Li Dios sa’ qayanq
Li Dios wan sa’ qayanq—ut yoo chi k’anjelak sa’ li qayu’am ut chixb’eresinkileb’ li ralal xk’ajol.
Chalen chaq xtiklajik, li Dios na’aatinak rik’in xtz’uumal reheb’ lix moos, eb’ li profeet.1 Sa’ li eq’la a’in, xqab’i li raatin lix profeet li Dios choq’ re chixjunil li ruchich’och’. Nakatqara, Awa’b’ej Russell M. Nelson, ut nintz’aama re chixjunil naq te’xtzol ut te’rab’i laa waatin.
Naq maji’ nink’et kab’laju chihab’, lin junkab’al ak x’eelelik wiib’ sut sa’ li qochoch re xtikib’ankil chi ak’il li qayu’am sa’ xyanq li choqink, li xuwak, ut li sachk li xchal rik’in li pleetik ut li jachok-ib’ sa’ xjolomil li tenamit. Ch’a’ajeb’ li kutan a’an choq’ we, a’b’an choq’ re inna’ inyuwa’ jwal nim tana’ li xiw li ke’reek’a.
Li qana’ qayuwa’ ink’a’ mas koohe’raatina laa’o lix kok’al kaahib’o chirix li rahilal a’an. Ke’riiqani li ch’a’ajkilal ut li rahilal chi anchaleb’ xmetz’ew. Numtajenaq tana’ lix xiweb’, junelik wan ut yoo chaq chixsachb’al xyo’onihomeb’.
Li rahil kutan a’an chirix li Guerra Mundial II kixjal li ruchich’och’. Kinixjal laa’in.
Sa’ li kutan a’an, sa’ xchamal lin junaatalil, naab’al sut xinpatz’, “Ma toj wan li yo’onink sa’ ruchich’och’?”
Eb’ li anjel sa’ qayanq
Naq xink’oxla li patz’om a’in, xink’oxlaheb’ li saaj misioneer aj America li ke’k’anjelak sa’ qayanq chiruheb’ li chihab’ a’an. Ke’xkanab’ li sahil wank sa’ rochocheb’ chi najt ut ke’k’ulun sa’ Alemania—xch’ocheb’ li ani toje’ ke’pleetink reheb’—re xyeechi’inkil xyo’onihom li qatenamit. Ink’a’ ke’k’ulun re xyeeb’al naq wan qamaak, re qaq’usb’al, chi moko re xk’eeb’al qaxutaan. Chi anchaleb’ xch’ool ke’xq’axtesi jun raqal lix yu’ameb’ ut maajun reeqaj ke’xsik’, ka’ajwi’ ke’raj xtenq’ankileb’ li ras riitz’in chixtawb’al li sahil ch’oolejil ut li tuqtuukilal li ak xtawomeb’.
Choq’ we, tz’aqaleb’ re ru li saaj winq ut ixq a’an. Ninnaw naq ke’wan xmajelaleb’, a’b’an choq’ we ink’a’. Junelik tinjuntaq’eetaheb’ rik’in li anjel re saqen ut taqenaqil loq’al, aj k’amol re li uxtaan, li chaab’ilal, ut li yaal.
Us ta nujenaq li ruchich’och’ rik’in eetz’unk, raho’k, xik’ ilok, ut xuwak, lix b’aanuhomeb’ ut li raatineb’ li saaj a’in ke’xnujob’resi inch’ool rik’in yo’onihom. Li esil chirix li evangelio li jultikanb’il xb’aaneb’ kixq’ax ru yalaq chik na’leb’ ut rahilal re li ruchich’och’ a’in. Kixk’e choxahil xsumenkileb’ li qaninqi patz’om sa’eb’ li ch’a’ajkil kutan a’an.
Li esil, a’an naq yo’yo li Dios ut naq nokoxra, us ta wan li ch’a’ajkilal, li sachk, ut li choqink. A’an kixk’utb’esi rib’ chi yaal sa’ li qakutan re xk’ojob’ankil wi’chik li saqen ut li yaal—lix evangelio ut lix Iglees. A’an yoo wi’chik chi aatinak rik’ineb’ li profeet; li Dios wan sa’ qayanq—ut yoo chi k’anjelak sa’ li qayu’am ut chixb’eresinkileb’ li ralal xk’ajol.
Jwal sachol ch’oolej li na’leb’ naqataw naq taqatz’il rix li na’leb’ kixk’uub’ li Dios chirix li kolb’a-ib’ ut li taqenaqil loq’al, li k’uub’anb’il na’leb’ re sahil ch’oolejil, choq’ reheb’ li ralal xk’ajol. Naq naqeek’a naq maak’a’ qawankil, naq tz’eqtaananb’ilo, malaj sachb’ilo, naqatzol naq naru taqanaw naq moko sachsooko ta sa’ xch’ool li Dios—relik chi yaal, naq a’an naxyeechi’i re chixjunileb’ li ralal xk’ajol jun maatan jwal nim: naq “taqeechani xyeechi’ihom li Dios, sum’eechaninelaqo qochb’een li Kristo.”2
K’a’ru naraj naxye a’in?
Naq taawanq qayu’am chi junelik ut xtz’aqalil xsahil qach’ool,3 ut naq tooruuq “chireechaninkileb’ li k’ojarib’aal, li awa’b’ejihom, li taqlanelil, ut li wankilal.”4
Tuulan naweek’a chixnawb’al naq naru taqak’ul li chaq’al ru ut taqenaqil maatan a’in—moko xb’aan ta aniho laa’o, xb’aan b’an ani li Dios.
Rik’in li nawom a’in, chan tab’i’ ru tooruuq raj chi wech’ok malaj raho’k sa’ qach’ool? Chan tab’i’ ru tooruuq raj chi ilok taq’a naq lix Reyeb’ li rey nokoxb’oq chi taqe’q toj sa’ junaq kutan chalel re choxahil sahilal?5
Li kolb’a-ib’ sa’ qayanq
Xb’aan lix tz’aqal rahok li Dios choq’ qe, ut lix junelikil mayej li Jesukristo, naru naq li qamaak—eb’ li ninq jo’eb’ ajwi’ li kok’—te’sachmanq ut ink’a’ chik te’jultikamanq.6 Tooruuq chi xaqliik chiru a’an chi saq qu, chi wan qak’ulub’, ut chi santob’resinb’il qu.
Numtajenaq inb’antioxihom choq’ re lin Choxahil Yuwa’. Ninnaw naq ink’a’ naxkanab’eb’ li ralal xk’ajol chi b’eek chiru xq’ojyinal li yu’am chi maak’a’ xyo’onihomeb’ choq’ re jun junelikil kutan li q’axal nalemtz’un ru. Kixk’e li na’leb’ li naxk’ut chan ru tooq’ajq rik’in. Ut sa’ xch’oolil chixjunil a’in wan li Ralal raaro xb’aan, li Jesukristo,7 ut lix mayej choq’ qe.
Lix tojb’al rix li maak xb’aan li Kolonel naxjal chi tz’aqal chan ru truuq taqil li qamaak ut li qamajelal. Ruuchil xk’oxlankileb’ rajlal ut reek’ankil naq ink’a’ truuq taatoje’q qix ut naq maak’a’ qayo’onihom, naru taqataw qana’leb’ rik’ineb’ ut tooyo’oninq.8 Li maatan re li jalb’a-k’a’uxlej naxk’e qawankil chixkanab’ankil chiqix li qamaak ut ok choq’ ak’il yo’ob’tesihom.9
B’antiox re li Jesukristo, ink’a’ taanawe’q qu a’ yaal li qamajelal. Naru te’xsaqob’resi qu.
Jo’ laj wajb’ li naxyal chaab’ilo’k, naru taqoksi li qat’anik, li qamajelal, ut li qamaak jo’ tenq’ re rilb’al qib’, xnimob’resinkil li qarahom choq’ reheb’ li qas qiitz’in, ut xsaqob’resinkil qib’ rik’in li jalb’a-k’a’uxlej.
Wi naqajal qak’a’uxl, li qamaak ink’a’ nokorisi chi junelik. Nokoxtenq’a b’an chi xik chi uub’ej.
Toj k’uula’alo anajwan, maji’ naqataw li taqenaqil loq’al ut wankilal li truuq taqeechani. Maajun naxtzol li b’eek ut li aalinak chi ink’a’ nat’ane’ ut naxtoch’ rib’ naab’al sut. Chi jo’ka’in naqataw qana’leb’.
Wi naqayal qaq’e chi anchal qach’ool, junelik naqayal ab’ink chiru lix taqlahom li Dios, ut naqajal qak’a’uxl, nokokuyuk, ut naqayu’ami li naqatzol, chi junjunqil li raqal taqach’utub’ li saqen sa’ li qaam.10 Ut us ta maji’ naqataw ru xtz’aqalil li qawankil anajwan, “naqanaw chi us naq, jo’q’e taak’utunq [li Kolonel],” taqil li rilob’aal sa’ li qe, ut “toxqil ru a’an chi tz’aqal re ru.”11
Nimla yeechi’ihom a’in!
Yaal, wan chi choqinb’il li ruchich’och’. Yaal ajwi’ naq wan li qamajelal. A’b’an miqaxulub’ li qajolom chi maak’a’ qayo’onihom, xb’aan naq naru taqapaab’ li Dios ut li Jesukristo, li Ralal, ut naru taqak’uluba’ li maatan re li Musiq’ej li tooxb’eresi sa’ li b’e a’in li nak’amok sa’ li sahil ch’oolejil ut choxahil sahilal.12
Li Jesus sa’ qayanq
Rajlal ninpatz’, k’a’ raj ru tixk’ut ut tixb’aanu li Jesus wi ta taawanq sa’ qayanq anajwan?
Chirix lix waklijik chi yo’yo, li Jesukristo kixtz’aqob’resi ru lix yeechi’ihom naq taarula’ani “jalan chik lix karneer.”13
Lix Hu laj Mormon: Jun chik ch’olob’anb’il esil chirix li Jesukristo na’aatinak chirix lix k’ulunik chiruheb’ li kristiaan sa’ li ch’och’ America. Wan qik’in li xnimal ru esil a’in jo’ aj yehol xnawom lix k’anjel li Kolonel.
Eb’ li kristiaan sa’ lix Hu laj Mormon ke’wan chixjunpak’al li ruchich’och’—jalan jalanq li resilaleb’, lix na’leb’eb’, ut lix tenamiteb’ rik’ineb’ li kristiaan kik’anjelak wi’ li Kolonel sa’ xyu’am. A’b’an, naab’al li na’leb’ li kixk’ut chiruheb’ juntaq’eet rik’in li kixk’ut sa’ li Santil Ch’och’.
K’a’ut naq kixb’aanu a’in?
Li Kolonel junelik naxk’ut li yaal li ink’a’ najala. Wan xyaalal lix k’utum choq’ re chixjunileb’.
A’an ki’aatinak chirix li yo’onink ut li komonil wank—xch’olob’ankil naq li Dios li qaChoxahil Yuwa’ ink’a’ naxkanab’eb’ li ralal xk’ajol.
Naq wan li Dios sa’ qayanq!
Wiib’ cient chihab’ chaq, li Kolonel kik’ulun wi’chik sa’ ruchich’och’. Rochb’een li Dios Yuwa’b’ej, a’an kixk’ut rib’ chiru laj Jose Smith naq kaalaju chihab’ xyu’am ut kixtikib’ lix k’ojob’ankil wi’chik lix evangelio ut lix Iglees li Jesukristo. Chalen chaq li kutan a’an, xteeman li choxa, ut eb’ laj choxahil taql ke’kub’e chaq sa’ choxa. Kihoyman li saqen ut li nawom chalen li choxahil k’ojarib’aal.
Li Qaawa’ Jesukristo ki’aatinak chi ak’il rik’in li ruchich’och’.
K’a’ru kixye?
Osob’tesinb’ilo naq naab’al li raatin kitz’iib’aak sa’ li Tzol’leb’ ut Sumwank—li naru taaroksi yalaq ani sa’ ruchich’och’ li naraj rilb’al ru ut xtzolb’al. K’a’jo’ xnimal xloq’al li aatin a’an choq’ qe anajwan!
Ut ink’a’ taasachq raj qach’ool naq li Kolonel yoo chixk’utb’al wi’chik li tz’aqal esil re lix evangelio: “Taara li Qaawa’ laa Dios chi anchal aach’ool, ut chi anchal aametz’ew, aak’a’uxl, ut aakawilal; ut sa’ lix k’ab’a’ li Jesukristo tatk’anjelaq chiru.”14 Nokoxmusiq’a chixsik’b’al li Dios15 ut chixyu’aminkil li na’leb’ kixk’utb’esi chiruheb’ lix moos, eb’ li profeet.16
Naxk’ut naq taqatzol qib’ chiqib’il qib’17 ut naq toowanq “chi nujenaq rik’in rahok choq’ reheb’ chixjunil li winq.”18
Nokoxb’oq chi wank choq’ li ruq’ ut chixb’aanunkil li us.19 “Moorahok yal chi aatin … choorahoq b’an rik’in qab’aanuhom ut chi tz’aqal yaal.”20
A’an nokoxb’oq chixpaab’ankil lix nimla taqlahom: re rahok, wotzok, ut xb’oqb’al chixjunil chixk’ulb’al lix evangelio ut lix Iglees.21
Naxk’e qataqlankil naq te’qakab’la li santil ochoch ut naq too’ok ut took’anjelaq aran.22
Naxk’ut chiqu chan ru too’ok choq’ xtzolom—naq li qach’ool ink’a’ tixsik’ li wankilal, li b’ihomal, li k’ulub’aak, chi moko li opiis. Naxk’ut chiqu naq “taqatz’eq chiqix li k’a’aq re ru re li ruchich’och’ a’in, ut taqasik’ li k’a’ru re jun q’axal chaab’il wi’chik.”23
Naxtz’aama naq taqasik’ li sahil ch’oolejil, li saqen, li tuqtuukilal, li yaal,24 ut xq’axb’al ru li kamk ut xk’ulb’al li junelik yu’am li yeechi’inb’il qe.25
Cho’aatinaq chirix li na’leb’ a’in. K’oxla naq li Jesus taachalq raj sa’ laa teep malaj uq’ej, malaj sa’ laa wochoch anajwan. K’a’ raj ru taa’uxq?
A’an taaril raj xsa’ laa waam. Maak’a’aq raj aj-e li nak’utun chawix. A’an tixnaw raj anihat tz’aqal. A’an tixnaw raj li rajom aach’ool.
Tixwaklesiheb’ raj li ani tuulan ut kub’enaq xch’ool.
Tixk’irtesiheb’ raj li yaj.
Tixnimob’resi raj xpaab’aaleb’ ut xkawilal xch’ooleb’ li neke’wiib’an xch’ool.
Tixk’ut raj chiqu chan ru xteeb’al li qach’ool chiru li Dios ut xtenq’ankileb’ li qas qiitz’in.
Tixk’e raj reetal ut taaroxloq’i xmaak’a’il li b’alaq’, li tuulanil, x’anchalil li ch’oolej, li paab’aal, li toqob’ank-u, ut li tz’aqal rahok.
Rik’in rilb’al xsa’ ru yal ta jun sut, toojalaaq raj chi junelik. Toojalaaq raj chi junajwa. Jalb’ilaqo raj xb’aan li qanawom naq li Dios wan sa’ qayanq chi yaal.
K’a’ru tento taqab’aanu?26
Najultiko’ we rik’in chaab’il ch’oolej lin yu’am naq yookin chaq chi k’iik. Wi ta tinruuq chi q’ajk sa’ li kutankil a’an, tink’ojob’ raj xch’ool li saaj winq a’an ut tinye re naq chikanaaq sa’ li chaab’il b’e ut naq mixkanab’ sik’ok. Ut tinpatz’ raj re naq tixb’oq li Jesukristo sa’ xyu’am, xb’aan naq li Dios wan sa’ qayanq!
Eere laa’ex, ex was wiitz’in, ex wamiiw, ut reheb’ chixjunil li neke’xsik’ xsumenkileb’, li yaal, ut xsahileb’ xch’ool, ninye a’in: meekanab’ sik’ok rik’in paab’aal ut kuyum.27
Chexpatz’oq, ut texk’uluq. Chextochʼoq, ut taateemanq cheru.28 Chepaab’ li Qaawa’.29
Sa’ li qayu’am wulaj wulaj, aajel ru ut nimla osob’tesink li xtawb’al li Dios.
Wi taqatz’eq chiqix li q’etq’etil ut toonach’oq rik’in lix k’ojarib’aal chi yot’b’il qach’ool ut tuulan qamusiq’,30 a’an ajwi’ taanach’oq qik’in.31
Wi taqasik’ ru xtaaqenkil li Jesukristo ut chixk’amb’al xb’ehil li tzolom, chi junjunqil li raqal, taachalq li kutan taqak’ul wi’ li xnimal ru maatan re xk’ulb’al xtz’aqalil xsahil qach’ool.
Ex wamiiw, li qaChoxahil Yuwa’ nekexxra chi tz’aqal. Ak xk’ut lix rahom chi numtajenaq, ut li jwal nim, a’an xq’axtesinkil li Ralal Junaj Chirib’il chiru jo’ mayej ut maatan choq’ reheb’ li ralal xk’ajol, re naq tooruuq chi sutq’iik rik’in li qana’ qayuwa’ sa’ choxa.
Ninch’olob’ xyaalal naq yo’yo li qaChoxahil Yuwa’, naq li Jesukristo naxb’eresi lix Iglees, ut naq li Awa’b’ej Russell M. Nelson, a’an lix profeet.
Nekexwosob’tesi ut ninyeechi’i inrahom choq’ eere sa’ li sahil Paswa a’in. Tehomaq eech’ool chiru laj Kolol qe ut aj Tojol qix, maak’a’ naxye lee ch’a’ajkilal, lee rahilal, ut lee maak; taaruuq teenaw naq yo’yo, naq nekexxra, ut naq b’antiox re a’an, maajo’q’e texkanaaq eejunes.
Li Dios wan sa’ qayanq.
Ninch’olob’ xyaalal a’in sa’ lix loq’laj k’ab’a’ li Jesukristo, amen.