“Lo! N̄a Anij in Mennin Bwilōn̄ ko”
Mennin bwilōn̄ ko, kakōļļe ko, im kabwilōn̄lōn̄ ko kar lo aer ellōn̄ ilubwilijin rikaļoor ro an Jisōs Kraist rainin, ilo mour ko ami im aō.
Ro jeiū im jatū, ej juon jeraam̧m̧an n̄an jutak im̧ami rainin. Koba ippān ro ededeļo̧k aer kar ekōnono ilo kweilo̧k in, ij kam̧ool bwe Jisōs Krasit emour. Ej tōl Kabun̄ in An; Ej ekōnono n̄an rikanaan eo An, Būreejtōn Russell M. Nelson, im Ej iakwe aolep ro nejin Jemedwōj Ilan̄.
Ilo Jabōt in Ijtō in jej keemem e Jerkakpeje eo an Jisōs Kraist, ad Rilo̧mo̧o̧r im Ripinmuur,1 Anij Kajoor Bōtata, Irooj in Aenōm̧m̧an.2 Pinmuur eo An, kobaļo̧k ippān Jerkakpeje eo An ālkin jilu raan ko ilo juon lōb, ej jutak āinwōt juon mennin bwilōn̄ eļaptata ilo bwebwenato an armej. “Bwe lo,” Ekar kean̄, “N̄aij Anij; im n̄a Anij in mennin bwilōn̄ ko.”3
“Mennin bwilōn̄ ko rekar bōjrak ke kōnke Kraist eaar wanlōn̄ļo̧k ilo lan̄, im kar jijet ianbwijmaron̄ in pein Anij?”4 rikanaan Mormon ej kajjitōk ilo Bok in Mormon. Ej uwaak, “Jaab; barāinwōt enjeļ raņ raar jab bōjrak n̄an jerbal ippān ro nejin armej raņ.”5
Ālkin Debwāāl eo, juon enjeļ in Irooj ekar waļokļo̧k n̄an Meri im bar jet kōrā ro me rekar ilo̧k n̄an lōb eo n̄an kapit ānbwinnin Jisōs. Enjeļ eo ekar ba:
“Etke koṃij pukot eo E mour ippān ro re mej?”6
“E jab pād ijin: a em̧ōj an jerkakpeje.”7
Bok in Mormon rikanaan Abinadai ekar kean̄ kōn mennin bwilōn̄ jab in:
“Eļan̄n̄e Kraist eaar jab jerkak jān ro remej, … enaaj kar ejjeļo̧k jerkakpeje.
“A ewōr jerkakpeje, kōn menin lōb ejjeļo̧k an anjo̧, im kein ire an mej ej oran̄ļo̧k ilo Kraist.”8
Jerbal ko rekabwilōn̄lōn̄ an Jisōs Kraist rekar kōm̧m̧an bwe rikaļoor ro im̧aan tata ren lam̧ōj: “Armej ōt in! Bwe Ej jiron̄ kōto ko im lọjet, im rej pokake.”9
Ke Rijilōk ro im̧aan tata raar ļoor Jisōs Kraist im ron̄ An katakin kōn gospel eo, raar kam̧ool elōn̄ mennin bwilōn̄ ko. Raar lo bwe “re pilo rej loḷọkjeṇ im ro re kūrro rej etetal, karreoik lōba ro, im ro re jarron̄ron̄ rej ron̄ḷọkjeṇ, ro re mej rej jerkakpeje, im kwaḷọk gospel n̄an ro ri jeraṃōl.”10
Mennin bwilōn̄ ko, kakōļļe ko, im kabwilōn̄lōn̄ ko kar lo aer ellōn̄ ilubwilijin rikaļoor ro an Jisōs Kraist rainin, ilo mour ko ami im aō. Mennin bwilōn̄ ko rej jerbal ko rekwojarjar, waļokļo̧k ko im kakkōļļe ko an kajoor eo ejjeļo̧k jem̧ļo̧k an Anij im juon kean̄ bwe E ej “juon wōt inne, rainin, im indeeo.”11 Jisōs Kraist, eo ekar ejake lojet ko, emaron̄ kaenōm̧m̧an er; E eo ekar leļo̧k loļo̧kjeņ n̄an ripilo emaron̄ ļōn̄aj loļo̧kjeņ ko ad n̄an lan̄; E eo ekar karreoik rilōba ro emaron̄ karpene m̧ōjņo̧ ko ad; E eo ekar kōmour em̧m̧aan eo em̧ōjn̄o̧ maron̄ kūr kōj n̄an jutak kōn “Itok im ḷoor eō.”12
Elōn̄ iaami ekar kam̧oole mennin bwilōn̄ ko, elōn̄ļo̧k jān ami kile. Remaron̄ āinwōt dik ilo keidi n̄an an Jisōs kōjerkak eo emej. Bōtaab wōj eo ejjab kōjenolo̧k juon mennin bwilōn̄, eo wōt me ej itok jān Anij. Jet rej ba bwe mennin bwilōn̄ ko rej jide ak lukkuun in jide. Bōtaab rikanaan Nipai ekar kobūlōk ro me raar “lelaļļo̧k kajoor eo im mennin bwilōn̄ ko an Anij, im kwaļo̧k naan n̄an er make .”13
Mennin bwilōn̄ ko rej kōm̧m̧an jān kajoor eo ekwojarjar jān E eo “ekajoor n̄an lo̧mo̧o̧ren.”14 Mennin bwilōn̄ ko rej dam̧oļo̧k ko an karōk indeeo eo an Anij; mennin bwilōn̄ ko rej m̧ōttan ko remenin aikuj n̄an dāpij mour jān lan̄ n̄an laļ.
Fall eo ļo̧k Sister Rasband im n̄a ilo iaļ eo am̧ro ļo̧k n̄an Goshen, Utah, n̄an juon iien Jelm̧ae Doon n̄an aolepān laļ in kar kadiwōjļo̧k n̄an elōn̄ļo̧k jān 600,000 armej ro ilo 16 kajin ko roktak.15 Būrookraam̧ eo ekar n̄an pedped ioon m̧akūtkūt ko an Jepļaaktok eo an gospel eo an Jisōs Kraist, kōn kajjitōk ko kar jilkintok jān rūm̧m̧an ded ro jān aolepān laļ in. Sister Rasband im n̄a kōm̧ro make kar etale kajjitōk ko; raar letok n̄an kōm̧ro iien em̧m̧an n̄an kam̧ool kōn Josep Smith āinwōt juon rikanaan an Anij, kajoor in revelesōn ilo mour ko ad, wōnm̧aanļo̧k wōt eo an Jepļaaktok eo an gospel eo an Jisōs Kraist, im bwe m̧ool ko im kien ko me jej kaorōki. Elōn̄ rej ron̄jake rainin raar m̧ōttan wōt m̧akūtkūt jab in ekabwilōn̄lōn̄.
Ilo jinoin kadiwōjļo̧k eo ekar kōm̧m̧an ilo Bukin Wōjke Kwojarjar eo ilo New York, ijo, āinwōt an Josep Smith kar kam̧ool: “Iaar lo ruo Armej, ro meram im aiboojoj eo aer eaar eļļāļo̧k jān aolep wāween kōmmeļeļe, rej jutak ilōn̄ū ilo mejatoto. Juon iair ear konono n̄ōn iō, ear kir io kin et eo eta, jitonlok eo juon im ba—En̄in Nejū Jiten bōro. Ron̄jake E!”16 Menin, ro jeiū im jatū, ekar juon kabwilōn̄lōn̄.
Ajedeed in nan̄inmej eo aolepān laļ in ekar kipel kōj n̄an kōm̧akūt iien ron̄jake eo n̄an Goshen, Utah, ijo Kabun̄ eo an Jisōs Kraist im Armej ro Rekwojarjar ilo Raan-ko Āliktata ekar bar ejake, n̄an kōm̧m̧ane pija in, juon jekjōn in Jerusalem eo etto. Sister Rasband im n̄a kar pād jejjo wōt m̧ail ko jān Goshen ilo joteen Jabōt jab eo ke kōm kar lo bat eo emijel ej itok jān kijien iaļ eo am. Kijeek killep ko raar ļap aer urur ilo eria eo, im kōm kar inepata bwe kadiwōjļo̧k eo emaron̄ pād ilo kauwōtata. Aaet em̧ool, 20 minit n̄an 6:00, awa in kadiwōjļo̧k eo am, jarom ilo aolepān m̧weo ekar kun. Ejjeļo̧k jarom! Ejjeļo̧k kadiwōjļo̧k imejatoto. Ekar wōr juon ijin jarom me jet raar ļōmņak bwe emaron̄ kar letok am jarom, bōtaab ekar ejjeļo̧k juon ekar jeļā n̄e emaron̄ kōjo̧ kein kōm̧adm̧ōd ko rekar pād.
Kōm aolep ro ilo būrookraam̧ eo, ekoba ribwebwenato ro, rial ro, im rikōm̧adm̧ōd ro—em̧ool 20 rūm̧m̧aan ded ro jān baam̧le eo ko am make—raar lukkuun in ajeļo̧k er make ilo ta eo ekar tōn bōk jikin. Ikar ilo̧k jān kōmejaaļaļ ko aer im tarpok eo aer im kar akweļap ippān Irooj kōn juon juon mennin bwilōn̄. “Jema Ilan̄,” Ikar jar, “Ejemakijkij aō kajjitōk kōn juon mennin bwilōn̄, bōtaab ij kajjtōk kōn juon kiiō. Kweilo̧k in ej aikuj kōm̧m̧an n̄an aolep rūm̧m̧an ded ko ipeļaakin laļ in. Kōmij aikuj jarom n̄an wōnm̧aanļo̧k wōt eļan̄n̄e en Ankilam̧.”
Jiljilimjuon minit ko ālkin 6:00, āinwōt an kar m̧ōkaj in wōt an kun, ekar bar peļļo̧k. Aolep men raar jino jerbal, jān kōjan̄jan̄ im kein kōnono ko n̄an pija in alooj ko im aolep kein kōm̧adm̧ōd in kadiwōjļo̧k ko. Kōm kar ju im ettōr. Kōm kar en̄jake juon mennin bwilōn̄.
Ke Sister Rasband im n̄a kar pād ilo waan ettōr eo jepļaak n̄an kapijuknen joteen ļo̧k eo, Būreejtōn im Sister Nelson kar jeje tok n̄an kōm kōn ennaan in: “Ron, kōm kōņaan bwe kom̧ro en jeļā bwe ilo iien eo wōt kōm kar ron̄ kōn an kun jarom, kōm kar jar kōn juon mennin bwilōn̄.”
Ilo raan ko āliktata jeje ko rekwojarjar kar je, “Bwe N̄a, Irooj, em̧ōj Aō likūt Peiū n̄an kōjādeik kajoor ko an lan̄; kom̧ jab maron̄ lo e kiiō, ijoke jidik iien im kom̧ naaj lo e, im jeļā bwe N̄aij mour, im bwe Inaaj itok im irooj ippān armej ro Aō.”17
En̄in ej ta eo ekar lukkuun waļo̧k. Irooj ekar eļļo̧ke Pein, im jarom eo ekar ebbōl.
Mennin bwilōn̄ ko raar jerbal kōn kajoor in tōmak, āinwōt an Būreejtōn Nelson ekar kanooj in kajoor ilo kar katakin kōj ilo m̧wein̄an eo ļo̧k. Rikanaan Moronai ekar kōketak armej ro, “Bwe eļan̄n̄e eaar ejjeļo̧k tōmak ilubwiljin ro nejin armej Anij emaron̄ kōm̧m̧an ejjeļo̧k mennin bwilōn̄ ilubwiljier; kōn menin, Eaar jab kwaļo̧ke make m̧ae ālikin aer tōmak.”
Ekar wōnm̧aanļo̧k wōt:
“Lo, eaar tōmak eo an Alma im Amulek in eaar kōm̧m̧an bwe kalbuuj eo en jeepepļo̧k n̄an laļ.
“Lo, eaar tōmak eo an Nipai im Liai eo eaar jerbale oktak eo ioon riLeman ro, bwe ren kar peptaij kōn kijeek im kōn Jetōb Kwōjarjar.
“Lo, eaar tōmak an Ammōn im ļōm̧aro jatin eo eaar jerbale ekanooj ļap mennin bwilōn̄ ilubwiljin riLeman ro. …
“Im barāinwōt jab ilo jabdewōt iien jabdewōt eaar jerbali mennin bwilōn̄ ko m̧ae ālikin aer tōmak; kōn menin raar m̧okta tōmak ilo eo Nejin Anij.”18
Imaron̄ kakobaba n̄an laajrak eo an jeje ko rekwojarjar, “Ekar tōmak an rūm̧m̧an ded ro rej kijejeto, rijerbal in kadiwōjļo̧k ro, ritōl ro an Kabun̄ in im membōr ro, juon rijilōk, im juon rikanaan an Anij me raar lukkuun kappukot juon mennin bwilōn̄ bwe jarom eo ekar bar jepļaaktok n̄an juon jikin kōm̧m̧an pija in alooj ettoļo̧k ilo Goshen, Utah.”
Mennin bwilōn̄ ko remaron̄ itok āinwōt juon uwaak in jar. Rejjab aolep iien ta eo jej kajjitōk kake ak ta eo jej kōtmene, bōtaab n̄e jej lōke ilo Irooj, Enaaj pād ijo, im Enaaj jim̧we. Enaaj okoktak n̄an mennin bwilōn̄ eo n̄an iien eo jej aikuji.
Irooj ej kōm̧m̧ani mennin bwilōn̄ ko n̄an kakeememej kōj kōn kajoor eo An, iakwe eo An n̄an kōj, Ankilan jān lan̄ ej kareel en̄jake eo ad ilo mour in, im An ikdeelel n̄an katakin kōn ta eo me eļap tata tokjān. E eo ewōr an tōmak ilo n̄a n̄an kōmour e,” Ekar ba n̄an Rikwojarjar ro ilo 1831 eo, im kallim̧ur eo ej wōnm̧aanļo̧k wōt rainin, “im ej jab m̧ōj kar jitōn̄e n̄an mej, naaj kōmour e.”19 Ewōr kien ko kar kōllaajraki ilo lan̄ ko, im jenaaj aolep iien lokjak n̄ani.
Ewōr iien ko jej kōjatdikdik n̄an juon mennin bwilōn̄ n̄an kemour juon eo ejitōnbōro, n̄an ukōt juon jerbal elej, ak n̄an kōmeraikļo̧k būruōn juon eo ellu ak juon jetōb einepata. Kalimjōk men ko kōn jekjek ko an mour wabanban, jej kōņaan bwe Irooj ej bōk koņaan, n̄an kōm̧m̧ane ta eo ekar rup. Kōn tōmak, mennin bwilōn̄ eo enaaj itok, men̄e ejjab menin aikuj n̄an iien eo ad ak kōn kije in ikdeelel eo ad. Ej meļeļe in ke edikļo̧k ad tiljek ak jejjab jolete An bōk koņaan? Jaab. Jej jitōn bōro ro an Irooj. Ekar letok An mour n̄an kōj, im An Pinmuur ej wōnm̧aanļo̧k wōt n̄an kōtļo̧k kōj jān eddo ko im jeraiwiw n̄e jej uwkeļo̧k im epakeļo̧k E.
Irooj ekar kakeememej kōj, “Im iaḷ ko ami re jab iaḷ ko aō.”20 Ej letok, “Koṃwin itok ñan Ippa, koṃ otemjej rej jerbal im ban, im Inaaj kakkijeik koṃ”21—kakkijen jān inepata, rup bōro, mijka, jab pokake, n̄ūrbōktak kōn ro rejitōnbōro, me rejakl ak erup ettōņak ko aer. Aenōm̧m̧an ibwilijin tarpok ak būrom̧ōj ej juon mennin bwilōn̄. Keememej nana ko an Irooj: “Iaar jab kwaļo̧k aenōm̧m̧an n̄an am ļōmņak kōn menin ke? Ta kam̧ool eļapļo̧k kwo maron̄ bōke ijeļo̧kin jān Anij?”22 Mennin bwilōn̄ eo ej bwe Jisōs Kraist, Jeova eo Eļap, Nejin eo Eutiej tata, ej uwaak kōn aenōm̧m̧an.
Ejja āinwōt An kar waļokļo̧k n̄an Mary ilo jikin kallib eo, kūr e kōn etan, Ej kūr kōj n̄an kōjerbale tōmak eo ad. Mary ekar kappukōt n̄an jerbal n̄an E im kea kōn E. Jerkakpeje eo An ekar jab ta eo ekar kōtmene kake, bōtaab eaar ekkar n̄an karōk in m̧ōņōņō eo eļap.
“Kwōn to laḷ jān debwāāl ṇe,”23 jarlepju eo an ro rejjab tōmak raar kajierer kake E ilo Calvary. Emaron̄ kar kōm̧m̧ane kain mennin bwilōn̄ kein. Bōtaab Ekar jeļā jem̧ļo̧k eo jān jinoin, im Ekar wōn wōt tiljek n̄an karōk eo an Jemen. Bwe waanjon̄ak eo ejjab aikuj bwe jen jab jako.
N̄an kōj ilo iien mālijjon̄ ko Ekar ba, “Lali kinej kein rekar wākari ikatū, im barāinwōt jenkwan dila kā ilo Peiū im Neō; kom̧in tiljek, kōjparok kien ko Aō, im kom̧ naaj jolōte aelōn̄ in lan̄.”24 Men jab in, ro jeiū im jatū, ej mennin bwilōn̄ eo kar kallim̧ur kake n̄an kōj aolep.
Ilo Jabōt in Ijtō in, ilo ad keemem e mennin bwilōn̄ eo an Jerkakpeje eo an Irooj, āinwōt juon Rijilōk an Jisōs Kraist ij jar ilo ettā bwe kom̧ naaj en̄jake kajoor eo an Ripinmuur eo ilo mour eo ami, bwe jabnejej ko ami n̄an Jemedwōj Ilan̄ renaaj uwaak kōn iakwe im kallim̧ur eo Jisōs Kraist ekar kwaļo̧ke ilo aolepān jerbal in karejar eo An. Ij jar bwe kom̧ maron̄ jutak pen im tiljek ilo aolep men ko renaaj itok. Im Ij kōjeraam̧m̧an kom̧ bwe mennin bwilōn̄ ko renaaj pād ippāmi āinwōt am kar en̄jake ilo Goshen—eļan̄n̄e en ankilan Anij. Kappukōt kōjeraam̧m̧an kein kar jilkintok jān-lan̄ ilo mour eo ami ilo ami “kappukot Jisōs in eo rikanaan ro im rijjilōk ro rekar jeje kake, bwe jouj eo an Anij Jemān, im barāinwōt Irooj Jisōs Kraist, im Jetōb Kwōjarjar, ro rekar jeje ļo̧o̧k kōn er, ren maron̄ pād ilo kom̧ indeeo.”25 Ilo etan Jisōs Kraist, amen.