Septiembre 24

Kasano a Masurotko ti Pagwadan ti Mangisalakan iti Panagtulong Kadagiti Agkasapulan?

2 Taga Corinto 8–13

Agiinnuman

Idauluan ti maysa a miembro ti panguluen ti klase wenno korum; agarup 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Handbook, 10.2, 11.2). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Ania ti napaglilinnawagantayo itay napalabas, ken ania dagiti naaramid nga awis wenno naidutok nga aramiden? Ania ti naaramidtayo tapno agtignay kadagita nga awis?

• Aywanan dagiti agkasapulan. Ania ti maaramid wenno maisaotayo a makatulong kadagiti mabalin a makarikna iti panagmaymaysa wenno adayo manipud iti Nailangitan nga Ama?

• Awisen ti amin nga umawat iti ebanghelio. Ania dagiti sumagmamano a wagas a pakatulongantayo kadagiti dadduma a makarikna iti ayat ni Jesucristo?

• Pagkaykaysaen dagiti pamilia para iti kinaagnanayon. Ania dagiti kapanunotan a maibinglaytayo iti tunggal maysa a makatulong a mangpapigsa kadagiti pamiliatayo?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Ania dagiti gundaway a makapagserbika ken dagiti miembro ti klasem wenno korummo kadagiti agkasapulan iti aglawlawmo? Iti maysa a panawen a nagsagsagaba dagiti Santo iti Jerusalem ken nagkasapulanda iti tulong, nagsurat ni Pablo kadagiti taga Corinto a mangallukoy kadakuada a mangted a siwawadwad, “awan sakit iti nakem, wenno gapu ta kasapulan: ta ay-ayaten ti Dios ti mangted a siraragsak.” Inkarina a gapu ta inaramidda daytoy, ti Dios “aramidenna nga aglaplapusanan ti parabur [kadakuada]” tapno mabalinda ti “aglaplapusanan iti tunggal nasayaat nga aramid” (2 Taga Corinto 9:7–8).

Intudo pay ni Pablo ti pagwadan ni Jesucristo, a “nupay nabaknang isuna, ngem gapu iti pagsayaatanyo nagbalin a nakurapay, tapno babaen iti kinapanglawna mabalin a bumaknangkayo” (2 Taga Corinto 8:9). Situtulok ti Mangisalakan a nangisakripisio kadagiti kinabaknang ti langit tapno makapagserbi Isuna kadatayo ken mangaramid kadatayo nga agnanayon a nabaknang. Mangpanunot kadagiti pagwadan iti biagna idi timmulong nga agserbi kadagiti adda iti aglawlawna. Kas nayon iti panangbasa iti 2 Taga Corinto 8–9 bayat ti panagsaganam a mangisuro, ibilang ti panangbasa iti mensahe ni Sister Michelle D. Craig “Eyes to See” (Liahona, Nob. 2020, 15–17).

Aggigiddan a Masursuruan

Tapno mangirugi iti panaglilinnawagyo, idawat iti klase wenno korum a mangilista iti sumagmamano kadagiti gapu no apay a mabalin a saan nga agserbi ti maysa a tao iti dadduma nga agkasapulan. Ania ti masursurotayo manipud kadagiti pannursuro ni Pablo iti 2 Taga Corinto 8:9; 9:7–8 a mangparegta kadatayo nga agaramid iti ad-adda pay nga agserbi kadagiti agkasapulan? Makatulong kadakuada dagiti sumaganad nga aktibidad iti baba tapno nasaysayaat a maawatanda no kasano ti tumulong a mangaywan kadagiti adda iti aglawlawda.

• Sumagmamano a gundaway iti nasantuan a kasuratan, insuro ti Apo no kasano ti riknana maipapan iti panangaywan kadagiti napanglaw ken agkasapulan. Naisingasing ti sumagmamano a pagarigan iti “Dagiti Nainayon a Resources.” Maysa a wagas a pang-rebyu kadagitoy a pannursuro ket mangbingay iti klasem wenno korummo iti kada paris ket idawat iti tunggal paris a mangadal iti sumagmamano kadagiti nasantuan a kasuratan. Idawatmo kadakuada a mangilawlawag no ania ti isuro dagiti binatog maipapan iti panangaywan kadagiti nakurapay ken agkasapulan. Apay a napateg unay iti Nailangitan nga Ama ken ni Jesucristo ti panangaywan kadagiti nakurapay ken agkasapulan? Awisem dagiti agtutubo a saggaysa nga agplanoda kadagiti wagas a pakatulonganda kadagiti agkasapulan.

• No dadduma makumikomtayo unay kadagiti bukodtayo a pakaseknan tapno maliwayantayo a mangbigbig kadagiti kasapulan dagiti adda iti aglawlawtayo. Iti mensahena nga “Eyes to See,” inrebyu ni Sister Michelle D. Craig ti pakaammuan ti Dios a mangisubsubli iti panagkita ti maysa nga agtutubo a lalaki (kitaen iti 2 Ar-ari 6:15–17). Ania ti masursurotayo manipud iti daytoy a pakaammuan? Ania ti masursurotayo manipud iti dadduma pay a pakaammuan nga imbinglayna maipapan iti panangbigbig iti dadduma pay a kasapulan ken panangtulong kadakuada? (Kitaen iti video “Pray for Eyes to See as He Sees” iti ChurchofJesusChrist.org). Mabalin pay nga ibinglay dagiti miembro ti klase wenno korum dagiti padas idi nabigbig ti maysa a tao dagiti kasapulanda ken nagminister kadakuada. Kaano a nabigbigtayo dagiti kasapulan dagiti dadduma ken nagminister kadakuada? Kasano ti mariknatayo no umaw-awat ken mangmangted iti kasta a panagminister?

• Maawatan kadi dagiti miembro ti klasem wenno korummo no kasano nga ipatungpalda ti pagrebbenganda a mangtulong a mangaywan kadagiti agkasapulan? Ibilang ti sangkamaysa a panaglilinnawag Mosiah 4:16–21 ken 18:8–10, kasta met dagiti mainaig a benneg ti Sapasap a Handbook (10.2.2 para iti Aaronic Priesthood 11.2.2 para kadagiti agtutubo a babbai). Ania ti nakaparegtaantayo nga aramiden kas bunga ti panangadal kadagitoy a pagadawan? Ibilang ti panagplano kadagiti wagas a makapagtrabahokayo a sangkamaysa a mangtulong kadagiti agkasapulan iti klasem wenno korum, ward wenno komunidadyo. Dagiti video iti “Dagiti Pangsuporta a Resources” ti mangted iti sumagmamano a kapanunotan. Para kadagiti gundaway iti serbisio iti lugaryo, kitaen iti JustServe.org.

Ti serbisio a kas ken ni Cristo mabalin a mangparabur iti biag dagiti adda iti aglawlawtayo.

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan iti no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Mateo 25:31–45; Santiago 1:27; Mosiah 2:17; Alma 34:27–28; Mormon 8:35–39; Doktrina ken Katulagan 104:14–18 (Ti pateg ti panangaywan kadagiti nakurapay ken agkasapulan)

• Jeffrey R. Holland, “Are We Not All Beggars?,” Liahona, Nob. 2014, 40–42

• “Michelle’s Story,” “Caring for the Poor and Needy,” “I Was a Stranger: Love One Another,” “Fast Offerings: Are We Not All Beggars” (videos), ChurchofJesusChrist.org

Panangisuro iti Wagas ti Mangisalakan

Dagiti nasantuan a kasuratan ken balikas dagiti propeta iti ud-udina nga aldaw ken dagiti apostol ti paggapuan dagiti kinapudno nga isurotayo. Iti tunggal gundaway, paregtaem dagiti sursuruam nga umasideg iti balikas ti Dios para iti pannarabay, mangsungbat kadagiti saludsod, ken mangsuporta.