“12 noviembre. Chan ru tinjilosi wib’ rik’in li Jesukristo rik’ineb’ li santil k’ojob’anb’il k’anjel ut sumwank? Hebreos 7–13,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li tzol’leb’ choq’ re 2023 (2022)
“12 noviembre. Chan ru tinjilosi wib’ rik’in li Jesukristo rik’ineb’ li santil k’ojob’anb’il k’anjel ut sumwank?,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li tzol’leb’ choq’ re 2023
12 noviembre
Chan ru tinjilosi wib’ rik’in li Jesukristo rik’ineb’ li santil k’ojob’anb’il k’anjel ut sumwank?
K’uub’ank na’leb’ sa’ komonil
B’eresinb’il xb’aan jun komon re li awa’b’ejil re li tzoleb’aal malaj molam; 10–20 k’asal
Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Jolomil K’anjenel Hu, 10.2, 11.2). K’uub’ahomaq chan ru teek’anjela li na’leb’ xex’aatinak wi’.
-
Xyu’aminkil li evangelio. Chan ru naq xoonacho’ rik’in li Kolonel? K’a’ru yooko chixb’aanunkil re wank jo’ a’an?
-
Rilb’aleb’ li wankeb’ sa’ rajb’al ru. Ani wan sa’ qak’a’uxl? Chan ru naq taqatenq’a?
-
Xb’oqb’aleb’ chixjunil chixk’ulb’al li evangelio. Chan ru naq taqasume lix patz’omeb’ li qamiiw chirix li Iglees re naq taakawob’resiiq xpaab’aaleb’ chirix li Kolonel?
-
Xjunajinkileb’ li junkab’al chi junelik. K’a’ru naru taqab’aanu re aatinak chi kok’ aj xsa’ rik’in li qajunkab’al ut li qech alal?
A’ yaal jo’ na’ajman, b’aanu a’in sa’ xraqik li tzolok:
-
Ch’olob’ xyaalaleb’ li na’leb’ li xe’k’utman.
-
Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.
Xkʼutb’al li tzolʼlebʼ
B’eresinb’il xb’aan jun aj jolominel malaj jun li saaj; 25–35 k’asal
Xkawresinkil aawib’ sa’ musiq’ej
Chiru k’iila cient chihab’, eb’ li ralal xk’ajol laj Israel, eb’ laj Hebreo, k’eek’ookeb’ xch’ool chi tz’aqonk sa’ li k’ojob’anb’il k’anjel re li loq’laj muheb’aal ut lix chaq’rab’ laj Moises. A’ut naab’al reheb’ ink’a’ ke’xk’e reetal naq li k’a’aq re ru a’an, a’an “reetalil li k’a’ re ru wan chaq sa’ choxa”—“xmuheel li sahilal toj chalel” (Hebreos 9:23; 10:1). Li rajom chixjunil li k’ojob’anb’il k’anjel a’an re xtzolb’aleb’ chirix li Jesukristo. A’in li kixch’olob’ laj Pablo sa’ lix hu kixtaqla reheb’ laj Hebreo. Aajel ru li raatin choq’ qe anajwan xb’aan naq laa’o ajwi’ wan li qak’ojob’anb’il k’anjel juntaq’eet li rajom. Jo’kan naq us xpatz’b’al qib’: Eb’ li k’ojob’anb’il k’anjel a’in, ma yookeb’ chiqatenq’ankil chixjultikankil li Jesukristo? Ma wan k’a’ chik ru naru taqab’aanu re xk’ulb’al lix wankil li Jesukristo rik’in li k’ojob’anb’il k’anjel re li evangelio? Malaj ma ink’a’ naqak’e reetal li tz’aqal rajomeb’, jo’eb’ laj Hebreo re najter kutan?
K’oxlaheb’ li patz’om a’in naq nakawil Hebreos 7–13 ut naq nakakawresi aawib’ re xk’utb’al chan ru naq eb’ li k’ojob’anb’il k’anjel ut eb’ li sumwank nokohe’xnach’ob’resi rik’in li Jesukristo. Naru ajwi’ taawil junjunq reheb’ li aatin yeeb’ileb’ sa’ li jolomil ch’utub’aj-ib’ sa’ li tusleb’ aatin a’in.
Tzolok sa’ komonil
Re naq eb’ li saaj te’xk’e reetal chan ru naru neke’xjilosi rib’ rik’in li Jesukristo rik’ineb’ li k’ojob’anb’il k’anjel ut eb’ li sumwank re lix evangelio, naru taapatz’ reheb’ naq te’xtz’iib’a junjunq reheb’ li k’ojob’anb’il k’anjel ut li sumwank nachal rik’in li junjunq chiru li pizarron (chi’ilmanq Temas del Evangelio, “Ordenanzas,” “Convenio,” topics.ChurchofJesusChrist.org). K’a’ru neke’xk’ut li k’ojob’anb’il k’anjel ut li sumwank chiqu chirix li Jesukristo ut lix tojb’al rix li maak? Li raatin li Elder David A. Bednar sa’ “Xkomon chik li tenq’ ” naxch’olob’ k’a’ru jun li k’ojob’anb’il k’anjel ut naxk’e xkomon chik li chaab’il na’leb’. Naru ajwi’ xb’aanunkileb’ li na’leb’ a’in.
-
Naru taapaz’ reheb’ li saaj naq te’ril Tzol’leb’ ut Sumwank 84:19–22 ut te’aatinaq chirixeb’ li patz’om a’in: K’a’ru naraj naxye “li wankilal re choxahilal”? Chan ru naq eb’ li k’ojob’anb’il k’anjel ut eb’ li sumwank nokohe’xtenq’a chixnumsinkil li wankilal a’an? K’a’ru xwankilaleb’ li k’ojob’anb’il k’anjel ut eb’ li sumwank sa’ li qayu’am? Chan ru nokohe’xtenq’a chi kanaak rik’in li Kolonel? Re xsumenkileb’ li patz’om a’an, li saaj naru te’ril li kaahib’ raqal sa’ xtiklajik li raatin li Elder Kent F. Richards, “Lix wankilal li choxahilal” (Jolomil ch’utub’aj-ib’ re abril 2016), malaj li raatin li Elder Bednar, “Chikab’lamanq li ochoch a’in choq’ re lin k’ab’a’ ” (Jolomil ch’utub’aj-ib’ re abril 2020), tz’aqal li raqal “Sa’ ch’oolej.”
-
Naru taapatz’ reheb’ li saaj chan raj ru te’xch’olob’ li k’ojob’anb’il k’anjel re li loq’laj wa’ak chiru jun kristiaan maak’a’ naxnaw chirix. Wan jun seraq’ chirix a’an sa’ li raqal “Li ink’ulum ut xnawom inch’ool” sa’ li raatin li Elder Taniela B. Wakolo, “Eb’ li k’ojob’anb’il k’anjel re li kolb’a-ib’ te’xk’am chaq qe li sachb’a-ch’oolejil saqen” (Jolomil ch’utub’aj-ib’ re abril 2018). Li saaj naru ajwi’ te’xk’e reetal li ninqi na’leb’ sa’ li video “Recordarle siempre” (ChurchofJesusChrist.org). Chan ru naq li loq’laj wa’ak nokoxnach’ob’resi rik’in li Jesukristo? Ma wankeb’ hoonal naq naru naqak’ut li na’leb’ a’in chiruheb’ li qas qiitz’in?
-
Rilb’aleb’ li oob’ chi na’leb’ kixye li Elder Peter F. Meurs sa’ “Li loq’laj wa’ak naru tooxtenq’a chi santob’resiik” (Jolomil ch’utub’aj-ib’ re octubre 2016) naru tixtenq’aheb’ li saaj chixtawb’al ru chan ru te’xkawresi rib’ choq’ re li loq’laj wa’ak. Malaj, wi wankeb’ li saaj li yookeb’ chixkawresinkil rib’ choq’ re li loq’laj tiqib’aak, ilomaq li raqal “Sobre la investidura del templo” sa’ temples.ChurchofJesusChrist.org. Tz’ilomaq rix chan ru naq li santil k’ojob’anb’il k’anjel a’in ut eb’ lix sumwank naru toohe’xnach’ob’resi rik’in li Kolonel.
-
Naru taatz’iib’aheb’ li aatin Loq’laj wa’ak, Kub’iha’, ut Santil ochoch chiru li pizarron. Patz’ reheb’ li saaj naq te’xtz’iib’a rub’eleb’ a’an li sumwank noko’ok wi’ aran. Li na’leb’ sa’ “Xkomon chik li tenq’ ” naru natenq’an. Tz’ilomaq rix chan ru naq eb’ li sumwank a’an nokohe’xnach’ob’resi rik’in li Jesukristo.
-
Naru taak’eheb’ li saaj sa’ kok’ ch’uut, ut li junjunq taaril jun raqal re li raatin li Elder Ronald A. Rasband, “Roxloq’inkileb’ li qayeechi’ihom ut li qasumwank” (Jolomil ch’utub’aj-ib’ re octubre 2019), malaj li raatin li Elder D. Todd Christofferson, “K’a’ru aj-e lix b’ehil li sumwank” (Jolomil ch’utub’aj-ib’ re abril 2021). Patz’ reheb’ naq te’xwotz chan ru naq xpaab’ankileb’ lix sumwank naxkawob’resi lix wanjikeb’ rik’in li Jesukristo.
Li santil k’ojob’anb’il k’anjel re li evangelio naxk’e “li wankilal re choxahilal” sa’ li qayu’am (chi’ilmanq Tzol’leb’ ut Sumwank 84:19–22).
K’anjelak rik’in paab’aal
Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.
Xkomon chik li tenq’
-
Mosiah 18:8–10 (Li sumwank re li kub’iha’)
-
Moroni 4–5 (Li sumwank re li loq’laj wa’ak)
-
Li Elder David A. Bednar kixye: “Aajeleb’ ru li k’ojob’anb’il k’anjel sa’ lix evangelio li Kolonel ut sa’ li b’e li nawulak rik’in li Kristo ut sa’ xsik’b’al li yo’laak wi’chik sa’ musiq’ejil. A’aneb’ loq’laj eek’asink-ib’ li wan xmusiq’ejil k’anjel, xjunelikil xyaalal, ut li neke’xk’am rib’ rik’in xchaq’rab’ li Dios. …
“Eb’ li k’anjel re li kolb’a-ib’ ut li taqenaqil loq’al li k’anjelanb’ileb’ sa’ lix Iglees li Qaawa’ k’ojob’anb’il wi’chik neke’xq’ax li k’a’ru yal b’aanunb’il jo’ eetalil. A’aneb’ b’an li numleb’ k’eeb’ileb’ xwankil sa’ wi’ naru te’ok li osob’tesink re choxa sa’ qayu’am chiqajunjunqal. …
“Li k’ojob’anb’il k’anjel k’ulb’ileb’ ut paab’anb’ileb’ qab’aan, aajeleb’ ru re xtawb’al li wankilal re choxahilal ut chixjunil li osob’tesink sa’ lix tojb’al rix li maak kixb’aanu li Kolonel” (“Junelik taakanaaq eerik’in li risinkil lee maak,” Jolomil ch’utub’aj-ib’ re abril 2016).
Li k’utuk jo’ li Kolonel
Naq nakab’oqeb’ li saaj chixk’anjelankil li tzol’leb’ tz’aqal yaal, nakatenq’aheb’ chi tzolok ajwi’ sa’ li rochocheb’ ut lix yu’ameb’ wulaj wulaj.