Oktubre 8

Kasano a Matulongannak ti Ebanghelio ni Jesucristo a Mangpapigsa iti Pamiliak?

Taga Efeso

Agiinnuman

Idauluan ti maysa a miembro ti panguluen ti klase wenno korum; agarup 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna, kas nayon iti panagiinnuman maipapan iti naipangruna a pakaseknan ti klase wenno korum, mabalin a kayatmo nga ilawlawag dagiti impresion ken tema manipud iti sapasap a komperensia. Makatulong dagiti sumaganad a saludsod:

• Ania dagiti tema wenno mensahe a napateg kadatayo? Ania ti nangpapigsa iti pammatitayo ken ni Jesucristo?

• Ania ti nangpatibker kadagiti pammaneknektayo maipapan kadagiti sibibiag a propeta? Ania ti nariknatayo a makaparegta nga aramiden gapu iti no ania ti nasursuro wenno nariknatayo?

• Ania ti kasapulantayo nga aramiden kas maysa a klase wenno korum tapno malagip ken agtignay a mayannurot iti balakad a nangngegantayo iti sapasap a komperensia?

Iti ungto ti adalen, no maitutop, aramidem dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Mabalin nga adda dagiti tao iti klasem wenno korummo iti napigsa, naayat a pamilia a mangtaraon iti pammati ken kinaespirituan. Mabalin nga agmaymaysa dagiti dadduma iti panagkagumaanda nga agbiag iti ebanghelio, ken mabalin a maipasango dagiti dadduma iti panagsisinnupanget ken nakaro a liday iti pagtaengan. Ngem awan iti klasem wenno korummo ti addaan iti perpekto a pamilia a nawaya manipud kadagiti karit. Ken magun-od ti tunggal maysa ti bileg ni Jesucristo, a mabalin a makaagas ken makapapigsa kadagiti pamilia.

Kayat ti Mangisalakan ti mangbendision kadagiti pamilia. No dadduma, ti wagas nga aramidenna daytoy ket babaen ti ayat ken pagwadan ti maysa nga agtutubo a mangikarkarigatan a sumurot Kenkuana ken agbiag iti ebangheliona. Bayat ti panagsaganam a mangisuro kadagiti agtutubo maipapan iti bileg a sidadaan a magun-odda ken dagiti pamiliada babaen ken ni Jesucristo, utobem dagiti pagbatayan iti Taga Efeso a makatulong kadatayo a mangpapigsa kadagiti relasion ti pamilia. Mabalinmo met nga adalen ti “Ti Kaamaan: Maysa a Waragawag iti Lubong” (ChurchofJesusChrist.org).

Aggigiddan a Masursuruan

Kalpasan ti panangted kadagiti miembro ti klase wenno korum iti gundaway a mangibinglay no ania ti insuro ti Espiritu kadakuada iti daytoy a lawas bayat ti panagadalda iti Taga Efeso, mangsapul kadagiti wagas a mangyam-ammo iti topiko maipapan iti no kasano a makatulong ni Jesucristo kadatayo a mangpapigsa kadagiti pamiliatayo. Kas pagarigan, mabalinmo nga awisen dagiti agtutubo a mangsarak ken mangibinglay kadagiti binatog iti Taga Efeso nga aglaon kadagiti pagbatayan a mabalintayo nga usaren a mangpapigsa kadagiti relasion ti pamilia. Mabalin nga iraman ti sumagmamano a pagarigan iti Taga Efeso 2:19–22; 3:14–19; 4:1–3, 25–26, 29–32; 5:1–2; 6:1–4. Kasano a makatulong ti balakad kadagitoy a bersikulo a mangbendision iti maysa a pamilia? Kasano a nagbalin a maysa a bendision ti Mangisalakan ken ti ebangheliona kadagiti pagtaengantayo? Adtoy ti sumagmamano a mainayon a kapanunotan nga aktibidad a mainaig iti daytoy a topiko.

• No kayatmo nga ilawlawag ti bilin a “dayawem ni amam ken ni inam” (Taga Efeso 6:2), mabalinmo a rugian babaen ti panangsaludsod kadagiti miembro ti klase wenno korum no ania ti kaipapan ti balikas a dayawen kadakuada. Nalabit a mabalin nga ibinglay ti maysa a tao ti depinision manipud iti diksionario wenno iti Pangiwanwan iti Nasantuan a Kasuratan (scriptures.ChurchofJesusChrist.org). Awisem dagiti ubbing a mangisarita maipangggep iti no kasano a mayaplikarda daytoy a bilin iti bukodda a biag. Mabalin pay a makaparegta a mangsukisok iti no kasano a dinayaw ni Jesucristo ti Amana iti Langit ken ti inana, ni Maria (kitaen, kas pagarigan, iti, Lucas 2:41–52; Patarus ni Joseph Smith, Juan 2:4 [iti Juan 2:4, footnote a]; Juan 8:29; 19:25–27). Ania ti masursurotayo manipud iti pagwadan ni Joseph a mabalin a mangpapigsa kadagiti relasiontayo kadagiti nagannak kadatayo?

• Mabalin a makatulong a pagsasaritaan maipapan iti no ania dagiti material a kasapulan tapno mangbangon iti natibker a balay. Ania dagiti sumagmamano kadagiti banag a kasapulan a pangbangon iti napigsa a pamilia? Kas paset daytoy a panaglilinnawag, mabalinmo nga ibinglay daytoy a palawag ni Elder L. Whitney Clayton: “No ania ti kapatgan ket ti akin-uneg a disenio dagiti kararua dagiti agindeg, saan nga iti istruktura mismo” (“The Finest Homes,” Liahona, Mayo 2020, 107–9). Mabalinmo pay nga ilawlawag ti uppat a singasing nga inted ni Elder Clayton iti mensahena para iti no kasano ti mangbangon kadagiti “kapipintasan a pagtaengan.”

• “Ti Kaamaan: Maysa a Waragawag iti Lubong” iramanna daytoy a kari: “Magun-od ti ragsak ti biag ti pamilia no nabangon daytoy kadagiti pannursuro ni Apo Jesucristo.” Kasano a parnuayen dagiti pannursuro ti Mangisalakan ti pundasion para iti naragsak a pamilia? Ti waragawag ti kaamaan ken dagiti nasantuan a kasuratan iti babaen ti “Dagiti Pangsuporta a Resources” ket mangted kadagiti pagarigan. Kasano a makapagtitinnulong dagiti miembro ti pamilia nga agbiag kadagitoy a pannursuro?

• Nalabit a mabalin a buyaen dagiti miembro ti klase ti video a “Through Small Things,” a pagsasaritaan dagiti tallo nga agkakabsat maipapan iti panangawat iti awis ti bishopda a mangpanunot kadagiti wagas a mamagbalin iti pagtaenganda a maysa a nasansantuan a lugar. Kasano a naparaburan ti pamilia iti video gapu kadagiti tignay dagitoy nga agtutubo? Kasano a maaramidtayo ti pagtaengantayo a maysa a nasantuan a lugar? Ibilang ti panangawis kadagiti agtutubo a mangawat iti isu met la nga awis nga inted ti bishop? Tapno matulongan ida a mangibilang no ania ti mabalin nga aramidenda, mabalinyo a paglilinnawagan ti saludsod a nadamag iti video: “Ania ti natallugod nga aramidenyo tapno maaddaan iti Espiritu iti pagtaenganyo?”

Dagiti pannursuro ni Jesucristo ti pundasion para iti kinaragsak iti biag ti pamilia.

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan iti no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Mateo 5:21–24, 38–42; 6:14; 7:1–5; 22:36–39; 3 Nephi 18:21; Moroni 7:33; Doktrina ken Katulagan 18:10–13

• Henry B. Eyring, “A Home Where the Spirit of the Lord Dwells,” Liahona, Mayo 2019, 22–25

• “Love at Home,” “Home Can Be a Heaven on Earth,” Hymns, nos. 294, 298

Panangisuro iti Wagas ti Mangisalakan

No marikna dagiti agtutubo nga adda panagtalekmo kadakuada, dumur-asto ti panagtalekda iti nadiosan a potensialda, ket masdaawkanto iti kabaelanda nga ipatungpal. Tulongam ida a mangkita iti pannirigan ti no ania ti ammo ti Nailangitan nga Ama a mabalin a pagbalinanda.