jinen im nejin rej kōmat

Oktoba 8

Elmen an Gospel eo an Jisōs Kraist Jipan̄ N̄a Kōkajoor Baam̧le eo Aō?

Epesōs

pija eo ej bōk jikin ko̧o̧njeļ ippān doon

Ko̧o̧njeļ Ippān Doon

Kar tōl jān eo juon uwaan būreejtōnji eo an doulul eo ak kūlaaj eo; tarrin 10-20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Jiron̄ Ro ak Unin Tōl eo an Doulul eo an Priesthood eo an Aron. Innem, n̄an eddeikļo̧k kapilōk doon kōn aikuj ko an doulul ak kūlaaj eo, kwomaron̄ kōņaan kōnono kōn im̧we im unin tōl ko jān kweilo̧k eo eļap. Kajjitōk ko rej ellaajrak remaron̄ jipan̄.

• Ta unin tōl eo ak ennaan ko rekar jiktok ilo kōļmenļo̧kjeņ ko ad? Ta eo ej kōkajoorļo̧k tōmak eo aō ilo Jisōs Kraist?

• Ta eo ej kōkajoorļo̧k naan in kam̧ool eo aō kōn rikanaan ro remour? Ta eo jekar en̄jake im̧we n̄an kōm̧m̧ane kōnke ta eo jekar ekkatak ak en̄jake?

• Ta eo jej aikuji n̄an kōm̧m̧ane āinwōt juon doulul ak kūlaaj n̄an keememej im kōm̧m̧an ekkar n̄an kapilōk ko jej ron̄ ilo kweilo̧k eo eļap?

Ilo jem̧ļo̧kin katak in, n̄e ekkar, kōm̧m̧ane laajrak in:

• Kam̧ool kōn pedped in katak ko kar katakin kaki.

• Kakeememej ro uwaan kūlaaj eo ak doulul eo kōn karōk ko im kūr ko me kar kōm̧m̧ane ilo iien kweilo̧k eo.

pija ej bōk jikin katakin katak eo

Katakin Katak eo

Kar tōl jān juon ritōl erūtto ak juon jodikdik; tarrin 25–35 minit

Kōpooj Eok Make ilo Jetōb

Jet armej ilo kūlaaj ak doulul eo emaron̄ lon̄ aer baam̧le, ekajoor me rej kajiriri tōmak im mour in jetōb. Jet remaron̄ make iaer ilo kijejeto eo aer n̄an mour kōn gospel eo, im jet remaron̄ jelmaik iakweelel im metak bōro ko ilo im̧ōko. Ak ejjeļo̧k juon ilo kūlaaj ak doulul eo am̧ ewōr aer baamle elukkun wāppen, me ejjeļo̧k aer apan̄. Ak aolep armej ewōr aer maron̄ ilo kajoor eo an Jisōs Kraist, eo emaron̄ kōmour im kōkajoor baam̧le ko.

Rilo̧mo̧o̧r ekōnaan kōjeraam̧m̧an baam̧le ko. Jet iien wāween An kōm̧m̧ane men in ej ilo iakwe im waanjon̄ak eo an juon armej em̧m̧an dettan eo ej niknik n̄an ļoore E im mour kōn gospel eo An. Ilo am̧ kōppopo n̄an katakin jodikdik ro kōn kajoor in epojak n̄an er im baam̧le ko aer ilo Jisōs Kraist, linūri katak ko ilo Epesōs me emaron̄ jipan̄ kōj kōkajoor jemjera ko an baam̧le. Kwomaron̄ bar ekkatak “Baam̧le Eo: Juon Naan in Kean̄ n̄an Laļ in” (ChurchofJesusChrist.org).

Ekkatak Ippān Doon

Ālkin leļo̧k n̄an membōr in kūlaaj ak doulul eo jidik iien n̄an kwaļo̧k ta eo Jetōb ej katakin er ilo wiik in ilo aer kar ekkatak Epesōs, kappukōt wāween ko n̄an kwaļo̧k unin kōnono ko kōn elmen an Jisōs Kraist maron̄ jipan̄ kōj kōkajoor baam̧le ko ad. N̄an waanjon̄ak, komaron̄ karuwainene jodikdik ro n̄an kappukot im kwaļo̧k bwebwenato ilo Epesōs me eped katak ko jemaron̄ kōjerbali n̄an kōkajoor jemjera an baam̧le. N̄an waanjon̄ak komaron̄ kobaik Epesōs 2:19–22; 3:14–19; 4:1–3, 25–26, 29–32; 5:1–2; 6:1–4. Elmen an naan in kapilōk ko ilo eo̧o̧n kein kōjeram̧m̧an juon baam̧le? Elmen an Rilo̧mo̧o̧r im gospel eo An juon kōjeram̧m̧an ilo m̧ōko imōd? En̄in ej jet ļōmņak in m̧akūtkūt rej ekkeijelļo̧k ippān unin kōnono in.

• N̄e kwokōnaan kōnono kōn kien eo n̄an “kwōn koutiej jemaṃ im jinōṃ” (Epesōs 6:2), komaron̄ jino ilo am̧ kajjitōk ippān membōr in kūlaaj ak doulul ta meļeļein naan in koutiej n̄an er. Bōlen juon armej emaron̄ kwaļo̧k meļeļein ilo tūkjinede ilo Guide to the Scriptures (scriptures.ChurchofJesusChrist.org). Karuwainene jodikdik n̄an kōnono kōn elmen aer naaj bōke kien ko aer ilo mour ko aer make. Emaron̄ bar im̧we n̄an lale elmen an kar Jisōs Kraist koutiej Jemen ilo Lan̄ im Jinen, Mary (lale, n̄an waanjon̄ak, Luk 2:41–52; Ukook eo an Josep Smith, Jon 2:4 [in Jon 2:4, footnote a]; Jon 8:29; 19:25–27). Ta eo jemaron̄ katak jān waanjon̄ak eo an Jisōs me emaron̄ kōkajoor jemjera eo ippān jined im jemed.

• Emaron̄ nej jipan̄ n̄an kōnono kōn men ko aikuji n̄an kalōk juon em̧ eben. Ta jet iaan men ko aikuji n̄an kaļōk juon baam̧le ekajoor? Ilo ekōnono in, komaron̄ kwaļo̧k ennaan eo jān Elder L. Whitney Clayton: “Ta eo ewōr tokjen ej kōm̧m̧an eo ilowaan jetōb ko an ro rej jokwe ie, ejjab ekkal eo an make.” (“M̧ōko Rem̧m̧an Tata,” Liaona, Māe 2020, 107–9). Komaron̄ barāinwōt kōnono kōn emen men ko Elder Clayton ej elmakoti me kwaļo̧k ilo ennaan ko an kōn wāween kaļōk “m̧ōko rem̧m̧an tata.”

• “Baam̧le Eo: Juōn Naan in Kean̄ n̄an Laļ in” ekoba kallim̧ur in: “M̧ōņōņō ilo mour in baam̧le ej maron̄ tōprak eļan̄n̄e ej pedped wōt ioon katakin an Irooj Jisōs Kraist.” Elmen an katak ko an Rilo̧mo̧o̧r kōkm̧anm̧an pedped eo n̄an juon baam̧le em̧ōņōņō? Naan in kean̄ eo an baam̧le im jeje ko rekwojarjar ium̧win “Kein Jipan̄ ko rej Rie” rej letok waanjon̄ak ko. Elmen an membōr ro an baam̧le jipan̄ doon mour kōn katak kein?

• Bōlen membōr in kūlaaj eo remaron̄ alwoj juon pijaan alwoj “Through Small Things,” eo ej kōnono kōn jilu jemjenjemjati ilo aer eo̧ron̄ kūr eo an bisop eo n̄an ļōmņak kōn wāween ko n̄an kōm̧m̧an bwe im̧weo im̧weer en juon jikin ekwojarjarļo̧k. Elmen an kar baam̧le in ilo pijaan alwoj in jeraam̧m̧an kōn jerbal ko an jodikdik rein? Ekōjkan ad maron̄ kōm̧m̧ane bwe en ekwojarjar juon em̧? Ļōmņak n̄an kaurwainene jodikdik ro n̄an eo̧ron̄ ejja karuwainene in me bisop ekar leļo̧k. N̄an jipan̄ er ļōmņak kōn ta eo remaron̄ kōm̧m̧ane, komaron̄ kōnono kōn kajjitōk eo kar kajjitōk kake ilo bitio eo: “What are you willing to do to have the Spirit in your home?”

baam̧le eo ej ekkatak ippān doon

Katak ko an Jisōs Kraist rej pedped eo n̄an m̧ōņōņō ilo mour in baam̧le.

Jerbal kōn Tōmak

Rōjan̄ ro uwaan kūlaaj eo ak doulul eo n̄an kejōkļo̧kjeņ im je ta eo renaaj kōm̧m̧ane n̄an mour ekkar n̄an im̧we ko rej en̄jaki rainin. Eļan̄n̄e rej kōņaan, remaron̄ kwaļo̧k ļōmņak ko aer. Karuwainene er n̄an ļōmņak kōn wāween aer eo̧ron̄ im̧we ko rej en̄jake naaj kōkajoorļo̧k jem̧jerā eo aer ippān Jemedwōj Ilan̄ im Jisōs Kraist.

Kein Jipan̄ ko rej Rie

• Matu 5:21–24, 38–42; 6:14; 7:1–5; 22:36–39; 3 Nipai 18:21; Moronai 7:33; Katak im Bujen Ko 18:10–13

• Henry B. Eyring, “M̧weo Ijo Jetōb eo an Irooj ej Jokwe ie,” Liaona, Māe 2019, 22–25

• “Ewōr Aibujuij Ibelakin,” “Home Can Be a Heaven on Earth,” Al Ko, Al in Ajri, nos. 34, 298

Katakin ilo Wāween eo an Rilo̧mo̧o̧r

Eļan̄n̄e jodikdik ro rej en̄jake bwe kwoj lōke er, aer lōke ilo kōjatdikdik eo aer ekwojarjar naaj eddōkļo̧k, im renaaj kailbōk eok kōn ta eo remaron̄ kōttōprake. Jipan̄ er loe juon kōttōpar in ta eo Jemedwōj Ilan̄ ejeļā me remaron̄ erom̧.