kub’sib’aal ha’

26 noviembre

Chan ru tintenq’aheb’ lin xe’ intoon chi chalk rik’in li Jesukristo?

1 ut 2 Pedro

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li tzoleb’aal malaj molam; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Jolomil K’anjenel Hu, 10.2, 11.2). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. K’a’ru xe’aatinak wi’ li obispil sa’ li jolomil ch’utam choq’ reheb’ li saaj sa’ li teep? A’ yaal li xe’aatinak wi’, k’a’ru taqab’aanu?

• Rilb’aleb’ li wankeb’ sa’ rajb’al ru. K’a’ru naru taqab’aanu re xtenq’ankileb’ li qas qiitz’in jo’ naraj li Kristo naq naqil li na’ajman ru a’b’an ink’a’ naqanaw k’a’ru xyeeb’al?

• Xb’oqb’aleb’ chixjunil chixk’ulb’al li evangelio. K’a’ru ak xqataw sa’ lix evangelio li Jesukristo li naxsahob’resi qach’ool? Chan ru taqawotz li sahil ch’oolejil a’an rik’ineb’ li qas qiitz’in?

• Xjunajinkileb’ li junkab’al chi junelik. K’a’ru yooko chixb’aanunkil re xtawb’al xk’ab’a’eb’ li qaxe’ qatoon li neke’raj ru xk’ojob’ankil k’anjel re li santil ochoch? K’a’ru naru taqab’aanu re xtenq’ankileb’ li qas qiitz’in chixtawb’al xk’ab’a’eb’ lix xe’toonil?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

reetalil xk’utb’al li tzol’leb’

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

K’a’ru nak’ulman rik’in li k’iila billon chi kristiaan li neke’kam chi ink’a’ neke’rab’i resil lix evangelio li Jesukristo ut ink’a’ neke’ru chixk’ulb’al lix k’ojob’anb’il k’anjel re li kolb’a-ib’? Naru natawman b’ayaq xcha’al lix sumenkil sa’ 1 Pedro 3:18–20; 4:6, b’ar wi’ laj Pedro ki’aatinak chirix li xjultikankil li evangelio chiruheb’ li kamenaq. A’ut sa’ Tzol’leb’ ut Sumwank 138 wan xtz’aqalil li yaal—eb’ li qaxe’ qatoon naru te’chalq chi tz’aqal rik’in li Kristo wi wanqeb’ xpaab’aal chirix ut wi te’xk’ulub’a lix evangelio, ut wi laa’o taqab’aanu li k’ojob’anb’il k’anjel choq’ reheb’ sa’ li santil ochoch. Re te’xk’ul li osob’tesink a’an, laa’o—eb’ li ralal xk’ajol li xe’osob’tesiik rik’in li evangelio—tento te’qasik’ xk’ab’a’eb’, toowulaq sa’ li santil ochoch, ut te’qak’ul li k’ojob’anb’il k’anjel re li kolb’a-ib’ choq’ reheb’ a’an.

K’a’ru aanumsihom laa’at sa’ xtenq’ankileb’ laa xe’toonil chi chalk rik’in li Kristo? Chan ru taatenq’aheb’ li saaj chirajb’al xb’aanunkil li k’anjel re li junkab’al ut li santil ochoch, ut chixnawb’al naq wankeb’ xseeb’al chixb’aanunkil? Naq nakakawresi li tzolok, naru taawil li raatin li Elder Dale G. Renlund, “Li k’anjel re li santil ochoch ut li resilal li junkab’al: Tz’ape’k sa’ junajil ut k’irtesink” (Jolomil ch’utub’aj-ib’ re abril 2018).

Tzolok sa’ komonil

Chan raj ru te’xsume li saaj li ani naxpatz’ chan ru naru te’kole’q li chaab’il kristiaan li ink’a’ xe’ru chixk’ulb’al li evangelio sa’ xyu’ameb’? K’a’ru neke’xtaw sa’ 1 Pedro 3:18–20; 4:6 li naxtenq’a xsumenkil li patz’om a’in? Sa’ li video “¿Haré mi parte?,” li Elder Enrique R. Falabella naxk’e xkomon chik li na’leb’. Xb’aanunkileb’ li na’leb’ a’in texxtenq’a sa’ li aatinak.

• Ka’ajwi’ sa’ Lix Iglees li Jesukristo rehebʼ laj Santil Paabʼanel saʼ Rosoʼjikebʼ li Kutan wan li tzol’leb’ chirix xkolb’aleb’ li kamenaq. Patz’ reheb’ li saaj naq te’ril Tzol’leb’ ut Sumwank 138:25–39 sa’ junesal malaj sa’ komonil ut naq te’xwotz k’a’ru neke’xtzol (chi’ilmanq “Xkomon chik li tenq’ ” re xtawb’al xkomon chik li raqal re li loq’laj hu chirix li na’leb’ a’in). K’a’ru neke’xye li raqal a’an chirix li nareek’a li qaChoxahil Yuwa’ choq’ re chixjunileb’ li ralal xk’ajol? Chan ru naq li kub’iha’ choq’ reheb’ li kamenaq naxtenq’aheb’ li qaxe’ qatoon chi chalk rik’in li Kristo? Chan ru naq nokoxtenq’a laa’o chi chalk rik’in li Kristo ut chixnimob’resinkil li qapaab’aal chirix a’an?

• K’a’ru taa’eek’asinq reheb’ li saaj chi tz’aqonk sa’ li k’anjel re li santil ochoch ut li junkab’al? Maare naru te’rileb’ li video sa’ “Xkomon chik li tenq’ ” ut te’xk’e reetal chan ru naq te’osob’tesiiq xb’aan li k’anjel re li santil ochoch ut li junkab’al. Naru ajwi’ te’xk’e reetaleb’ li osob’tesink yeechi’inb’ileb’ sa’ li tusleb’aal natawman sa’ li raatin li Elder Dale G. Renlund, “Li k’anjel re li santil ochoch ut li resilal li junkab’al: Tz’ape’k sa’ junajil ut k’irtesink.” Patz’ reheb’ naq te’xwotz b’ar wan reheb’ li osob’tesink li nawulak chiruheb’, ut k’a’ut. Naru ajwi’ tex’aatinaq chirix li naramok qe chi tz’aqonk sa’ li k’anjel re li santil ochoch ut li junkab’al. Chan ru naq li Kolonel naru tooxtenq’a chi numtaak sa’ xb’eeneb’ li ramleb’ a’an?

• Wi wankeb’ xcelular li saaj, naru taak’ut chiruheb’ chan ru naq li Qaawa’ naxseeb’ob’resi li k’anjel re naq moko ch’a’aj ta xtawb’aleb’ li qaxe’toonil li neke’raj ru li k’ojob’anb’il k’anjel re li kolb’a-ib’ (chi’ilmanq “Xkomon chik li tenq’ ”). Naru taab’oq li consultor sa’ xk’anjel li santil ochoch ut li junkab’al re laa teep malaj uq’ej naq tixtenq’aheb’ li saaj chixnawb’al k’a’ruheb’ li k’anjeleb’aal naru te’roksi. Naru ajwi’ taawaklesi xch’ooleb’ li saaj chixyalb’al roksinkileb’ li k’anjeleb’aal a’an sa’ rochocheb’, ut naq te’xye resil li xe’xb’aanu naq texch’utlaaq wi’chik.

nekee’aatinak li saaj ixq

Naq naqab’aanu li loq’laj k’ojob’anb’il k’anjel sa’ li santil ochoch, naqatenq’a xyeechi’inkileb’ li osob’tesink re li evangelio reheb’ chixjunileb’ li kamenaq.

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• Malakias 4:5–6; Mateo 16:18–19; Jwan 5:25; 1 Korintios 15:29; Tzol’leb’ ut Sumwank 137:7–9 (Li tzol’leb’ chirix xkolb’aleb’ li kamenaq)

• “Las bendiciones prometidas de la historia familiar 1” ut “Las bendiciones prometidas de la historia familiar 2” (eb’ li video), ChurchofJesusChrist.org

• Aplicacion Árbol Familiar (tento naq eb’ li saaj te’ok rik’in lix cuenta re li Iglees)

• RootsTech (Eb’ li saaj naru te’ril li ch’utam sa’ internet.)

• FamilySearch.org (Naru teeril FamilySearch.org/discovery ut li k’a’ru wan aran sa’ komonil.)

Li k’utuk jo’ li Kolonel

Naq nakab’oqeb’ li saaj chi k’utuk, tenq’aheb’ chixkawresinkil rib’ chi us. Ch’olob’ chan ru naq nakakawresi aawib’ re k’utuk. Chi jo’ka’in taatenq’aheb’ li saaj ink’a’ ka’ajwi’ sa’ jun tzoleb’aal, chiru b’an chixjunil xyu’ameb’ re te’xk’ut li evangelio jo’ chanru kik’utuk li Kolonel.