Templo iti Indianapolis Indiana

Agosto 27

Kasano a Maipakitak nga Ammok a Maysa a Sagrado a Sagut ti Bagik a Naggapu iti Dios?

1 Taga Corinto 1–7

Agiinnuman

Idauluan ti maysa a miembro ti panguluen ti klase wenno korum; agarup 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Handbook, 10.2, 11.2). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Ania dagiti kaudian a padas nga ad-adda a nangyasideg kadatayo iti Nailangitan nga Ama ken ni Jesucristo?

• Aywanan dagiti agkasapulan. Adda kadi maysa a tao a kaak-akar iti wardtayo wenno nabiit pay a nagkameng iti Simbaan? Kasano a makatulongtayo kadakuada a makarikna iti nabara a pannakapasangbay?

• Awisen ti amin nga umawat iti ebanghelio. Ania dagiti aktibidad a sumangbay a mabalin a pangawisan kadagiti gagayyemtayo a dumar-ay?

• Pagkaykaysaen dagiti pamilia para iti kinaagnanayon. Ania dagiti panagkagumaan a maaramidtayo a mangisurat kadagiti bukodtayo a pakasaritaan?

Iti ungto ti adalen, no maitutop, aramidem dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Para iti nasaysayaat wenno para iti dakdakes, kasla maam-ammo dagiti Santo iti Ud-udina nga Aldaw iti no ania ti saantayo nga aramiden. Adu kadagiti “saan nga aramiden” ti adda pakainaiganna iti wagas a panangtratotayo kadagiti pisikal a bagitayo. Iti likudan ti tunggal maysa kadagita a pili maipapan iti no ania ti aramiden ket ti sumagmamano nga agnanayon a kinapudno—nga ammotayo. Ania dagiti agnanayon a kinapudno a mangtarabay kadagiti pilitayo, agbalin dagita a pili a nalaklaka nga aramiden, naragrag-o, ken napapaut. Tulongannatayo pay dagiti agnanayon a kinapudno a mangilawlawag kadagiti pilitayo iti gagayyemtayo. Nalabit a kas nayon iti pannakaam-ammo kadatayo iti no ania ti saantayo nga ar-aramiden, maam-ammotayo iti no ania ti ammotayo.

Panunoten maipapan kadagiti agnanayon a kinapudno nga ammom maipapan kadagiti pisikal a bagitayo—no apay nga addaantayo kadagitoy, no kasano ti rikna ti Dios maipapan kadagitoy, ken no kasano ti kayatna a mariknatayo maipapan kadagitoy. Kasano a ti pannakaammom kadagitoy a kinapudno ket nangbendision kenka ken nangimpluensia kadagiti pilim? Kasano a makabendision daytoy a pannakaammo kadagiti miembro ti klasem wenno korummo? Bayat ti panangutobmo iti daytoy, basaem ti Genesis 1:27; 1 Taga Corinto 6:19–20; ken ti artikulo ni President Russell M. Nelson “Your Body: A Magnificent Gift to Cherish” (Liahona, Ago. 2019, 50–55).

Aggigiddan a Masursuruan

Bayat ti panagadal dagiti miembro ti klasem wenno korummo iti nasantuan a kasuratan iti daytoy a lawas, mabalin a napanunotda dagiti pannursuro ni Pablo maipapan kadagti bagitayo iti 1 Taga Corinto 6. Maysa a wagas a pangawisan kadakuada a mangiburay kadagita a kapanunotan ket ikkan ti tunggal maysa kadakuada iti maysa a papel ket idawat kadakuada a mangisurat iti uray laeng tallo a posible a sungbat iti saludsod “Kasano a maipada dagiti bagitayo iti templo?” Allukoyem ida a mangbasa iti 1 Taga Corinto 6:19–20 bayat ti panangutobda iti daytoy a saludsod. Kalpasanna mabalinda nga ibinglay dagiti kapanunotanda iti tunggal maysa. Kasano nga impluensiaan dagiti pannursuro ti Mangisalakan maipapan kadagiti bagitayo dagiti pili nga aramidentayo? Adtoy ti sumagmamano a mainayon nga aktibidad iti kapanunotan maipapan iti daytoy a topiko; mangpili manipud kadagitoy, wenno mangplano iti maysa a bukodmo.

• No kayatmo ti maaddaan iti nayon a panaglilinnawag maipapan iti panagdasig ni Pablo iti bagi ken ti templo, ibilang ti panangipakita kadagiti ladawan ti sumagmamano a nadumaduma a templo. Makasarakka iti sumagmamano iti temples.ChurchofJesusChrist.org. Mabalin a paglilinnawagan dagiti miembro ti klase wenno korum dagiti pagdudumaan a makitada kadagitoy a templo, kasta met dagiti banag a pagpapadaanda. Mabalinda met ti agsarita no kasano ti mariknada no addada iti templo. Ania ti mangaramid iti templo a naespirituan, sagrado a lugar? Kalpasanna mabalinmo nga allukoyen ti klase wenno korum a manginaig kadagiti banag nga inlawlawagda maipapan kadagiti templo kadagiti bagitayo. Kasano a mainaig dagiti pannursuro maipapan kadagiti templo iti Doktrina ken Katulagan 97:15–16; 109:8, 12 kadagiti pisikal a bagitayo?

• Nalabit nga addaan dagiti miembro ti klasem wenno korummo—wenno addaandanto—kadagiti gundaway a mangilawlawag no apay a surotenda dagiti pannursuro ti Mangisalakan maipapan iti panangaywan kadagiti bagitayo. Mabalin a saludsodem ti sumagmamano kadakuada no ania ti mabalin a sawenda no, kas pagarigan, maysa a tao ti agsaludsod kadakuada no apay a saanda nga uminom iti makabartek, tsaa, wenno, kape wenno apay a saannda nga agaruat kadagiti masinunuo a kita ti kawes. Ania dagiti sumagmamano a kinapudno manipud iti ebanghelio ni Jesucristo a makaapekto iti no kasano ti panangtratotayo kadagiti bagitayo? Mabalin a sapulen dagiti miembro ti klase wenno korum iti sumagmamano kadagitoy a kinapudno iti babaen iti “Dagiti Pangsuporta a Resources.”

• Tapno matulongan dagiti sursuruam a mangpauneg iti panagraemda para kadagiti namilagruan a bagitayo, mabalinmo nga ipakita ti video “God’s Greatest Creation” (kitaen met iti Russell M. Nelson, “Your Body: A Magnificent Gift to Cherish,” 50–55). Kasano a kayat ti Nailangitan nga Ama ken ni Jesucristo a mariknatayo maipapan kadagiti bagitayo? Mabalinmo met nga ilawlawag dagiti wagas a pangpadasan ni Satanas a manguyot kadatayo a mangtagilag-an wenno manggura pay kadagiti bagitayo. Ania ti maaramidtayo a mangparmek kadagiti kinaulbod ken pannulisogna? Ania dagiti kinapudno a mangtulong kadatayo. Sumagmamano kadagiti resources iti babaen ti “Dagiti Pangsuporta Resources” ti mabalin a makatulong.

Sagsagut nga aggapu iti Dios dagiti bagitayo, ken tulongannatayo dagiti kinapudno ti ebanghelio a mangaywan kadagitoy.

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan iti no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Genesis 1:27; 1 Taga Corinto 6:19–20; Alma 11:42–44; 40:23; Doktrina ken Katulagan 89; 130:22

• “The Family: A Proclamation to the World,” nangnangruna iti umuna a tallo a parapo

• “The Lord Gave Me a Temple,” Children’s Songbook, 153

• Dagiti artikulo maipapan kadagiti pisikal a bagi iti Agosto 2019 New Era wenno Liahona

• Insuro ni President Russell M. Nelson: “Iti panangtedna iti sagut ti bagi, pinalugodannatayo ti Dios a mangala iti napateg nga addang iti panagbalin nga ad-adda a kas Kenkuana. Maawatan ni Satanas daytoy. … Isu nga adu, no di kaaduan, a dagiti pannulisogna ti mangigapu iti panangabuso iti bagitayo ken ti bagi dagiti dadduma. … Ti bagiyo ti bukodyo a templo, naparsua a pagyanan ti agnanayon nga espirituyo [kitaen iti 1 Taga Corinto 3:16–17; 6:18–20]. Nasken nga aywananyo dayta a templo. Ita, saludsodek kadakayo, … naes-essemkayo kadi iti panangkawes ken panangurnos iti bagiyo a mangpagusto iti lubong ngem iti mangparagsak iti Dios? Ti sungbatyo iti daytoy a saludsod ti mangted iti direkta a mensahe Kenkuana maipapan iti riknayo maipanggep iti nakaskasdaaw a sagutna kadakayo” (“We Can Do Better and Be Better,” Liahona, Mayo 2019, 68).

• Insuro ni Elder D. Todd Christofferson: “Dagiti mamati nga ad-adda pay dagiti bagitayo ngem iti resulta ti ebolusionario a gundaway ket mariknadanto a saanda nga agsungbat iti Dios wenno iti asino man para iti aramidenda iti bagida. Datayo nga addaan iti saksi ti dakdakkel a kinapudno ti premortal, mortal, ken postmortal nga agnanayon, nupay kasta, nasken nga awatentayo nga adda pagrebbengantayo iti Dios no maipanggep iti daytoy napateg a pannakatun-oy ti panagparsuana iti bagi. … Gapu ta ramit ti espiritu ti bagitayo, napateg daytoy nga aywanantayo iti kasayaatan a kabaelantayo. Nasken nga ikonsagrartayo dagiti bilegna nga agserbi ken mangpadur-as iti aramid ni Cristo” (“Reflections on a Consecrated Life,” Liahona, Nob. 2010, 17).

Panangisuro iti Wagas ti Mangisalakan

Agbalinka a managrikna kadagiti adda iti klasem wenno korummo nga addaan kadagiti pagkurangan wenno dadduma pay a pannubok a mainaig iti bagi. Tulongam ida a makaawat a napateg ti bagi ti tunggal maysa ken maikari iti pannakarespeto. Ti ayat a kas ken ni Cristo nga ipakitam iti amin ket mabalin a maaddaan iti nabileg nga impluensia iti wagas a makita dagiti miembro ti klase wenno korum iti dadduma wenno iti bagida.