Ad Būrom̧ōj Enaaj Oktak n̄an Lan̄lōn̄
Ij karuwaineneik aolep ro rej en̄jake būromōj, aolep ro rej awōļ kōn ta eo ej waļo̧k ālkin mej, n̄an likūt am̧ tōmak ilo Kraist.
Jejjo iiō ko rem̧ootļo̧k, ikar pād ilo kweilo̧k ko ilo Salt Lake City, rikanaan eo ad ejitōnbōro Russell M. Nelson ekar karuwaineneiki eō. Ilo wāween karuwainene eo emenāān tata, ekar kajjitōk, “Mark, ejet an jinem mour?”
Ikar ba n̄an e ke ej kab m̧ōj aō kar loļo̧k ilo kapijuknen eo an ilo New Zealand im elukkuun rūtto ak ekar obrak kōn tōmak im ej juon im̧we n̄an aolep ro rekar jeļā kajjien.
Innem ekar ba, “Jouj im leļo̧k aō iakwe … im ba n̄an e ke ij erreim̧aanļo̧k wōt n̄an iien en inaaj bar ioone.”
Ikar bwilōn̄ im kar kajjitōk, “Elōn̄ am̧ tūrāāp n̄an New Zealand ejjab to jān kiiō ke?”
Kōn m̧ool ilo kōļmenļo̧kjeņ ekar uwaak, “O ejjeļo̧k, inaaj ioone ilo mour eo tokālik.”
Ekar jab bajjōk uwaak ilo an kōnono. Ekar jab kōm̧m̧an kōjak ilo peltokin an kōnono. Ilo iien eo ejenolo̧k im ejjeļo̧k armej, ikar ron̄ im en̄jake juon naan in kam̧ool erreo im em̧ool jān juon rikanaan emour bwe mour ej wōnm̧aanļo̧k wōt ālkin mej.
Kweilo̧k in ilo jem̧ļo̧kin wiik in, kwonaaj ron̄ an rijilōk ro remour im rikanaan ro kam̧ool kōn Jerkakpeje eo an Jisōs Kraist. “Pedped in katak ko an kabun̄ in ad rej naan in kam̧ool ko an Rijilōk im Rikanaan ro, kōn Jisōs Kraist, bwe Ekar mej, kar Kalibwini, im ekar bar jerkak ilo raan eo kein kajilu, … aolep men ko jet me rej iookļo̧k kabun̄ in ad rej m̧ōttan wōt [m̧ool in].”1 Ij kallim̧ur bwe ilo am̧ ron̄jake kōn lukkuun kōttōpar, Jetōb eo enaaj kapene ilo kōļmenļo̧kjeņ im buruōm̧ m̧ool an naan in kam̧ool kein.2
Rikaļoor ro etto an Jisōs rekar oktak n̄an indeeo ālkin An kar waļo̧k n̄an er ālkin mej eo An. Jon̄oul iaer rekar kam̧ool kōn mejāer bwe em̧ōj An jerkakpeje. Thomas, eo ekar jako iien eo, ekar ba, “Eļan̄n̄e I jab lo … I jāmin tōmak.”3 Tokālik Jisōs ekar katakin Thomas: “Kwōn jab pere a tōmak.”4 Innem Irooj ekar katakin kōn jon̄an aorōk in tōmak: “Em̧ōņōņō ro raar jab lo, im rej tōmak.”5
Irooj ālkin an kar jerkakpeje ekar leļo̧k n̄an Rikaļoor ro An eddo n̄an kam̧ool kōn E. Āinwōt an rijilōk ro remour rainin, rej likūt eddo ko aer me an laļ in im leļo̧k aolepān mour ko aer n̄an peran ilo aer kwaļo̧k bwe Anij ekar kōjerkak Jisōs in. Kajoor in naan in kam̧ool ko aer kar tōl taujin armej ro n̄an bōk kūr in n̄an peptaij.6
Ennaan eo eaibojooj kōn jibbon̄in Ijtō ej tōmak eo an aolep Rikūrijin. Jisōs Kraist ekar jerkak jān mej, im kōn menin, jemaron̄ bar mour bar juon alen ālkin mej. Jeļā in ej letok eļap meļeļein im unin kōttōpar n̄an mour ko ad. Eļan̄n̄e jej bun̄ m̧aanļo̧k kōn tōmak, jenaaj oktak n̄an indeeo, āinwōt kar Rijilōk ro etto. Kōj, āinwōt er, jenaaj maron̄ niknik im jelm̧ae men ko reppen kōn tōmak ilo Jisōs Kraist. Tōmak in ej barāinwōt letok n̄an kōj kōjatdikdik n̄an juon iien n̄e ad “burom̧ōj enaaj oktak n̄an lan̄lōn̄.”7
Tōmak eo aō make ekar wōr an ijjino ālkin juon iien būromōj.
Jema im jinō rekar nejnej sip ko ilo New Zealand.8 Rekar m̧ōņōņō kōn mour ko aer. Āinwōt jet ripālele ro rekar dik wōt, rekar jeraam̧m̧an kōn jilu nejierro leddik jidikdik. Diktata eo etan in Ann. Juon raan ilo juon iien kakkije ke rekar ippān doon ilo juon ļwe, ajri ro nejier edik me 17 an allōn̄ etan Ann ekar jako jān tūrier. Ālkin jejjo minit in aer jeparūjrūj im pukōte, rekar loe emej ilo ļwe eo.
Iien in epen ekar kōm̧m̧an aō lukkuun būrom̧ōj. Jema ekar jeje tok n̄an eō iiō ko tokālik kōn jet iaan m̧ōņōņō ko rejako jān mour ko aer n̄an indeeo. Ekar kōm̧m̧an an lim̧ōtak kōn uwaak ko n̄an kajjitōk ko relukkuun aorōk tata kōn mour: “Ta eo Ann eo ejitōnbōro ippād enaaj kar erom̧? Jenaaj ke bar ioone? Ewi wāween an baam̧le eo am maron̄ bar m̧ōņōņō juon alen?”
Jejjo iiō ālkin jerata eo ekar waļo̧k, ruo mijenede rekar itok jān Kabun̄ eo an Jisōs Kraist im Armej ro Rekwojarjar ilo Raan Ko Āliktata n̄an jikin tāāp menin mour eo am. Rekar jino katakin kōm kōn m̧ool ko me repād ilo Bok in Mormon im Baibōļ eo. M̧ool kein ekoba kam̧ool ko bwe Ann kiiō ej mour ilo laļ eo an jetōb. Kōn Jerkakpeje eo an Jisōs Kraist, e enaaj bar jerkakpeje. Rekar katakin bwe Kabun̄ eo an Jisōs Kraist em̧ōj an bar juon alen jepļaaktok n̄an laļ in im ewōr juon rikanaan emour im jon̄oulruo rijilōk ro. Im rekar katakin katak ko rekwabilōn̄lōn̄ im rejeņolo̧k bwe baam̧le remaron̄ liāp ippān doon kōn ejja mālim an priesthood eo me Jisōs Kraist ekar leļo̧k n̄an rijilōk eo An erūtto, etan Piter.9
Jinō ekar m̧ōkaj an kile m̧ool eo im bōk juon an kam̧ool jān Jetōb. Jema, mekarta, ekar apan̄ wōt ilowaan iiō ko tokālik kōn pere im en̄jake ko jān Jetōb. Barāinwōt, ekar jab kōņaan ukōt wāween an mour. Juon jibbon̄ ālkin bon̄ ko in an jab kiki, jab tōt, ekar oktak n̄an Jinō im ba, “Inaaj peptaij rainin n̄e ejjab ijāmin peptaij.”
Jinō ekar ba n̄an mijenede ro ta eo ekar waļo̧k, im ekar mōkaj aer kile jidikin tōmak eo ilo jema eo me emaron̄ nej kar eddōkļo̧k ak jako.
Ejja jibbon̄on eo wōt baam̧le eo am rekar keļo̧k im etal n̄an lojet eo epaak tata. Jab jeļā ta eo enaaj waļo̧k, kōm ajri kar piknik ioon po̧k ko ke Elder Boyd Green im Gary Sheffied rej jibweļo̧k jinō im jema n̄an lo̧jet im kōpeptaiji er. Kōn jerbal in tōmak, Jema ekar wūjlepļo̧k ilo ittino̧ n̄an Irooj bwe jabdewōt men eo enaaj waļo̧k, enaaj m̧ool wōt ilo aolepān mour eo an n̄an kallim̧ur ko ekar kōm̧m̧ani.
Juon iiō tokālik juon tampeļ kar aje ilo Hamilton, New Zealand. Ejjab to jān iien eo baam̧le eo am, ippān bar juon eo ekar bōk jikin Ann, bukwelōlō im jepooļe lokatok eo ilo m̧weo ekwojarjar im̧ōn Irooj. Ijeņ, kōn mālim an priesthood eo, kōm kar bar koba ippān doon āinwōt juon baam̧le indeeo ilo juon kain̄i eļam waan im aibojooj. Menin ekar bōktok eļap aenōm̧m̧an im lan̄lōn̄.
Elōn̄ iiō ko tokālik Jema ekar ba n̄a eō bwe n̄e en kar jab kōn mej eo an Ann, eban kar kōttāik būruōn n̄an bōk jepļaaktok eo an gospel eo. Aaet Jetōb an Irooj ekar leļo̧k kōjatdikdik bwe ta eo mijenede ro rekar katakin e rem̧ool. Tōmak eo an jinō im jema rekar wōnm̧aanļo̧k wōt m̧ae rekar lukkuun uruur kōn kijeek kōn naan in kam̧ool ko aer me elur im ettā tōl jān kajjojo kālet ko aer ilo mour in.
Inaaj aolep iien kam̧m̧olool kōn waanjon̄ak eo an jinō im jema n̄an epepen ko ilju im jekļaj. Jeban maron̄ bwini jon̄an mour ko rej oktak kōn aer kōjerbal tōmak ilo iien būrom̧ōj eļap.
Ij karuwaineneik aolep ro rej en̄jake būromōj, aolep ro rej apan̄ kōn pere, aolep ro rej awōļ kōn ta eo ej waļo̧k ālkin mej, n̄an likūt am̧ tōmak ilo Kraist. Ij kallim̧ur bwe eļan̄n̄e kwoj ikdeleel n̄an tōmak, innām jerbal kōn tōmak im ļoor unoojdikdik an Jetōb, kwonaaj lo lan̄lōn̄ ilo mour in im ilo laļ eo ej itok.
Ewi jon̄an aō erriem̧aanļo̧k n̄an raan eo inaaj ioone sister eo aō Ann. Ij erreim̧aanļo̧k n̄an juon iien bar ippān doon eo ekam̧ōņōņō ippān jema, eo ekar mej 30 iiō ko rem̧ootļo̧k. Ij kam̧ool kōn lan̄lōn̄ in me ej pād ilo ad mour kōn tōmak, tōmak ilo jab loe,, ak jeļā kōn kajoor eo an Jetōb Kwojarjar bwe Jisōs Kraist ej mour. Kōn aolepān buruō, ij kālet n̄an ļoor Jisōs Kraist im gospel eo An me em̧ōj an jepļaaktok. Menin ej kōjeraam̧m̧an kajjojo m̧ōttan ko ilo mour eo aō. Ijeļā bwe Jisōs ej Kraist eo, Nejin Anij, ad Rilo̧mo̧o̧r im Ripinmuur. Ilo etan Jisōs Kraist, amen.