Anij Ilubwilijid
Anij ej pād ilubwilijid—im E make ekar pād ilo mour ko am im niknik tōl ajri ro Nejin.
Ilo aolep iiō ko, Anij ekar kōnono kōn ro Rikarejeran, rikanaan ro.1 Kiiō jibbon̄ ekar wōr ad iien em̧m̧an n̄an ron̄jake an rikanaan eo an Anij kōnono n̄an aolepān laļ in. Kōmij iakwe eok, Būreejtōn Nelson, im ij kōketak aolep jabdewōt jikin n̄an ekkatak im ron̄jake naan ko am̧.
M̧okta jān aō kar tōpar keemem eo aō kein 12, baam̧le eo aō kar kipele ruo alen n̄an em̧m̧akūt jān m̧weo imōm̧ im kar bar jino ibwilijin jorrāān, mijak, im jab jeļā ta kar kōm̧m̧an jān pata eo im jepel ilo kien. Ekar juon iien ekamijak n̄an n̄a, bōtaab ekar lukkuun kainepata n̄an ro jinō im jema.
Jinō im jema raar kwaļo̧k jidikin eddo in ippām ajri ro emān. Raar lukkuun kijejeto im en̄taan ilo jekjek eo em̧m̧an tata remaron̄ kar. Mijak aikuj in kar eddo, bōk eļap jān awa ko aer im kadikļo̧k kōjatdikdik eo aer.
Tōre in an juon en̄jake in jab kōjatdikdik ālkin Pata eo an Laļ in kein karuo ekar likūt jenkwan ioon laļ in. Ekar likūt jeno̧k eo an ilo n̄a.
Ilo tōre eo, ilo awa in ajimakeke ko ad, emakijkij aō kōn ļōmņak, “Ewōr ke jabdewōt kōjatdikdik epād ilo laļ in?”
Enjeļ ro Ilubwilijid
Ke ikar kejōkļo̧kjeņ kōn kajjitōk in, ikar ļōmņak kōn mijenede in Riamedka ro ad reddik me raar jerbal ilubwilijim ilo iiō ko. Raar em̧m̧akūt jān im̧ōko im̧weer rejokwane im pād ilo jimettan in laļ in im ilo̧k n̄an Germany—laļ eo an rikōjdāt ro aer ejjab to—n̄an letok kōjatdikdik eo ekwojarjar n̄an armej ro am. Raar jab itok n̄an ņa ruōn, katakin, ak kajook. Raar m̧ōņōņō in kar letok mour ko aer reddik ilo jab ļōmņak kōn bun̄bun̄ an laļ, kōņaan wōt jipan̄ ro jet lo lan̄lōn̄ im aenōm̧m̧an eo raar en̄jake.
N̄an n̄a, likao im jiron̄ jiddik rein raar jetjet. Ij m̧ool raar irļo̧k, bōtaab ejjab n̄an n̄a. Inaaj aolep iien ļōmņak kake er eļap kilaer n̄an ro jet—enjeļ ro an meram im aiboojoj, rikwaļo̧k ro kōn meanwōd, em̧m̧an, im m̧ool.
Ilo an laļ in kar libobo ilo kōraat, kitōtō, dike, im mijak, waanjon̄ak eo im katak ko an armej rein reddik kar kobrak eō kōn kōjatdikdik. Ennaan eo an gospel eo raar letok juon men eļapļo̧k jān politic ko, bwebwenato, ņota ko, bōd ko, im kōņaan ko an juon make. Ekar letok uwaak ko rekwojarjar n̄an kajjitōk ko raorōk ekar wōr ippām ilo iien kein reppen.
Ennaan eo ekar bwe Anij emour im ej kea kōn kōj, jekdo̧o̧n ilo tōre kein kōn aen̄wān̄wā, tarpok, im jorrāān. Bwe E ekar lukkuuk waļo̧ktok ilo tōre in ad n̄an kōjepļaaktok m̧ool eo im meram eo—an gospel eo An im Kabun̄ eo An. Bwe E ej kōnono n̄an rikanaan ro bar juon alen; bwe Anij ej pād ilubwilijid—im e make ekar pād ilo mour ko am im niknik tōl ajri ro Nejin.
Ej lukkuun kabwilōn̄lōn̄ ta eo jemaron̄ ekkatak n̄e jej kanooj kalimjōk karōk in lo̧mo̧o̧r eo im mour ijo eutiej tata eo an Jemedwōj Ilan̄, karōk in m̧ōņōņō eo, n̄an ajri ro Nejin. N̄e jej en̄jake likjab, en̄jake jojoļāār, im meļo̧kļo̧k, jej ekkatak bwe jemaron̄ jeļā bwe Anij ejjan̄in de meļo̧ļo̧k kōj—ilo m̧ool, E ej letok n̄an aolep ajri ro Nejin juon men jab meļeļe kake: n̄an erom “ri jolōt an Anij, im ri jolōt ippān Kraist.”2
Ta meļeļein menin?
Bwe jenaaj mour indeeo, bōk tarlep in lan̄lōn̄ eo,3 im wōr kōjatdikdik eo n̄an “jolōte tūroon ko, aelōn̄ in kiin̄ ko, tōln̄an ko, im kajoor ko.”4
Ej kanooj in ettā n̄an jeļā bwe ilju im jekļaj in ekilep im kwojarjar ej maron̄—ejjab kōnke kōn wōn kōj ak kōnke kōn wōn Anij.
Jeļā menin, ekōjkan ad maron̄ alin̄ūrn̄ūr, ak pād wōt ilo illu? Ekōjan ad maron̄ kōmeļeļeik kōtmene ko ad ilo ettā n̄e Kiin̄ in kiin̄ ro ej kūr kōj n̄an kakūrm̧ool kōjatdikdik eo ad n̄an ilju im jekļaj eo jab meļeļe kake an m̧ōņōņō eo ekwojarjar?5
Lo̧mo̧o̧r Ilubwilijid
Kōnke kōn iakwe eo eweppān an Anij n̄an kōj im katok eo ejjeļo̧k jem̧ļo̧kin an Jisōs Kraist, jerawiwi ko ad—jim̧or eļļap im dik—maron̄ bukwiļo̧k im jab bar keememeji n̄an jidik.6 Jemaron̄ jutak Im̧aan E erreo, wānōk, im kōkwojarjar.
Būruō ej jiōbļo̧k kōn kam̧m̧oolol n̄an Jemewōj Ilan̄. Ij kile bwe E ejjan̄in kar kwaļo̧k juon men ejerata n̄an ajri ro Nejin n̄an kapan̄ aer kōm̧m̧ane juon men ilo mour in kōn ejjeļo̧k kōjatdikdik n̄an juon ilju im jekļaj eo emeram im n̄an indeeo. E ekar letok kōmeļeļe ko me ej kwaļo̧k iaļ eo ļo̧k n̄an Ippān. Im ilo ioļapļap in aolepān men otemjej ej Nejin Jitōnbōro, Jisōs Kraist,7 im katok eo An n̄an kōj.
Pinmuur eo eļap an Rilo̧mo̧o̧r eo elukkuun in ukōt wāween ad maron̄ lale jerawiwi ko ad im jab wānōk ko ad. Ijello̧kin pedped ioer im en̄jake in jab lo̧mo̧o̧ren ak jeļo̧k kōjatdikdik, jemaron̄ ekkatak jān er im en̄jake kōjatdikdik.8 Menin letok in karreo eo an ukweļo̧k ej kōtļo̧k ad ilo̧k jān jerawiwi ko ad im kwaļo̧k kōj juon menin kōm̧anm̧an ekāāl.9
Kōnke kōn Jisōs Kraist, likjab ko ad rejjab aikuj kwaļo̧k kadkadid. Remaron̄ kōkāāl kōj.
Āinwōt juon rial ej kōmālmel e note ko, jemaron̄ lo likjab ko ad, irļo̧k ko, im jerawiwi ko ilo an iien ko rem̧m̧an kōn ļapļo̧k in ekkōl-an juon make, m̧wilaļļo̧k im ļapļo̧k iakwe eo em̧ool n̄an ro jet, im kōkāāl eo kōn ukweļo̧k.
Eļan̄n̄e jej ukweļo̧k, bōd ko reban joļo̧k kōj. Rej m̧ōttan eddōkļo̧k eo ad.
Jej aolep nin̄nin̄ keidi n̄an m̧ōttan aiboojoj im wōj eo jekar kōm̧m̧an n̄an erom. Ejjeļo̧k armej wabanban ej etal jān tōbalbal n̄an etetal n̄an ettōr ilo an jab emakijkij an tūbbo̧k, ebbōj, im mao. En̄in ej wāween ad ekkatak.
Eļan̄n̄e jej lukkuun kaminene wōt, aolep iien kajjieon̄ n̄an kōjparok kien ko an Anij, im wujlepeļo̧k kijejeto ko ad n̄an ukweļo̧k, niknik, im kōjerbale ta eo jej ekkatak, lain im bar lain, jenaaj aintok meram eo n̄an jetōb ko ad.10 Im men̄e jemaron̄ jab lukkuun keidi aolepān kōjatdikdik eo ad kiiō, “jej jeḷā bwe eḷan̄n̄e [Rilo̧mo̧o̧r eo] enaaj weaaktok,”bwe jenaaj lo E, im “ilo wāween an pād.”11
Ej juon kallim̧ur aiboojoj!
Aaet, laļ in ej pād ilo aen̄wān̄wā. Im aaet, ewōr ad m̧ōjņo̧ ko. Bōtaab jejjab aikuj in reilo̧k kōn ad ebbweer, kōnke jemaron̄ lōke Anij, jemaron̄ lōke Nejin, Jisōs Kraist, im jemaron̄ bōk menin letok eo an Jetōb n̄an tōl kōj ilo iaļ in m̧aanļo̧k n̄an juon mour eobrak kōn lan̄lōn̄ im m̧ōņōņō ekwojarjar.12
Jisōs ej Ilubwilijid
Emakijkij aō kōn ļōmņak, Ta eo Jisōs enaaj kar katakin im kōm̧m̧ane eļan̄n̄e E en kar pād ilubwilijid rainin?
Ālkin Jerkakpeje eo, Jisōs Kraist ekar kakūrm̧ool kallim̧ur eo An n̄an loļo̧k “bar jet Aō sip.”13
Bok in Mormon: Bar Juon Kallim̧ur kōn Jisōs Kraist ej kōnono kōn juon waļo̧k eo n̄an armej ro ilo Amedka. Ewōr ippād rekoot in āinwōt juon kein kam̧ool maron̄ jibwe im loe kōn jerbal eo an Rilo̧mo̧o̧r eo.
Armej ro ilo Bok in Mormon raar mour ilo turejet in laļ in—bwebwenato ko, m̧anit ko aer, im jekjek in politic ko aer raar kanooj in oktak jān armej ro Anij ekar katakin ilo tōre in jerbal in karejar eo An ilo mour in. Aaet mekarta Ekar katakin er elon̄ wōt iaan ejja men ko wōt Ekar katakin ilo Āne eo Ekwojarjar.
Etke Ekar kōm̧m̧ane?
Rilo̧mo̧o̧r eo aolep iien ej katakin m̧ool ko rejjab oktak. Rej jerbal n̄an armej ro ilo aolep epepen im ilo jabdewōt jekjek.
Ennaan eo an ekar im ej juon ennaan in kōjatdikdik im uwaan—juon naan in kam̧ool bwe Anij Jemedwōj Ilan̄ ejjan̄in kar kōjerawawiki ro Nejin.
Bwe Anij ej ilubwilijid!
Ribuki iiō ko remootļo̧k, Rilo̧mo̧o̧r eo bar juon alen kar ro̧o̧ltok n̄an laļ in. Koba ippān Anij Jemen, Ekar waļo̧kļo̧k n̄an juon 14-iiō dettan Josep Smith im kwaļo̧k Jepļaaktok eo an gospel eo im Kabun̄ eo an Jisōs Kraist. Jān raan eo m̧aantak, lan̄ ko rekar peļļo̧k, im rikwoj meļan in lan̄ ro raar itok jān lan̄ n̄an kwaļo̧k tok ennaan ko rekwojarjar. Meram im jeļā eo kar leļo̧k n̄an armej ro ioon laļ in jān lan̄.
Irooj Jisōs Kraist ekar bar juon alen kōnono n̄an laļ in.
Ta eo Eaar ba?
N̄an kōjeraam̧m̧an eo ad, elōn̄ iaan naan ko An kar rekooti ilo Katak im Bujen Ko—rej pād n̄an aolep ilo laļ in ro rekōņaan riiti im ekkatak kaki. Ewi jon̄an an aorōk naan kein n̄an kōj rainin?
Im jejjab aikuj in kar ilbōk n̄an lo bwe Rilo̧mo̧o̧r eo ej bar juon alen katakin ennaan eo eaorōk tata an gospel eo An: “Kwōn iakwe Irooj am Anij kōn aolepān būruōm̧, kōn aolepān am maron̄, ļōmņak, im kajoor; im ilo etan Jisōs Kraist kwōn jerbal n̄an e.”14 E ej im̧we kōj n̄an pukōt Anij15 im mour kōn katak ko Ekar kwaļo̧k n̄an ro Rikarejeran, rikanaan ro.16
Ej katakin kōj n̄an iakwe doon17 im n̄an “obrak kōn iakwe em̧ool n̄an armej otemjeļo̧k.”18
Ej kajjitōk ippād n̄an erom pā ko Pein, n̄an ilo̧k im kōm̧m̧an em̧m̧an.19 “Jen jab yokwe ilo naan … ak ilo kōṃṃan im ṃool.”20
E ej idajon̄jon̄e kōj n̄an ron̄jake kean̄ eo An eļap: n̄an iakwe, n̄an kwaļo̧k, n̄an karuwaineneik aolep n̄an gospel eo An im Kabun̄ eo An.21
Ej kakien kōj n̄an kalōk tampeļ ko rekwojarjar im n̄an deļo̧n̄ im jerbal ijo.22
E ej katakin kōj n̄an erom ro Rikaļoor ro An—bwe būruōd rej aikuj jab kajjieon̄ n̄an kajoor an juon make, m̧weie, kōmālim, ak jerbal. Ej katakin kōj n̄an “likūtļo̧k men ko an laļ in, im kappukot men ko rem̧m̧anļo̧k.”23
Ej pinniki kōj n̄an pukōt lan̄lōn̄, kōmeramļo̧k, aenōm̧m̧an, m̧ool, m̧ōņōņō,24 im kallim̧ur eo an mour jab wabanban im mour indeeo.25
Jen bōk juon bun̄tōn m̧aanļo̧k wōt. Ļōmņak n̄e Jisōs ekar itok n̄an ward eo ami, n̄an branch eo ami, ak n̄an m̧weo im̧ōm̧ rainin. Ewi naaj kar jekjek in?
Emaron̄ in lo lowaan būruōm̧. Paotok ko itulik enaaj kar jako aorōk eo aer. Enaaj kar jeļā kwe āinwōt am̧ jeļā. Enaaj kar jeļā ikdeelel ko an būruōm̧
Ettā im ettā bōro Enaaj kar kotake.
Rinan̄inmej Enaaj kar kemour.
Eo ej pere Enaaj kar kobrak kōn tōmak im peran n̄an tōmak.
Enaaj kar katakin kōj n̄an kōpeļļo̧k būruōd n̄an Anij im pukōtļo̧k ro jet.
Enaaj kar kile im kautiej m̧ool, ettā bōro, jim̧we, tiljek, meanwōd, im iakwe em̧ool.
Jān wōt kalimjōk Mejān im jejjamin naaj bar āinwōt m̧okta. Jenaaj indeeo oktak. Jenaaj oktak jān kile eo eļap bwe, ilo m̧ool, Anij ej ilubwilijid.
Ta eo Jenaaj Kōm̧m̧ane?26
Ij reilikļo̧k kōn jouj kōn n̄a ke ikar juon likao ilo tōre in iiō ko ikar rūttoļo̧k. Eļan̄n̄e imaron̄ kar bar jepļaak likļo̧k, inaaj kar kaenōm̧m̧an e im jiron̄ e n̄an pād wōt ilo iaļ eo ejim̧we im kappukōt wōt. Im inaaj kar kajjitōk ippān n̄an karuwaineneiktok Jisōs Kraist n̄an mour eo an, bwe Anij ej ibwilijid!
N̄an kom̧, ro jeiū im jatū jitōnbōro, ro m̧ōtta rejitōnbōro, n̄an aolep ro me rej kappukōt uwaak ko, m̧ool eo, im m̧ōņōņō eo, ij lewaj ejja kapilōk in wōt: kappukōt wōt kōn tōmak im kijenmej.27
Kajjitōk, im kom̧ naaaj bōk. Kaļļaļļaļ, im enaaj peļļo̧k n̄an kom̧.28 Lōke Irooj.29
Ilo mour eo ad aolep raan ej jerbal eo ad aorōk im iien eo em̧m̧an ejeraam̧m̧an n̄an iioon Anij.
Ilo ad likūt iturejet utiej bōro im kepaakļo̧k tūron eo An kōn juon bōro erup im jetōb ettā,30 Enaaj kepaaktok kōj.31
Ilo ad pukōt n̄an ļoor Jisōs Kraist im etetal ilo iaļ in rikaļoor, lain im bar lain, raan eo enaaj itok me jenaaj en̄jake bwe menin letok eo jab maron̄ meļeļe kake an bōk juon tarlep in lan̄lōn̄.
Ro jera rejitōnbōro, Jemāmi Ilan̄ ej iakwe kom̧ kōn juon iakwe eweppān. Em̧ōj An kam̧oole iakwe eo An ilo wāween ko ejjeļo̧k jem̧ļo̧kier, bōtaab ilōn̄ in aolep kōn letok Nejin Emake Wōt āinwōt juon katok im āinwōt juon menin letok n̄an ajri ro Nejin n̄an kōm̧m̧an bwe ren bar ro̧o̧l n̄an ro jined im jemed ilan̄ en m̧ool.
Ij kwaļo̧k kam̧ool bwe Jemedwōj Ilan̄ ej mour, bwe Jisōs Kraist ej tōl Kabun̄ in An, bwe Būreejtōn Russell M. Nelson ej rikanaan eo An.
Ij lewaj n̄an kom̧ iakwe eo aō im kōjeraam̧m̧an eo ilo tōre in iien Ijtō in elem̧ōņōņō. Kōpeļļo̧k būruōmi n̄an ad Rilo̧mo̧o̧r im Ripinmuur eo, jekdo̧o̧n ta jekjek ko ami, mālijjon̄ ko, en̄taan ko, ak bōd ko; kom̧ maron̄ jeļā bwe E ej mour, bwe E ej iakwe kom̧, im bwe kōnke kōn E, kom̧ij jamin naaj makeļo̧k.
Anij ej ilubwilijid.
Jān menin ij kam̧ool im kwaļo̧k kam̧ool ilo āt eo ekwojarjar etan Jisōs Kraist, amen.