peptaij

O̧kwōj 13

Elmen an Jisōs Kraist Jipan̄ N̄a Oktak?

Rom 1–6

pija eo ej bōk jikin kapilōk doon

Ko̧o̧njeļ Ippān Doon

Kar tōl jān eo juon uwaan būreejtōnji eo an doulul eo ak kūlaaj eo; tarrin 10-20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Jiron̄ ro ak Unin Tōl eo an Doulul eo an Priesthood eo an Aron Innem tōl juon iien ekōnono kōn jerbal in lo̧mo̧o̧r im mour eo eaibojooj ijo eutiej tata ilo ami kōjerbal juon ak elōn̄ļo̧k kajjitōk ko ilaļ ak kajjitōk ko am̧ make (lale Bok in Bōk Meļeļe,, 10.2, 11.2) Karōk wāween ko n̄an kōm̧m̧ane ta eo kom̧ij kōnono kake.

• Mour kōn gospel eo. Ekōjkan ad maron̄ lo lan̄lōn̄ im m̧oor Jisōs Kraist?

• Kea kōn ro rej pād ilo aikuj. Wōn eo ilo ward ad ak jukjuk in pād eo ad me ej aikuj jipan̄ ko ad? Ewi wāween ad jipan̄ er?

• Karuwaineneik aolep n̄an bōk gospel eo. Ewi wāween ad jipan̄ doon kōppopo n̄an jerbal in mijenede?

• Kobaik baam̧le ko n̄an indeeo. Ewi wāween ad maron̄ jipan̄ļo̧k kijejeto ko an ward eo ad n̄an kōm̧m̧ane menmenbwij an baam̧le im jerbal in tampeļ?

Ilo jem̧ļo̧kin katak in, n̄e ekkar, kōm̧m̧ane laajrak in:

• Kam̧ool kōn pedped in katak ko kar katakin kaki.

• Kakeememej ro uwaan kūlaaj eo ak doulul eo kōn karōk ko im kūr ko me kar kōm̧m̧ane ilo iien kweilo̧k eo.

pija ej bōk jikin katakin katak eo

Katakin Katak eo

Kar tōl jān juon ritōl erūtto ak juon jodikdik; tarrin 25–35 minit

Kōpooj Eok Make ilo Jetōb

Gospel eo an Jisōs Kraist ej juon gospel in oktak!” Būreejtōn Russell M. Nelson ekar ba (“Jokālet ko n̄an Indeeo,” Liaona, Nob. 2013, 108). Ejja, Rijilōk Paul ekar kōmeļeļeik bwe elan̄e jej baptise, jej, “etal ilo mour ekāāl.” (Rom 6:4). Kōnke kōn Jisōs Kraist, aolep raan—ejjab raan eo wōt jekar baptise—emaron̄ bōktok “mour ekāāl” ak juon iiien n̄an etetal etoļo̧k jān jerawiwi im epaakeļo̧k Anij. N̄an mour kōn gospel eo an Jisōs Kraist ej meļeļein n̄an ukweļo̧k im eddōkļo̧k n̄an epaake Anij—aolep iien, jet iien jidik kōn jidik—ilo ad jeļā bwe kijejeto eo ad ej tōl n̄an m̧ōņōņō obrak.

Kejōkļo̧kjeņ elmen an Rilo̧mo̧o̧r kaoktak kwe im armej ro kwōj katakin. Elmen am̧ nej kadede n̄an bōke kajoor eo an Rilo̧mo̧o̧r n̄an ukōt kwe? Ļōmņak kōn men in ilo am̧ riiti Rom 1–6 im ilo am̧ kōppopo n̄an katakin. Komaron̄ barāinwōt etale ennaan eo an Būreejtōn Russell M. Nelson “Jemaron̄ Kōm̧m̧an Em̧m̧anļo̧k im Maron̄ Em̧m̧anļo̧k” (Liaona, Māe 2019, 67–69) ak ennaan eo an Sister Becky Craven “Dāpij Oktak Eo” (Liaona, Nob. 2020, 58–60).

Ekkatak Ippān Doon

N̄an jet iaad, “mour ekaal” me Kraist ej letok (Rom 6:4) epen n̄an kile kōnke ej waļo̧k jidik kōn jidik, ak n̄an ro jet, oktak in emōkaj an waļo̧k. Komaron̄ karuwainene membōr in kūlaaj ak doulul eo n̄an kwaļo̧k ta “etetal ilo mour ekāāl” meļeļein n̄an er?. Ta jet iaan naan ak jantōj ko jān Rom 6 me rej kōmeļeļe mour ko ad ippān ak ejjab ippān im̧we eo an Rilo̧mo̧o̧r? (N̄e jodikdik ro rej aikuj jipan̄, remaron̄ lale ilo eoon 6, 11, 22–23.) Ta bar jet naan im jantōj jemaron̄ ļōmņak kake? Ekōjkan an Rilo̧mo̧o̧r letok jipan̄ bwe jān oktak? Makūtkūt rōt kein elaajrak emaron̄ tōl n̄an ekōnono ko rem̧wilaļ kōn un kōnono in.

• N̄an jipan̄ kūlaaj ak doulul eo ļōmņak kōn oktak ko Rilo̧mo̧o̧r emaron̄ jipan̄ er kōm̧m̧ani, karuwainene er n̄an riiti meļeļe eo ium̧win “Repent, Repentance” in Guide to the Scriptures (scriptures.ChurchofJesusChrist.org). Remaron̄ barāinwōt kōnono kake meļeļe eo an Būreejtōn Russell M. Nelson kōn ukweļo̧k ilo eoon ko jilimjouj ilo jinoin in tata in ennaan eo an “Jemaron̄ Kōm̧m̧an Em̧m̧anļo̧k im Maron̄ Em̧m̧anļo̧k.” Ta m̧ool ko raorōk jekar ekkatak kōn ukweļo̧k jān meļeļe kein? Komaron̄ barāinwōt leļo̧k n̄an kūlaaj ak doulul eo iien n̄an linūri elaajrak eo an Būreejtōn Nelson kōn men ko Jisōs ej kajjitōk ipped n̄an ukōte (ilo eoon lalem ilo ennaan eo an). Rōjan̄ er n̄an jeki juon men aorōk rej en̄jake n̄an ukōte. Kwaļo̧k am̧ naan in kam̧ool kōn kajoor eo an Rilo̧mo̧o̧r n̄an jipan̄ kōj ukweļo̧k im oktak.

• Sister Becky Craven ekar ba bwe ro mōttan jān jemaan jet iien rej ba, “Āinwōt kwojan̄in de oktak!” Kōmaron̄ kwaļo̧k uwaak eo an Sister Craven kōn men in (lale “Dāpij Oktak eo,” 59–60). Kajjitōk ippān membōr in kūlaaj ak doulul eo n̄an ļōmņak bwe ilo lalem ak jonoul iiō jān kiiō, renaaj io̧o̧ne ro mōttaer jān jemaan. Oktak ta ko emaron̄ pidodo an ro mōttad loi? Ilo wāween rōt jej kōjatdikdik bwe jenaaj oktak? Elmen an tōmak ilo Jisōs Kraist jipan̄ kōj oktak? (lale Mosaia 5:2–5, 7; Alma 5:11–13; Ether 12:27, ak “wāween ko n̄an wōnm̧aanļo̧k n̄an oktak.” Sister Craven kar kōmeļeļeik ilo eoon emen in ennaan eo an jino jān “Ke ikar dik”). Komaron̄ kajjitōk ippān jodikdik ro n̄an kwaļo̧k en̄jake ko aer juon iien Jisōs Kraist ekar jipan̄ er oktak.

• Jet iien jemaron̄ ļōmņak bwe jej aikuj kōm̧m̧ani oktak ko ak em̧m̧anļo̧k ko ilo mour ko ad make iaad. Elmen an men in oktak jān m̧ool in ukweļo̧k? N̄an jipan̄ kūlaaj ak doulul eo am̧ kōnono kōn kajjitōk in, komaron̄ etale ippān doon ennaan ko ilo “Kein Jipan̄ ko rej Rie.” Ta eo jemaron̄ kōm̧m̧an kiiō n̄an pukōt jipan̄ an Rilo̧mo̧o̧r bwe oktak ko ad enaaj ped wōt im lem̧ōņōņō? Menin ej juon iien em̧m̧an n̄an an jodikdik ro ļōmņak kōn kōtōpar ko aer make n̄an em̧m̧anļo̧k. Elmen ad kobaik Rilo̧mo̧o̧r ilo kōtōpar ko ad?

jiron̄ ro rej etetal

Tōmnak ilo Jisōs Kraist ej jipan̄ kōj n̄an ukwelo̧k im erom̧ āinwōt E kajjojo raan.

Jerbal kōn Tōmak

Rōjan̄ ro uwaan kūlaaj eo ak doulul eo n̄an kejōkļo̧kjeņ im je ta eo renaaj kōm̧m̧ane n̄an mour ekkar n̄an im̧we ko rej en̄jaki rainin. Eļan̄n̄e rej kōņaan, remaron̄ kwaļo̧k ļōmņak ko aer. Karuwainene er n̄an ļōmņak kōn ekōjkan an jerbali im̧we ko aer naaj kōkajoorļo̧k jem̧jerā eo aer ippān Jemedwōj Ilan̄ im Jisōs Kraist.

Kein Jipan̄ ko rej Rie

• Būreejtōn Russell M. Nelson eaar kōmeļeļe: “Jemaron̄ ukōt m̧wiliid. Lukkuun kōņaan ko ad remaron̄ oktak. Ekōjkan? Ewōr juon wōt iaļ. Oktak eo em̧ool—likkuun oktak emool—emaron̄ waļo̧k kōn wōt kemour, erreeo, im kōn kajoor in Pinmuur eo an Jisōs Kraist. Ej iakwe eok—kajjojo iami! Ej kōm̧m̧an bwe kwon bōk An kajoor ilo am̧ kōjparok kien ko An ilo, ikdelel, kijejeto, im ilo jejjet.” (“Decisions for Eternity,” 108).

• Elder Dale G. Renlund ekar katakin: “Kajoor eo ej kōm̧m̧an bwe ukweļo̧k en maron̄ bōk jikin [ej] pinmuur in en̄taan eo an ad Rilo̧mo̧o̧r. Mool in ukweļo̧k ej aikuj kitbuuj tōmak ilo Irooj Jisōs Kraist, tōmak bwe Emaron̄ ukōt kōj, tōmak bwe Emaron̄ jero̧ļo̧k ad bōd, im tōmak bwe Emaron̄ jipan̄ kōj bōbraik elōn̄ likjab ko. Kain tōmak rot in ekōm̧m̧an bwe Pinmuur eo An en jerbal ilo mour ko ad. N̄e jej … ‘oktakļo̧k’ [ukweļo̧k] kōn jipan̄ eo an Rilo̧mo̧o̧r, jej maron̄ en̄jake kōjatdikdik ilo kallim̧ur ko An im m̧ōņōņō eo an jeo̧rļo̧k bōd. N̄e ejjeļo̧k Ripinmuur, ājinkōj in kōjatdikdik im m̧ōņōņō an ukweļo̧k ejej tokjen. Ilo ad tōmak ilo E, jenaaj erom̧ otak n̄an maron̄ eo An im kōnaan nej jeroļo̧k jerawiwi” (Dale G. Renlund, “Repentance: A Joyful Choice,” Liahona, Nov. 2016, 122).

Katakin ilo Wāween eo an Rilo̧mo̧o̧r

Makūtkūt kein ilo katak in rej letok wāween ko remaron̄ jipan̄ kūlaaj ak doulul eo am̧ ekkatak ippān doon kōn Rilo̧mo̧o̧r im kajoor eo An n̄an jipan̄ kōj oktak. Emaron̄ lon̄ men ko komaron̄ lale lok n̄an jerbal em̧m̧anļo̧k n̄an ro kwōj katakin. Jar n̄an kappukot tōl an Jetōn ilo am̧ kōm̧m̧an wāween ko n̄an kalōk tōmak ilo Jisōs Kraist