Nobiembre 26

Kasano a Matulongak dagiti Kapuonak nga Umas-asideg ken ni Jesucristo?

1 ken 2 Pedro

Agiinnuman

Idauluan ti maysa a miembro ti panguluen ti klase wenno korum; agarup 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Handbook, 10.2, 11.2). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Ania dagiti topiko nga inlawlawag ti bishopric kadagiti mitingtayo iti ward youth council? Ania ti mabalintayo nga aramiden kas maysa a klase wenno korum maibatay kadagita a panaglilinnawag?

• Aywanan dagiti agkasapulan. Kasano a makatulongtayo kadagiti tao iti wagas a kas ken ni Cristo no makitatayo ti panagkasapulan ket ditayo ammo no ania ti isaotayo?

• Awisen ti amin nga umawat iti ebanghelio. Ania ti nasarakantayo iti ebanghelio ni Jesucristo a mangisangbay kadatayo iti rag-o? Kasano a maibinglaytayo ti ayatna kadagiti dadduma?

• Pagkaykaysaen dagiti pamilia para iti kinaagnanayon. Ania ti ar-aramidentayo a mangsapul iti nagnagan dagiti kapuonantayo nga agkasapulan kadagiti ordinansa ti templo? Ania ti maaramidtayo a makatulong kadagiti dadduma a mangsapul iti nagnagan dagiti kapuonanda?

Iti ungto ti adalen, no maitutop, aramidem dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Ania ti mapasamak kadagiti binilion a tattao a pumusay nga awanan iti pudno a gundaway a dumngeg iti ebanghelio ni Jesucristo wenno umawat kadagiti pangisalakan nga ordinansa? Masarakantayo dagiti pamugtuan ti sungbat iti 1 Pedro 3:18–20; 4:6, a nangisaritaan ni Pedro iti ebanghelio a maikaskasaba kadagiti natay. Kalpasanna ipalgak ti Doktrina ken Katulagan 138 ti naan-anay a kinapudno—makasangbay a naan-anay dagiti kapuonantayo ken ni Cristo no addaanda iti pammati Kenkuana ken umawat iti ebangheliona ken maaramidtayo a sidadaan a manggun-od kadagiti ordinansa para kadakuada iti templo. Kasapulan daytoy a bendision a datayo—dagiti an-annaboda nga addaan iti ebanghelio—agsukisoktayo iti nagnaganda, mapantayo iti templo, ken umawat kadagiti pangisalakan nga ordinansa nga agpaay kadakuada.

Ania dagiti addan a padasmo a nangtultulong kadagiti kapuonam nga umas-asideg ken ni Cristo? Kasano a matulongam dagiti sursuruam nga agbalin a nagaggagar maipapan iti aramid iti family history ken templo ken ad-adda a managtalek iti kabaelanda nga aramiden daytoy? Bayat ti panagsaganam, mabalinmo a basaen ti mensahe ni Elder Dale G. Renlund “Family History and Temple Work: Sealing and Healing” (Liahona, Mayo 2018, 46–49).

Aggigiddan a Masursuruan

Kasano a sumungbat dagiti miembro ti klasem wenno korummo iti maysa a tao a masdaaw no kasano a maisalakan dagiti nasayaat a tao a saan a naaddaan iti gundaway nga umawat iti ebanghelio? Ania ti masarakanda iti 1 Pedro 3:18–20; 4:6 a mangtulong a masungbatan daytoy a saludsod? Iti video “Will I Do My Part?,” mangted ni Elder Enrique R. Falabella kadagiti nayon a nalawag a pannakaammo ken pannakaawat. Mabalinyo nga ituloy ti panaglilinnawagyo iti maysa wenno ad-adu pay kadagiti sumaganad nga aktibidad.

• Ti doktrina ti panangsubbot kadagiti natay ket naisangsangayan iti Ti Simbaan ni Jesucristo dagiti Santo iti Ud-udina nga Aldaw. Awisem dagiti miembro ti klase wenno korum a mangadal iti Doktrina ken Katulagan 138:25–39 a saggaysa wenno kas grupo (kitaen iti “Dagiti Pangsuporta a Resources” para kadagiti nainayon a resources). Ania ti isingasing dagitoy a bersikulo maipapan iti wagas a marikna ti Nailangitan nga Ama maipapan iti amin nga annakna? Kasano a ti panagbuniag para kadagiti natay ket matulonganna dagiti kapuonan nga umas-asideg ken ni Cristo? Kasano a matulongannatayo daytoy nga umas-asideg ken ni Cristo ken mangpapigsa iti pammatitayo Kenkuana?

• Ania ti mabalin a mangparegta kadagiti agtutubo nga ad-adda a makiraman iti aramid iti templo ken family history? Nalabit a mabalinda a buyaen ti maysa wenno agpada kadagiti video a masarakan iti “Dagiti Pangsuporta a Resources” ken mangsapul kadagiti wagas a pakabendisionan kadakuada ti aramid iti templo ken family history work. Mabalinda pay a sapulen dagiti naikari a bendision iti listaan nga adda bulletna iti mensahe ni Elder Dale G. Renlund a “Family History and Temple Work: Sealing and Healing.” Kalpasanna awisem ida a mangibinglay no ania kadagiti bendision ti napateg kadakuada ken apay. Mabalinmo pay nga ilawlawag ti sumagmamano kadagiti tubeng a mabalin a maglapped kadatayo iti pannakiraman iti aramid iti templo ken family history. Kasano a makatulong kadatayo ti Mangisalakan a mangparmek kadagitoy a tubeng?

• No adda access dagiti miembro ti klasem wenno korummo kadagiti digital device, mabalin a maaddaanka iti gundaway a mangipakita kadakuada no kasano nga inaramid ti Apo a nalaklaka itan ti mangsapul kadagiti kapuonan nga agkasapulan kadagiti pangisalakan nga ordinansa (kitaen iti “Dagiti Pangsuporta a Resources”). Mabalinmo pay nga awisen ti consultant ti temple ken family history iti ward a mangtulong kadagiti agtutubo a makaawat kadagitoy a resources. Mabalinmo pay nga allukoyen dagiti agtutubo nga agaramid kadagiti plano a mangsukisok kadagitoy a resources iti pagtaengan ket agsubli nga agreport iti masakbayan a miting.

No annongentayo dagiti sagrado nga ordinansa iti templo, tumulongtayo a mangaramid kadagiti bendision iti templo a sidadaan a magun-od dagiti pimmusayen.

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan iti no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Malakias 4:5–6; Mateo 16:18–19; Juan 5:25; 1 Taga Corinto 15:29; Doktrina ken Katulagan 137:7–9 (Ti doktrina ti pannakasubbot para kadagiti natay)

• “The Promised Blessings of Family History 1” ken ti “The Promised Blessings of Family History 2” (videos), ChurchofJesusChrist.org

• Family Tree app (agkasapulan nga ag-log-in dagiti agtutubo iti panangusar iti kukuada a Church account)

• RootsTech (Mabalin nga agsukisok dagiti agtutubo kadagiti sesion manipud kadagiti komperensia a virtual.)

• FamilySearch.org ( Mabalinyo a bisitaen ti FamilySearch.org/discovery ket aggigiddan a sukisokenyo dagitoy nga aktibidad.)

Panangisuro iti Wagas ti Mangisalakan

No awisem dagiti agtutubo a mangisuro, maaddaanka iti gundaway a mangtulong kadakuada nga agsagana a siuumno. Ilawlawagmo no ania ti aramidem nga agsagana a mangisuro. Iti kastoy a wagas matulongamto dagiti agtutubo saan laeng a para iti maysa a lesson no di ketdi para iti tungpal biag a panangisuro iti ebanghelio iti wagas ti Mangisalakan.