En̄in Ej Tōre eo Ad!
Anij ekar jilkintok kōj n̄an ijin, kiiō, ilo iien in aorōk ilo bwebwenato.
Ilo 1978, Ikar jutak ilowaan m̧ōn football eo eobrak kōn 65,000 rialooj ro. Im̧aan meja jet iaan rikkure ro jān team eo juōn im relikkun kūlep rej reitok einwōt n̄e rej kōņaan tūmwi bōra. Kar game eo aō kein kajuon einwōt juon quarterback ilo National Football League eo, im kōm kar ikkure ippen team eo ekar bōke Super Bowl Champion eo. N̄an kwaļo̧k m̧ool, ikar kajjitōk eļan̄n̄e ekar bwe aō jeļā n̄an pād ilo jikin ikkure eo. Ikar kā liktak im kadkad kōn booļ eo, im ilo Aō kar kōtļo̧k ball eo, kar tubar e eō eļapļo̧k jān kar m̧oktaļo̧k. Ilo tōre eo, ij babu ium̧win rukkure ro rekkūlep, ikar ļōmņak ta eo ij kōm̧m̧ane ijo. Eaar wōr aō kālet n̄an kōm̧m̧an. Inaaj ke kōtļo̧k bwe pere ko ad ren eļļā iooū, ak Inaj ke loe peran im kajoor n̄an jutak im n̄an wōnm̧anļo̧k?
Ippen Doon
Iaar jab kūle ilo tōre eo ewi wāween an naj en̄jake in kōpooj n̄a n̄an iien ko rem̧m̧an iliju im jekļaj. Ikar aikuj n̄an ekkatak bwe in kajoor im peran ilo iien aō jelm̧ae men ko reppen.
Juon ikkure in football emaron̄ jab aorōk in wōt men ko reppen im kwonaj iooni. Eitōn aolep iien, eban wōr jikin ikkure eobrak kōn armej rej alooj. Bōtaab kālet ko am reperan renaaj wōr aer jenekjej indeeo.
Bōlen jeban aolep iien en̄jake ad anjo̧ ioon idajon̄jon̄ eo. Bōtaab Jemedwōj Ilan̄ ej loe kwe einwōt juon rikalōk Aelōn̄ Eo An im ejjab mijak. Unin an kar jilikintok kōj n̄an ijin ilo iien kōm̧m̧an kālet ilo bwebwenato an laļ in. En̄in ej tōre eo ad.
Ron̄jake ta eo Būreejitōn Russell M. Nelson ekar ba ālkin jidik iien ālkin an kar erom̧ Būreejtōn n̄an Kabun̄ in: “Rilo̧mo̧o̧r eo ad im Ripinmuur, Jisōs Kraist, enaaj kōm̧m̧ane jet iaan jerbal ko An rekajoor ikōtaan kiiō im iien eo Ej bar itok. Jenaaj lo kōkaļļe in menin bwilōn̄ ko me Anij Jemed im Nejin, Jisōs Kraist, ej tōl Kabun̄ in ilo wōj im aeboojoj” (“Revelesōn n̄an Kabun̄ eo, Revelesōn n̄an Mour ko Ad,” Liaona, Māe 2018, 96).
Jerbal ekajoor? Kōkaļļe in menin bwilōn̄ ko? Enaaj ewi jōkjōk in kalimjōke? Ta eo jenaaj kōm̧m̧ane, im enaaj ewi wāween ad jeļā ta eo jen kōm̧m̧ane? Ijjab jeļā aolep uwaak ko, bōtaab Ijeļā bwe Irooj ej aikuji ad bojak! Erreo ilo kajoor eo an priesthood ejjan̄in kar ļapļo̧k an aorōk.
Jej ke tōmak rikanan ro an Anij? Jemaron̄ ke pukōt im kakūrm̧ool kōttōbar ko ad? Aaet jemaron̄, im aaet, jej aikuj, kōnke en̄in ej tōre eo ad!
Eļan̄n̄e jej ron̄ bwebwenato ko kōn rijerbal ro rem̧m̧an an Anij im raar itok im̧aad—āinwōt Moses, Meri, Moronai, Alma, Esther, Josep, im ebar lōn̄ ro jet—im ro reutiej ļo̧k. Im rejjab oktakļo̧k jān kōj. Armej rein rej jelm̧ae apan̄ kein rej bar āinwōt kōj. Raar lōke Irooj. Rekar kālet jim̧we ilo iien ko raorōk. Im, ilo tōmak kōn Jisōs Kraist, rekar kōm̧m̧ani jerbal ko aer ilo iien ko aer.
Jo̧o̧ļ em̧m̧an
Kōļmenļo̧kijeņ kōn eo eperan etan Joshua ilo Kallim̧ur M̧okta. Kar rikaļoor eo em̧ool n̄an Moses, juon iaan ritōl ro rem̧m̧an ilo bwebwenato. Ālkin an Moses kar ilo̧k, ekar iien eo an Joshua. Ekar tōl ajri in Israel ro n̄an āneen kallim̧ur. Ekōjkan an kar kōm̧m̧ane menin? Joshua ekar ļotak im rūttoļo̧k ium̧win kōm̧akoko ilo Egypt. Ekar ejjeļo̧k an bok in bōk meļeļe ak pija in in kōmeļeļe ko n̄an jipan̄ e. Ekar ejjeļo̧k an smartphone! Bōtaab ekar wōr ippān kallim̧ur in jān Irooj:
“Āinwōt Iaar pad ippān Moses, āindein Inaaj pād ippam: Ij jāmin likjab jān eok, ak ilo̧k jān eok.
“Kwon kajoor wōt im peran” (Joshua 1:5–6).
Ke iaar kāālwōt n̄an Jijlimjuonn̄oul ro im jab lukkuun jeļā ta, ikar uwaake juon talboon eaorōk jān Opiijj eo an Būreejitōnji eo Kein Kajuon, kajjitōk ippa eļan̄e imaron̄ bōk jikin rikanan eo im loļo̧k juon likao ilo aujpitōļ—iien eo em̧ōkajtata. Etan likao eo ej Zach. Ekar kōpopo n̄an erom̧ juon mijenede bōtaab ekar kūraaj im ekar en̄taan im pād ilo juon kauwōtata kōn jorrāān ilo bōran.
Ilo aō kar ettōrļo̧k n̄an aujpitōļ, iaar kōļmenļo̧kjeņ. Juōn m̧akūtkūt ak jerbal an rikanan eo—kwoj kōjak ke? Ta eo ij bojen jelm̧ae? Ewi wāween aō naaj jipan̄ likao in? Ebwe ke jon̄an tōmak eo aō? Jar ilo m̧ool im jeļā eo epād ippa im maron̄ eo ekwojarjar an priesthood eo rekar erom̧ emjak ko aō.
Ke Ij tōbrakļo̧k, Zach ekar babu ilo juon peet ilo aujpitōļ. Rej jutak im bojak n̄an kair kake e n̄an ruum̧ im m̧wijm̧wij eo bwe taktō ro ren kadikļo̧k metak eo ilo bōran. Ikar kalimjōke jinen eo ej jan̄ im juōn m̧ōttan eo emijak ej jutak turin, im ikar jeļā ke Zach ekar aikuji juon kōjeraam̧m̧an jān priesthood eo. Eo m̧ōttan ej kab m̧ōj an bōk Melkisedek Priesthood eo, im ikar kajjitōk ippān bwe en jipan̄ n̄a. Ikar en̄jake kajoor an priesthood eo ilo am̧ kar ettā im leļo̧k kōjeraam̧m̧an n̄an Zach. Innem ekar kair kake n̄an bwe en m̧wijm̧wij , im ilo juon en̄jake eaenōm̧an ej kalikkarke Rilo̧mo̧o̧r eo enaj kōm̧m̧an aolep men ekkar n̄an Māletlet.
Rijerbal in aujpitōļ ro raar bar etal im X-ray ak pijaiki āliktata m̧okta jān aer m̧wijiti. Raar loe, ilo aer būlōn̄, ejjab aikuj kōm̧m̧an jerbal in m̧wijm̧wij.
Ālkin elōn̄ jipan̄ ko, Zach ekar bar ekkatak etetal im kōnono. Eaar jerbale juon mijen eo eļap tōprak in im em̧m̧an im ej kiiō lale juōn an baam̧le make.
Aaet, ejjab aolep iien ej waļok āindein. Ikar bar leļo̧k kōjeraam̧m̧an ko an priesthood ko elōn̄ kōttan ilo ejja jon̄an tōmak in wōt, im ankilaan Irooj ekar jab lukkuun leļo̧k kōmour eļap ilo mour in. Jej lōke un im kōttōpar ko An im likūt aolep men ilo E. Ejjab aolep iien enaaj kālet tōprakin jerbal ak kōm̧m̧an ko ad, bōtaab jemaron̄ kālet n̄an bojak im jerbal.
Bōlen jamin bar kajjitōk ippam̧ jān Būreejitōnji eo Kein Kajuon n̄an ilok ikūjer ilo jun iien ekawōtata n̄an mour. Bōtaab kūr n̄an kōj bwe jen kōm̧m̧an oktak ko ilo mour in āinwōt ro rej bōk jikin Irooj. Ejjamin meļo̧kļo̧k kōj. En̄in ej tōre eo ad.
Piter, ritōl eo an rikaļoor ro an Rilo̧mo̧o̧r ekar pād ilo wa eo ilo lo̧meto ke ej lo an Jisōs etetal ioon dān eo. Ekar kōņaan ilo̧k Ippān, innām Rilo̧mo̧o̧r eaar ba, “Kwon itok.” Peran im kabwilōn̄lōn̄, Piter ekar to jān wa eo im jino an etetalļo̧k n̄an ippān Rilo̧mo̧o̧r. Bōtaab ke Piter ekar loe kōto ko, tōmak eo an eaar jino makunļo̧k. “E mijak; im ekar jino an tulo̧k, eaar jan̄, eaar ba, Irooj, kwon lo̧mo̧o̧ren eō. “Im em̧ōkaj an Jisōs erļo̧ke pein, im dāpij e.” (Lale Matu 14:22–33.)
N̄e kōto ko rej bōktok mour kein ad, ia eo jej kalimjōke? Keememej, ewōr juon kein jipan̄ n̄an kōkajoor im kōperan. Pein Jisōs ej erļo̧k n̄an kōj, āinwōt aer kar erļok n̄an Piter. Ilo ad kajjieon̄ tōbar E, Enaaj m̧ōņōņō n̄an jipan̄ kōj. Jej ro An. Ekar ba, “Kwon jab mijak: bwe em̧ōj an lo̧mo̧ren e, Iar ān̄in̄in eok kōn etam̧, kwoj aō” (Aiseia 43:1). Enaaj kaanjo̧ eok ilo mour ņe am̧ eļan̄e kwonaj kōtļo̧k n̄an E. Kāālet eo ej ami! (Lale Russell M. Nelson, “Anij En Anjo̧l,” Liaona, Nob. 2020, 92–95).
Ālkin mour eo an, Joshua ekar akweļap n̄an armij ro an, “Komin kāālet rainin wōn eo kom̧ naaj jerbal n̄an e; … a kōn n̄a im ro nukū, kōm naaj jerbal n̄an Irooj” (Joshua 24:15). Kōn kāālet eo an ekar jerbal n̄an Irooj, Joshua ekar oktak im juon ritōl eo em̧m̧antata ilo iien eo an. Ro jera, en̄in ej tōre eo ad! Im kāālet ko ad renaj kwaļo̧k ia eo jej ilo̧k ieļo̧k (lale Thomas S. Monson, “Decisions Determine Destiny” [Brigham Young University fireside, Nov. 6, 2005], speeches.byu.edu).
Ke iaar jerbal āinwōt juon bisop, ekar wōr juon am matto ilo ward eo am, Kāālet ko rem̧m̧an rej kwaļo̧k m̧ōņōņō—ejjeļo̧k jem̧ļokin. Jodikdik ro rej ioon eō ilo hall way eo im ba, “Bisop, ij kōm̧m̧ani kāālet ko rem̧m̧an!” Ej ettōņak eo an juon bisop in!
Ta meļeļe eo ad kōn “kāālet jim̧we ko”? Juon armej ekar kajjitōk ippān Jisōs, “Kakien ta eo em̧m̧an iaan aolep kakien?” Ekar uwaak:
“Kwōn yokwe Irooj am̧ Anij kōn aolepen būruom̧ im kōn aolepen am̧, im kōn am̧ ļōmņak otemjej.
“En̄in ej kien eo eļap im m̧oktata.
“Im eo kein karuo āinwōt in, Kwōn yokwe ri turum̧ im āinwōt kwe” (Matu 22:36–39).
Ijjab jeļā kōn kom̧, bōtaab n̄e ij riiti kakien kein ruo rem̧m̧antata, ij lale kein kajilu, lukkuun kakien: n̄an iakwe eok make.
Em̧ōj ke am ļōmņak kōn iakwe eok make āinwōt juon kakien? Jemaron̄ ke iakwe Anij im iakwe ajri ro nejin eļan̄n̄e jejjab iakwe kōj make?
Juon ritōl eo emeletlet ej rōjan̄ juon em̧m̧aan eo im ej kajjieon̄ anjo̧ ioon iiō ko rellōn̄ kōn kāālet ko an renana. Em̧m̧aan eo eaar jook, im pere bwe e ej juon eo ejjeļo̧k eņ ej iakwe.
Ritōl eo an ekar ba n̄ane, “Bwe Irooj ejeļā kōn e, ej iakwe e, im ej m̧ōņōņō [kōn] e im an peran n̄an bōk kūltōn kein.” Bōtaab eaar kobaikļo̧k, “[Kwe] kwoj aikuj ron̄jake kakien in n̄an iakwe kwe make bwe kwon maron̄ en̄jake an [Anij] iakwe im iakwe ro jet.”
Ke brother in ekar ron̄ naan in rōjan̄ in, ekar lo oktak kāāl ilo an kalimjōk mour in. Tokālik eaar ba, “Iaar joļo̧k aolepān mour e aō n̄an pukot aenōm̧m̧an im lan̄lōn̄. Ikar pukot men kein ilo elōn̄ jikin ro rōbōd. Kōn wōt iakwe eo an Jemedwōj Ilan̄ im Rilo̧mo̧o̧r eo, imaron̄ loe aenōm̧m̧an. Ijeļā rej kōņaan bwe in iakwe n̄a make; en̄in ej wāween eo wōt imaron̄ en̄jake iakwe eo Aer n̄an eō.”
Jemedwōj Ilan̄ ej kōņan bwe jen iakwe kōj make—jab utiej bōro ak ļōmņak kōn kōj make, bōtaab n̄an kalimjōk kōj make āinwōt An kalimjōk kōj: ajri ro Nejin raorōk. N̄e m̧ool in ej lukkuun un̄ūr ijo em̧ūlaļ ilo būruōd, ad iakwe n̄an Anij ej eddōk. Eļan̄n̄e kwonaj lale kwe ilo am̧ kea kake, būruwōm̧ enaj peļļo̧k im kwonaj kōm̧m̧an n̄an ro jet. N̄e enaaj ļapļo̧k am̧ kūle aorōkid, enaaj ļapļo̧k am̧ meļeļe m̧ool eo: bwe Anij ekar jilikintok kwe n̄an ijin, kiiō, ilo tōrein ilo bwebwenato, bwe kwon maron̄ kōm̧m̧ane men eo em̧m̧antata kōn jeļā eo im menin letok ko ippam. En̄in ej iien eo ad. (lale Russell M. Nelson, “Becoming True Millennials” [worldwide devotional for young adults, Jan. 10, 2016], broadcasts.ChurchofJesusChrist.org.)
Josep Smith eaar katakin bwe aolep rikanan, ilo aolep iiō, “rej reim̧anļo̧k kōn m̧ōņōņō n̄an raan eo im jenaj mour ie; … raar al im jei im kanan kōn raan kein ad; … jej ro rem̧m̧an im em̧ōj an Anij [kāālet] n̄an bōktok aibojoj eo Raan ko Āliktata” (Teachings of Presidents of the Church: Joseph Smith [2007], 186).
Ilo am̧ jelm̧ae apan̄ ko raan otemjej, keememej naan in kaenōm̧m̧an in im kar letok jān Elder Jeffrey R. Holland: “En ļap kakkūje ioon aerad, bōtaab enaaj juon aiboojoj im en̄jake eo eļap tokjān. … Anjo̧ eo ej un jum̧ae eo āliktata im em̧ōj kōnono kake. Anjo̧ in em̧ōj an ped ilo bok in jeje… , jeje ko rekwojarjar!” (“Be Not Afraid, Only Believe” [address to Church Educational System religious educators, Feb. 6, 2015], broadcasts.ChurchofJesusChrist.org).
Ilo weekend in Ijtō in eaiboojoj, imaron̄ ke kajjitōk ippāmi bwe jen aolep jar n̄an kile im kautiej eddo ko ad kajjojo ilo ad kōppopo n̄an raan eo eaibojooj n̄e Rilo̧mo̧o̧r ej bar itok. Irooj ej iakwe kōj eļap jān jon̄an eo jemaron̄ kōmeļeļeiki, im E enaaj uwaak jar ko ad! Mekarta jej pād ilo melan jikin ikkure football eo, juon ruum̧ ilo aujpitōļ, ak ilo jabdewōt jikin, jej m̧ōttan karōk in aorōk—kōnke en̄in ej tōre eo ad in! Ilo etan Jisōs Kraist, amen.