Nobiembre 12

Kasano nga Ad-adda a Makaasidegak ken ni Jesucristo babaen dagiti Sagrado nga Ordinansa ken Katulagan?

Hebreo 7–13

Agiinnuman

Idauluan ti maysa a miembro ti panguluen ti klase wenno korum; agarup 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Handbook, 10.2, 11.2). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Kasano nga ad-adda nga immasidegtayo iti Mangisalakan? Kasano a padpadasentayo ti agbalin nga ad-adda a kas Kenkuana?

• Aywanan dagiti agkasapulan. Asino ti adda iti panunottayo itay laeng? Kasano a matulongantayo dagitoy a tao?

• Awisen ti amin nga umawat iti ebanghelio. Kasano a masungbatantayo dagiti saludsod dagiti gagayyemtayo maipapan iti Simbaan iti wagas a mangpapigsa iti pammatida iti Mangisalakan?

• Pagkaykaysaen dagiti pamilia para iti kinaagnanayon. Ania dagiti sumagmamano a wagas a nasaysayaat a maikonektatayo kadagiti miembro a kabagyan ti pamilia, a kas kadagiti lelang ken lelong ken kasinsin?

Iti ungto ti adalen, no maitutop, aramidem dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Iti adu a siglo, dagiti annak ti Israel, no dadduma maawaganda iti Hebreo, sipapasnek a makiramramanda kadagiti ordinansa a mainaig iti tabernakulo ken ti linteg ni Moises. Ngem saan a naamiris ti adu kadakuada a dagitoy a banag ket “pagtuladan dagiti banag iti langlangit” —“anniwan dagiti nasayaat a banag nga umay” (Hebreo 9:23; 10:1). Naisangrat amin dagiti ordinansa a mangisuro kadakuada maipapan ken ni Jesucristo. Daytoy ti inlawlawag ni Pablo iti Suratna kadagiti Hebreo. Napateg met ti mensahena kadatayo ita gapu ta addaantayo met kadagiti sagrado nga ordinansa nga addaan iti isu met la a panggep. Ita napateg ti panagdamag iti bagbagitayo kadagitoy a saludsod: Tultulongandatayo kadi dagitoy nga ordinansa a manglaglagip ken ni Jesucristo? Adda kadi pay maaramidtayo a mangpadas iti bileg ni Jesucristo babaen dagiti ordinansa ti ebanghelio? Wenno, kas kadagiti nagkauna a Hebreo, awanantayo iti naun-uneg a pategda?

Utobem dagitoy a saludsod bayat ti panagbasam iti Hebreo 7–13 ken bayat ti panagsaganam a mangisuro maipapan iti no kasano a mangyas-asideg kadatayo ken ni Jesucristo dagiti ordinansa ken katulagan. Mabalin pay nga adalem ti sumagmamano a mensahe iti sapasap a komperensia a nadakamat iti daytoy a balabala.

Aggigiddan a Masursuruan

Tapno matulongan dagiti sursuruam a mangkita no kasano nga ad-adda a makaasidegda ken ni Jesucristo babaen dagiti ordinansa ken katulagan ti ebanghelio, mabalinmo nga awisen ida a mangilista iti pisarra iti sumagmamano nga ordinansa iti ebanghelio ken dagiti mainaig a katulagan,” (kitaen iti Gospel Topics, “Ordinances,” “Covenant,” topics.ChurchofJesusChrist.org). Ania ti isuro kadatayo dagitoy nga ordinansa ken katulagan maipapan ken ni Cristo ken iti Pannubbotna? Ti palawag ni Elder David A. Bednar iti “Dagiti Nainayon a Resources” ket mangted iti depinision dagiti ordinansa ken dadduma pay a napapateg a pannakaammo ken pannakaawat. Dagiti aktibidad a kas iti sumaganad ket makatulong pay.

• Mabalinmo pay nga awisen dagiti agtutubo a mangbasa iti Doktrina ken Katulagan 84:19–22 ket paglilinnawagan dagiti saludsod kas kadagitoy: Ania ti kaipapanan ti “bileg ti kinadiosan”? Kasano a natulongannatayo dagiti ordinansa ken katulagan a mangpadas iti dayta a bileg? Ania ti pagdumaan nga aramiden dagiti ordinansa ken katulagan nga aramidentayo iti biagtayo? Kasano a tulongandatayo nga agtalinaed a konektado iti Mangisalakan? Tapno matulongan a masungbatan dagitoy a saludsod, mabalin a basaen dagiti agtutubo ti umuna nga uppat a parapo ti mensahe ni Elder Kent F. Richards a “The Power of Godliness” (Liahona, Mayo 2016, 118) wenno mensahe ni Elder Bednar a “Let This House Be Built unto My Name” (Liahona, Mayo 2020, 84–87), nangnangruna iti benneg “From the Inside Out.”

• Ibilang ti panangidawat kadagiti sursuruam no kasano nga ilawlawagda ti ordinansa ti sakramento iti maysa a tao a dina ammo ti ania man a banag maipapan iti daytoy. Ti benneg nga “Experience and Testimony” iti Elder Taniela B. Wakolo “Saving Ordinances Will Bring Us Marvelous Light” (Liahona, Mayo 2018, 39–41) ti mangted iti maysa a pagarigan. Mabalin pay dagiti agtutubo ti mangsarak kadagiti napapateg a pannursuro iti video nga “Always Remember Him” (ChurchofJesusChrist.org). Kasano a yasidegnatayo nga ad-adda ti sakramento ken ni Jesucristo? Ania dagiti gundaway nga adda kadatayo a mangisuro maipapan iti daytoy?

• Ti panangrebyu iti lima a singasing iti mensahe iti Elder Peter F. Meurs iti “The Sacrament Can Help Us Become Holy” (Liahona, Nob. 2016, 85–87) makatulong kadagiti agtutubo a makaawat no kasano a nasaysayaat nga agsagana para iti sakramento. Wenno, no addaankayo kadagiti agtutubo nga agsagsagana nga umawat iti endowmentda, aggigiddan a mangrebyu iti benneg a napauluan iti “About the Temple Endowment” iti temples.ChurchofJesusChrist.org. Ilawlawag no kasano a makatulong dagitoy sagrado nga ordinansa ken dagiti mainaig a katulaganda nga umas-asideg iti Mangisalakan.

• Ibilang ti panangisurat kadagiti balikas a Sakramento, Panagbuniag, ken Templo iti pisarra. Iti babaen ti tunggal maysa, awisem dagiti agtutubo a mangilista kadagiti katulagan nga aramidentayo. Dagiti reperensia a masarakan iti “Dagiti Pangsuporta a Resources” ti makatulong. Paglilinnawagan a sangkamaysa no kasano a matulongannatayo dagitoy a katulagan a umas-asideg ken ni Jesucristo?

• Mabalinmo a bingayen ti klasem wenno korummo kadagiti grupo ket dutokam ti tunggal grupo a mangrebyu iti maysa a benneg ti mensahe ni Elder Ronald A. Rasband “Standing by Our Promises and Covenants” (Liahona, Nob. 2019, 53–56) wenno mensahe ni Elder D. Todd Christofferson “Why the Covenant Path” (Liahona, Mayo 2021, 116–19). Allukoyem ida a mangibinglay no ania ti masursuroda maipapan iti no kasano a ti panagtungpal kadagiti katulaganda ket mangpapigsa iti relasionda ken ni Jesucristo.

Mangisangbay dagiti sagrado nga ordinansa iti ebanghelio iti “bileg ti kinadiosan” iti biagtayo (kitaen iti Doktrina ken Katulagan 84:19–22).

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan iti no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Mosiah 18:8–10 (Katulagan iti panagbuniag)

• Moroni 4–5 (Katulagan iti sakramento)

• Insuro ni Elder David A. Bednar: “Dagiti nasantuan nga ordinansa ti kangrunaan unay iti ebanghelio ti Mangisalakan ken iti proseso nga umasideg Kenkuana ken panagkalikagum a manggun-od iti naespirituan a pannakayanak manen. Sagrado nga aramid dagiti ordinansa nga addaan iti naespirituan a panggep, agnanayon a kinapateg, ken adda pakainaiganna kadagiti paglintegan ken annuroten ti Dios. …

  “Dagiti ordinansa ti pannakaisalakan ken pannakaitan-ok a naannong iti naisubli a Simbaan ket ad-adda pay ngem dagiti ritual wenno simboliko nga aramid. Ketdi, buklen dagitoy dagiti awtorisado a wagas a pakaibukbokan dagiti bendision ken bileg ti langit iti tunggal biagtayo. …

  “Napateg dagiti ordinansa a naawat ken nadayaw nga addaan iti integridad tapno magun-od ti bileg ti kinadios ken amin a bendision nga adda a sidadaan babaen ti Pannubbot ti Mangisalakan” (“Always Retain a Remission of Your Sins,” Liahona, Mayo 2016, 59–60).

Panangisuro iti Wagas ti Mangisalakan

No inawismo dagiti sursuruam nga agtignay a mayannurot iti pudno a doktrina, matulongam ida a dumakkel ti padasda iti panagadal agingga iti pagtaenganda ken iti inaldaw a panagbiagda.