Meram ej Eddāp n̄an Meram
Ilo ad kōkajoorļo̧k tōmak ko ad ilo Kraist, jej bōk meram jān ad lale jon̄an kajoor eo m̧ae ejako aolepān marok.
Ro jeiū im jatū jitōnbōro, Ij lan̄lōn̄ ippāmi ilo Jabōt in Easter in jejeram̧m̧an kake ilo ad kejokļo̧kjeņ kōn aibojooj in meram eo me ekar rome laļ in kōn Jerkakpeje eo an ad Irooj im Rilo̧mo̧o̧r, Jisōs Kraist.
Ilo iien kwaļo̧k naan eo An ilo laļin, Jisōs eaar kwaļo̧k, “N̄a, meram in laļ; eo ej ļoor Eō e jāmin etal ilo marok, a enaaj an meram in mour.”1 Jetōb eo an Kraist, “ej ilo aolep men ko otemjeļo̧k, [im] ej leļo̧k mour n̄an aolep men ko otemjeļo̧k.”2 Ej eļļā ioon marok eo me enaaj kar jepooļe kōj.
Iiō ko remootļo̧k, ilo am kar kappukot jikin ko n̄an alooji, laddik ro ruo nejū im n̄a kōm kar etal ippān juon group in Doulul eo an Likao ro n̄an juon ron̄ kileplep etan Moaning, kar etņake kōn et in kōnke juon ainikien ekkein itok jān lowaan jikin e. Ron̄ in ej juon ron̄ kileplep eo m̧wūlaļļin ej 180 ne debakbak (55 m) juon ron̄ ekileptata ilo jikin eo ilo California.
Ewōr wōt ruo iaļ laļļo̧k: ilo juon jikinwe edoulul ak wallalļo̧k kōn to n̄an laļ tata ilo ron̄ eo; n̄a im laddik ro nejū kōm kar kāālet n̄an wallaļļo̧k ilo to. Laddik eo nejū eritto ekar walaļļo̧k jinoin im n̄a im ļaddik eo nejū edikļo̧k n̄a kom̧ro wallaļ āliktata bwe kom̧ro en jim̧or walaļļo̧k ippān doon.
Ālkin kar letok kōmeļeļe ko im kakoņkoņ kōm kōn to im kein tallōn̄ ko n̄an juon to ekajoor, kōm kar wanlaļļo̧k m̧ae iien kōm atartar im jutak ilo juon jikin jutak eaidik ilo tōrerein im joļo̧k am mijak, āinwōt ke kar ijo āliktata bwe kōm en kar bar rool, im jikin eo āliktata me kōm maron̄ kar loe meram jān ijo ilōn̄tata ilo ron̄ kileplep eo.
Ke kōm kar rool likļo̧k kōm kar wōtļo̧k n̄an ron̄ kileplep eo etan cathedral elukkuun aitok im depakpak jon̄an Statue of Liberty emaron̄ deļon̄ lowaan. Kōm kar eroulul ilo to ko ilo an mejem kajjieon̄ ilo erre ilo marok eo. Ilo am kar wōnm̧anļo̧k wōt im wanlaļļo̧k, meram in tōma ko rekar rome dipin lowaan ron̄ kileplep ijoko dōkā ko rej ejatōltōl ie.
Ilo ejjeļo̧k kōjeļā kake, meram eo ekar kajju jako. Etto ilo mejatoto ilo ioļapen jikin eo, kar jepooļ kōm kōn marok jon̄an kōmim ejjab maron̄ lo peim make ilo to ko im̧aan mejām. Im ainikien eo em̧ōkaj an ikkūr, “Baba, Baba, koped ke ijo?”
“N̄a e ije, Nejū, N̄a e ije,” Iaar uwaak.
An jako meram eo rekar lōme n̄an kwaļo̧k n̄an armej bwe ilo an ejjeļo̧k tōma n̄an kōmeramram, marok ilo ron̄ kileplep eo jeban maron̄ loļo̧kjeņ. Ej eļļā jene; kōm ekar “en̄jake” marok lep eo. Ke ekar bar ebbōl tōma ko, kajoor an meram ekar anjo̧ jen marok, āinwōt aolep iien marok ejjab maron̄ anjo̧ jen meram, jekdo̧o̧n jiddik ko. Laddik eo nejū im N̄a kar emeemļo̧k juon marok me jejjan̄in kar jeļā kake, juon kamoolol eļap n̄an meram eo me kōm ban meļo̧kļo̧k, im kōjatdikdik bwe jeban aolep make iaad ilo marok.
Ad wanlaļļo̧k ilo ron̄ kileplep in ilo jet wāween ej kajbwebwe iaļ in ad ilo mour in. Jaar etal jān meram eo aiboojoj ilo lan̄ im wanlaļtak ilo ron̄ol in meļo̧kļo̧k eo n̄an juon laļ eo emarok. Jemedwōj Ilan̄ ekar jab kōjōkdoon kōj ilo marok in bōtaab eaar kallimur kōn meram ilo iaļ in ad ilo Nejin Emake, Jisōs Kraist.
Jejeļā bwe meram in aļ aorōk n̄an mour kein ad ilo laļin. Jon̄an wōt an aorōk mour in jetōb ko ad ej meram eo im ej itok jān ad Rilomo̧o̧r. Ilo iakwe eo An ewāppen, Anij ej letok Meram eo an Kraist n̄an jabdewōt “ro rej itok n̄an laļ in”3 bwe ren maron̄ “jeļā em̧m̧an jān nana”4 bwe ren im̧we “n̄an kōm̧m̧an em̧m̧an iien otemjej.”5 Meram eo, ej kwaļo̧k ta ko jej ņa etan bōklōkot ko ad,, akweļap n̄an kōj bwe jān m̧akūtkūt im em̧m̧anļo̧k, kōkm̧anm̧an kōj make.
Ilo ad kōkajoorļo̧k tōmak ko ad ilo Kraist, jej bōk meram jān ad lale jon̄an kajoor eo m̧ae ejako aolepān marok eo im emaron̄ jepooļ kōj. “Men eo ej jān Anij ej meram; im e eo ej bōk meram, im wōnm̧aanļo̧k wōt ilo Anij, ej bōk eļapļo̧k meram; im meram in ej meramļo̧k im meramļo̧k m̧ae raan eo eweeppān.”6
Meram eo an Kraist ej kōpooj kōj n̄an bōk im̧we ko an jerbal in karejar eo jān Jetōb Kwojarjar, eo im “ej kajoor in ukōt an Anij … eo ej m̧ool eo an Gospel eo”7 Eo ej kein kajilu ilo Taitōļ in Anij, Jetōb Kwojarjar eo “ej juon ānbwinnin Jetōb.”8 Men eo eļaptata ilo meram eo Jemedwōj Ilan̄ eaar likūt ippād ilo mour in ej itok jān Jetōb Kwojarjar eo eo im im̧we ko an “enaaj kōmeram am ļōmņak, eo enaaj koobrak am kōn m̧ōņōņō.”9
Ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, kōn mālim eo an priesthood, kom̧ ej peptaij kōn tulo̧k ilo dān n̄an jeorļo̧k jerawiwi ko. Innem pā ko rej likūt ioon bōram̧ im men eo em̧m̧antata “mennin letok eo jab maron̄ kōmeļeļeiki”10 eo an Jetōb Kwojarjar ej likūt ioom̧.
Ālkin, n̄e kōņan im kōm̧m̧an ko rej pedped ilo iaļ in bujen eo, Jetōb Kwojarjar eo, ej meram eo ilo kwe, enaj kwaļo̧k im kam̧ool n̄an kwe kōn m̧ool eo,11 kakkōl eo jān jorrān, kaeņōm̧m̧an12 im karreo,13 im letok aenōm̧m̧an,14 n̄an mour eo am̧.
Kōnke “meram ej eddāp n̄an meram,”15 eo m̧ōttam̧ Jetōb Kwojarjar enaj tōl kwe n̄an bōk kāālet ko im renaj dāpij kwe ilo meram in; kōļmenļo̧kjen, kāālet ko im jab im̧we jān Jetōb Kwojarjar renaj tōlļo̧k kwe n̄an ijo emaroktata. Āinwōt an Elder Robert D. Hales kar katakin, “N̄e meram eo ped, maroklep ej jako im aikuj ilo̧k. … N̄e jitbōn meram eo an Jetōb Kwojarjar ej ped, maroklep an Satan ej jakoļo̧k.”16
N̄e imaron̄ ba bōlen en̄in ej iien eo n̄an kajjitōk ippam make: Ewōr ke meram in ilo mour e aō? N̄e ejjab, ņāāt eo āliktata ekar wōt ippa?
Baj āinwōt an meram in al rometok laļ in n̄an kōkāāl im rie mour, komaron̄ aolep iien kōmeramļo̧k meram eo ilo kwe n̄e kwoj kālet n̄an ļoor E—Jesus Christ.
Juon pil in meram ej ļapļo̧k aolep iien kwoj pukot Anij ilo jar; katak jeje ko rekwojarjar n̄an “ron̄jake E”;17 m̧akūtkūt ekkar n̄an tōl im revelesōn jān rikanan ko ad remour im ilo pokake im kōjparok kien ko n̄an “etetal ilo aolep kain̄i ko an Irooj.”18
Kwonaaj karuwaineneik waj meram in jetōb n̄an jetōb eo am̧ im aenōm̧m̧an n̄an mour eo am̧ kajjojo iien kwoj ukweļo̧k. Ilo am̧ bōk kwojkwoj aolep wiik, n̄an bōk etan Rilo̧mo̧o̧r eo ioom̧, n̄an keememej E iien otemjej im kōjparok kein ko An, meram eo An enaaj romaak ilo kwe.
Enaj wōr meram ilo kwe aolep iien kwoj kwaļo̧k kōn gospel eo im kwaļo̧k am̧ kam̧ool. Aolep iien kwoj jerbal n̄an ro jet āinwōt kar Rilo̧mo̧o̧r, An iakwe maron̄ en̄jake ilo būruwōm̧. Meram eo an Jemedwōj Ilan̄ ej aolep iien pād ilowaan tampeļ ko An rekwojarjar im ioon aolep ro rej kwaļo̧k er make ilo mweo Im̧ōn Irooj. Meram eo An ilo kwe ej pād ilo jerbal in jouj ko am̧, am̧ kijenmej, jeorļo̧k bōd, im iakwe erreo an Kraist im kwaļo̧k e make ilo an paaktokum̧ m̧ōņōņō. Ilo bar juon wāween, jej etetal ilo annan̄ n̄e em̧ōkaj ad inepata ak erumij ad jeorļo̧k bōd. “Ilo am kalimjōkļo̧k wōt meram in aļ, annan̄ ko reban anjo̧ bōtaab renej waļo̧k wōt ilo tulikūm̧.”19
Ilo am mour em̧m̧an n̄an mour kōn Jetōb Kwojarjar eo, kwoj lukkuun m̧ool “kōļapļo̧k maron̄ in jetōb eo ami n̄an bōk revelesōn.”20
Mour ej kwaļo̧k apan̄ ko im m̧ōjņo ko, im kōjwōj jej aikuj jelm̧ae maroklep im lan̄ ko. Ilo aolepen men kein, eļan̄e jenaaj “kālet bwe Anij en anjo̧ ilo mour ko ad,”21 meram eo an Jetōb Kwojarjar enaj kwaļo̧k bwe ewōr wūnin im meļeļe ko n̄an en̄taan ko ad, bwe jenaaj lukkuun oktak n̄an em̧m̧anļo̧k, lukkuun likio ilo juōn tōmak edim im meram in kōjatdikdik ilo Kraist, jeļā bwe Anij ekar pād ijeņ ippād ilo aolep raan ko ad ko remarok. Ilo an kar Būreejtōn Russell M. Nelson kapilōk, “marok in me ej ļapļo̧k ippān tok melijjon̄ ko rej kōm̧m̧an bwe meram eo an Jisōs Kraist en ļapļo̧k wōt an romaak.”22
Mwen̄an ko an mour in remaron̄ bōk kōj n̄an ijoko jejjab kōtmani im rejjab kam̧ōņōņō. Eļan̄e jerawiwi ekar tōlļo̧k kwe n̄an ijeņ, leliktak katiin̄ in maroklep ņe im jino kiō n̄an kōttaik ilo am epaakeļo̧k Jemam̧ Ilan̄ kōn juon bōro erub im juon jetōb ettā im ukweļo̧k. Enaaj ron̄jake jar in akweļap eo am̧ Kōn peran rainin, “kepaaktok [Eō] im [Inaaj] kepaakwaj kom̧.”23 Kwoj jāmin likjab jān kajoor in kōmour eo an Pinmuur eo an Jisōs Kraist.
Ij itok jān jinō im jema ro rem̧m̧an im jān ritōmak ro jibū im jimmaō ro im raar bōk meram eo an Jisōs Kraist im Gospel eo An, im eaar kōjeram̧man mour ko aer im ro tok ālik im raar ļoor aenōm̧an eo an jetōb. Jema emakūjkūj an kōnono kōn jemen n̄an n̄a, Milo T Dyches, im ej kwaļo̧k wāween an tōmak ilo Anij kar juon meram n̄an e raan im bon̄. Jimma ekar juon rikadūdudu im ekkā an etal n̄an toļ ko, leļo̧k mour eo an ilo an jab kajjitōk tōl an Anij im kōjparok.
Juon iien fall, Jimma ekar make iian ilo toļ ko reutiej. Im ej jino an winter im ekar iuwe ioon juon iaan kiria ko nejin, etan old Prince, im iuwe n̄an juon jikin kōm̧m̧an aļaļ eo n̄an julok kūlin aļaļ ko im jon̄i m̧okta jān aer mwijiti im ukoti n̄an lumber.
Ke ej jino jok marok, ekar kam̧ōj an jerbal im bar iuwe ioon kiria eo. Ilo iien eo, eaar lukkuun ļap m̧ōļo, im juon lan̄ in winter im sno ko rekar kalipopoik aolepān toļ eo. Ilo an ejjeļo̧k meram ak iiaļ n̄an tōl e, ekar tōl Prince n̄an juon ial ekar ļōmņak enaaj kar tōl er n̄an ranger station.
Ālkin an etal ilo marok elōn̄ m̧ael ko, Prince ekar rumijļo̧k an etetal innem eaar bōjrak. Jim̧m̧a ekar jiron̄ Prince bwe en wōnm̧anļo̧k wōt, bōtaab horse eo ekar jab. Ippen an snow ko doululi erro, Jim̧m̧a eaar kūle ke aikuji jipan̄ eo an Anij. Einwōt an kajoor aolepen mour eo an, eaar kōttāik e “[kajjitōk] ilo tōmak, ilo ejjeļo̧k kalijōkļo̧k.”24 Juon, ainikien edik eaar uwaak, “Milo, leļo̧k bwe Prince en tōl.” Jim̧m̧a eaar bokake, im ilo an kōtļo̧k bwe en tōl, Prince ekar oktak im ettōr ilo iiaļ eo eoktakļo̧k. Jet awa tolālik, Prince ekar bar bōjrak im lelaļļo̧k bōran. Ilo an etal ilo snow ko ļo̧k, Jim̧m̧a eaar loe bwe erro kar tōbarļo̧k kōjem̧ eo an ranger station.
Ilo jibbon̄on eo, Jim̧m̧a eaar maron̄ lo iaļ ko an Prince ilo snow ko. Ekar bōk kūtwōn ke ekar lo iaļ ko me ekar tōl Prince kiria eo ieļo̧k: kar lukkuun tōrerein wōt toļ utiej, im jidik wōt an nej kiria eo m̧akūt m̧aanļo̧k ak enaaj kar wōtļo̧k im mej ioon dekā killep ko laļ.
Itok wōt jān en̄jake in im ko jet, Jim̧m̧a ekar kapilōk, “Eo m̧ōttam̧ im em̧m̧antata im kwonaj jeļā kake ej Jemed Ilan̄.” Jabdewōt iien paba ej keid bwebwenato eo an Jim̧m̧aō, Ij keememej ej ekōnono jān jeje ko rekwojarjar:
“Kwōn lōke Irooj kōn aolepān būruom̧, im kwōn jab atartar ioon jeļāļo̧kjeņ eo am̧.
“Kwōn kwaļo̧k E ilo iaļ ko am̧ otemjeļo̧k, innām Enaaj ba kajjien iaļ ko am̧.”25
Ij kam̧ool bwe Jisōs Kraist ej meram eo n̄an indeeo im ej “romaak ilo marok.”26 Ejjeļo̧k marok en emaron̄ kabōjrake, joļo̧ke, kajoor jene, ak eļļā ioon meran in. Jemedwōj Ilan̄ ej letok meram in n̄an kwe. Kom̧ij jab makeļo̧k iaami. E ej ron̄ im uwaake aolep jar. E em̧ōj “kūr kom̧ jān marok im n̄an ilowaan meram eo An e men in bwilōn̄.”27 N̄e kwoj kajjitōk, “Jema, Jema, Kwoj ke pād ijeņ?” Enaaj aolep iien uwaak, “N̄a e, nejū; Ij pād ijeņ.”
Ij kwaļo̧k aō kam̧ool bwe Jisōs Kraist ekar kakūrm̧ool karōk eo an Jemedwōj Ilan̄ āinwōt ad Rilomo̧o̧r im ad Ripinmuur;28 E ej ad meram, ad mour, im ad iaļ. Meram eo An ejjamin marok,29 aiboojoj eo An ejamin bōjrak, iakwe eo An n̄an kwe ej n̄an indeeo, inne, rainin, im indeeo. Ilo etan Jisōs Kraist, amen.