Anij ej Iakwe Ajri ro Nejin
Ikōņaan kwaļo̧k jilu wāween ko Jemedwōj Ilan̄ ej kwaļo̧k iakwe eo An n̄an kōj, ajri ro Nejin.
Ro jeiū im jatū, ij lan̄lōn̄ ippemi ilo gospel eo an Jisōs Kraist. Ij bōktok ippa iakwe jān membōr ro rekajoor ilo Philippines im ba, ilo etāer, Mabuhay!
Ilo jibbon̄ in Ijtō in, ij kam̧ool kōn Kraist eo emour, bwe E ekar jerkak jān ro remej im bwe An iakwe n̄an kōj im n̄an Jemed ilo Lan̄ erreo im ej n̄an indeeo. Rainin, ikōņaan pedped wōt kōn iakwe eo an Jemedwōj Ilan̄ im Jisōs Kraist n̄an aolep, eo ej waļo̧k jān Pinmuur eo an Jisōs Kraist. “Bwe kōn an Anij yokwe laļ, Ear letok juon wōt Nejin Ear keotak” (Jon 3:16).
Ke rikanaan eo Nipai ekar kajjitōk ippān jān juon enjeļ kōn jeļāļo̧kjeņ eo an kōn Anij, Nipai ekar uwaak, “Ijeļā bwe E ej iakwe aolep ro nejin” (lale 1 Nipai 11:16–17).
Juon eoon jān Bok in Mormon: Bar Juon Kallim̧ur kōn Jisōs Kraist elukkuun kajoor an kōmeļeļeiki iakwe eo ewāppen an Rilo̧mo̧o̧r eo: “Im laļ in, kōn nana ko aer, naaj ekajet E bwe ej men pata; … rej den̄ļo̧ke e, … rej ubrare E, … rej em̧m̧ōje E, im E ej kōtļo̧k e, kōn iakwe in jouj eo An im kōn kijenmej eo An kōn ro nejin armej” (1 Nipai 19:9). Iakwe eo an Rilo̧mo̧o̧r n̄an aolep ej kōketak eo ekajoor ilo aolep men Ej kōm̧m̧ane. Jejeļā bwe ejja āinwōt iakwe eo an Jemed Ilan̄ n̄an kōj, kōnke Rilo̧mo̧o̧r eo ekar katakin ilo ettā bwe E im Jemen “rej juon wōt” (lale Jon 10:30; 17:20–23).
Ewi wāween, innām, jej ke bar kōro̧o̧rleļo̧k im kwaļo̧k ad kam̧m̧oolol kōn iakwe eo Aer n̄an aolep? Rilo̧mo̧o̧r eo ekar katakin kōj naan in karuwainene in eļam waan, ekitbuuj jet men ko: “Eļan̄n̄e kom̧ij yokwe Eō, kom̧ naaj kōjparok kien ko Aō” (Jon 14:15).
Būreejtōn Dallin H. Oaks ekar katakin, “Io̧kwe eo ewānōk im ļap an Anij ej ilo aolepān kōjeram̧m̧an ko an karōk ko an gospel eo An, ekoba m̧ool eo bwe kōjeram̧m̧an ko An rej pojak n̄an jabdewōt ro rej pokake kakien ko An.”1
Ikōņaan kwaļo̧k jilu wāween ko Jemedwōj Ilan̄ ej kwaļo̧k iakwe eo An n̄an kōj, ajri ro nejin.
Juon, Jem̧jerā ko ippān Anij im Baam̧le ej Kwaļo̧k Iakwe eo An
Jem̧jerā ko ad me raorōktata rej pād ippān Jemān im Nejin im ippān baam̧le ko ad make kōnke ad liāp n̄an er rej n̄an indeeo. Karōk in m̧ōņōņō eļap ej juon waļo̧k in iakwe eo an Anij n̄an kōj. Kōn māj ko rejumemej ilo karōk eo an Anij jej m̧ōņōņō in kālet n̄an m̧wijitiļo̧k bwidej im dōkā ko ilo kōj me rej rie kōņaan ko ad raineļap im jāniji kōn pedped ko me rej kalōk jem̧jerā ko an indeeo. Ilo juon meļeļe, menin emaron̄ ņaetan “jerbal in kōb ilo jetōb.” Ilo kōm̧m̧ane jerbal in kōb eo ad ilo jetōb, jej aikuj m̧okta pukot Anij im kūr n̄an E (lale Jeremaia 29:12–13).
Pukot E im kūr n̄an E enaaj jino jerbal eo im letok jikin n̄an kalōk im kōkajoorļo̧k jem̧jerā ko ad indeeo. Ej kōdebakbakļo̧k jon̄an jetōb eo ad im jipan̄ kōj pedped wōt ioon ukōt ta eo jemaron̄ in kabwijere ijjelo̧kin ad mijake ta itulikin ta eo jemaron̄ kabwijere. Ekkatak mour eo im jerbal eo an ad Rilo̧mo̧o̧r Jisōs Kraist enaaj kōmaron̄ ad loe inepata kein jet kōn juon jibadbad indeeo.
Men ko rej kōm̧ad kōj remaron̄ jet iien bōbrae kōj jān ad en̄jake iakwe eo an Anij ilo jem̧jerā ko an baam̧le im m̧akūtkūt ko. Juon m̧am̧a, ke ekar en̄jake bwe device ko rekar bōk irooj ioon jem̧jerā eo an baam̧le eo, ekar wōnlōn̄tak kōn juon wāween n̄an ņa mejļan. Ilo tebōļ in kōjota eo im iien ko jet an baam̧le, ekar ba, “kwaļo̧k Taļboon ko; jen kōm̧m̧ane juon iien ad bwebwenato.” Ej ba bwe en̄in ej jon̄ak eo ekāāl n̄an baam̧le eo aer im bwe ej kōkajoorļo̧k jem̧jerā eo aer āinwōt juon baam̧le n̄e rej kōm̧m̧ane juon iien bwebwenato. Er kiiō rej lan̄lōn̄ kōn ekkōnono ko eļap tokjāer an Itok, Ļoor Eō ippān doon āinwōt juon baam̧le.
Kein Karuo, E ej Kwaļo̧k Iakwe eo An n̄an Ajri ro Nejin ilo an Kūr Rikanaan ro
Laļ in ad rainin ej ibwijleplep kōn juon “tariņae in naan ko im lim̧otak in ļōmņak kein” (Josep Smith—Bwebwenato 1:10). Paul ej kakeememej bwe “elōn̄ … wāween ainikien ilo laļ” (1 Korint 14:10). Ewi wōt iaan ainikien kein aolep rej alikkar im lukkuun meļeļe ilōn̄ in pata in? Ej ainikien eo an rikanaan ro an Anij, rilolo ro, im rikwaļo̧k revelesōn ro.
Ij lukkuun keememej, ālkin aō kar pād ilo iien m̧wijm̧wij eo aō ilo 2018 im bar jepļaakļo̧k n̄an jerbal, ikar pād ilo jikin baak eo ilo opiij ko reļļap an Kabun̄ in. Ejjab to, ikar ron̄ ainikien Būreejtōn Russell M. Nelson ej kūr eō, “Taniela, Taniela.” Ikar ettōrļo̧k n̄an e, im ekar kajjitōk ejet aō mour.
Ikar ba, “Em̧m̧anļo̧k aō pād, Būreejtōn Nelson.”
Ekar letok n̄an eō naan in kōkapilōklōk im bakuwij eō. Ikar lukkuun en̄jake jerbal eo emake an juon rikanaan n̄an “juon.”
Būreejtōn Nelson ekar ekkāke n̄an elōn̄ laļ ko ilo laļ in. Ilo ļōmņak eo aō, ejjab jerbal in karejar wōt n̄an taujin armej ro, ak e ej jerbal in karejar n̄an taujin in “kajjojo.” Ilo kōm̧m̧ane wāween in, ej kwaļo̧k iakwe eo an Anij n̄an aolep ajri ro Nejin.
Raan kein, naan ko an Būreejtōn Nelson rekar erom̧ juon kein jipan̄ n̄an kōkajoor im im̧we armej ro ilo Philippines. Āinwōt ilo aolep laļ ilo laļ in, ilo 2020, Philippines ekar jelm̧ae jorrāān jān ajedeed in COVID-19, barāinwōt juon bōkkoļo̧k in volcano, m̧akūtkūt in laļ, taiboon ko rekajoor, im ibwijlelep ko renana.
Ak, āinwōt juon juron meram ej romaak jān kōto̧ ko rekilmeej kōn mijak, ajjimakeke, im ebbweer naan ko an rikanaan eo rekar itok. Rekar kobaik kūr eo n̄an jitlo̧k im jar aolepān laļ in im ko̧o̧njeļ eo n̄an em̧m̧akūt m̧aanļo̧k wōt mekarta ajedeed in. Ekar kajjitōk ippād bwe jen kōm̧m̧an bwe m̧ōko im̧ōd ren jikin ko kōn tōmak. Ekar kūr ioon Armej ro Rekwojarjar aolep jikin n̄an kautiej ajri ro aolep nejin Anij im kōm̧m̧an bwe Anij en anjo̧ ilo mour ko ad.2
Āinwōt kar pija in naan in kam̧ool eo an Būreejtōn Nelson kōn kajoor in kam̧m̧oolol, im jar in ikkilōk eo an ekar kobrak peļaakin Phillipines.3 Ilo jikin kweilo̧k in Leyte, pija in alooj eo ekar jo̧ ilo juon m̧akūtkūt an kabun̄ ko, im kar barāinwōt kōnono kake āinwōt juon m̧ōttan kōnono an juon pris. Philippines, kobaļo̧k ippān aolepān laļ in, rej lukkuun jeraam̧m̧an im en̄jake iakwe an Anij jān naan ko rikanaan eo An me kar kālete.
Jilu, Kauwe Emaron̄ Erom̧ juon Waļo̧k in Iakwe an Anij n̄an Ajri ro Nejin
Jet iien Anij ej kwaļo̧k iakwe eo An ilo An kauweik kōj. Ej juon wāween kakeememej kōj bwe E ej iakwe kōj im bwe Ejeļā wōn kōj. Kōjeraam̧m̧an kōn aenōm̧m̧an eo Ekar kallim̧ur kake ej peļļo̧k n̄an aolep ro rej etetal peran ilo iaļen bujen im rej m̧ōņōņō in bōk kajim̧we.
N̄e jej kile kauwe eo im jej riwōnm̧ae ro rem̧ōņōņō, ej erom̧ juon iien m̧wijm̧wij ilo jetōb. Wōn ro em̧m̧an ippāer m̧wijm̧wij, ij baj ba? Ak n̄an ro rej aikuji im rej m̧ōņōņō in bōke, emaron̄ erom̧ juon kein lo̧mo̧o̧ren mour. Irooj ej kauweik ro Ej iakwe. Jeje ko rej jiron̄ kōj bwe (lale Hibru 12:5–11; Hilamōn 12:3; Katak im Bujen Ko 1:27; 95:1). Kauwe in, ak iien m̧wijm̧wij in ilo jetōb, enaaj bōktok oktak eo emenin aikuj ilo mour ko ad. Jenaaj kile, ro jeiū im jatū, bwe ej kōkāāl im karreoik tuub ko ilowaad.
Josep Smith, Rikanaan eo an Jepļaaktok eo, kar kauweiki. Ālkin an Josep kar luuji 116 peij ko in Bok in Mormon eo, Irooj ekar jim̧or kajim̧we im kwaļo̧k iakwe ilo an ba: “Kwon kar jab mijak armej eļapļo̧k jān Anij. … Kwon kar tiljek. … Lo, kwe Josep, im em̧ōj kar kāālet eok. … Keememej, Anij e tūriam̧o; kōn menin, ukeļo̧k” (Katak im Bujen Ko 3:7–10).
Ilo 2016, ke ikar jerbale juon mijen ilo Little Rock, Arkansas, ikar kajjitōk ippān Brother Cava n̄an bōkļo̧k juon pakij n̄an leddik eo jeiū errūtto, eo ekar jokwe ilo juon āne ilo Fiji. Uwaak eo an ekar jab juon men eo ikar kōtmāne. “Būreejtōn Wakolo,” ekar illu, “leddik eo jeim̧ em̧ōj an jako im kar kalbwini 10 raan rem̧ootļo̧k.” Ikar būrom̧ōj im aaet kar jidik inepata bwe baam̧le eo aō ekar jab kepaak eō n̄an kōjjeļļāik eō.
Raan eo juon, ke kōrā eo pāleeō ekar katakin mijenede ro, ļōmņak in ekar tuwe jetōb eo aō: “Taniela, aolep en̄jake kein rej n̄an em̧m̧an eo am̧ make im eddōkļo̧k. Kwaar katakin im kwaļo̧k naan in kam̧ool eo am̧ kōn Pinmuur eo an Jisōs Kraist; kiiō mour ekkar n̄ani.” Ikar keememej bwe “E m̧ōņōņō armej eo Anij ej kauweik e; kōn men in … kwōn jab kajekdo̧o̧n … kaje an Eo e Kajoor Bōtata” (Job 5:17). Ekar juon iien m̧wijm̧wij ilo jetōb n̄an n̄a, im tōprak eo an ekar m̧ōkaj.
Ke ikar kōļmenļo̧knen̄ kōn en̄jake in, ikar bōk juon kūr n̄an kwaļo̧k ļōmņak ko aō āliktata kōn ekōnono in. Ilubwilijin men ko jet, ikar kwaļo̧k katak ko me ij kab baj ekkatak jāni: juon, ij kab baj bōk kauwe jān Jetōb Kwojarjar eo im em̧m̧an ippa kōnke ekar n̄a wōt ikar maron̄ ron̄ kake; ruo, kōnke katok eo an Rilo̧mo̧o̧r eo im kanemkwoj eo, ij jāmin naaj bar kōnono kake rej apan̄ ko aō āinwōt mālijjon̄ ko im en̄taan ko ak āinwōt en̄jake in ekkatak; im jilu, kōnke mour eo An ewāppen im ejjeļo̧k an jerawiwi ij jāmin bar kōnono kake rej likjab ko aō im likjab in maron̄ āinwōt m̧ōjņo̧ ko ijjelo̧kin āinwōt aō iien em̧m̧an n̄an eddōkļo̧k. En̄jake in ekar jipan̄ eō jeļā bwe Anij ej kauweik kōj kōnke Ej iakwe kōj.
Ij kōjem̧ļo̧k. Jemed Indeeo im Nejin, Jisōs Kraist, rej kwaļo̧k Aer iakwe ilo aer kōm̧m̧an bwe en pidodo n̄an kōj n̄an bōk jem̧jerā eo ejjeļo̧k jem̧ļo̧kin Ippāer im ro uwaan baam̧le ko ad, ilo Aer kūr ioon rikanaan ro raan kein n̄an aer katakin im jerbal in karejar n̄an kōj, im ilo Aer kauweik kōj n̄an jipan̄ kōj ekkatak im eddōkļo̧k. “Anij kōn mennin letok eo jejjab maron̄ keidi an Nejin,”4 Irooj eo ad ekar jerkakpeje, aaet Kraist eo emour. Ilo etan Jisōs Kraist, amen.