“24 diciembre. Chan ru naq li Jesukristo naxk’ut lix rahom choq’ we? Li Ralankil,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li tzol’leb’ choq’ re 2023 (2022)
“24 diciembre. Chan ru naq li Jesukristo naxk’ut lix rahom choq’ we?,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li tzol’leb’ choq’ re 2023
Kolb’il, xb’aan li xJenedy Paige
24 diciembre
Chan ru naq li Jesukristo naxk’ut lix rahom choq’ we?
Li Ralankil
K’uub’ank na’leb’ sa’ komonil
B’eresinb’il xb’aan jun komon re li awa’b’ejil re li tzoleb’aal malaj molam; 10–20 k’asal
Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Jolomil K’anjenel Hu, 10.2, 11.2). K’uub’ahomaq chan ru teek’anjela li na’leb’ xex’aatinak wi’.
-
Xyu’aminkil li evangelio. Chan ru naq yooko chixtawb’al xsahil qach’ool sa’ xtaaqenkil li Jesukristo?
-
Rilb’aleb’ li wankeb’ sa’ rajb’al ru. Ani sa’ li qateep malaj qatenamit naraj ru qatenq’? Chan ru taqatenq’a?
-
Xb’oqb’aleb’ chixjunil chixk’ulb’al li evangelio. Chan ru taqakawresi qib’ chiqib’il qib’ re xik sa’ mision?
-
Xjunajinkileb’ li junkab’al chi junelik. Chan ru tootenq’anq sa’ li teep re xb’aanunkil li k’anjel re li santil ochoch ut li junkab’al?
A’ yaal jo’ na’ajman, b’aanu a’in sa’ xraqik li tzolok:
-
Ch’olob’ xyaalaleb’ li na’leb’ li xe’k’utman.
-
Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.
Xkʼutb’al li tzolʼlebʼ
B’eresinb’il xb’aan jun aj jolominel malaj jun li saaj; 25–35 k’asal
Xkawresinkil aawib’ sa’ musiq’ej
Rub’elaj lix yo’lajik sa’ ruchich’och’, li Jesukristo kinawe’ ru jo’ li nimla Jehova. A’an chaq “li Raaro ut Sik’b’il ru xb’aan [li Yuwa’b’ej] chalen chaq sa’ xtiklajik” (Moises 4:2), nujenaq chi loq’al ut chi usilal ut chi yaal (chi’ilmanq Jwan 17:5; Tzol’leb’ ut Sumwank 93:11). A’b’anan naq kiyo’la, li xMaria “kixsotob’ sa’ xwa’leb’aaleb’ ketomq, xb’aan naq maak’a’ na’ajej choq’ reheb’ sa’ li kab’l” (Lukas 2:7). K’a’ut naq li Jesukristo kiraj xk’ulub’ankil lix k’anjel jo’ Kolonel us ta tento taayo’laaq arin sa’ neb’a’il? Kixb’aanu xb’aan naq nokoxra. Naq laj Nefi kiril lix yo’lajik li Kolonel sa’ k’utb’esinb’il matk’, a’an kixch’olob’ xyaalal “lix rahom li Dios, li naxpuktesi rib’ sa’ xch’ooleb’ li ralal xk’ajoleb’ li winq; jo’kan ut, q’axal wi’chik atawal sa’ xb’een chixjunil li k’a’aq re ru” (1 Nefi 11:22).
Li Ralankil a’an jun santil hoonal re xk’oxlankil chan ru naq lix yo’lajik li Kolonel ut lix mayej re xtojb’al rix li maak naxk’ut lix rahom choq’ aawe. Naq nakakawresi aawib’ re xtenq’ankileb’ li saaj chireek’ankil lix rahom li Kolonel, naru taawil Lukas 4:16–21; Jwan 3:16–17; 3 Nefi 27:13–16; ut li raatin li Elder D. Todd Christofferson, “Lix rahom li Dios” (Jolomil ch’utub’aj-ib’ re octubre 2021).
Tzolok sa’ komonil
Yoo chi raqe’k li xtzolb’al li Ak’ Chaq’rab’ chiru li chihab’ a’in, jo’kan naq naru taapatz’ reheb’ li saaj naq te’xwotz li seraq’ re li Ak’ Chaq’rab’ mas nawulak chiruheb’ b’ar wi’ li Kolonel kixk’ut lix rahom choq’ reheb’ li ras riitz’in. Naru ajwi’ teerileb’ li seraq’ a’an. K’a’ru neke’xk’ut li seraq’ a’an chiqu chirix lix rahom li Kolonel choq’ qe? Naru xb’aanunkileb’ li na’leb’ a’in re aatinak chirix lix rahom li Kolonel.
-
Patz’ reheb’ li saaj naq te’xjuntaq’eeta lix rahom li qaChoxahil Yuwa’ ut li Jesukristo choq’ qe rik’in jun kuut utz’u’uj (chi’ilmanq Russell M. Nelson, “Amor Divino,” Liahona, febrero 2003, 12). Naru taak’e re li junjunq saaj jun utz’u’uj yiib’anb’il rik’in hu, ut taapatz’ reheb’ naq te’ril jun reheb’ li raqal re li loq’laj hu sa’ “Xkomon chik li tenq’.” Patz’ reheb’ naq te’xtz’iib’a chiru li utz’u’uj k’a’ru neke’xtzol chirix lix rahom li qaChoxahil Yuwa’ ut li Jesukristo choq’ qe. Naq te’xwotz li xe’xtzol, naru te’xch’utub’ chixjunileb’ li utz’u’uj. Chan ru taqatzol xk’eeb’al reetal li neke’xb’aanu li qaChoxahil Yuwa’ ut li Jesukristo re xk’utb’al xrahomeb’ choq’ qe?
-
Wankeb’ li b’ich li neke’xch’olob’ chan ru naq li Kolonel naxk’ut xrahom choq’ qe (chi’ilmanq, jo’ eetalil, “Ninnaw naq yo’yo inKolonel,” Eb’ li B’ich, 77). Eb’ li saaj naru te’xsik’ ru jun li b’ich ut te’xwotz jo’q’e reek’ahomeb’ lix rahom li Kolonel jo’ chanru ch’olob’anb’il sa’ li b’ich. Chan chik ru naq li Kolonel xk’ut lix rahom choq’ qe? Jo’ aj taaqehom re li Kristo, chan ru taqatenq’aheb’ li qas qiitz’in chireek’ankil lix rahom?
-
Maak’a’jo’ xk’ihal li b’alaq’il na’leb’ chirix lix rahom li Dios choq’ qe natawman sa’ ruchich’och’. Jo’ jun eetalil, wankeb’ li neke’xk’oxla naq wi b’ihom malaj usilanb’il jun kristiaan, a’an naraj naxye naq li Dios mas naxra a’an wi’chik chiru jalan chik. Wankeb’ li neke’reek’a naq wi ta li Dios tooxra chi yaal, a’an tooxk’ulub’a raj jo’ ak wanko ut ink’a’ tixpatz’ raj naq toojalaaq. K’a’ chik li b’alaq’il na’leb’ qab’ihom chirix lix rahom li Dios? Re xka’pak’alinkil li b’alaq’il na’leb’ a’an, naru taapatz’ reheb’ li saaj naq te’ril li raatin li Elder D. Todd Christofferson, “Lix rahom li Dios,” malaj li raatin li Awa’b’ej Dallin H. Oaks, “El amor y la ley” (Liahona, noviembre 2009, 26–29). K’a’ru li na’leb’ naqataw sa’eb’ li esil a’an li nokoxtenq’a chixtawb’al ru lix rahom li Dios choq’ qe?
Lix rahom li qaChoxahil Yuwa’ ut li Jesukristo naru najuntaq’eetaman rik’in jun kuut utz’u’uj jwal ch’ina-us.
K’anjelak rik’in paab’aal
Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.
Xkomon chik li tenq’
-
Jwan 3:16–17; 15:9–13; Romanos 8:35–39; Hebreos 12:5–6, 9–11; 1 Nefi 11:21–23; Alma 7:11–12; 3 Nefi 11:13–17; Moroni 7:45–48
-
Michael John U. Teh, “Li qaKolonel,” Jolomil ch’utub’aj-ib’ re abril 2021
-
Taniela B. Wakolo, “Li Dios naxraheb’ li ralal xk’ajol,” Jolomil ch’utub’aj-ib’ re abril 2021
Li k’utuk jo’ li Kolonel
Chixjunil li kixb’aanu li Kolonel sa’ lix k’anjel sa’ ruchich’och’ eek’asinb’il xb’aan li rahok—lix rahom choq’ re lix Yuwa’ ut lix rahom choq’ qe chiqajunil. Rik’in li rahok narahok wi’ li Kristo sa’ li qach’ool, yalb’ilaq qaq’e chixsik’b’al chan ru naru taqatenq’aheb’ li qas qiitz’in chi tzolok chirix li Kristo ut chi chalk rik’in a’an. A’anaq xb’aan ut rik’in li rahok naq nokok’utuk.