Taekinaki, iroun Jenedy Paige

Ritembwa 24

E Kanga Iesu Kristo ni Kaota Ana Tangira Ibukiu?

Kiritimati

Te Uaia ni Marooro

E kairaki iroun te membwa n te kiraati ke te beretitentii n te kooram, e na kabanea 10–20 te miniti

Ni moan waakin te bootaki, ikotaki n taekina Aia Botoniango Ataeinnaine ke Aia Botoniango Kaain te Kooram n te Nakoanibonga ae te Aaron. Ngkanne kaira te marooro iaon te mwakuri ni kamaiu ao ni karietataaki ni kabongana teuana ke e raka riki titiraki aika inano ke aika bon am kario (taraa Aeniboki ni Kabuta,, 10.2, 11.2). Bairei aron mwakuriian bwaai ake a tia n maroroakinaki.

• Maiuakina te euangkerio. N na kanga ni kunea te kimwareirei n iriiran Iesu Kristo?

• Tararuakiia naake iai kainnanoia. Antai n ara uoote ke n te komiuniti aika a kainnanoa ara ibuobuoki? Ti na kanga ni buokiia?

• Kaoia ni kabane bwa ana karekea te euangkerio. Ti na kanga ni buokiia tabeman ni katauraoi ibukin te mwakuri ni mitinare?

• Katiteuanakiia utu in akea tokina. Ti na kanga n tibwatibwa nakon aia kekeiaki kaain ara uoote ni karaoa rongoronngon te utu ao mwakuri n te tembora?

N tokin te reirei, ngkana e riai, karaoi waaki aikai:

• Kaota koauan te reirei are e reiakinaki.

• Kauringa te kiraati ao membwa n te kooram iaon babaire ao kakao ake a karaoaki n tain te bootaki.

Reirei te Reirei

Kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

Imwaain ae E bungiaki, e kinaaki Iesu Kristo bwa Iehova ae moan te kakannato. Boni Ngaia are e “Tangiraki ao e Rineaki irou man te moan tai” (Mote 4:2), e onrake n te mimitong, te akoi, ao te koaua (taraa Ioane 17:5; Reirei ao Berita aika Tabu 93:11). Ao ngke E bungiaki, Maria “e kawenea ni nen te man n amarake ba akea neia n te auti n iruwa (Ruka 2:7). Bukin tera ngkai Iesu Kristo e tauraoi ni butimwaea Ana beku n riki bwa te Tia Kamaiu e ngae ngke e ranonaki bwa e mangori aron rokona nakon te aonaaba? Te kaeka ae bebete bwa E bon tangiriira. Ngke Nibwaai e noora bungiakin te Tia Kamaiu n te mii, “ana tangira te Atua, are e tibwatibwaki nako nanoia natin te aomata n taabo nako; mangaia ae, bon ngaia te bwai ae moamoa tangirana nakon tangiran bwaai nako” (1 Nibwaai 11:22).

Te Kiritimati bon te tai ae onoti n iangoia raoi bwa e kanga bungiakin te Tia Kamaiu ao ana anga karea ni kamaiu ni kaota Ana tangira ibukim. Ngkai ko katauraoi ni buokiia kairake ake ko reireiniia n namakina ana tangira te Tia Kamaiu, iangoia ni manga rinanoa Ruka 4:16–21; Ioane 3:16–17; 3 Nibwaai 27:13–16; ao ana marooro Unimwaane D. Todd Christofferson “Ana Tangira te Atua Ibukira” (Riaona, Nob. 2021, 16–19).

Te Uaia n Reirei

Ngkai a kan roko n tokin aia kamatebwai n te Nu Tetemanti n te ririki aei kaain am kooram ke te kiraati, ko na kona n tuangiia kairake bwa a na tibwauai tabeua karaki man te Nu Tetemanti ake a mamate nanoia iai ike e kaota Ana tangira te Tia Kamaiu nakoia naake Irarikina. Kam kona naba n uaia ni wareki tabeua karaki man aikai. Tera ae a reiakinaki ni karaki aikai biukin ana tangira te Tia Kamaiu ibukira? Ni buokiko ni waaki nako ni maroroakina ana tangira te Tia Kamaiu, kabonganai waaki ni kakukurei n aron aikai.

• Kaoiia kaain am kiraati ke te kooram n iangoa aia tangira te Tama are i Karawa ao Iesu Kristo ibukira n ai aron te bwaene n uee (taraa Russell M. Nelson, “Divine Love,” Ensign, Beb. 2003, 24). Iangoia n anganiia ni kaka temanna te uee ae koreaki man te beeba ao tuangiia bwa a na wareka teuana te rongorongo ma koroboki aika tabu inanon “Reitan Bwaai n Mwakuri.” Tuangiia bwa iaon aia uee ao a na korei baike a reiakin ibukin ana tangira te Tama are i Karawa ao Iesu ibukira. Ngkana a tia n tibwauai baike a reiakin, a kona ni booti aia uee ni karaoa iai te bwaene. Ti na kanga ni kinai raoi kawai ike a kaota iai Aia tangira te Tama are i Karawa ao Iesu Kristo?

• Tabeua anene n taromauri a kabwarabwarai kawai ike te Tia Kamaiu e kaota Ana tangira ibukira (taraa, n aron te katooto, “I Ataia Bwa E Maiu Iesu,” Anene n Taromauri, nambwa 136). A kona kaain te kiraati ke te kooram n rinea te anene n taromauri ao n tibwauai taneiai ngke a tia n namakina ana tangira te Tia Kamaiu n te kawai ae tii te arona nakoia naake a kabwarabwaraaki n te anene. Tera tabeua kawai ike e a tia ni kaota Ana tangira te Tia Kamaiu ibukira? Ngkai taan ririmwiin Kristo, ti na kanga ni buokiia tabeman n namakina Ana tangira?

• A mwaiti iango aika a kewe n te aonaaba ibukin ana tangira te Atua ibukira. N aron te katooto, tabeman a bae n taku bwa ngkana a kaubwai aomata ke a maiu raoi, are nanona bwa a tangiraki riki iroun te Atua nakoia ake tabeman. Tabeman a namakinna bwa ngkana e bon tangiriira raoi te Atua, E na butimwaira n arora ao n aki tuangiira bwa ti na bitaki. Tera rongorongo aika a kewe ibukin ana tangira te Atua ake ti kaongoaki? Ni buokia ni kaitarai rongorongo aikai, ko kona n tuangiia kairake bwa a na rinanoa ana marooro Unimwaane D. Todd Christofferson “Ana Tangira te Atua” ke ana marooro Beretitenti Dallin H. Oaks “Love and Law” (Riaona, Nob. 2009, 26–29). Tera koaua ake ti kunei inanon rongorongo aikai ake a buokiira ni mataata n ana tangira te Atua ibukira?

E kona ni kabotauaki ana tangira te Tama are i Karawa ao Iesu Kristo nakon te bwaene n uee.

Mwakuri ma te Onimaki

Kaunga te kiraati ke membwa n te kooram bwa a na iangoi man korei baike a na karaoi n mwakurii namakin ake a karekei n te bong aei. Ngkana a tangiria, a kona n tibwauai aia iango. Kaoiia bwa a na iangoia bwa e kanga mwakurian aia namakinan ni kakorakorai reitakiia ma Tamara are i Karawa ao Iesu Kristo.

Reitan Bwaai n Mwakuri

• Ioane 3:16–17; 15:9–13; I-Rom 8:35–39; Ebera 12:5–6, 9–11; 1 Nibwaai 11:21–23; Aramwa 7:11–12; 3 Nibwaai 11:13–17; Moronaai 7:45–48

• Michael John U. Teh, “Ara Tia Kamaiu ae Onoti,” Riaona, Meei 2021, 99–101

• Taniela B. Wakolo, “E Tangiriia Natina te Atua,” Riaona, Meei 2021, 94–96

Reirei n ana Kawai te Tia Kamaiu

Bwaai ni kabane ake e karaoi te Tia Kamaiu inanon Ana mwakuri iaon te aba e kaungaaki man te tangira—Ana tangira ibukin Tamana ao Ana tangira ibukira ni kabane. Ma ana tangira Kristo inanora, ti na ukeri kawai nako ake a tauraoi ni buokiia tabeman n reiakina taekan Kristo ao n Nakoina. Te tangira bon oin bukin ma ungan nanora ibukin ara anga reirei.