Ta eo Jej Ekkatak im Jej Jāmin Meļo̧kļo̧ke
Eļan̄n̄e kwonej kalimjōke mour eo am̧, ij tōmak kwonaaj loe elōn̄ wāween ko Irooj ekar tōl eok ilo iien in epen.
Em̧m̧aan ro jeiū im jatū rejitōn bōro, n̄a ikar reim̧aantak n̄an kweilo̧k in ippemi imejatoto. Iien eo ļo̧k jekar kōm̧m̧ane m̧wen̄an eo an priesthood ilo kweilo̧k eo eļap ekar ilo Eprōl 2019. Elōn̄ men rekar waļo̧k ilo iiō ko ruo rej mootļo̧k! Jet iaami rekar luuji ro rejitōn bōro ippāer. Ro jet, rekar luuji jerbal ko aer, wāween mour, ak nan̄inmej. Ak ro jet rekar luuji en̄jake in aenōm̧m̧an ak kōjatdikdik kōn ilju im jekļaj. Būruwō ej iwōj n̄an kom̧ kajjojo rekar en̄taan kōn men kein ak jako ko jet. Ij wōnm̧aanļo̧k im jar bwe Jemedwōj Ilan̄ enaaj kaenōm̧m̧an kom̧. Ilo ami wōnm̧aanļo̧k wōt im kōtļo̧k bwe Anij en anjo̧ ilo mour ko ami, ijeļā bwe E ej baj kōjatdikdik wōt kōn ilju im jekļaj eo ami āinwōt E ekar baj wōt jān jinoun.
Ilubwilijin jako kein jekar jelm̧ai, ebar wōr jet men ko jekar loi. Jet rekar loe eļapļo̧k tōmak ilo Jemedwōj Ilan̄ im Nejin, Jisōs Kraist. Elōn̄ rekar loe juon jibadbad ekāāl kōn mour—aaet juon jibadbad indeeo. Kom̧ ar loe jem̧jerā ko rekajoorļo̧k ippān ro kom̧ij iakwe er im ippān Irooj. Im ij kōjatdikdik bwe kom̧ ar loe juon maron̄ eo eļapļo̧k n̄an ron̄jake E im bōk revelesōn ko ami make. Mālijjon̄ ko reppen ekkā aer letok iien ko ad rem̧m̧an n̄an eddōkļo̧k ko me reban maron̄ kar itok ilo jabdewōt wāween.
Ļōmņak likļo̧k kōn iiō ko ruo remootļo̧k. Ewi wāween am̧ kar eddōkļo̧k? Ta eo kwaar ekkatak? Komaron̄ jino ļōmņak in kōņaan bwe kwon kar bar ro̧o̧lļo̧k n̄an 2019 im pād wōt ie! Ak eļan̄n̄e kwonej kalimjōke mour eo am̧, ij tōmak kwonaaj loe elōn̄ wāween ko Irooj ekar tōl eok ilo iien in epen, jipan̄ eok n̄an erom̧ juon em̧m̧aan ewūjlepļo̧k, im ļapļo̧k an oktaktok—juon em̧m̧aan em̧ool an Anij.
Ijeļā bwe Irooj ewōr juon an karōk eļap im kabwilōn̄lōn̄ n̄an kōj—kajjojo im aolep. Kōn tūriamo̧ im kijenmej, Ej ba:
“Kom̧ ro ajri reddik, im kom̧ij jan̄in kar meļeļe ewi jon̄an ļap in kōjeraam̧m̧an ko ippān Jemān … kar kōpooji n̄an kom̧;
“Im kom̧ij jab maron̄ ineek aolep men otemjeļo̧k kiiō; mekarta, kom̧in m̧ōņōņō, bwe Inaaj tōlļo̧k kom̧.”1
Ro jeiū im jatū jitōn bōro, ij kam̧ool bwe E ekar, im ej, ilo m̧ool tōlļo̧k kōj, ilo ad kappukot n̄an rōn̄jake E. Ekōņaan bwe jen eddōkļo̧k im ekkatak, aaet jān—bōlen eļaptata jān—apan̄ ko.
Apan̄ ej juon rūkaki eļap. Ta eo kwaar ekkatak ilo iiō ko ruo rej mootļo̧k me aolep iien kokōņaan keememeji? Uwaak ko am̧ renaaj aolep iien jenolo̧k n̄an kwe, ak ij lewaj emān katak ko ij kōjatdikdik kōj aolep jekar ekkatak im jej jāmin meļo̧kļo̧ki.
Katak 1: M̧weo Ej Dilep in Tōmak im Kabun̄jar
Irooj emakijkij an kakkōl kōj kōn kauwōtata ko an raan ko āliktata, Ej ko̧o̧njeļ aaet: “Kom̧in jutak ilo jikin ko rekwojarjar, im jab em̧m̧akūt.”2 “Jikin kein” rekwojarjar em̧ool rekitbuuj tampeļ ko im̧ōn Irooj im mōnjar ko. Ak ad maron̄ in aiintok doon ilo jikin kein em̧ōj an mo̧ ilo elōn̄ jekjek ko, jekar katak bwe juon iaan jikin ko rekwojarjarļo̧k ioon laļ in ej m̧weo—aaet m̧weo im̧ōm̧.
Em̧m̧aan ro Rejitōn Bōro, kwoj ineek priesthood eo an Anij. “Bwe jim̧we ko an priesthood rej ekkejelļo̧k jān kajoor ko an lan̄.”3 Kwe im baam̧le eo am̧ rekar būki kain̄i ko an priesthood eo. Ej “ilo kain̄i ko ie [an priesthood eo kajoor] in āinwōt anij ej waļo̧k.”4 Bwe kajoor in ej pād n̄an kom̧ im baam̧le eo ami ilo m̧weo im̧ōmi ilo ami kōjparok bujen ko kom̧ ar kōm̧m̧ani.5
185 iiō ko remootļo̧k, ilo rainin, Eprōļ 3, 1836, Ilaija ekar kōjepļaaktok kii ko an priesthood eo me ej kōtļo̧k an baam̧le ko ad maron̄ liāp ippān doon n̄an indeeo. En̄in ej etke en̄jake in elukkuun em̧m̧an n̄an kōm̧m̧ane kwojkwoj eo ilo m̧weo im̧ōm̧. Ewi wāween am̧ ļōmņak enej jelet ro uwaan baam̧le eo am̧ n̄an loe am̧, eo jemāer, eo jim̧aer, eo pāleen, ļaddik eo nejūm̧, ak ļaddik eo jeim̧ ak jatūm̧, jerbale kain̄i in ekwojarjar? Ta eo kwonaaj kōm̧m̧ane n̄an dāpij wōt en̄jake in ekwojarjar ilo baam̧le eo am̧?
Komaron̄ en̄jake bwe ewōr jidik men kwoj aikuji n̄an kōm̧m̧ane bwe m̧weo im̧ōm̧ em̧ool en juon im̧ōn tōmak. Eļan̄n̄e āindein, jouj im kōm̧m̧ane! Eļan̄n̄e em̧ōj am̧ m̧are, ko̧o̧njeļ ippān kōrā eo pāleem̧ āinwōt juon m̧ōttam̧ jon̄an wōt kwe ilo jerbal in eaorōk. Elōn̄ jejjo jibadbad ko eļapļo̧k aer aorōk jān menin. Kōtaan rainin im iien eo Irooj enaaj bar itok, kōj aolep naaj aikuj bwe m̧ōko im̧ōd rej jikin ko raiboojoj im kōjparok.6
M̧wil ko im kōm̧m̧an ko rej karuwaineneik tok Jetōb eo renaaj kōļapļo̧k an ekwojarjar m̧weo im̧ōm̧. Em̧ool jekun wōt juon ej m̧ool eo bwe kwojarjar in ej jāmin jako eļan̄n̄e ewōr jabdewōt men ilo m̧wil eo m̧wilim ak mejatoto eo me ej jum̧ae Jetōb Kwojarjar eo, innām “lan̄ ko make rej jenļo̧k.”7
Konan̄in ke ļōmņak etke Irooj ekōņaan bwe jen kōm̧m̧an bwe m̧ōko im̧ōd ren dilepin ekkatak gospel eo im mour kōn gospel? Ejjab wōt n̄an kōpooje kōj n̄an, im jipan̄ kōj ilo, juon ajedeed in nan̄inmej in. Kwaļo̧k mo̧ ko ilo aiintok doon enaaj juon iien bōjrak. Ijoke, kallim̧ur eo am̧ n̄an kōm̧m̧an bwe m̧weo im̧ōm̧ en jikin eo eaorōktata an tōmak im ej aikuj jab bōjrak. Ilo an tōmak im kwojarjar dikļo̧k ilo laļ in ebun̄, aikuj eo am̧ n̄an jikin ko rekwojarjar enaaj ļapļo̧k. Ij rōjan̄ eok n̄an wōnm̧aanļo̧k im kōm̧mane bwe m̧weo im̧ōm̧ en em̧ool jikin ekwojarjar “im jab em̧m̧akūt”8 jān kōttōbar in eaorōk.
Katak 2: Jej Aikuji Doon
Anij ekōņaan bwe jen jerbal ippān doon im jipan̄ doon. En̄in ej etke Ekar jilkintok kōj n̄an laļ in ilo baam̧le ko im kar ejaake kōj ilo ward ko im stake ko. En̄in ej etke Ej kajjitōk ippād n̄an jerbal im jerbal in karejar n̄an doon. En̄in ej etke Ej kajjitōk ippād n̄an mour ilo laļ in bōtaab jab jān laļ in.9 Jemaron̄ kōttōbrak ijo eļap ippān doon jān ad kōm̧m̧ane make iaad.10 Karōk in m̧ōņōņō eo an Anij enaaj kalulu eļan̄n̄e ajri ro Nejin renaaj pād wōt ilo aer kōmakeļo̧k er jān doon.
Ilo ajedeed in nan̄inmej in em̧ōj an jenelo̧k ilo wāween an jelet kajjojo ilo laļ in ilo ejja in wōt. Ilo tōre in elōn̄ jet rej en̄taan eļapļo̧k jān ro jet, kōj aolep jekar jelm̧ae ilo jet wāween ko. Kōnke menin, mālijjon̄ eo ad ewōr an jibadbad n̄an jipan̄ kobaiktok ajri ro nejin Anij āinwōt ejjan̄in kar waļo̧k m̧okta. Kōn menin, ij kajjitōk, em̧ōj ke an mālijjon̄ in kepaak waj ro ipeļaakūm̧—brother im sister ro am̧ kajjeen m̧weo im̧ōm̧ im ipeļaakin laļ in?
Ilo wāween in, ruo kien ko reļļap remaron̄ tōl kōj: juon, iakwe Anij im, ruo, n̄an iakwe ritūrir.11 Jej kwaļo̧k ad iakwe ilo ad jerbal.
Eļan̄n̄e kwojeļā juon armej ej make iaan, pukotļo̧k—aaet men̄e kwoj barāinwōt en̄jake am̧ make iaam̧! Ejjab aikuj in wōr juon am̧ un ak ennaan ak pejnej ak menin wia. Baj ba iakwe im kwaļo̧k am̧ iakwe. Kein jerbal ko raan kein remaron̄ jipan̄ eok. Ajedeed in nan̄inmej ak jab, kajjojo ajri raiboojoj nejin Anij rej aikuj in jeļā bwe e ejjab make iaan!
Katak 3: Doulul in Priesthood eo Am̧ Ej Kōm̧m̧an Eļapļo̧k Jān Baj juon Kweilo̧k
Ilo iien ajedeed in, kweilo̧k ko an doulul ilo Jabōt rekar kānjeļ n̄an juon iien. Jet doulul ko rej kiiō maron̄ kweilo̧k ilo mejatoto. Mekarta, jerbal eo me Irooj ekar letok n̄an doulul ko an priesthood eo ej jan̄in kar kōm̧m̧an n̄an kōm̧m̧an jon̄aer n̄an juon kweilo̧k. Kweilo̧k ko rej juon m̧ōttan edik an ta eo juon doulul ekar kōm̧m̧an n̄ane im ta eo emaron̄ kōm̧m̧ane.
Em̧m̧aan ro Jeiū im Jatū an doulul ko an Priesthood eo an Aron im elder ro, kōļapļo̧k ettōņak eo am̧ kōn etke ewōr doulul ko. Ewi wāween an Irooj kōņaan bwe kwon kōjerbal doulul eo am̧ n̄an kōttōbrak jerbal eo An—kiiō? Kappukot revelesōn ko jān Irooj. Kōttāik eok make! Kajjitōk! Rōn̄jake! Eļan̄n̄e kar kūr eok n̄an tōl, ko̧o̧njeļ āinwōt juon būreejtōnji im ippān ro uwaan doulul eo am̧. Jekdo̧o̧n kain opiij in priesthood eo am̧ ak kūr eo, kōm̧m̧an bwe Anij en anjo̧ āinwōt juon membōr in doulul eo am̧ im ilo jerbal in jipan̄ eo am̧. En̄jake kōn lan̄lōn̄ wāppen eo naaj bōk m̧aantak ilo am̧ “poub kōn tokjān.”12 Doulul ko rej pād ilo juon jekjek ejenolo̧k n̄an ļōn̄aj aiintok doon an Israel ilo jait ko jim̧or an rōn̄ōl eo.
Katak 4: Jej ron̄jake Jisōs Kraist N̄e Jej Ineem̧m̧an Wōt
Jej mour ilo juon iien kar kanaan kake etto, n̄e “aolep men otemjeļo̧k renaaj poktak; im em̧ool, būruōn armej renaaj likjab jān er; bwe mijak enaj itok ioon aolep armej.”13 Menin ekar m̧ool m̧okta jān ajedeed in nan̄inmej in, im enaaj m̧ool ālkin. Poktak ilo laļ in enaaj wōnm̧aanļo̧k im ļapļo̧k. Ilo oktan, ainikien Irooj ej jab “juon ainikien eko̧uwaron̄ron̄, … [ej] juon ainikien emera in lur eweeppān, [āinwōt] juon unoojdikdik, im eaar [kabijlo̧k] em̧ool n̄an lukkuun bōro.”14 N̄an maron̄ rōn̄ ainikien in emera, kwoj aikuj in ineem̧m̧an wōt!15
N̄an juon iien, ajedeed in nan̄inmej in ekar kānjeļe m̧akūtkūt ko me ekkā aer kobrak mour ko ad. Ejjab etto jemaron̄ in kālet n̄an kobrak iien in bar juon alen kōn ainikien im poktak ko an laļ in. Ak jemaron̄ kōjerbal iien eo ad n̄an ron̄jake ainkien unoojdikdik an Irooj Ej tōl, kaenōm̧m̧an, im aenōm̧m̧an. Iien in elur ej iien ekwojarjar—iien eo me enaaj kōjekiik revelesōn eo an juon make im ineem̧m̧an wōt.
Katakin eok make n̄an bōk juon iien makeļo̧k iaam̧ im ippān ro kwoj iakwe. Kōppeļļo̧k būruwōm̧ n̄an Anij ilo jar. Bōk iien n̄an leļo̧k aolepān am̧ ilo jeje ko rekwojarjar im kabun̄jar ilo tampeļ eo.
Em̧m̧aan ro rejitōn bōro, ebooļ men ko Irooj ekōņaan bwe jen ekkatak jān en̄jake in ad ilo iien ajedeed in nan̄inmej in. Ikar kōļaajrake emān wōt. Ij kajjitōk ippem n̄an kōm̧m̧ane juon am̧ make laajrak, lukkuun ļōmņak kaki, im kwaļo̧k ippān ro kwoj iakwe.
Ilju im jekļaj emeram n̄an armej in bujen ro an Anij rej kōjparok bujen ko.16 Irooj enaaj kōļapļo̧k kūr ioon rikarejar ro An ro rej erreo ilo aer kabwijer priesthood eo n̄an kōjeraam̧m̧an, kaenōm̧m̧an, im kōkajoorļo̧k armej ro im n̄an jipan̄ kōpooj laļ in im armej ro An n̄an Itok eo An Kein Karuo. Ej ad kajjojo eddo n̄an mour ekkar n̄an kain̄i in ekwojarjar jej būki. Jemaron̄ kōm̧m̧ane menin! Ij kam̧ool e, kōn iakwe eo aō n̄an kom̧ kajjojo, em̧m̧aan ro rejitōn bōro ippa, ilo et eo ekwojarjar etan Jisōs Kraist, amen.