kōrā ej jiburlep

Jeptōm̧ba 24

Elmen Aō Ļoore Waanjon̄ak eo an Rilo̧mo̧o̧r ilo Jipan̄ Ro rej Aikuj?

2 Korint 8–13

pija eo ej bōk jikin ko̧o̧njeļ ippān doon

Ko̧o̧njeļ Ippān Doon

Kar tōl jān juon uwaan būreejtōnji eo an doulul eo ak kūlaaj eo; tarrin 10-20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Jiron̄ ro ak Unin Tōl eo an Doulul eo an Priesthood eo an Aron. Innem tōl juon iien ekōnono kōn jerbal in lo̧mo̧o̧r im mour indeeo ippān Anij ijo eutiej tata ilo ami kōjerbal juon ak elōn̄ļo̧k kajjitōk ko ilaļ ak kajjitōk ko am̧ make (lale Bok in Bōk Meļeļe eo Eļap,, 10.2, 11.2). Karōk wāween ko n̄an kōm̧m̧ane ta eo kom̧ij kōnono kake.

• Mour kōn gospel eo. Ta eo jekar ekōnono kake iien eo ļo̧k, im ta kūr ko ak ijjitōn̄ ko rekar kōm̧m̧an? Ta eo em̧ōj ad kar kōm̧m̧ane n̄an jerbal kōn kūr ko ak ijjitōn̄ ko?

• Kea kōn ro rej pād ilo aikuj. Ta eo jemaron̄ kōm̧m̧ane ak ba n̄an pukōtļo̧k ro me remaron̄ en̄jake ajimakeke ak ettoļo̧k jān Jemedwōj Ilan̄?

• Karuwaineneik aolep n̄an bōk gospel eo. Ta jet iaan wāween ko jemaron̄ jipan̄ ro jet en̄jake iakwe eo an Jisōs Kraist?

• Kobaik baam̧le ko n̄an indeeo. Ta ļōmņak ko jemaron̄ kwaļo̧ki ippān ro jet n̄an jipan̄ kōkajoorļo̧k baam̧le ko ad?

Ilo jem̧ļo̧kin katak in, n̄e ekkar, kōm̧m̧ane laajrak in:

• Kam̧ool kōn pedped in katak ko kar katakin kaki.

• Kakeememej ro uwaan kūlaaj eo ak doulul eo kōn karōk ko im kūr ko me kar kōm̧m̧ane ilo iien kweilo̧k eo.

pija ej bōk jikin katakin katak eo

Katakin Katak eo

Kar tōl jān juon ritōl erūtto ak juon jodikdik; tarrin 25–35 minit

Kōpooj Eok Make ilo Jetōb

Iien ta ko rem̧m̧an me kwe im membōr ro ilo kūlaaj eo am̧ ak doulul eo rej aikuj n̄an jipan̄ ro rej aikuj iturum̧? Ilo juon iien ke Rikwojarjar ro ilo Jerusalem rekar en̄taan im aikuj jipan̄, Paul ekar jeje n̄an Rikorint ro n̄an rōjan̄ er n̄an leļo̧k ilo jouj “jab ilo būrum̧ōj ak kōn an aikuj kōm̧m̧ane, bwe Anij ej yokwe eo e m̧ōņōņō in leļo̧k.” Ekar kallim̧ur bwe ilo aer kōm̧m̧ane men in “kōm̧m̧an bwe jouj otemjej en ļe n̄an [kom̧],” bwe ren maron̄ “jeraam̧m̧an ilo jerbal otemjej rem̧m̧an” (2 Korint 9:7–8).

Paul ekar barāinwōt kwaļo̧k waanjon̄ak eo an Jisōs Kraist, eo “bwe men̄e E kein m̧weiie, Ear erom jeram̧ōl kōn kom̧, bwe kom̧win m̧weiie kōn An jeram̧ōl” (2 Korint 8:9). Rilo̧mo̧o̧r ekar kōņaan kōjekdo̧o̧n aolep m̧weiie ko an lan̄ bwe E en maron̄ jerbal n̄an kōj im kōm̧m̧an bwe jān m̧weiie n̄an indeeo. Ļōmņak kōn waanjon̄ak ko jān mour eo An ilo an kar etal im jerbal n̄an ro Ipeļaakin. Eddeikļo̧k riitiin̄ in 2 Korint 8–9 ilo am kōppopo n̄an katakin, ļōmņak n̄an riiti ennaan eo an Sister Michelle D. Craig “Mej ko n̄an Loļo̧kjeņ” (Liaona, Nob. 2020, 15–17).

Ekkatak Ippān Doon

N̄an jinoe ekōnono ko am̧, kajjitōk ippān kūlaaj ak doulul eo n̄an kōm̧m̧ane juon elaajrak in jet iaan un ko etke juon armej ejjab maron̄ jerbal n̄an ro rej aikuj. Ta eo jej ekkatak jān katak eo an Paul ilo 2 Korint 8:9; 9:7–8 me ej im̧we kōj n̄an kōm̧m̧ane eļapļo̧k n̄an jerbal n̄an ro rej aikuj? M̧akūtkūt kein ilaļ remaron̄ jipan̄ ro kwoj katakin em̧m̧anļo̧k aer meļeļe elmen n̄an jipan̄ kea kōn ro ipeļaakier.

• Jejjo iien ilo jeje ko rekwojarjar, Irooj ekar katakin elmen An en̄jake kōn lale ro rejeram̧ōl im aikuj. Jet waanjon̄ak ko rej ellaajrak ilo “Kein Jipan̄ ko rej Rie.” Juon wāween n̄an etale katak kein ej n̄an kajepel kūlaaj ak doulul eo n̄an ruo armej juon kurup im kajjitōk ippān kajjojo kūrup n̄an katak jet iaan jeje ko eoon kein. Kajjitōk ippāer ta eo eoon ko rej katakin kōn lale rijeram̧oļ im ro rej aikuj. Etke lale ro rej jeram̧oļ im ro riaikuj eaorōk n̄an Jemedwōj Ilan̄ im Jisōs Kraist? Karuwainene jodikdik ro n̄an pepe kōn wāween ko me er kajjojo remaron̄ jipan̄ ro rej aikuj.

• Jet iien jej boub kōn inepata ko ad make jon̄an jej likjab n̄an kile aikuj ko an ro ipeļaakid. Ilo ennaan eo an “Mej ko n̄an Loļo̧kjeņ,” Sister Michelle D. Craig ekar etale bwebwenato eo kōn an kar Anij kōpeļļo̧k mejen juon likao (lale 2 Kiin Ko 6:15–17). Ta eo jej ekkatak jān bwebwenato in? Ta eo jemaron̄ katak jān bwebwenato ko jet ekar kwaļo̧k kōn kile aikuj ko an ro jet im etal ippāer? (lale barāinwōt pijaan alwoj eo “Pray for Eyes to See as He Sees” ilo ChurchofJesusChrist.org). Membōr in kūlaaj ak doulul eo remaron̄ barāinwōt kwaļo̧k en̄jake ko aer kōn juon iien juon armej ekar kile aikuj ko aer im karejar n̄an er. N̄aat ko jekar kile aikuj ko an ro jet im karejar n̄an er? Elmen ad en̄jake n̄e jej bōk ak leļo̧k jerbal in karejar?

• Membōr in kūlaaj ak doulul eo am̧ rej ke meļeļe elmen kakūrm̧ool eddo ko aer n̄an jipan̄ lale ro rej aikuj? Ļōmņak n̄an kōnono ippān doon Mosaia 4:16–21 im 18:8–10, barāinwōt jekjen ko rekkar ilo Bok in Bōk Meļeļe eo Eļap (10.2.2 n̄an Doulul eo an Priesthood eo an Aron ak 11.2.2 n̄an jiron̄ ro). Ta eo jej im̧we n̄an kōm̧m̧ane āikin ad ekatak kein jiban̄ kein? Ļōmņak n̄an peke wāween ko komaron̄ jerbal ippān doon n̄an etal ippān ro rej aikuj ilo kūlaaj eo am̧, doulul, ward, ak jukjuk in pād eo. Pija ko ilo “Kein Jipan̄ ko rej Rie” rej letok jet ļōmņak ko. N̄an jerbal in jipan̄ ko ilo eria eo am̧, lale JustServe.org.

jiron̄ eo ej bōk kwoņaan ilo jerbal in jipan̄

Jerbal in jipan̄ eo ilo Kraist emaron̄ kōjeram̧m̧an ro rej jokwe ipeļaakūd.

Jerbal kōn Tōmak

Rōjan̄ ro uwaan kūlaaj eo ak doulul eo n̄an kejōkļo̧kjeņ im je ta eo renaaj kōm̧m̧ane n̄an mour ekkar n̄an im̧we ko rej en̄jaki rainin. Eļan̄n̄e rej kōņaan, remaron̄ kwaļo̧k ļōmņak ko aer. Karuwainene er n̄an ļōmņak kōn wāween aer eo̧ron̄ im̧we ko rej en̄jake naaj kōkajoorļo̧k jem̧jerā eo aer ippān Jemedwōj Ilan̄ im Jisōs Kraist.

Kein Jipan̄ ko rej Rie

• Matu 25:31–45; Jemes 1:27; Mosaia 2:17; Alma 34:27–28; Mormon 8:35–39; Katak im Bujen Ko 104:14–18 (Aorōk in lale ro rejeram̧ōl im reaikuj)

• Jeffrey R. Holland, “Jej Jab Aolep Ruwo̧o̧r Ke?,” Liaona, Nob. 2014, 40–42

• “Michelle’s Story,” “Caring for the Poor and Needy,” “I Was a Stranger: Love One Another,” “Fast Offerings: Are We Not All Beggars” (pijan alwoj), ChurchofJesusChrist.org

Katakin ilo Wāween eo an Rilo̧mo̧o̧r

Jeje ko Rekwojarjar im naan ko an rikanaan ro im rijilōk ro ilo raan ko āliktata rej unjen m̧ool eo jej katakin. Ilo aolep iien ko rem̧m̧an, im̧we ro kwoj katakin er n̄an oktakļo̧k n̄an naan ko an Anij n̄an tōl, uwaak n̄an kajjitōk, im jipan̄.