Li ch’utam re k’uub’ank na’leb’ re lixb’een domingo

Sa’ li xb’een domingo rajlal po, eb’ li ch’utam re lix molameb’ li xb’eenil ut li Komonil re Tenq’ank ink’a’ te’xk’ul jun tzolok k’utb’il xb’aan aj k’utunel. Ruuchil a’an, eb’ li awa’b’ejil re lix molameb’ li xb’eenil ut li Komonil re Tenq’ank te’xb’eresi jun ch’utam re k’uub’ank na’leb’. Sa’ li ch’utam re k’uub’ank na’leb’ re li xb’een domingo, li junjunq xmolameb’ li xb’eenil ut Komonil re Tenq’ank te’k’uub’anq na’leb’ sa’ komonil chirix li na’ajman ru sa’ li qana’aj, li naru taab’aanumanq, ut li ch’a’ajkilal; li tzolok rik’in lix na’leb’ ut lix k’ulum li junjunq; ut xk’uub’ankil chan ru te’k’anjelaq a’ yaaleb’ li musiq’anb’il na’leb’ neke’xk’ul rik’in li Musiq’ej. Tento naq oksinb’ileb’ li loq’laj hu ut lix k’utumeb’ li yo’yookil profeet sa’ li k’uub’ank na’leb’ a’in.

Moko juntaq’eeteb’ ta chixjunileb’ li ch’utam re k’uub’ank na’leb’. Wahe’ junjunq tenq’anel na’leb’ re xtenq’ankileb’ li awa’b’ejil chixb’eresinkil jun chaab’il ch’utam.

Rub’elaj li ch’utam re k’uub’ank na’leb’

Us xb’aanunkil:

Xk’oxlankil k’a’ru li na’ajman ru sa’ li qana’aj, li naru taab’aanumanq, ut li ch’a’ajkilal.
Xsik’b’al rik’in tijok jun na’leb’ re aatinak chirix.
Xb’oqb’aleb’ li komon re li molam malaj li Komonil re Tenq’ank chi chalk chi kawresinb’ileb’ re xwotz’bal lix k’oxlahom ut lix k’ulum.

Ink’a’ us xb’aanunkil:

Xkawresinkil jun li tzolok.
Chalk chi ak k’uub’anb’il chan ru xtuqub’ankil jun ch’a’ajkilal malaj xb’aanunkil jun k’anjel.

Chiru li ch’utam re k’uub’ank na’leb’

Us xb’aanunkil:

Xb’oqb’aleb’ li komon chixwotz’bal li k’a’ru xk’ulumeb’ rik’in k’anjelak a’ yaaleb’ li musiq’anb’il na’leb’ xe’xk’ul sa’eb’ li ch’utam numenaqeb’.
Xyeeb’al resil li na’leb’ tex’aatinaq wi’ ut xwaklesinkileb’ xch’ool li komon chixk’uub’ankil xna’leb’ sa’ komonil chirix li na’leb’ a’an, rik’in xsik’b’al chan ru xtuqub’ankil rik’in li b’eresihom natawman sa’eb’ li loq’laj hu, sa’ li raatineb’ li profeet, ut rik’in li Santil Musiq’ej.
Xk’uub’ankil chan ru xk’anjelankil li na’leb’ xex’aatinak wi’. Naru naq a’in jun li k’uub’anb’il na’leb’ choq’ re chixjunileb’ malaj jun li na’leb’ naxk’uub’ li junjunq choq’ re xjunes rib’.

Ink’a’ us xb’aanunkil:

Xb’aanunkil lix k’ihal li aatinak jun ajwi’ li kristiaan.
Xyalb’al xq’unb’esinkileb’ xch’ool li junjunq chik chirix aana’leb’.
Aatinak chirix k’a’ruhaq muqmu malaj ch’a’aj chirix junaq li komon malaj junkab’al.
Xk’utb’al jun li tzolok.
Xminb’al ru anihaq chi tz’aqonk.

Chirix li ch’utam re k’uub’ank na’leb’

Us xb’aanunkil:

Xpatz’b’al chirixeb’ li k’uub’anb’il na’leb’ ut li k’anjel k’eeb’il chiru li ch’utam re k’uub’ank na’leb.
Xtawb’al chan ru roksinkileb’ li ani ink’a’ xe’ru chi tz’aqonk sa’ li ch’utam xb’aan lix b’oqb’aleb’ malaj k’a’ruhaq chik. Ye reheb’ li k’uub’anb’il na’leb’ li xe’k’uub’aman.
Xk’eeb’al xhoonaleb’ li komon chixwotzb’al lix numsihomeb’ sa’eb’ li ch’utam chalel.

Junjunqeb’ li na’leb’ li naru chi oksimank sa’ li ch’utam re k’uub’ank na’leb’ re li xb’een domingo

Naru neke’tawman li na’leb’ choq’ re li ch’utam re k’uub’ank na’leb’ sa’ lix ch’utameb’ li awa’b’ejil, sa’ li ch’utam re li jolomil ch’utam re li teep, sa’ li k’uub’anb’il na’leb’ choq’ re li sutam, rik’in lix musiq’anb’il na’leb’ laj jolominel naq neke’rileb’ li komon, ut rik’in lix musiq’ahom li Santil Musiq’ej. Li na’leb’ wankeb’ chirub’el naru te’oksimanq a’ut moko teneb’anb’il ta naq te’oksimanq. Naru naq eb’ laj jolominel neke’xnaw xkomon chik li k’a’ru na’ajman ru li neke’reek’a naq te’aatinaq wi’.

K’a’ru naru taqab’aanu re k’anjelak chiruheb’ li ani wankeb’ qasutam? (chi’ilmanq Mosiah 3:19).
Chan ru naru taqak’e x’aajelil ru chixjunileb’ li qateneb’ahom?
Chan ru taqawotz li evangelio rik’ineb’ li qamiiw ut li qech kab’al? (chi’ilmanq Alma 17).
Chan ru naru taqak’e xk’olb’al qix ut xk’olb’al rix li qajunkab’al chiru li yib’ aj esil ut li tz’aj aj jalam-uuch?
K’a’ru taqab’aanu re xtzolb’aleb’ ut xkawob’resinkileb’ li qalal qak’ajol ut eb’ li saaj sa’ li qateep?
Chan ru naru tootz’aqonq chi us sa’ li k’anjel re li resilal li junkab’al ut li loq’onink sa’ li santil ochoch?
Chan ru naru taqab’oq lix tenq’ li Qaawa’ naq naqasik’ xsumenkileb’ li qapatz’om chirix li evangelio ut xnimal xtawb’al ru li evangelio?
Chan ru naru taqakawob’resi lix nawom qach’ool chirix li Qaawa’ ut lix evangelio ut taqatenq’a li qajunkab’al chixtenq’ankil rib’ xjunes sa’ li k’a’aq re ru re li musiq’ej?