Naispal, ni Jenedy Paige

Disiembre 24

Kasano nga Ipakita ni Jesucristo ti Ayatna para Kaniak?

Paskua

Agiinnuman

Idauluan ti maysa a miembro ti panguluen ti klase wenno korum; agarup 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Handbook, 10.2, 11.2). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Kasano nga agsapsapultayo iti rag-o iti panangsurot ken ni Jesucristo?

• Aywanan dagiti agkasapulan. Asino iti ward wenno komunidadtayo ti agkasapulan iti tulongtayo? Kasano a makatulongtayo kadakuada?

• Awisen ti amin nga umawat iti ebanghelio. Kasano a matulongantayo ti tunggal maysa nga agsagana para iti serbisio ti misionario?

• Pagkaykaysaen dagiti pamilia para iti kinaagnanayon. Kasano a makatulongtayo kadagiti panagkagumaan ti wardtayo nga agtrabaho iti aramid iti family history ken templo?

Iti ungto ti adalen, no maitutop, aramidem dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Sakbay ti pannakayanakna, naam-ammo ni Jesucristo kas naindaklan a Jehova. Isu ti “Patpatgen ken Pili ti Ama manipud idi punganay” (Moises 4:2), napnuan iti dayag, parabur, ken kinapudno (kitaen iti Juan 17:5; Doktrina ken Katulagan 93:11). Ket idi naipasngayen Isuna, ni Maria “impaiddana iti maysa a kulluong; gapu ta awan ti siled para kadakuada iti pagdagusan” (Lucas 2:7). Apay a nagtallugod ni Jesucristo a mangawat iti akemna kas Mangisalakan nupay kaipapanan daytoy ti yaayna iti daga iti kanunumuan a kasasaad? Simple ti sungbat, a gapu ta ay-ayatennatayo. Idi nakita ni Nephi ti pannakayanak ti Mangisalakan iti parmata, pinaneknekanna “ti ayat ti Dios, a nangyagsep iti bagina kadagiti puso dagiti annak ti tao; gapuna, isu ti kangrunaan a matarigagayan iti amin a banag” (1 Nephi 11:22).

Ti Paskua ket maysa a naisangsangayan a panawen a panangutob no kasano nga ipakita ti pannakayanak ti Mangisalakan ken ti pangsubbot a sakripisiona ti ayatna para kadakayo. Bayat ti panagsaganam a mangtulong kadagiti agtutubo a sursuruam a makarikna iti ayat ti Mangisalakan, ibilangmo ti panagrebyu iti Lucas 4:16–21; Juan 3:16–17; 3 Nephi 27:13–16; ken iti mensahe ni Elder D. Todd Christofferson a “The Love of God” (Liahona, Nob. 2021, 16–19).

Aggigiddan a Masursuruan

No umadanin ti klasem wenno korummo iti gibus ti panagadalyo iti Baro a Tulag itoy a tawen, mabalinmo a paibinglay kadagiti agtutubo ti sumagmamano a paggugusto nga estoria iti Baro a Tulag a nangipakitaan ti Mangisalakan iti ayatna para kadagiti adda iti aglawlawna. Mabalinmo pay a basaen ti sumagmamano kadagitoy nga estoria. Ania ti isuro dagitoy nga estoria kadatayo maipapan iti ayat ti Mangisalakan para kadatayo? Tapno matulonganka pay a mangilawlawag iti ayat ti Mangisalakan, usarem dagiti aktibidad kas iti sumaganad.

• Awisem dagiti miembro ti klasem wenno korummo a mangpanunot iti ayat ti Nailangitan nga Ama ken ni Jesucristo kadatayo kas napintas a bokey ti sabsabong (kitaen iti Russell M. Nelson, “Divine Love,” Ensign, Peb. 2003, 24). Ibilang ti panangted iti tunggal tao iti maysa nagetteng a papel a sabong ken panangidawat kadakuada a saggaysa a mangbasa iti maysa kadagiti binatog iti nasantuan a kasuratan iti “Dagiti Pangsuporta a Resources.” Paisuratmo kadakuada iti sabsabongda no ania ti masursuroda maipapan iti ayat ti Nailangitan nga Ama ken ni Jesus para kadatayo. Bayat ti panangibinglayda no ania ti nasursuroda, mabalinda a pagtitiponen dagiti sabsabongda tapno mangaramid iti maysa a bokey. Kasano a nasaysayaat a mabigbigtayo dagiti wagas a pangipakitaan ti Nailangitan nga Ama ken ni Jesus ti ayatda para kadatayo?

• Iladawan ti sumagmamano a himno dagiti wagas a pangipakitaan ti Mangisalakan iti ayatna para kadatayo (kitaen, kas pagarigan iti, “I Know That My Redeemer Lives,” Hymns, no. 136). Mabalin a pilien dagiti miembro ti klase wenno korum ti maysa a himno ken ibinglayda dagiti padasda idi nariknada ti ayat ti Mangisalakan kadagiti wagas a maipada kadagiti nailadawan iti himno. Iburaymo ti pammaneknekmo maipapan iti no kasano nga impakita ti Mangisalakan iti ayatna para kenka. Kas pasurot ni Cristo, kasano a matulongantayo dagiti dadduma a makarikna iti ayatna?

• Adu dagiti palso a kapanunotan iti lubong maipapan iti ayat ti Dios para kadatayo? Kas pagarigan, mabalin nga adda dagiti mangipagarup a no nabaknang wenno narang-ay dagiti tao, kayatna a sawen nga ad-adda nga ay-ayaten ida ti Dios ngem dagiti dadduma. Mabalin nga adda makarikna a no pudno nga ay-ayatennatayo ti Dios, awatennatayo ti Dios no asinotayo ken saanna nga idawat nga agbalbaliwtayo. Ania dagiti palso a mensahe maipapan iti ayat ti Dios a nangngegantayon? Tapno matulongan a masuppiat dagitoy a palso a mensahe, mabalinmo nga idawat kadagiti agtutubo a mangrebyu iti mensahe ni Elder D. Todd Christofferson “The Love of God” wenno ti mensahe ti President Dallin H. Oaks “Love and Law” (Liahona, Nob. 2009, 26–29). Ania dagiti kinapudno a masarakantayo kadagitoy a mensahe a mangtulong kadatayo a makaawat iti ayat ti Dios para kadatayo?

Mabalin a maidasig ti ayat ti Nailangitan nga Ama ken ni Jesucristo iti napintas a bokey dagiti sabsabong.

Agtignay iti Pammati

Allukoyem dagiti miembro ti korum wenno klasem a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Juan 3:16–17; 15:9–13; Taga Roma 8:35–39; Hebreo 12:5–6, 9–11; 1 Nephi 11:21–23; Alma 7:11–12; 3 Nephi 11:13–17; Moroni 7:45–48

• Michael John U. Teh, “Our Personal Savior,” Liahona, Mayo 2021, 99–101

• Taniela B. Wakolo, “God Loves His Children,” Liahona, Mayo 2021, 94–96

Panangisuro iti Wagas ti Mangisalakan

Amin a banag nga inaramid ti Mangisalakan iti unos ti panagserbina iti daga ket pinaregta ti ayat—ti ayatna para iti Amana ken ti ayatna kadatayo amin. Addaan iti ayat a kas ken ni Cristo iti puspusotayo, kalikagumantayonto ti tunggal posible a wagas tapno mangtulong iti dadduma a masursuruan maipapan ken Cristo ken umasideg Kenkuana. Ti ayat ti agbalinto a gapu ken motibasion iti panangisurotayo.