Bōkļo̧k, jān Jenedy Paige

Tijem̧ba 24

Elmen An Jisōs Kraist Kwaļo̧k Iakwe eo An n̄an N̄a?

Kūrijm̧ōj

Ko̧o̧njeļ Ippān Doon

Tōl jān eo juon uwaan būreejtōnji eo an doulul eo ak kūlaaj eo; tarrin 10-20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Jiron̄ ro ak Unin Tōl eo an Doulul eo an Priesthood eo an Aron. Innem tōl juon iien ekōnono kōn jerbal in lo̧mo̧o̧r im mour indeep ippān Anij ijo eutiej tata ilo ami kōjerbal juon ak elōn̄ļo̧k kajjitōk ko ilaļ ak kajjitōk ko am̧ make (lale Bok in Bōk Meļeļe Eļap,, 10.2, 11.2). Karōk wāween ko n̄an kōm̧m̧ane ta eo kom̧ij kōnono kake.

• Mour kōn gospel eo. Ekōjkan ad maron̄ lo lan̄lōn̄ im m̧oor Jisōs Kraist?

• Kea kōn ro rej pād ilo aikuj. Wōn eo ilo ward ad ak jukjuk in pād eo ad me ej aikuj jipan̄ ko ad? Ewi wāween ad jipan̄ er?

• Karuwaineneik aolep n̄an bōk gospel eo. Ewi wāween ad jipan̄ doon kōppopo n̄an jerbal in mijenede?

• Kobaik baam̧le ko n̄an indeeo. Ewi wāween ad maron̄ jipan̄ļo̧k kijejeto ko an ward eo ad n̄an kōm̧m̧ane menmenbwij an baam̧le im jerbal in tampeļ?

Ilo jem̧ļo̧kin katak in, n̄e ekkar, kōm̧m̧ane laajrak in:

• Kam̧ool kōn pedped in katak ko kar katakin kaki.

• Kakeememej ro uwaan kūlaaj eo ak doulul eo kōn karōk ko im kūr ko me kar kōm̧m̧ane ilo iien kweilo̧k eo.

Katakin Katak eo

Kar tōl jān juon ritōl erūtto ak juon jodikdik; tarrin 25–35 minit

Kōpooj Eok Make ilo Jetōb

M̧okta jān An kar ļōtak, Jisōs Kraist kar ņae etan Jeova eo eļap. E kar an Jemen “Jitōnbōro im Rikāālet jān jinoin,” (Moses 4:2), obrak kōn aiboojoj, tūriam̧o, im m̧ool (lale Jon 17:5; Katak im Bujen ko 93:11). Im ke E ekar ļotak, Mary ekar “kababu E ilo menjer; bwe ejjeḷọk jikier ilo iṃōn ruwamāejet” (Luk 2:7). Etke Jisōs Kraist ekar erra ilo jerbal eo An āinwōt juon Rilo̧mo̧o̧r men̄n̄e ekar meļeļein itok n̄an laļin ilo ettā otemjej? Uwaak eo epidodo ej kōnke E ej iakwe kōj. Ke Nipai ekar loe ļotak eo an Rilo̧mo̧o̧r ilo etōņak “iakwe eo an Anij, eo kajeeded e ijoko jabdewōt ilo būruōn ro nejin armej; kōn menin, e in elukkuun ļap kōttōpare jān men ko otemjej” (1 Nipai 11:22).

Kūrimōj ej juon iien ejenolo̧k n̄an linūri wāween an ļotak eo Rilo̧mo̧o̧r im en̄taan in pinmuur eo An kwaļo̧k iakwe eo An n̄an kōj. Ilo am̧ kōpopo n̄an jipan̄ jodikdik ro kwōj katakin en̄jake iakwe eo an Rilo̧moor eo, lōmnak n̄an etale Luk 4:16–21; Jon 3:16–17; 3 Nipai 27:13–16; im ennaan eo an Elder D. Todd Christofferson “Iakwe eo an Anij” (Liaona, Nob. 2021, 16–19).

Ekkatak Ippān Doon

Ilo an kūlaaj ak doulul eo am̧ itok n̄an āliktata in katak ko am ilo Kalim̧m̧ur Ekāāl ilo iiō in, komaron̄ kajjitōk ippān jodikdik ro n̄an kwaļo̧k jet iaan bwebwenato ko ilo Kalim̧m̧ur Ekāāl em̧m̧an tata ipper me Rilo̧mo̧o̧r ekar kwaļo̧k iakwe eo An n̄an ro Ipelaakin. Komaron̄ riiti jet iaan bwebwenato kein ippān doon. Ta eo bwebwenato kein rej katakin kōj kōn iakwe eo an Rilo̧mo̧o̧r n̄an kōj? N̄an jipan̄ kōļapļo̧k kōnono kōn iakwe eo an Rilo̧mo̧o̧r, kōjerbale m̧akūtkūt kein āinwōt kein relaajrak.

• Karwainene membōr in kūlaaj ak doulul eo n̄an lōmnak kōn iakwe eo an Jemedwōj Ilan̄ im Jisōs Kraist n̄an kōj āinwōt juon bat in wūt aiboojoj (lale Russell M. Nelson, “Divine Love,” Ensign, Feb. 2003, 24). Ļōmņak n̄an leļo̧k n̄an juon armej juon wūt emōj m̧wijiti jān pepa im kajjitōk ippeer kajjojo n̄an riiti juon iaan eo̧o̧n ko ilo “Kein Jipan̄ ko rej Rie.” Kajjitōk ipper n̄an jeje ilo wūt eo aer ta eo rekar katak kōn iakwe eo an Jemedwōj Ilan̄ im Jisōs n̄an kōj. Ilo aer kwaļo̧k ta eo rekar ekkatak, remaron̄ aiin wut ko aer ippān doon n̄an kōm̧m̧ane juon bat in wūt. Elmen ad em̧m̧anļo̧k ad kile wāween ko Jemedwōj Ilan̄ im Jisōs rej kwaļo̧k iakwe eo Aer n̄an kōj?

• Jejjo al rej kōmeļeļeik wāween ko Rilo̧mo̧o̧r ej kwaļo̧k iakwe eo An n̄an kōj (lale, n̄an waanjon̄ak, “Ij Jela Bwe Aō Dri Pinmuur ej Mour,” Al ko Al in Ajri, no. 28). Membōr in kūlaaj ak doulul eo remaron̄ kāālet juon al im kwaļo̧k aer en̄jake ke rekar en̄jake iakwe eo an Rilo̧mo̧o̧r ilo wāween ko ej āinwōt an kōmeļeļe ilo al eo. Ta jet bar wāween ko Rilo̧mo̧o̧r ekar kwaļo̧k iakwe eo An n̄an kōj? Āinwōr ro rej ļoore Kraist, elmen ad jipan̄ ro jet en̄jake iakwe eo An?

• Elōn̄ ļōmņak reriab ilo laļin kōn iakwe eo an Anij n̄an kōj. N̄an waanjon̄ak, jet remaron̄ lōmņak bwe n̄e armej rej m̧weie im ejimourur, ej meļeļein bwe Anij ej iakwe er eļapļo̧k jān ro jet. Jet remaron̄ en̄jake bwe n̄e Anij elukkuun iakwe kōj, E enaaj bōke kōj ilo jon̄an eo jeped ie im eban kajjitōk ipped n̄an oktak. Ta jet ennaan ko reriab em̧ōj ad ron̄ kōn iakwe eo an Anij? N̄an jipan̄ joļo̧k ennaan kein reriab, komaron̄ kajjitōk ippān jodikdik ro n̄an etale ennaan eo an Elder D. Todd Christofferson “Iakwe eo an Anij” ak ennaan eo an Būreejtōn Dallin H. Oaks “Love and Law” (Liahona, Nov. 2009, 26–29). Ta mool ko jemaron̄ loi ilo ennaan kein rej jipan̄ kōj meļeļe kōn iakwe eo an Anij n̄an kōj?

Iakwe eo an Jemedwōj Ilan̄ im Jisōs Kraist emaron̄ keidi n̄an juon bat in wūt aiboojoj.

Jerbal kōn Tōmak

Rōjan̄ ro uwaan kūlaaj eo ak doulul eo n̄an kejōkļo̧kjeņ im je ta eo renaaj kōm̧m̧ane n̄an mour ekkar n̄an im̧we ko rej en̄jaki rainin. Eļan̄n̄e rej kōņaan, remaron̄ kwaļo̧k ļōmņak ko aer. Karuwainene er n̄an ļōmņak kōn ekōjkan an jerbali im̧we ko aer naaj kōkajoorļo̧k jem̧jerā eo aer ippān Jemedwōj Ilan̄ im Jisōs Kraist.

Kein Jipan̄ ko rej Rie

• Jon 3:16–17; 15:9–13; Rom 8:35–39; Hibru 12:5–6, 9–11; 1 Nipai 11:21–23; Alma 7:11–12; 3 Nipai 11:13–17; Moronai 7:45–48

• Michael John U. Teh, “Ad Make Rilo̧mo̧o̧r,” Liaona, Māe 2021, 99–101

• Taniela B. Wakolo, “Anij ej Iakwe Ajri ro Nejin,” Liaona, Māe 2021, 94–96

Katakin ilo Wāween eo an Rilo̧mo̧o̧r

Aolepen men ko Rilo̧mo̧o̧r ekar kōm̧m̧ane ilo jerbal eo An ilo laļin kar ikideelel jān iakwe—Iakwe eo An n̄an Jemen im iakwe eo An n̄an kōj aolep. Kōn iakwe eo an Kraist ilo būrued, jenaaj kapukot aolepen wāween ko n̄an jipan̄ ro jet ekkatak kōn Kraist im itok n̄an E. Iakwe enaaj un eo im ikdeelel eo n̄an ad katakin.