Septiembre 10

Kasano a Masarakak ti Liwliwa ken ni Jesucristo No Pumusay ti Maysa nga Ipatpateg?

1 Taga Corinto 14–16

Agiinnuman

Idauluan ti maysa a miembro ti panguluen ti klase wenno korum; agarup 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Handbook, 10.2, 11.2). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Kasano a ti yaasideg iti Apo makatulong kadatayo a mangsango kadagiti karit ken pannubok?

• Aywanan dagiti agkasapulan. Asino ti am-ammotayo nga agkasapulan kadagiti kararagtayo ken iti pannakigayyemtayo?

• Awisen ti amin nga umawat iti ebanghelio. Ania dagiti plano a mangibinglay iti ebanghelio ti napaglilinnawagan kadagiti miting ti youth council iti ward? Kasano a mairaman ti klase wenno korumtayo?

• Pagkaykaysaen dagiti pamilia para iti kinaagnanayon. Kasano a ti panangitrabaho iti aramid iti family history ket makapapigsa iti relasiontayo iti Nailangitan nga Ama ken ni Jesus?

Iti ungto ti adalen, no maitutop, aramidem dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

No matay ti maysa a tao nga ipatpategtayo, mabalin a makapaupay iti rikna. Ti isisina manipud iti maysa nga ipatpateg ket mangisangbay iti rikna ti napalaus a ladingit ken leddaang. Ngem insuro ni Pablo nga iti kamaudianan “alimonen ti balligi ni patay” (1 Taga Corinto 15:54) gapu iti Panagungar ni Jesucristo. Iti sabali a pannao, ti “pannilud ni patay”—ti saem ken kinaawan namnama a mariknatayo iti mortalidad—“ket maalimon ken ni Cristo” (Mosiah 16:7–8; kitaen met iti 1 Taga Corinto 15:54–57).

Iti maysa a punto, mapadasanto ti tunggal maysa ti ipapatay ti maysa nga ay-ayatenda. Kasano a matulongamto dagiti sursuruam a mangsarak iti liwliwa kabayatan dagita a narigat a panawen babaen ti pammatida ken ni Jesucristo? Panunotem maipapan daytoy a saludsod bayat ti panagsaganam a mangisuro babaen ti panangbasa iti 1 Taga Corinto 15, Mosiah 16:7–9, ken Doktrina ken Katulagan 42:44–46.

Aggigiddan a Masursuruan

Mabalinmo nga awisen ti sumagmamano a miembro ti klase wenno korum a mangibinglay no nariknada ti maysa a banag a mangsilud. Kalpasanna mabalinmo a saludsoden ida no apay iti panagkunada nga inusar ni Pablo ti balikas a “pannilud” a mangiladawan iti ipapatay (kitaen iti 1 Taga Corinto 15:54–56). Ikkam ida iti sumagmamano a minuto a mangrebyu iti 1 Taga Corinto 15 ket mangibinglay kadagiti kinapudno a masarakanda maipapan iti no kasano a maparmek ti pannilud ni patay. Kalpasanna ibilang dagiti aktibidad kas kadagiti adda iti baba a mangtulong kadagiti agtutubo a nasaysayaat a makaawat no kasano a maliwliwanatayo ti Mangisalakan no pumusay ti maysa nga ipatpategtayo.

• Mabalinmo a bingayen dagiti miembro ti klase wenno korum iti kada paris ket idawat iti tunggal paris nga aggigiddan a mangrebyu iti sumagmamano kadagiti binatog ti nasantuan a kasuratan iti “Dagiti Pangsuporta a Resources.” Mabalinda nga isurat dagiti sungbatda iti maysa a saludsod kas iti “ania dagiti napateg a kinapudno a namnamaek a lagipen no mapukawko ti maysa nga ipatpateg?” Idawatmo kadakuada a mangiraman iti impormasion manipud kadagiti binatog iti nasantuan a kasuratan iti sungbatda. Kalpasanna awisem ida a mangibinglay iti klase kadagiti kinapudno a kapatgan kadakuada ken apay.

• Ibilang ti aggigiddan a panagrebyu iti pakaammuan manipud iti mensahe iti sapasap a komperensia a mangipakpakita no kasano a nakasarak ti maysa a tao iti namnama ken Jesucristo no natay ti maysa nga impategda. Mairaman dagiti pagarigan iti mensahe ni Sister Reyna I. Aburto “The Grave Has No Victory” (Liahona, Mayo 2021, 85–86) wenno ti mensahe ni Elder S. Mark Palmer “Our Sorrow Shall Be Turned into Joy” (Liahona, Mayo 2021, 88–89). Mabalin a maawis ti imatangmo a mangibinglay iti bukodmo a padas wenno mangawis kadagiti agtutubo a mangiburay no kasano a nakasarakda iti liwliwa ken namnama ken ni Jesucristo kalpasan ti ipupusay ti maysa nga ipatpateg.

• Kalpasan ti panangibilang kadagiti kasapulan dagiti miembro ti klasem wenno korummo, ipabuyam ti maysa wenno ad-adu pay kadagiti video iti “Dagiti Pangsuporta a Resources..” Awisem dagiti agtutubo a mangibinglay kadagiti impresionda. Kasano a ti pannakaammo a nagungaren ni Jesucristo ket mangapekto iti no kasano ti pannirigantayo iti ipapatay? Awisem dagiti miembro ti klasem wenno korummo a mangibinglay kadagiti pammaneknekda maipapan iti Mangisalakan ken ti Panagungarna ken no kasano a mangyeg daytoy a pannakaammo iti namnama kadakuada.

• Ti Juan 11 iladawanna ti padas ti Mangisalakan iti ipapatay ti maysa nga ipatpateg—ti gayyemna a ni Lazaro. Nalabit a mabalin a basaen ti klase wenno korum dagiti bersikulo 1–45 nga aggigiddan, ket bayat ti panagbasada, mabalinda nga ibinglay dagiti banag a masursuroda manipud iti padas ti Mangisalakan. Ania ti masursurotayo manipud iti daytoy a pakaammuan a makaited kadatayo iti liwliwa no pumusay ti maysa nga ipatpategtayo. Kasano a masurottayo ti pagwadan ti Mangisalakan a “makipagladingit kadagiti agladladingit … ken manglinglingay kadagiti makasapul iti pannakalinglingay”? (Mosiah 18:9). Ania pay ti masursurotayo manipud iti Doktrina ken Katulagan 42:45–46 a makatulong kadatayo a mangaramid iti daytoy? Mabalin a kayatmo nga ipabuya ti video “One-on-One (Ministering with Love)” (ChurchofJesusChrist.org).

Dagiti pammaneknektayo maipanggep iti Panagungar ni Jesucristo ti mangted iti namnama no pumusay ti maysa nga ipatpateg.

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan iti no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Isaiah 25:8; 1 Taga Corinto 15:20–22; Mosiah 16:7–9; Alma 7:11–12; 11:42–44; 22:14; 28:12–14; 40:11–12

• Dallin H. Oaks, “What Has Our Savior Done for Us?,” Liahona, Mayo 2021, 75–77

• Moisés Villanueva, “Favored of the Lord in All My Days,” Liahona, Nob. 2021, 44–46

• Dagiti video: “Dealing with Death: Sunday Will Come,” “Finding Hope through the Resurrection of Christ,” “He Will Give You Help,” “Until We Meet Again” (ChurchofJesusChrist.org)

Panangisuro iti Wagas ti Mangisalakan

Maibilang ditoy ti panagserbi nga addaan iti ayat ken panangtulong kadagiti dadduma nga umawat kadagiti parabur ti ebanghelio, ken masansan a daytoy a tulong ti kasapulan mismo dagiti miembro a saan unay nga aktibo. Masapul nga agtitinnulongtayo amin tapno matulongan dagiti marigatan, ken kas maysa a mannursuro mabalin nga addaka iti naidumduma a kasasaad tapno tumulong.