“10 diciembre. Chan ru naq li Jesukristo naxk’e chi uxmank lix k’uub’anb’il na’leb’ li qaChoxahil Yuwa’? Apokalipsis 1–5,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li tzol’leb’ choq’ re 2023 (2022)
“10 diciembre. Chan ru naq li Jesukristo naxk’e chi uxmank lix k’uub’anb’il na’leb’ li qaChoxahil Yuwa’?,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li tzol’leb’ choq’ re 2023
10 diciembre
Chan ru naq li Jesukristo naxk’e chi uxmank lix k’uub’anb’il na’leb’ li qaChoxahil Yuwa’?
K’uub’ank na’leb’ sa’ komonil
B’eresinb’il xb’aan jun komon re li awa’b’ejil re li tzoleb’aal malaj molam; 10–20 k’asal
Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Jolomil K’anjenel Hu, 10.2, 11.2). K’uub’ahomaq chan ru teek’anjela li na’leb’ xex’aatinak wi’.
-
Xyu’aminkil li evangelio. B’ar ak xqil li ruq’ li Qaawa’ sa’ li qayu’am?
-
Rilb’aleb’ li wankeb’ sa’ rajb’al ru. Chan ru naq taqatenq’a qib’ chiqib’il qib’ sa’ li naqanumsi?
-
Xb’oqb’aleb’ chixjunil chixk’ulb’al li evangelio. Chan ru naq taqoksi li tecnologia re xwotzb’al li evangelio?
-
Xjunajinkileb’ li junkab’al chi junelik. K’a’ru yooko chixb’aanunkil re xtenq’ankil li qajunkab’al chi chalk rik’in li Kristo?
A’ yaal jo’ na’ajman, b’aanu a’in sa’ xraqik li tzolok:
-
Ch’olob’ xyaalaleb’ li na’leb’ li xe’k’utman.
-
Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.
Xkʼutb’al li tzolʼlebʼ
B’eresinb’il xb’aan jun aj jolominel malaj jun li saaj; 25–35 k’asal
Xkawresinkil aawib’ sa’ musiq’ej
Sa’ k’utb’esinb’il matk’, laj Jwan aj K’utb’esinel kiril jun tasal hu, ut “maajun kitawman sa’ choxa, chi moko sa’ ruchich’och’ malaj rub’el ta li ch’och’ ” li kiwan xk’ulub’ chixteeb’al, ut xmaak a’in naq ki’ok chi yaab’ak (chi’ilmanq Apokalipsis 5:3–4). Li hu a’an reetalil “lix k’anjel li Dios,” jo’ lix k’uub’anb’il na’leb’ chirix xq’axb’al ru li kamk ut xk’ulb’al li junelik yu’am (chi’ilmanq Tzol’leb’ ut Sumwank 77:6; Moises 1:39). A’b’an, sa’ lix k’utb’esinb’il matk’ laj Jwan, jun Karneer kitawman li “xk’ulub’ xchapb’al li hu ut xteeb’al eb’ li xtz’apleb’ ” (Apokalipsis 5:9). Lix chaq’alil ru a’an kixk’eheb’ “k’iila mil o’q’ob’ chi o’q’ob’ ” li anjel chi b’ichank ut chixjapb’al reheb’ xb’aan xsahileb’ xch’ool (Apokalipsis 5:11). Li Jesukristo, lix Karneer li Dios, “rik’in xkik’el kixloq’eb’ li winq ut li ixq choq’ re li Dios” (Apokalipsis 5:9) ut kixteheb’ li osob’tesink re lix k’uub’anb’il na’leb’ li qaChoxahil Yuwa’.
K’oxlan chirix li xb’aanuhom li Jesukristo choq’ aawe. Ma aaweek’ahom jun sutaq li ke’reek’a li ani “ke’xhupub’ rib’ chi loq’onink” sa’ xk’utb’esinb’il matk’ laj Jwan? (Apokalipsis 5:14). K’oxla chan ru naq taatenq’aheb’ li saaj chixnimob’resinkil xnawomeb’ chirix lix k’anjel li Jesukristo sa’ lix k’uub’anb’il na’leb’ li qaChoxahil Yuwa’. Rochb’een Apokalipsis 1–5, naru taawil 2 Nefi 9; “Li yo’yookil Kristo: Lix ch’olob’ahomeb’ li Apostol” (ChurchofJesusChrist.org); ut li raatin li Elder Ulisses Soares, “Li Jesukristo: Laj ilol re li qach’ool” (Jolomil ch’utub’aj-ib’ re abril 2021).
Tzolok sa’ komonil
Maare taawulaq chiruheb’ li saaj xk’oxlankileb’ rib’ jo’ aj yiib’ahom pelicula li patz’b’il re naq tixyiib’ jun li pelicula chirix lix k’utb’esinb’il matk’ laj Jwan sa’ Apokalipsis 5. K’e xhoonaleb’ chixtz’ilb’al rix li ch’ol ut chixk’eeb’al reetal k’a’ru te’raj xk’utb’al sa’ li pelicula. K’a’ru neke’xk’oxla naq jwal taatoch’oq ch’oolej? Chan ru naq li pelicula tixnimob’resi li paab’aal chirix li Kolonel? Re xtenq’ankileb’ li saaj chi tzolok chirix lix k’anjel li Jesukristo sa’ lix k’uub’anb’il na’leb’ li qaChoxahil Yuwa’ re li kolb’a-ib’, naru xb’aanunkileb’ li na’leb’ a’in.
-
Naru taatz’iib’aheb’ li aatin a’in chiru li pizarron: Li yu’am naq maji’ noko’yola, Li yu’am sa’ ruchich’och’, ut Li yu’am chirix naq nokokam. Patz’ reheb’ li saaj naq te’rileb’ li raqal re li loq’laj hu sa’ “Xkomon chik li tenq’ ” re te’xtzol chan ru naq lix k’anjel li Kolonel naq maji’ nayo’la, naq wan sa’ ruchich’och’, ut chirix naq kiwakli chi yo’yo naxk’e chi k’anjelamank lix k’uub’anb’il na’leb’ li qaChoxahil Yuwa’. Naru te’xtz’iib’a chi k’osb’il ru li k’a’ru neke’xtaw chiru li pizarron. K’e xhoonaleb’ li saaj chixwotzb’al li neke’reek’a chirix li xb’aanuhom li Kolonel choq’ reheb’.
-
Re xtenq’ankileb’ li saaj chixtawb’al ru k’a’ru kixb’aanu li Jesukristo re xk’anjelankil lix k’uub’anb’il na’leb’ li qaChoxahil Yuwa’, yiib’ xjalam-uuch jun li b’e chiru li pizarron li taareetali li qab’eenik re sutq’iik rik’in li qaYuwa’ sa’ Choxa. Yiib’ xjalam-uucheb’ li ramleb’ chiru li b’e, ut k’ab’a’iheb’ kamk re tz’ejwalej ut kamk re musiq’ej. (Wi na’ajman, eb’ li saaj naru te’ril xch’olob’ankileb’ a’an sa’ “Kamk re tz’ejwalej” ut “Kamk re musiq’ej” sa’ li K’utul Raqal reheb’ li Loq’laj Hu). Chan ru naq li Kolonel nokoxtenq’a chi numtaak sa’ xb’eeneb’ li ramleb’ a’an? (chi’ilmanq 2 Nefi 9:7–10). Eb’ li saaj naru te’ril li raatin li Elder Soares, “Li Jesukristo: Laj ilol re li qach’ool,” ut te’xtz’iib’a chixk’atq li b’e li ch’ol aatin neke’xtaw li naxch’olob’ chan ru naq li Jesus nokoxtenq’a chi sutq’iik rik’in li Dios.
-
Naq eb’ li qas qiitz’in neke’patz’ok chirix li naqapaab’ ut li naqab’aanu, naru taqawotz k’a’ut naq aajel ru li Jesukristo choq’ qe. Naru taakawresiheb’ li saaj choq’ re a’an rik’in xpatz’b’al reheb’ naq te’ril li raatin li Elder Dieter F. Uchtdorf, “Waye’ li Winq!” (Jolomil ch’utub’aj-ib’ re abril 2018), ut naq te’xsik’ li na’leb’ te’raj xwotzb’al chirix li Jesukristo. Naru teetz’iib’aheb’ li na’leb’ a’an chiru li pizarron. Toja’ naq taak’e xhoonaleb’ chixch’olob’ankil chirib’ileb’ rib’ k’a’ut naq naqaj ru li Jesukristo ut chan ru naq osob’tesinb’ileb’ xb’aan naq neke’xnaw ru li Kolonel.
Xkamik li Kristo chiru krus, xb’aan li xLouise Parker
K’anjelak rik’in paab’aal
Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.
Xkomon chik li tenq’
-
Jwan 1:1–3, 10; Eter 3:14; Moises 4:1–2 (Lix k’anjel li Kolonel naq maji’ nayo’la)
-
Mosiah 3:5–11; Alma 7:11–13; Tzol’leb’ ut Sumwank 19:16–19 (Lix k’anjel li Kolonel sa’ lix ruchich’och’il yu’am)
-
Jwan 14:2–3; 2 Nefi 9:15–17; Tzol’leb’ ut Sumwank 45:3–5; 138:28–31 (Lix k’anjel li Kolonel chirix lix kamik ut lix waklijik chi yo’yo)
Li k’utuk jo’ li Kolonel
Rik’in li junjunq li wan sa’ laa tzoleb’aal naru natawman li xnawom ch’oolej, li chaab’il na’leb’, ut li k’a’ru nak’ulman rik’in xyu’aminkil li evangelio. B’oqeb’ chi wotzok ut chixwaklesinkileb’ rib’ chirib’ileb’ rib’.