panagbuniag

Agosto 13

Kasano a Matulongannak ni Jesucristo nga Agbalbaliw?

Taga Roma 1–6

icon ti panagiinnuman

Agiinnuman

Idauluan ti maysa a miembro ti panguluen ti klase wenno korum; agarup 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Handbook, 10.2, 11.2). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Kasano nga agsapsapultayo iti rag-o iti panangsurot ken ni Jesucristo?

• Aywanan dagiti agkasapulan. Asino iti ward wenno komunidadtayo ti agkasapulan iti tulongtayo? Kasano a makatulongtayo kadakuada?

• Awisen ti amin nga umawat iti ebanghelio. Kasano a matulongantayo ti tunggal maysa nga agsagana para iti serbisio ti misionario?

• Pagkaykaysaen dagiti pamilia para iti kinaagnanayon. Kasano a makatulongtayo kadagiti panagkagumaan ti wardtayo nga agtrabaho iti aramid iti family history ken templo?

Iti ungto ti adalen, no maitutop, aramidem dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

icon iti isuro ti doktrina

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Ti ebanghelio ni Jesucristo ket ebanghelio ti panagbalbaliw!” Kinuna ni President Russell M. Nelson (“Decisions for Eternity,” Liahona, Nob. 2013, 108). Maipada met, inlawlawag ni Apostol Pablo a no nabuniagantayon, “magnatayo iti baro a panagbiag” (Taga Roma 6:4) Gapu ken ni Jesucristo, inaldaw—saan laeng nga iti aldaw a panagbuniagtayo—makayeg iti “baro a panagbiag” wenno maysa a gundaway a magna nga umad-adayo iti basol ken umas-asideg iti Dios. Tapno agbiag iti ebanghelio ni Jesucristo kayatna a sawen ti agbabawi ken dumur-as nga as-asideg iti Dios—agtultuloy, wenno in-inut—nga ammotayo a dagiti panagkagumaantayo ti mangiturongto kadatayo iti pakabuklan ti rag-o.

Utobem no kasano a balbaliwannaka ti Mangisalakan ken dagiti tao a sursuruam. Kasano a naan-anay a maawatmo ti bileg ti Mangisalakan a mangbalbaliw kenka? Panunotem maipapan iti daytoy bayat ti panagbasam iti Taga Roma 1–6 bayat ti panagsaganam a mangisuro. Mabalinmo met nga irebyu ti mensahe ni President Russell M. Nelson a “We Can Do Better and Be Better” (Liahona, Mayo 2019, 67–69) wenno ti mensahe ni Sister Becky Craven “Keep the Change” (Liahona, Nob. 2020, 58–60).

Aggigiddan a Masursuruan

Para iti sumagmamano kadatayo, ti “kinabaro ti biag” nga idiaya ni Cristo (Taga Roma 6:4) ket narigat a maawatan (discern) gapu ta mapasamak nga in-inut, idinto a para iti dadduma, mapasamak daytoy a panagbalbaliw a nadardaras. Mabalinmo nga awisen ti sumagmamano a miembro ti klase wenno korum a mangibinglay no ania ti kaipapanan ti “magna iti kinabaro ti biag.” Ania dagiti sumagmamano a balikas ken ragup ti balikas manipud iti Taga Roma 6 a mangiladawan iti biagtayo nga addaan ken awanan iti bileg ti Mangisalakan? (No kasapulan dagiti agtutubo ti tulong, mabalinda a kitaen kadagiti bersikulo 6, 11, 22–23.) Ania dagiti balikas ken ragup ti balikas a mapanunottayo? Kasano nga idiaya a tulongannatayo ti Mangisalakan nga agbalbaliw? Dagiti aktibidad a kas iti sumaganad ti makaiturong iti naun-uneg a panaglilinnawag iti daytoy a topiko.

• Tapno tulongan ti klase wenno korum a mangpanunot maipapan kadagiti panagbalbaliw a makatulong ti Mangisalakan no ania iti aramidenda, awisem ida a mangbasa iti depinision iti babaen ti “Agbabawi, Panagbabawi” iti Pangiwanwan iti Nasantuan a Kasuratan (scriptures.ChurchofJesusChrist.org). Mabalinda pay nga ilawlawag ti depinision ni President Russell M. Nelson iti umuna a pito a parapo ti mensahena “We Can Do Better and Be Better.” Ania dagiti napateg a kinapudno a masursurotayo maipapan iti panagbabawi manipud kadagitoy a depinision? Mabalinmo pay nga ikkan ti klase wenno korum iti oras tapno mangutob iti listaan ni President Nelson dagiti banag nga idawat ni Jesus kadatayo nga agbalbaliw (iti maikalima a parapo ti mensahena). Allukoyem ida a mangisurat iti maysa a banag a naipangpangruna a mariknada a maguyugoyda a balbaliwan. Ipaneknekmo maipapan iti bileg ti Mangisalakan a mangtulong kadatayo nga agbabawi ken agbalbaliw.

• Kinuna ni Sister Becky Craven a no dadduma kuna dagiti gagayyemna iti napalabas, “Dika met a talaga nagbalbaliw!” Mabalinmo nga ibinglay dagiti komentario ni Sister Craven maipapan iti daytoy (ktaen iti “Keep the Change,” 59–60). Idawat kadagiti miembro ti klase wenno korum a mangipapan nga iti lima wenno sangapulo a tawen, tumarayda a mapan iti maysa a gayyem iti napalabasda. Ania dagiti panagbalbaliw a mabalin a madlaw kadagiti gagayyemtayo? Iti ania a wagwagas a namnamaentayo a nabalbaliwantayo koma? Kasano a matulongannatayo nga agbalbaliw ti pammatitayo ken ni Jesucristo? (kitaen iti Mosiah 5:2–5, 7; Alma 5:11–13; Ether 12:27, wenno ti “agtultuloy a pagtuladan para iti panagbalbaliw” nga inladawan ni Sister Craven iti uppat a parapo ti mensahena a mangrugi iti “Idi ub-bingak”). Mabalinmo nga idawat kadagiti agtutubo a mangibinglay iti ania man a padpadas idi tinulongan ida ni Jesucristo nga agbalbaliw.

• No dadduma mapanunottayo a manamnama kadatayo nga agaramid iti panagbalbaliw wenno panagsayaat iti biagtayo amin iti bukodtayo. Kasano a maigiddiat daytoy iti pudno a panagbabawi? Tapno makatulong iti klasem wenno korummo a paglilinnawagan daytoy a saludsod, mabalinyo nga aggigiddan nga irebyu dagiti palawag iti “Dagiti Pangsuporta a Resources.” Ania ti maaramidtayo itan tapno makagun-od iti tulong ken bileg ti Mangisalakan tapno agbalinto a manayon ken narag-o dagiti panagbalbaliwtayo? Mabalin a daytoy ti nasayaat a gundaway a panangibilang dagiti agtutubo kadagiti panggepda a tun-oyen iti bukod a panagdur-as. Kasano a mairamantayo ti Mangisalakan kadagiti panggeptayo a tun-oyen?

dagiti agtutubo a babbai a magmagna

Ti pammati ken ni Jesucristo tulongannatayo nga agbabawi ken agbalin nga ad-adda a kas Kenkuana iti inaldaw.

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan iti no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Inlawlawag ni President Russell M. Nelson a: “Mabalintayo a balbaliwan ti ugalitayo. Makapagbalbaliw dagiti mismo a tarigagaytayo. Kasano? Adda maysa laeng a wagas. Ti pudno a panagbalbaliw—manayon a panagbalbaliw—ket mabalin a sumangbay laeng babaen iti panangagas, panangdalus, ken pangpabael a bileg ti Pannubbot ni Jesucristo. Ay-ayatennakayo—tunggal maysa kadakayo! Palugodannakayo a manggun-od iti bilegna no tungpalenyo dagiti bilinna, sigagagar, sipapasnek, ken siuumno” (“Decisions for Eternity,” 108).

• Insuro ni Elder Dale G. Renlund: “Ti bileg a mamagbalin a posible ti panangbabawi [ket] ti pangsubbot a sakripisio ti Mangisalakantayo. Ti napudpudno a panagbabawi nasken nga iramanna ti pammati ken ni Apo Jesucristo, pammati a mabalbaliwannatayo, pammati a mapakawannatayo, ken pammati a tulongannatayo a mangliklik iti ad-adu pay a biddut. Daytoy a kita ti pammati ti mangaramid nga epektibo ti Pannubbotna iti biagtayo. No … ‘agsublitayo’ nga [agbabawi] nga addaan iti tulong ti Mangisalakan, mariknatayo ti namnama kadagiti karina ken ti rag-o ti pammakawanna. No awan ti Pannubbot, awan koma ti nakaisigudan a namnama ken rag-o, agbalin ti panagbabawi a naliday a panagbalbaliw iti ugali. Ngem babaen ti panangaramat iti pammati Kenkuana, agbalintayo a napasurot iti kabaelan ken kinaayatna a mangpakawan iti basol” (Dale G. Renlund, “Repentance: A Joyful Choice,” Liahona, Nob. 2016, 122).

Panangisuro iti Wagas ti Mangisalakan

Isingasing dagiti aktibidad iti daytoy a balabala dagiti posible a wagas a mangtulong iti klasem wenno korummo nga aggigiddan nga agsursuro maipapan iti Mangisalakan ken iti bilegna a mangtulong kadatayo nga agbalbaliw. Mabalin nga adda dagiti dadduma pay a wagas a maaramat a nasaysayaat para kadagiti sursuruam. Nainkararagan nga agpatarabayka iti Espiritu bayat ti panagplanom kadagiti wagas a mangbukel iti pammati ken ni Jesucristo.