COVID-19 im Tampeļ ko
Kōjparok bujen tampeļ ko ami im kōjeraam̧m̧an ko raorōktata ilo ļōmņak ko ami im būruwōmi. Mool wōt n̄an bujen ko kom̧ ar kōm̧m̧ani.
Ro jeiū im jatū rejtōn bōro, em̧ool bwe jekar bōk juon m̧ōn̄ā in kijoone ilo jetōb. Ilukkuun in kam̧m̧oolol kōn jar ko, ennaan ko, im al ko ilo aolepān kweilo̧k in. Kam̧m̧oolol kom̧ kajjojo kōn ami kar kobatok ippem, jekdo̧o̧n ia kwoj pād ie.
Jinoin iiō eo ļo̧k, kōnke ajedeed in COVID-19 im ad kōņaan erom̧ citizen ro rem̧m̧an ipeļaakin laļ in, jekar kōm̧m̧ani kāālet ko reppen n̄an kilōki aolep tampeļ ko ium̧win jidik iien. Ilo allōn̄ ko tokālik, jekar bōk im̧we n̄an bar kōppeļļo̧ki tampeļ ko kōn juon jekjek in jet ilo̧k jet. Tampeļ kein kiiō em̧ōj aer peļļo̧k ilo phase ko emān, lukkuun ļoore kakien ko an kien eo ioļap im wāween m̧akūtkūt ko retiljek.
N̄an tampeļ ko ilo phase 1, rej kōmaron̄ an ripālele ro em̧ōj aer bōk mennin letok kwojarjar ko aer maron̄ liāp āinwōt ļeo im lio pālele.
N̄an tampeļ ko ilo phase 2, aolep kain̄i ko n̄an ro remour rej kōm̧m̧an, ekoba mennin letok kwojarjar an juon make, liāp an ļeo im lio pālele im liāp ko an ajri ro n̄an ro jineer im jemāer. Ej kab m̧ōj ad ukōte men ko remenin aikuj an phase 2, im kōtļo̧k an jodikdik ro, membōr ro rekāāl, im ro jet rej kabwijer juon peba in mālim an tampeļ ewōr jon̄an kōjerbale n̄an bōk koņaer ilo kōpeptaij ko ilo etan ro remej n̄an ro jibūer im jim̧aer etto.
N̄an tampeļ ko ilo phase 3, n̄an ro ewōr jikejuuļ in appoinment ko remaron̄ bōk koņaer ejjab wōt ilo kain̄i ko n̄an ro remour ak barāinwōt ilo aolep kain̄i ko n̄an kōm̧m̧ani ilo etan ro remej n̄an rietto ro.
Phase 4 ej bar jepļaak n̄an aolep m̧akūtkūt, m̧akūtkūt ko an tampeļ kajjojo raan.
Jej kam̧m̧oolol kōn ami kijenmej im kijejeto ilo jerbal in jipan̄ ilo iien in eoktak im eapan̄ Ij jar bwe kōņaan eo ami n̄an kabun̄jar im jerbal ilowaan tampeļ eo ej bwil eļapļo̧k im meramļo̧k kiiō jān m̧okta.
Bōlen kom̧ij ļōmņak n̄āāt eo kom̧ naaj maron̄ jepļaak n̄an tampeļ eo. Uwaak eo: Tampeļ eo an enaaj peļļo̧k n̄e kakien ko an kien eo ioļap renej kōtļo̧k e. N̄e jekjek eo kōn COVID-19 ilo eria eo ami jon̄ak ko ie rem̧m̧an im kōjparok, tampeļ eo ami enaaj bar peļļo̧k. Kom̧in kōm̧m̧ane jon̄an wōt ami maron̄ n̄an leļaltak nōm̧ba in COVID eo ilo eria eo ami bwe iien ko ami rem̧m̧an ilo tampeļ eo ren ļapļo̧k.
Ak ilo tōre in, kōjparok bujen tampeļ ko ami im kōjeraam̧m̧an ko raorōktata ilo ļōmņak ko ami im būruwōmi. Mool wōt n̄an bujen ko kom̧ ar kōm̧m̧ani.
Jej kalōk kiiō n̄an ilju im jekļaj eo! En̄oul juon tampeļ ko kiiō rej ekkal ak kōkāāli. Ilo iiō eo ļo̧k, mekarta ajedeed in nan̄inmej in, bwidej ko kar rubi n̄an 21 tampeļ ko rekāāl!
Jekōņaan bōktok m̧weo im̧ōn Irooj aaet bwe en epaakeļo̧k membōr ro, bwe ren maron̄ wōr aer iien ko rekwojarjar n̄an deļo̧n̄e tampeļ eo emakijkij in wōt n̄e jekjek ko aer rej kōmaron̄ er.
Ij kōjjeļļāik karōk ko ad n̄an kalōk elōn̄ļo̧k 20 tampeļ ko, ij kejōkļo̧kjeņ im nōbar paineer ro—jem̧aan im raan kein—ro rekar wūjlepļo̧k mour ko aer im jipan̄ kōm̧m̧ane menin en juon bwebwenato rainin. Juon tampeļ ekāāl enaaj ekkal ilo kajjojo jikin kein rej ellaajrak: Oslo, Norway; Brussels, Belgium; Vienna, Austria; Kumasi, Ghana; Beira, Mozambique; Cape Town, South Africa; Singapore, Republic of Singapore; Belo Horizonte, Brazil; Cali, Colombia; Querétaro, Mexico; Torreón, Mexico; Helena, Montana; Casper, Wyoming; Grand Junction, Colorado; Farmington, New Mexico; Burley, Idaho; Eugene, Oregon; Elko, Nevada; Yorba Linda, California; im Smithfield, Utah.
Tampeļ rej juon iaan m̧ōttan eo aorōk n̄an Jepļaaktok eo an gospel eo an Jisōs Kraist ilo tarlep in. Kain̄i ko an tampeļ eo rej kobrak mour ko ad kōn kajoor im maron̄—rej pād ilo ejjeļo̧k bar juon iaļ. Jej kam̧m̧oolol Anij kōn kōjeraam̧m̧an kein.
Ilo ad kiil kweilo̧k in, jej bar juon alen kwaļo̧k am iakwe n̄an kom̧. Jej jar bwe Anij enaaj wūtidikdik im kōjparok kom̧ kajjojo kōn kōjeraam̧m̧an ko An. Ippān doon jej bōk koņaad ilo jerbal in An ekwojarjar. Kōn peran, jen aolep wōnm̧aanļo̧k ilo jerbal eo eaiboojoj an Irooj. Kōn menin Ij jar, ilo et eo ekwojarjar etan Jisōs Kraist. amen.