Li Dios naxraheb’ li ralal xk’ajol
Nawaj xwotzb’al oxib’ na’leb’ b’ar wi’ li qaChoxahil Yuwa’ naxk’ut lix rahom choq’ qe, li ralal xk’ajol.
Ex was wiitz’in, nasaho’ inch’ool eerik’in sa’ lix evangelio li Jesukristo. Nink’am chaq wik’in li rahok reheb’ li qakawil komon sa’ Filipinas, ut sa’ xk’ab’a’eb’ ninye eere, Mabuhay!
Sa’ li eqla a’in re Paswa, ninch’olob’ xyaalal li yo’yookil Kristo, naq kiwakli sa’ xyanqeb’ li kamenaq, ut naq saq ru ut maak’a’ roso’jik lix rahom choq’ qe ut choq’ re li qaChoxahil Yuwa’. Anajwan, tinwaj aatinak chirix lix rahom li qaChoxahil Yuwa’ ut li Jesukristo choq’ qe, li naxk’ut rib’ sa’ lix tojb’al rix li maak xb’aan li Jesukristo. “Xb’aan naq li Dios k’a’jo’ naq kixra li ruchich’och’: kixk’e chaq li Ralal jun chirib’il” (Jwan 3:16).
Naq li anjel kixpatz’ re li profeet aj Nefi k’a’ru naxnaw chirix li Dios, laj Nefi kixsume chi jo’ka’in, “Ninnaw naq a’an naxraheb’ li ralal xk’ajol” (chi’ilmanq 1 Nefi 11:16–17).
Jun raqal re lix Hu laj Mormon: Jun chik Ch’olob’anb’il Esil chirix li Jesukristo naxch’olob’ chi us lix tz’aqal rahom li Kolonel: “Ut li ruchich’och’, sa’ xk’ab’a’ lix maa’usilaleb’, te’xb’ir rix jo’ chanchan naq maak’a’ xloq’al; … neke’xraple, … neke’xsak’, … neke’xchuub’a, ut a’an naxkuy, sa’ xk’ab’a’ lix chaab’ilal xch’ool aj rahonel, ut xnajtil li royb’enihom choq’ reheb’ li ralal xk’ajoleb’ li winq” (1 Nefi 19:9). Lix nimla rahom li Kolonel, a’an li wankilal li nareek’asi chixjunil li naxb’aanu a’an. Naqanaw naq a’an ajwi’ li rahom nareek’a li qaYuwa’ sa’ Choxa choq’ qe, xb’aan naq li Kolonel kixk’ut rik’in tuulanil naq a’an ut li Yuwa’b’ej a’aneb’ “jun” (chi’ilmanq Jwan 10:30; 17:20–23).
Chi jo’kan, chan ru taqasutq’isi lix rahom ut taqak’ut li qab’antioxihom xb’aan a’an? Li Kolonel kixk’e qana’leb’ rik’in li saqen ruhil b’oqok a’in: “Wi nikineera, teepaab’ lin chaq’rab’ ” (Jwan 14:15).
Li Awa’b’ej Dallin H. Oaks kixye, “Lix tz’aqal rahom li Dios nak’utman sa’ chixjunileb’ li rosob’tesihom lix evangelio, jo’ naq li xnimal ru osob’tesiik k’uulanb’ilaq choq’ reheb’ li neke’xpaab’ lix chaq’rab’.”1
Nawaj xwotzb’al oxib’ na’leb’ b’ar wi’ li qaChoxahil Yuwa’ naxk’ut lix rahom choq’ qe, li ralal xk’ajol.
Xb’een, li qakomonil rik’in li Dios ut rik’in li qajunkab’al naxk’ut lix rahom
Li qakomonil jwal nim xloq’al wan rik’in li Yuwa’b’ej ut li Alalb’ej ut rik’in li qajunkab’al, xb’aan naq junajinb’ilo rik’ineb’ a’an chi junelik. Li xnimal ru k’uub’anb’il na’leb’ re sahil ch’oolejil, a’an jun xnimal ru xk’utb’esihom lix rahom li Dios choq’ qe. Chi k’eeb’il li qilom chi xaqxo chiru lix k’uub’anb’il na’leb’ li Dios, naqasik’ risinkil sa’ li qaam li q’etq’etil, ut ruuchil a’an naqasik’ xk’eeb’al xk’ojleb’aal li k’a’ru naxk’uub’ li qajunelikil komonil. A’in chanchan “jun musiq’ejil pikok.” Sa’ xb’aanunkil li qamusiq’ejil pikok, xb’een wa tento naq taqasik’ li Dios ut taqapatz’ xk’ab’a’ (chi’ilmanq Jeremias 29:12–13).
Xsik’b’al a’an ut xpatz’b’al xk’ab’a’ tixk’e xtiklajik li pikok, ut tixk’e xna’aj b’ar wi’ taqakab’la ut taqakawresi li qajunelikil komonil. Tixnimob’resi li musiq’ejil qilom ut tooxtenq’a chixjalb’al li naru chiqu, ink’a’ li qaxiw li ink’a’ nokoru chixjalb’al. Li tzolok chirix lix yu’am ut lix k’anjel li qaKolonel, Jesukristo, tooxtenq’a chirilb’aleb’ li qak’a’uxl rik’in rilob’aal li junelik q’e kutan.
Wan naq, wan li k’a’ru nokoxram chireek’ankil lix rahom li Dios sa’ li qajunkab’al. Jun li na’b’ej, li nareek’a naq eb’ li kok’ ulul ch’iich’ yookeb’ chixtoch’b’al chi naab’al lix junkab’al, kichal sa’ xch’ool chan ru xtuqub’ankil. Naq yookeb’ chi wa’ak ut naq ch’utch’uukeb’ jo’ junkab’al, a’an yal naxye, “Kanab’omaq lee celular; chiqil qib’ chiqib’il qib’.” A’an naxye naq a’in li ak’ wanjik choq’ re lix junkab’al, ut naq a’in naxkawob’resi lix komonileb’ sa’ junkab’al naq neke’raatina rib’ chirib’ileb’ rib’. Anajwan neke’aatinak rajal chirix Kim, Taaqehin sa’ junkab’al.
Xkab’, li Dios naxk’ut lix rahom choq’ reheb’ li ralal xk’ajol naq naxb’oq’eb’ li profeet
Anajwan, li ruchich’och’ sub’b’il “sa’ xyi li pleet a’in re aatin ut choqink chirix li k’a’ru k’oxlanb’il” (Jose Smith—Resilal 1:10). Laj Pablo naxjultika qe naq “k’a’jo’ xk’ihaleb’ li [xyaab’ kuxej] wank sa’ ruchich’och’ ” (1 Korintios 14:10). B’ar wan reheb’ li xyaab’ kuxej naxtaqsi rib’ chi saqen ru sa’ xb’een li choqink? A’an xyaab’ xkuxeb’ li profeet, aj ilol na’leb’, ut aj k’utb’esinel re li Dios.
Nanaq sa’ inch’ool naq chirix naq kincho’e’ sa’ 2018 ut xinsutq’i sa’ lin k’anjel, wankin chaq sa’ xk’uuleb’aaleb’ li b’eleb’aal ch’iich’ chixk’atq li oficiin re li Iglees. Kiwab’i xyaab’ xkux li Awa’b’ej Russell M. Nelson, yoo xpatz’b’al ink’ab’a’, “Taniela, Taniela.” Xin’alinak re tinwulaq rik’in, ut a’an kixpatz’ we chan ru naq wankin.
Xinye re, “Yookin chi usaak, Awa’b’ej Nelson.”
A’an kixk’e inna’leb’ ut kinixq’alu. Kiweek’a chi yaal lix k’anjel jun profeet choq’ re li “jun.”
Li Awa’b’ej Nelson ak nawulak sa’ naab’aleb’ tenamit re li ruchich’och’. Sa’ lin k’a’uxl, moko ka’aj ta wi’ naxtenq’aheb’ li k’iila tenamit, a’an b’i’ naxtenq’aheb’ li k’iila tenamit sa’ “junjunqal.” Sa’ xb’aanunkil a’an, yoo chixwotz’b’al lix rahom li Dios choq’ re chixjunileb’ li ralal xk’ajol.
Toje’ chaq, li raatin re li Awa’b’ej Nelson kiwan jo’ jun yo’leb’aal re kawilal ut musiq’aak choq’ reheb’ li qakomon aran Filipinas. Jo’ sa’ chixjunil li ruchich’och’, kiwan naab’al li ch’a’ajkilal sa’ Filipinas chiru li chihab’ 2020 xb’aan li nimla yajel COVID-19, jo’ ajwi’ xb’aan xpuk’ik chaq li volcan, eb’ li hiik, eb’ li ninqi kaq-sut-iq’, ut eb’ li b’uut’iha’.
A’b’an, jo’ jun xaqal li saqen li narisi li chamal q’ojyinal choql re xiw, junaatalil, ut roso’jik li ch’oolej, kichal li raatin li profeet. A’an kixb’oq chixjunil li ruchich’och chi kuyuk sa’ ut chi tijok, ut chi xik chi uub’ej, us ta wan li nimla yajel. Kooxb’oq chixk’eeb’al li qochoch choq’ loq’laj na’ajej re paab’aal. Kixb’oqeb’ laj santil paab’anel yalaq ta b’ar wankeb’ naq te’roxloq’i chixjunileb’ li ralal xk’ajol li Dios ut naq taqakanab’ chi numtaak li Dios sa’ li qayu’am.2
Ke’xtoch’ ajwi’ li qaam li video toje’ ki’el chaq chirix lix nawom xch’ool li Awa’b’ej Nelson chirix lix wankilal li b’antioxink ut lix tij sa’ roso’jik, li ke’ab’iman sa’ chixjunil li ch’och’ Filipinas.3 Sa’ Leyte, xk’utman li video sa’ jun k’anjel re naab’aleb’ li paab’aal, ut kik’ute’ ajwi’ xb’aan jun aj tij sa’ jalan chik paab’aal. Jo’ chixjunil li ruchich’och’, k’a’jo’ naq osob’tesinb’il li tenamit Filipinas chireek’ankil lix rahom li Dios rik’in li raatin lix profeet sik’b’il ru xb’aan.
Rox, li q’usuk naru chi wank jo’ xk’utb’esihom lix rahom li Dios choq’ reheb’ li ralal xk’ajol
Wan naq li Dios naxk’ut li rahom naq nokoxq’us. A’in jun na’leb’ re xjultikankil qe naq a’an nokoxra ut naxnaw aniho laa’o. Li tuqtuukilal li naxyeechi’i wan choq’ re chixjunileb’ li neke’b’eek sa’ xb’ehil li sumwank ut li wankeb’ xch’ool chixk’ulb’al li q’use’k.
Naq naqak’e reetal li q’use’k ut naqak’ulub’a chi anchal qach’ool, na’ok choq’ jun musiq’ejil cho’e’k. Ani b’i’ nawulak chiru cho’e’k? A’b’an choq’ re li ani naraj ru ut wan xch’ool chixk’ulb’al, li cho’e’k naru chixkolb’al lix yu’am. Li Qaawa’ naxq’useb’ li ani naxraheb’. A’an li naxye li loq’laj hu (chi’ilmanq Hebreos 12:5–11; Helaman 12:3; Tzol’leb’ ut Sumwank 1:27; 95:1). Li q’use’k a’an, malaj li musiq’ejil cho’e’k, tixk’e chi jalaak li qayu’am jo’ ajb’il ru. Taqak’e reetal, ex was wiitz’in, naq a’an naxch’ajob’resi ut naxsaqob’resi li qaam.
Laj Jose Smith, li profeet re lix k’ojob’ankil wi’chik li evangelio, a’an kiq’use’ ajwi’. Chirix naq ke’sach chiru laj Jose li 116 perel hu re lix Hu laj Mormon, li Qaawa’ kixq’us a’ut kixk’ut ajwi’ lix rahom choq’ re naq kixye: “Ink’a’ raj kaxuwaheb’ ru li winq wi’chik chiru li Dios. … Laaʼat bʼan tento raj naq tiikat chaq chi paabʼank. … K’e reetal, laa’at aj Jose, ut kisik’e’ aawu. … Chijultiko’q aawe, li Dios a’an aj uxtaan; jo’kan ut, jal aak’a’uxl” (Tzol’leb’ ut Sumwank 3:7–10).
Sa’ 2016, naq wankin chaq sa’ mision aran Little Rock, Arkansas, kinpatz’ re li Hermano Cava naq tixk’am jun pakeet rik’in li wanab’, li wan chaq aran Fiji. Li k’a’ru xsume moko ninwoyb’eni ta. “Awa’b’ej Wakolo,” chan, “laa wanab’ kikam ut ak kimuqe’ lajeeb’ kutan chaq.” Kinraho’ ut kipo’ b’ayaq inch’ool xb’aan naq lin junkab’al moko xe’xye ta we.
Wulajaq chik, naq li wixaqil yoo chixtzolb’aleb’ li misioneer, ki’ok sa’ li waam li k’oxlahom a’in: “Taniela, chixjunil li k’a’ru nakak’ul, a’an re aachaab’ilob’resinkil ut re naq tatk’iiq. Yookat chixk’utb’al ut chixwotzb’al lix nawom aach’ool chirix lix tojb’al rix li maak xb’aan li Jesukristo; anajwan b’eresi laa yu’am jo’ chanru a’an.” Xjultiko’ we naq “us xaq re li winq li naq’use’ xb’aan li Dios: jo’kan naq miqatz’eqtaana li q’usb’al li naxk’e li nimajwal Dios” (Job 5:17). A’an jun li musiq’ejil cho’e’k choq’ we, ut sa’ junpaat kiweek’a.
Tz’aqal naq yookin chaq chixk’oxlankil li xink’ul chaq, kipatz’e’ we naq tintiqeb’ lin k’oxlahom sa’ li aatinak. Xinwotz li na’leb’ li toje’ xink’ul: xb’een, li Santil Musiq’ej xinixq’us, ut xwulak chiwu xb’aan naq ka’ajwi’ laa’in xwab’i chaq; xkab’, sa’ xk’ab’a’ lix mayej li Kolonel, laa’in ink’a’ chik tinye naq nikine’xrahob’tesi ut neke’xyal wix lin ch’a’ajkilal, tinye b’an naq “neke’xk’e inna’leb’ ”; ut rox, b’antiox re lix yu’am tz’aqal re ru ut chi maak’a’ xmaak li Kolonel, laa’in ink’a’ chik tinye naq lin majelal naxk’ut naq q’un inmetz’ew, tinye b’an naq naxk’e “inhoonal chi chaab’ilo’k.” Li k’a’ru xink’ul chaq xinixtenq’a chixnawb’al naq li Dios nokoxq’us xb’aan naq a’an nokoxra.
Ninraq li waatin. Li qaChoxahil Yuwa’ ut li Jesukristo, li Ralal, neke’xk’ut lix rahom naq neke’xkanab’ naq laa’o naru toowanq sa’ komonil chi junelik rik’ineb’ a’an ut li qajunkab’al, naq neke’xb’oqeb’ li profeet sa’ li qakutankil re qatzolb’al ut qatenq’ankil, ut naq nokohe’xq’us re qatenq’ankil chi tzolok ut chi k’iik. “B’antioxinb’ilaq taxaq re li Dios xb’aan li maatan li maak’a’ xjuntaq’eetankil li kixk’e chaq sa’ lix choxahil Alal,”4 a’ li Qaawa’ waklijenaq chi yo’yo, li yo’yookil Kristo. Sa’ xk’ab’a’ li Jesukristo, amen.