma te ingainga n nano, te nano ae korakora, ao ni koaua” (“Decisions for Eternity,” 108).

• Unimwaane Dale G. Renlund e reireiniira: Te mwaaka are e karaoa te rairannano n riaina, [bon] te mwakuri ni kamaiu iroun ara Tia Kamaiu. Te rairannano ni koaua e riai n irekereke inanon onimakinan te Uea Iesu Kristo, te onimaki are e kona ni bitiira, te onimaki are e kona ni kabwarai bure, te onimaki are e kona n buokiira n totokoi rakan kaairua. Te aeka n onimaki aei e karaoa Ana mwakuri ni Kamaiu n roota maiura. Ngke ti… ‘rairaki rikaki’ [rairi nanora] ma ana buoka te Tia Kamaiu, ti na namakina te kantaninga inanon Ana berita ao te kukurei ni kabwarabure. N akean te Tia Kabooi Maiura, karekean mwiin te kantaninga ao namakinan te kimwareirei, ao karaoan te rairannano e na bon bebete te bitaki n te aroaroa ae buakaka. Ma man kamwakuran am onimaki Irouna, ti na rairaki riki nakon Ana atatai ao kukureina ni kabwarai buure. (Dale G. Renlund, “Te Rainanano: Te Rinerine ae Kakukurei,” Riaona, Nob. 2016, 122).

Reirei n ana Kawai te Tia Kamaiu

Waaki n kakukurei aika n te kabwarabwara aio a kaoti kawai aika kona n buoka ma kiraati ao kooram n ikotaki n reiakina taekan te Tia Kamaiu ao Mwaakana n buokiira bwa ti na bitaki. E na Iai naba aanga tabeua ae tamaroa riki n buokaia ake ko reireiniia. Tataroakina ukoran ana kairiiri te Tamnei n bairean kawai n karikirakea am onimaki iroun Iesu Kristo.