Oktubre 22

Kasano a Makapagtalinaedak a Napigsa iti Panagkumitko ken ni Jesucristo?

1 ken 2 Taga Tesalonica

Agiinnuman

Idauluan ti maysa a miembro ti panguluen ti klase wenno korum; agarup 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Handbook, 10.2, 11.2). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Ania dagiti nabiit pay a padas a nangpapigsa kadagiti pammaneknektayo?

• Aywanan dagiti agkasapulan. Asino ti agkasapulan iti tulong ken karkararagtayo? Ania ti mariknatayo a nakaawisan ti riknatayo nga aramiden a makatulong kadakuada?

• Awisen ti amin nga umawat iti ebanghelio. Kasano a makapagbalintayo a silaw kadagiti miembro ti pamilia wenno gagayyem a saantayo a kapada iti pammati?

• Pagkaykaysaen dagiti pamilia para iti kinaagnanayon. Kasano a maipakitatayo ti ad-adda pay nga ayat ken suporta para kadagiti pamiliatayo ken makaaramid iti positibo a pakaidumaan kadagiti pagtaengantayo?

Iti ungto ti adalen, no maitutop, aramidem dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Kaaduan kadatayo ket adda am-ammona a maysa a tao nga iti maysa a gundaway kasla nagkumit a naan-anay ken ni Jesucristo ngem manipud idin natnag iti pammatida. Gagangay a masdaawka, “Mapasamak ngata dayta kaniak?” Dinayaw ni Pablo dagiti Santo a taga Tesalonica gapu iti kinapudnoda ngem nariknana a naparegta a mangballaag kadakuada maipapan kadagiti palso a pannursuro ken dadduma pay nga impluensia a mabalin a mangpakapuy iti pammatida. Kasano man ti kapigsa ti panagkumittayo iti Mangisalakan itan, kanayon nga adu ti maaramidtayo a “mangpaan-anay dayta a panagkurang iti pammati[tayo]” (1 Taga Tesalonica 3:10).

No ikararagam dagiti tao iti klasem wenno korummo, dumngegka kadagiti pannignay nga ibaon ti Apo kenka. Ania ti mariknam a mangtulong kadakuada nga agtalinaed a napudno iti Mangisalakan ania man ti oposision a pakaipasanguandanto? Ania ti nangtulong kenka? Bayat ti panagsaganam a mangisuro, mabalinmo nga irebyu ti mensahe ni Elder Dale G. Renlund nga “Unwavering Commitment to Jesus Christ” (Liahona, Nob. 2019, 22–25) kas pangnayon iti 1 ken 2 Taga Tesalonica.

Aggigiddan a Masursuruan

Tapno matulongan dagiti agtutubo a mangrebyu no ania ti nabasada iti 1 ken 2 Taga Tesalonica ken mangyam-ammo iti topiko ti panagtalinaed a napigsa iti panagkumitttayo iti Mangisalakan, mabalinyo a basaen nga aggigiddan ti 2 Taga Tesalonica 2:1–3. Ilawlawag no ania ti mabalin a kaipapanan ti termino a “pannakatnag.” Kangrunaanna, ania ti kayat a sawen ti matnag ti maysa a tao manipud ken ni Jesucristo? Mabalinmo a pagdasigen daytoy a termino iti dadduma pay a ragup ti balikas nga inusar ni Pablo, kas iti “agtalinaed a natibker iti Apo” (1 Taga Tesalonica 3:8) ken “saan a mabannog iti panagaramid iti naimbag” (2 Taga Tesalonica 3:13). Mabalinmo nga irebyu ti 1 Taga Tesalonica 5:15–23. Kasano a ti panangsurot iti balakad ni Pablo kadagitoy a bersikulo ket makatulong kadatayo manipud iti pannakatnag manipud iti pammatitayo ken ni Jesucristo—uray no maipasangotayo iti oposision? Agusar kadagiti aktibidad kas iti sumaganad tapno mangtulong kadagiti miembro ti klase wenno korum nga agtalinaed a napigsa iti panagkumitda iti Mangisalakan.

• Mabalin a makaparegta a masursuruan manipud kadagiti pagwadan dagiti dadduma a nagbalin a di maisin iti panagkumitda ken ni Cristo. Kas pagarigan, mabalinyo nga aggigiddan nga adalen ti pagwadan dagiti Anti-Nephi-Lehi, a nagbalin a “naatap ken nasukir ken nakaam-amak a tattao” ngem “pulos a dida nagikay” kalpasan a “napasurot[da] iti Apo” (Alma 17:14; 23:6–8). Ania ti isingasing ti Alma 24: 8–18 maipapan ti no apay a nagtalinaedda a napudno? Ania dagiti kangrunaan a pili nga inaramidda? Kasano a tinulongan ida ti Mangisalakan? Mabalin a masarakan dagiti nayon a pagarigan iti mensahe ni Elder Dale G. Renlund nga “Unwavering Commitment to Jesus Christ.” Nalabit a mabalin a basaen iti sumagmamano nga agtutubo ti sumagmamano kadagitoy a pagwadan ken ibinglayda no ania ti masursuroda maipapan iti panagtalinaed a pudno ken ni Cristo. Kasano a nagtalinaedtayo a managkumit iti Apo iti baet dagiti pagkurangantayo?

• Kadagiti panagkagumaantayo a mangpapigsa iti pammatitayo, makatulong a mannakaammotayo kadagiti puersa a mangpakapuy iti daytoy. Iladawan ti parmata ni Lehi iti kayo ti biag ti sumagmamano kadagitoy a puersa. Nalabit a mabalinmo nga ipakita ti maysa a ladawan ti parmata (kitaen iti Libro ti Arte ti Ebanghelio [2009], no. 69) ket aggigiddan nga irebyu dagiti detalye, a masarakan iti 1 Nephi 8:10–34. Iti parmata, ania ti nanglapped kadagiti tao iti panangnanamda iti bunga ti kayo? Ania ti nangtulong kadagiti tao a dimmanon iti kayo ken nagtalinaed sadiay? Ania ti isimbolo dagitoy a banag iti biagtayo?

• Iti mensahena a “Power to Overcome the Adversary” (Liahona, Nob. 2019, 110–12), inlista ni Elder Peter M. Johnson ti tallo a wagas a pananggandat ti Satanas a mangpakapuy kadatayo. Mabalinmo a dutokan ti tunggal agtutubo a mangbasa maipapan iti maysa kadagitoy ken mangibinglay iti klase wenno korum kadagiti pagarigan ti no kasano nga usaren ni Satanas daytoy a ramit a maibusor kadagiti agtutubo ita. Kalpasanna mabalin a saggaysada a mangbasa iti maysa kadagiti uppat a singasing ni Elder Johnson para iti panangparmek kadagiti taktika ti kabusor ket ibinglayda no ania ti nasursuroda.

Saan nga Agbuteng, ni Michael Malm

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan iti no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• 1 Nephi 2:9–10; Alma 17:1–3; Helaman 5:12

• Jeffrey R. Holland, “Lord, I Believe,” Liahona, Mayo 2013, 93–95

• Neil L. Andersen, “Never Leave Him,” Liahona, Nob. 2010, 39–42

• Becky Craven, “Careful versus Casual,” Liahona, Mayo 2019, 9–11

Panangisuro iti Wagas ti Mangisalakan

Iti adu a gundaway, mabalin a maitutop nga awisen dagiti agad-adal nga agtitinnulong a mangsapul kadagiti sungbat dagiti saludsodda. No tinignay ti Espiritu, mabalinmo nga ikeddeng nga aramiden daytoy uray no mariknam nga ammom ti sungbat.