Disiembre 10

Kasano nga Aramiden ni Jesucristo ti Pannakaipatungpal ti Plano ti Nailangitan nga Ama?

Apocalipsis 1–5

Agiinnuman

Idauluan ti maysa a miembro ti panguluen ti klase wenno korum; agarup 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Hanbook, 10.2, 11.2). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Kasano a naimatangantayon ti ima ti Apo iti biagtayo?

• Aywanan dagiti agkasapulan. Kasano a makapagtitinnulongtayo kadagiti banag a mapaspasarantayo?

• Awisen ti amin nga umawat iti ebanghelio. Kasano a nasaysayaat a mausartayo ti teknolohia kas maysa a ramit a mangibinglay iti ebanghelio?

• Pagkaykaysaen dagiti pamilia para iti kinaagnanayon. Ania dagiti ar-aramidentayo a mangtulong kadagiti pamiliatayo nga umasideg ken ni Jesucristo?

Iti ungto ti adalen, no maitutop, aramidem dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Iti maysa a parmata, nakita ni Juan a Mammaltiing ti mays a libro nga “awan tao iti langit, wenno iti daga, wenno iti baba ti daga” a maikari a manglukat, ket daytoy ti namagsangit kenkuana (kitaen iti Apocalipssis 5:3–4). Ibagi ti libro “dagiti aramid ti Dios,’ agraman ti planona para iti imortalidad ken agnanayon a biag (kitaen iti Doktrina ken Katulagan 77:6; Moises 1:39). Ngem kalpasan iti parmata ni Juan, natakuatan a ti maysa a Kordero ti “maikari a mangala iti libro, ken manglukat kadagiti selio” (Apocalipsis 5:9). Daytoy nadayagan a damag ti nangigapu kadagiti “maminsangapulo a ribu, ken , rinibribu dagiti rinibribu” nga anghel tapno agkanta ken mangipukkaw iti rag-oda (Apocalipsis 5:11). Ni Jesucristo, ti Kordero ti Dios, “sinubbotnatayo iti Dios babaen iti dara[na]” (Apocalipsis 5:9) inaramidna a maipatungpal dagiti bendison ti plano ti Nailangitan nga Amatayo.

Utobem no ania ti inaramid ni Jesucristo para kenka. Nariknam kadin ti kas kadagiti adda iti parmata ni Juan a “nagtamed ken nagdaydayaw kenkuana”? Apocalipsis 5:14 Ibilangmo no kasano a matulongam dagiti miembro ti klasem wenno korummo tapno nasaysayaat a maawatanda ti kangrunaan nga akem ni Jesucristo iti plano ti Nailangitan nga Ama. Kas nayon iti Apocalipsis 1–5, mabalinmo pay a basaen ti 2 Nephi 9; “Ti Sibibiag a Cristo: Ti Pammaneknek dagiti Apostol” (ChurchofJesusChrist.org); ken ti mensahe ni Elder Ulisses Soares “Jesus Christ: The Caregiver of Our Soul” (Liahona, Mayo 2021, 82–84).

Aggigiddan a Masursuruan

Mabalin a magustuan dagiti miembro ti klasem wenno korummo nga aginkukuna nga agbalin a producer ti pelikula a naidawat nga agaramid iti pelikula maipapan iti parmata ni Juan iti Apocalipsis 5. Ikkam ida iti sumagmamano a minuto a mangrebyu iti kapitulo ken mangikeddeng no ania kadagiti senario a kayatda nga ipelikula. Ania ti mariknada nga agbalin a dagiti kabilegan a kanito? Kasano a makatulong daytoy a pelikula a mangbukel iti pammati iti Mangisalakan? Tapno agtultuloy ti panangtulongmo iti klasem wenno korummo a masursuruan maipapan iti akem ni Jesucristo iti plano ti Nailangitan nga Ama iti pannakaisalakan, adtoy ti sumagmamano a singasing:

• Mabalinmo nga isurat dagiti sumaganad a paulo iti pisarra: Biag Sakbay Daytoy a Biag, Biag iti Daga, ken Biag kalpasan ti Ipapatay. Awisem dagiti agtutubo a mangrebyu kadagiti binatog iti nasantuan a kasuratan iti babaen ti “Dagiti Pangsuporta a Resources” tapno masursuruan no kasano a ti mision ti Mangisalakan kabayatan ti biagna sakbay daytoy a biag, kabayatan ti biagna iti daga, ken kalpasan ti Panagungarna ket mangipatungpal iti plano ti Ama. Mabalinda a gupgopen no ania ti masursuroda iti babaen dagiti paulo iti pisarra. Ikkam dagiti miembro ti klasem wenno korummo iti gundaway a mangibinglay kadagiti riknada maipapan iti no ania ti inaramid ti Mangisalakan para kadakuada.

• Tapno matulongam dagiti agtutubo a sursuruam a nasaysayaat a maawatanda no ania ti inaramid ni Jesucristo tapno maipatungpal ti plano ti Nailangitan nga Ama, mangidrowing iti maysa a dana iti pisarra a mangibagbagi iti panagdaliasattayo nga agsubli iti Amatayo iti Langit. Mangidrowing kadagiti tubeng a naikkan iti label a pisikal nga ipapatay ken naespirituan nga ipapatay. (No kasapulan, mabalin nga irebyu dagiti agtutubo dagiti depinision iti babaen ti “Ipapatay, Pisikal” ken “Ipapatay, Naespirituan” iti Pangiwanwan iti Nasantuan a Kasuratan [scriptures.ChurchofJesusChrist.org]). Kasano nga inaramid a posible ti Mangisalakan a maparmektayo dagitoy a tubeng? (kitaen iti 2 Nephi 9:7–10). Mabalin nga irebyu dagiti agtutubo ti mensahe ni Elder Ulisses Soares a “Jesus Christ: The Caregiver of Our Soul” ket isurat dagiti binatog manipud iti mensahe a kabatog ti dana a mangipakita no kasano a tulongannatayo ni Jesus nga agsubli iti Dios.

• No agsaludsod kadatayo dagiti dadduma a tao maipapan kadagiti pammatitayo ken dagiti pili nga aramidentayo, mabalintayo a maaddaan iti gundaway a mangibinglay no apay a napateg kadatayo ni Jesucristo. Maysa a wagas tapno maisaganatayo dagiti agtutubo kadagiti kasta a gundaway ket awisen ida a mangrebyu iti mensahe ni Elder Dieter F. Uchtdorf “Behold the Man!” (Liahona, Mayo 2018, 107–10) a mangsapsapul kadagiti kinapudno nga ibinglay maipapan ken ni Jesucristo. Mabalinmo nga ilista ti sumagmamano kadagitoy a kinapudno iti pisarra. Kalpasanna mabalinmo nga ikkan dagiti agtutubo iti gundaway a mangsanay iti panangilawlawag iti tunggal maysa no apay a kasapulantayo ni Jesucristo ken no kasano a nabendisionan dagiti biagda gapu ta am-ammoda ti Mangisalakan.

Ti Pannakailansa iti Krus ni Cristo, ni Louise Parker

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan iti no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Juan 1:1–3, 10; Ether 3:14; Moises 4:1–2 (Ti mision ti Mangisalakan iti biag sakbay daytoy a biag)

• Mosiah 3:5–11; Alma 7:11–13; Doktrina ken Katulagan 19:16–19 (Ti mision ti Mangisalakan kabayatan ti biagna iti daga)

• Juan 14:2–3; 2 Nephi 9:15–17; Doktrina ken Katulagan 45:3–5; 138:28–31 (Ti mision ti Mangisalakan kalpasan ti ipapatay ken Panagungarna)

Panangisuro iti Wagas ti Mangisalakan

Tunggal tao iti klasem ket nabaknang a paggapuan ti pammaneknek, pannakaawat, ken padpadas iti panagbiag iti ebanghelio. Awisem ida nga agbibinninglay ken agpipinnaregta iti tunggal maysa.