Li ch’utam re lixkab’ ut rox domingo
Sa’ li xkab’ ut rox domingo rajlal po, eb’ lix molameb’ li xb’eenil ut li Komonil re Tenq’ank te’tzoloq chirix lix k’utumeb’ laj jolominel re li Iglees sa’ li jolomil ch’utub’aj-ib’ toje’ xnume’. Us naq te’oksimanq li esil k’eeb’il xb’aaneb’ lix komon li Xb’eenil Awa’b’ejil ut lix Molameb’ li Kab’laju chi Apostol. A’b’anan, a’ yaal li k’a’ru na’ajman ru sa’ li junjunq chi na’ajej ut jo’ musiq’anb’il xb’aan li Musiq’ej, naru taa’oksimanq yalaq esil re li jolomil ch’utub’aj-ib’ toje’ xnume’.
Chi kok’ aj xsa’, li awa’b’ejil re lix molameb’ li xb’eenil ut li Komonil re Tenq’ank te’xsik’ jun esil re xtzolb’al a’ yaal k’a’ru na’ajman ru reheb’ li komon, us ta li obiisp malaj li awa’b’ej re li oqech naru te’xk’e xna’leb’. Eb’ laj jolominel naru te’xsik’ jun esil li wan rilom rik’in li na’leb’ li xe’aatinak wi’ sa’ li ch’utam re k’uub’ank na’leb’ re li xb’een domingo, malaj ut naru te’xsik’ junaq chik li esil a’ yaal jo’ musiq’anb’ileb’ xb’aan li Musiq’ej.
Eb’ laj jolominel ut laj k’utunel tento te’xtaw chan ru te’xwaklesi xch’ooleb’ li komon chirilb’al li esil sik’b’il ru chi rub’elaj ut chi chalk chi kawresinb’ileb’ re xwotzb’aleb’ li yaalil na’leb’ re li evangelio ut xna’leb’eb’ chirix chan ru xk’anjelankileb’. Eb’ li kok’ k’anjel re tzolok li k’eeb’ileb’ arin, li k’ojob’anb’ileb’ sa’eb’ li xb’eenil na’leb’ sa’ Li k’utuk jo’ li Kolonel, naru tixtenq’aheb’ li komon chixtzolb’aleb’ li esil re jolomil ch’utub’aj-ib’ toje’ xnume’.
M. Russell Ballard, “Eb’ li chaq’al ru maatan re li Dios”
Li esil xb’aan li Awa’b’ej Ballard na’aatinak chirix junjunq li na’leb’—eb’ li profeet, li paab’aal chirix li Jesukristo, li loq’laj wa’ak, ut li k’anjelak chiru qas qiitz’in—ut naru naq eb’ li komon re lee molam malaj Komonil re Tenq’ank te’xtaw xchaab’ilal jalan chik na’leb’. Kanab’eb’ li komon chixwotzb’al k’a’ruhaq sa’ li esil a’in li xmusiq’ank reheb’. K’a’ruheb’ li b’oqom malaj li yeechi’inb’il osob’tesihom naqataw sa’ li esil xb’aan li Awa’b’ej Ballard? K’oxla xb’oqb’aleb’ li komon chixk’oxlankil chiru junjunq k’asal li k’a’ru neke’musiq’aak wi’ chixb’aanunkil xb’aan li aatinak a’in.
Gary E. Stevenson, “ Li raam jun li profeet”
Re xtenq’ankileb’ li komon re naq “te’xtaw ru li xnimal ru” lix b’oqb’al jun ak’ profeet, naru taakanab’eb’ li komon chixtz’ilb’al rix li esil xb’aan li Elder Stevenson, xsik’b’aleb’ li yaal ut li na’leb’ li te’tenq’anq reheb’ chixtawb’al ru li xnimal ru ut lix loq’alil li choxahil k’anjel a’in. K’oxla xkanab’ankileb’ li komon chixwotzb’al li xe’reek’a sa’ li ch’utlajik re tiik ruhil k’a’uxlej xxaqab’aak wi’ xwankil li Awa’b’ej Nelson choq’ Awa’b’ej re li Iglees. Naru ajwi’ taayiib’ jun aamej chiru li pizarron ut taapatz’ reheb’ li komon naq te’xtz’iib’a li aatin malaj ch’ol aatin li neke’xch’olob’ chan ru li raam ut lix na’leb’ li Awa’b’ej Nelson. K’a’ru xk’ut li Awa’b’ej Nelson li ak xoorosob’tesi?
Neil L. Andersen, “Lix profeet li Dios”
Li aatinak chirix li esil xb’aan li Elder Andersen naru tixkawob’resi xpaab’aaleb’ li komon chirixeb’ li yo’yookil profeet. Naru taakanab’eb’ chixtz’ilb’al rix li esil a’in re xtawb’al li k’a’ru naxtenq’aheb’ chixtawb’al ru k’a’ut naq wankeb’ lix profeet li Dios sa’ ruchich’och’ ut k’a’ut naq naqataaqeheb’. Chan ru ak xoo’osob’tesiik rik’in naq wan jun li qaprofeet? Eb’ li komon naru te’xwotz chan ru xe’xk’ul xnawomeb’ xch’ool naq li Awa’b’ej Russell M. Nelson a’an lix profeet li Qaawa’ ut Awa’b’ej re Lix Iglees li Jesukristo reheb’ laj Santil Paab’anel sa’ Roso’jikeb’ li Kutan.
David A. Bednar, “Tuulan ut kub’enaq xch’ool”
Re xtikib’ankil li aatinak chirix li esil xb’aan li Elder Bednar, naru taatz’iib’a Li tuulanil a’an … ut Li tuulanil maawa’ a’an … sa’ li pizarron. Toja’ naq eb’ li komon naru te’xtz’il rix li esil xb’aan li Elder Bednar ut te’xtz’iib’a sa’ pizarron li ch’ol aatin neke’xtaw li neke’xtz’aqob’resi ru li na’leb’ a’in. K’a’ru naqatzol sa’ li esil a’in li nokoxmusiq’a chi wank chi tuulan? K’a’ruheb’ li reetalil li tuulanil li naru naqak’oxla? Chan ru naru taqak’anjela li raatin li Elder Bednar re naq tuulanaqo chik?
Bonnie L. Oscarson, “Eb’ li saaj ixq sa’ li k’anjel”
Rik’in li patz’ok, naru taab’oqeb’ li komon chi k’oxlak sa’ xch’ooleb’. K’oxla xtz’iib’ankil sa’ li pizarron junjunq li patz’om li sumenb’ileb’ sa’ li esil xb’aan li Hermana Oscarson, jo’ Chan ru naru taqoksiheb’ li saaj ixq sa’ lix k’anjel li Qaawa’? B’oqeb’ li komon chixtz’ilb’al rix li esil re xsumenkileb’ li patz’om a’in ut chi aatinak chirix li xe’xtzol. K’a’ruheb’ li osob’tesink li neke’chal naq eb’ li saaj ixq neke’oken sa’ rilb’aleb’ li komon? Maare eb’ li komon sa’ li tzoleb’aal naru te’xwotz lix numsihomeb’ naq xe’k’anjelak rochb’eeneb’ li saaj ixq. A’ yaal li xoo’aatinak wi’, k’a’ru naqeek’a naq tento taqab’aanu?
Dale G. Renlund, “Li k’anjel re li santil ochoch ut li resilal li junkab’al: Tz’ape’k sa’ junajil ut k’irtesink”
Li Elder Renlund x’aatinak chirix lix k’utb’esinb’il matk’ laj Esekiel chirix jun santil ochoch rik’in jun kawil roq ha’ na’el chaq chi sa’ (chi’ilmanq Esekiel 47:8–9). Maare jun komon re li molam malaj li Komonil re Tenq’ank naru tixtz’iib’a jun xjalam-uuch li k’utb’esinb’il matk’ a’in sa’ li pizarron. Chan ru naq eb’ li osob’tesink re li k’anjel re li santil ochoch ut li resilal li junkab’al chanchan li roq ha’ sa’ lix k’utb’esinb’il matk’ laj Esekiel? Naru taakanab’eb’ li komon sa’ li tzoleb’aal chixwotzb’aleb’ li osob’tesink re li k’anjel re li santil ochoch ut li resilal li junkab’al li ak xk’ul. K’a’ru naru taqab’aanu re naq too’okenq chik chi kok’ aj xsa’ sa’ li k’anjel re li santil ochoch ut li resilal li junkab’al?
D. Todd Christofferson, “Lix molameb’ li xb’eenil”
Sa’ lix molameb’ li xb’eenil, naru taakanab’eb’ li komon chirilb’al ru li raqal re li esil xb’aan li Elder Christofferson li k’ab’a’inb’il “Li rajb’aleb’ li jalaak a’in.” K’a’ru naru taqab’aanu re naq taqatz’aqob’resiheb’ ru li ajom a’in? Sa’ li Komonil re Tenq’ank, naru taapatz’ re jun komon naq tixch’olob’ chi k’osb’il ru eb’ li jalok sa’eb’ li molam re li Tijonelil re Melkisedek jo’ ch’olob’anb’il xb’aan li Elder Christofferson. Chirix a’an, eb’ li komon ixq naru te’xtaweb’ li na’leb’ reheb’ li jalok li naru te’oksimanq sa’ lix k’anjel li Komonil re Tenq’ank. Sa’ lix molameb’ li xb’eenil malaj li Komonil re Tenq’ank, eb’ li komon naru te’aatinaq chirix li xe’xtzol sa’ li seraq’ chirix li Hermano Goates ut k’a’ru li rilom a’an rik’ineb’ lix k’anjel.
Ronald A. Rasband, “Cheril! Lix teep li Rey”
Maare taatiklaaq chi us li aatinak chirix li esil xb’aan li Elder Rasband chirix xb’ichankil, rab’inkil, malaj rilb’al raatinul li b’ich “Cheril! Lix teep li Rey” (Eb’ li B’ich, ajl 161) sa’ komonil. Chan ru naq eb’ li molam re li tijonelil ut li Komonil re Tenq’ank a’aneb’ chanchan jun teep re jun rey? Eb’ li komon naru ajwi’ te’xsik’ ut te’aatinaq chirix li “naab’al li qosob’tesinkil” yeeb’il resil xb’aan li Elder Rasband li te’chalq rik’in li jalok reheb’ li molam re li tijonelil. K’a’ruheb’ chik li osob’tesink li ak xqak’ul—malaj li naqoyb’eni xk’ulb’al—rik’in xk’anjelankileb’ li jalok a’in? Chan ru naq li Komonil re Tenq’ank naru ajwi’ tixk’uleb’ li osob’tesink jo’ li “k’iila paay chik li maatan” ut li “tzolok-ib’ ”?
Henry B. Eyring, “Li musiq’anb’il k’anjel re rilb’aleb’ li komon”
Li Awa’b’ej Eyring naxye resil wiib’ li esil li xe’k’ehe’ sa’ li ch’utam re li loq’laj wa’ak li xe’musiq’an re. Maare naru taapatz’ re xyijach li molam malaj li Komonil re Tenq’ank naq te’xtz’il rix li raatin li ch’ajom li 14 chihab’ xyu’am, ut li xyijach jun chik naq te’xtz’il rix li seraq’ chirix laj tzolol ochochnal. Naq yookeb’ chirilb’al ru, eb’ li komon naru te’xk’oxla li na’leb’ te’xye raj re jun saaj winq malaj saaj ixq li toje’ xk’ul xb’oqb’al chirilb’al junaq lix komon. Chan ru naq naru “toowulaq chi mas musiq’anb’ilo ut chi mas aj rahonelo wi’chik sa’ li qak’anjel … re rilb’aleb’ li komon”?
Dallin H. Oaks, “Eb’ lix wankil li tijonelil”
Re xtik’ibankil li aatinak, naru taatz’iib’a sa’ li pizarron lix k’ab’a’eb’ li kaahib’ tasal re li esil xb’aan li Awa’b’ej Oaks. Chirix a’an, naru taakanab’ li junjunq komon chirilb’al ru jun tasal sa’ xk’a’uxl ut chixtz’iib’ankil jun ch’ol aatin sa’ li pizarron li naxch’olob’ chi k’osb’il ru li jolomil na’leb’ re li tasal a’an. Chirix a’an, eb’ li komon naru te’xwotz li xe’reek’a naq tento te’xb’aanu xb’aan li xe’ril ru. Chan ru taachaab’ilo’q li qak’anjel jo’ aj k’amol re li tijonelil malaj komon ixq sa’ li Komonil re Tenq’ank naq taqak’anjelaheb’ li na’leb’ sa’ li esil xb’aan li Awa’b’ej Oaks?
Russell M. Nelson, “Rilb’aleb’ li komon rik’in li wankil ut li wankilal k’eeb’il xb’aan li Dios”
Li Awa’b’ej Nelson naxb’oqeb’ laj k’amol re li tijonelil “chi xaqliik” ut chiroksinkil li tijonelil re rosob’tesinkileb’ li ralal xk’ajol li qaChoxahil Yuwa’. Kanab’eb’ li komon re laa molam malaj Komonil re Tenq’ank chixtz’ilb’aleb’ rix li eetalil naroksi li Awa’b’ej Nelson ut chi aatinak chirix chan ru nokohe’xtenq’a chixtawb’al ru chan ru naq li tijonelil naru taa’oksimanq re rosob’tesinkil lix junkab’aleb’ ut li rech kristiaanil. K’a’ru naru taqawotz chirix li hoonal naq xoo’osob’tesiik xb’aan lix wankil li tijonelil? Chan ru naru taqatenq’aheb’ li qakomon malaj taqatenq’a qib’ chixk’ulb’al li paab’aal re roksinkil lix tijonelil li Dios re “took’anjelaq sa’ lix k’ab’a’ ”?
Reyna I. Aburto, “Sa’ junajil ch’oolej”
Li esil xb’aan li Hermana Aburto naxk’e xhoonal laa molam malaj Komonil re Tenq’ank chixtz’ilb’al rix ma junajinb’ilex sa’ xb’aanunkil lix k’anjel li Qaawa’. Re xtenq’ankileb’ li komon chixb’aanunkil a’in, naru taak’uteb’ li jalam-uuch re li peepem, lix k’ulunik li Kolonel sa’ xyanqeb’ laj Nefita (chi’ilmanq Libro de obras de arte del Evangelio, 82, 83, 84), ut lix k’anjel li Iglees re ayuda humanitario (chi’ilmanq LDS.org). Eb’ li komon naru te’xtz’il rix li esil ut te’xtaw chan ru naq li Hermana Aburto xroksiheb’ li eetalil a’in re k’utuk chirixeb’ li rajb’al ut li rosob’tesinkil li k’anjelak sa’ junajil. K’a’ru naru taqab’aanu re k’anjelak “sa’ junajil ch’oolej”?
Henry B. Eyring, “Taawanq lix Musiq’ aawik’in”
Re xnimob’resinkil li rajom qach’ool ut li qaseeb’al chixk’ulb’al li Santil Musiq’ej, li Awa’b’ej Eyring naxwotz junjunq lix numsihom ut naxk’e qab’eresinkil. Chirix xtz’ilb’aleb’ rix lix numsihom, k’a’ruheb’ li numsihom chanchaneb’ a’an li naru te’xwotz li komon re laa molam malaj Komonil re Tenq’ank chirix naq xe’toch’e’ xch’ool xb’aan li Santil Musiq’ej malaj naq a’an xch’olob’ li yaal chiruheb’? Maare eb’ li komon naru te’xtz’iib’a chi tzoltzo sa’ li pizarron li b’eresihom naxwotz li Awa’b’ej Eyring re xtenq’ankil “[chixteeb’al] li qach’ool re xk’ulb’al lix k’anjelankil li Musiq’ej.” Chan ru naq tootenq’aaq sa’ li qayu’am ut li qajunkab’al rik’in xtaaqenkil lix b’eresinkil? sa’ li qamolam malaj Komonil re Tenq’ank?
Dallin H. Oaks, “Li k’a’ru ka’ch’in ut moko nimob’resinb’il ta”
Sa’ li esil xb’aan li Awa’b’ej Oaks wankeb’ li jaljookil ru aatin li neke’xk’ut chan ru naq li k’a’ru ka’ch’in ut moko nimob’resinb’il ta naru taawanq xnimla metz’ew choq’ re li us malaj li ink’a’ us. Eb’ li jaljookil ru aatin a’in, a’aneb’ re lix xe’ lix toonal li che’, re jun ch’uut sa’ li jukub’, re lix cha’alil li k’aam, ut re li ha’ yoo chi tz’uqluk. Eb’ li komon naru te’rileb’ ru li jaljookil ru aatin a’in ut te’aatinaq chirix li neke’xk’ut chirix lix wankil xb’aanunkil chi rajlal li k’a’ru ka’ch’in ut moko nimob’resinb’il ta. K’a’ru junjunq reheb’ li k’a’ru ka’ch’in ut moko nimob’resinb’il ta li neke’xk’am lix wankil li Santil Musiq’ej sa’ li qayu’am? Kanab’eb’ li komon chixk’oxlankil li k’a’ru musiq’anb’ileb’ chixb’aanunkil re xtaaqenkil li raatin li Awa’b’ej Oaks.
Russell M. Nelson, “Li k’utb’esinb’il na’leb’ choq’ re li Iglees ut choq’ re qayu’am”
Sa’ li raatin, li Awa’b’ej Nelson narelaji qe naq taqakawresi li “[qawankilal] chixk’ulb’al li k’utb’esinb’il na’leb’.” Re xtenq’ankileb’ li komon chixtaaqenkil lix b’eresihom, naru taatz’iib’aheb’ li patz’om a’in sa’ li pizarron: K’a’ut naq naqaj ru li k’utb’esinb’il na’leb’? Chan ru naru taqakawresi li qawankilal chixk’ulb’al li k’utb’esinb’il na’leb’—qajunes qib’ jo’ ajwi’ naq naqak’uub’ qana’leb’ sa’ komonil? K’a’ruheb’ li osob’tesink xyeechi’i qe li Awa’b’ej Nelson wi taqasik’ li k’ub’tesinb’il na’leb’? Jacheb’ ru li komon sa’ wiib’ jachal, ut kanab’ li junjunq chixtawb’al ut chixwotzb’al lix sumenkil jun reheb’ li patz’om a’in.
Gerrit W. Gong, “Kristo anajwan xwakli”
K’a’ru naru te’xtzol eb’ li komon sa’ laa molam malaj Komonil re Tenq’ank sa’ li esil xb’aan li Elder Gong chirixeb’ li qasumwank ut lix tojb’al rix li maak xb’aan li Jesukristo? Naru taakanab’eb’ li komon chixtz’ilb’al rix li esil, xsik’b’aleb’ li osob’tesink li k’eeb’ileb’ qe xb’aan—sa’ xkab’ichal—lix tojb’al rix li maak xb’aan li Kolonel ut li qasumwank. Chirix a’an, k’oxla xpatzb’aleb’ li patz’om jo’ a’in chirix li xe’xtaw: Chan ru naq wotz neke’k’anjelak li qasumwank ut lix tojb’al rix li maak re “[xk’eeb’al] wankilal ut [xk’eeb’al] loq’alil” qe? K’a’ru li nokohe’xtenq’a chixchapb’al ut k’a’ru li nokohe’xtenq’a chixkanab’ankil?
Ulisses Soares, “Eb’ li profeet neke’aatinak rik’in lix wankil li Santil Musiq’ej”
Li esil xb’aan li Elder Soares naru tooxmusiq’a chi k’anjelak rik’in paab’aal naq naqeek’a naq maak’a’ li qaseeb’al sa’ xb’aanunkil li rajom li Qaawa’. Chan ru xk’ul li Elder Soares lix k’ojob’ankil xch’ool naq xk’ul lix ak’ b’oqb’al choq’ apostol? K’a’ru kixtzol naq kib’oqe’ choq’ awa’b’ej re mision? K’a’ru naru taqatzol rik’in li kixk’ul? K’e xhoonaleb’ li komon chixwotzb’al li xe’xk’ul naq xe’wiib’an xch’ooleb’ chirix li k’a’ru xraj li Dios naq te’xb’aanu. K’a’ru xe’xb’aanu re xtawb’al li paab’aal re xik chi uub’ej?
Jeffrey R. Holland, “Wank rik’ineb’ ut xk’eeb’al xkawilaleb’”
Naq eb’ li komon sa’ laa molam malaj Komonil re Tenq’ank xe’xnaw chan ru taajale’q “li na’leb’ re rilb’aleb’ li komon sa’ li tijonelil ut li Komonil re Tenq’ank,” k’a’ruheb’ li patz’om xe’ok sa’ xk’a’uxleb’? Maare li esil xb’aan li Elder Holland naru tixsumeheb’ li patz’om a’in. Eb’ li komon naru te’xsik’eb’ li na’leb’ re li evangelio li k’ojob’anb’ileb’ wi’ li jalok a’in jo’ naxk’ut li Elder Holland. K’a’ruheb’ li b’oqom li naqataw sa’ li esil a’in? K’a’ruheb’ li osob’tesink li yeechi’inb’ileb’? Chan ru naq li ak’ na’leb’ re rilb’aleb’ li komon te’ruuq chiqatenq’ankil chi ok’ choq’ “tz’aqal xtzolom li Kristo”?
Jean B. Bingham, “Rilb’aleb’ li komon jo’ naxb’aanu li Kolonel”
Sa’ li raatin, li Hermana Bingham nokoxb’oq chixpatz’b’al qib’ li patz’om li naru te’xb’eresi li qak’anjel re rilb’aleb’ li qakomon. Eb’ li komon naru te’aatinaq chirix chan ru naq eb’ li patz’om a’in taaruuq raj tixb’eresiheb’ xb’aanuhom ut chirix a’an, naru te’xsik’ xsumenkil lix patz’om li Hermana Bingham, “B’ar wankeb’ li reetalil [li rilb’aleb’ li komon]”? Maare us taatz’il rix junjunq reheb’ li eetalil naxwotz li Hermana Bingham chirix rilb’aleb’ li komon ut taakanab’eb’ li komon chixwotzb’al li eetalil sa’ xyu’ameb’ a’an. K’a’ru naqataw sa’ li esil xb’aan li Hermana Bingham li naxnimob’resi li qanawom chirix k’a’ut ut chan ru naqileb’ li qakomon?
Dieter F. Uchtdorf, “Waye’ li Winq!”
Chan raj ru taqatenq’a jun kristiaan chixtawb’al ru naq lix mayej aj tojol-ix ut lix waklijik chi yo’yo li Jesukristo a’aneb’ q’axal wi’chik ninqeb’ xwankil chiru yalaq chik li kik’ulman chalen chaq sa’ xk’ojlajik li ruchich’och’? Kanab’eb’ li komon chixk’oxlankil li patz’om a’in naq neke’ril ru li esil xb’aan li Elder Uchtdorf. K’a’ru neke’xtaw li natenq’an chixch’olob’ankil k’a’ut naq q’axal wi’chik ninqeb’ xwankil li na’leb’ a’in choq’ reheb’? Chirix li aatinak, eb’ li komon naru te’aatinaq chirix k’a’ru naraj naxye “waye’ li Winq.” Chan ru xqatzol xk’eeb’al reetal li Winq?
Quentin L. Cook, “Kawresi aawib’ chixk’ulb’al li Dios”
Naru taatikib’ li aatinak chirix li esil xb’aan li Elder Cook rik’in xb’oqb’al jun komon chixch’olob’ankil chi k’osb’il ru lix k’ojob’ankileb’ wi’chik lix laawil li tijonelil sa’ li Santil Ochoch re Kirtland. A’ yaal jo’ naxye li esil xb’aan li Elder Cook, k’a’ruheb’ lix teneb’ahom li Iglees li wankeb’ rilom rik’ineb’ li laaw a’in? A’ yaal jo’ naxye li esil xb’aan li Elder Cook, k’a’ruheb’ lix teneb’ahom li Iglees li wankeb’ rilom rik’ineb’ li laaw a’in? Tz’iib’aheb’ li aatin tiikilal, junajil, ut juntaq’eetil sa’ li pizarron, ut kanab’eb’ li komon chixwotzb’al lix na’leb’eb’ neke’xk’ul chirix li junjunq xb’eenil na’leb’ a’in sa’ li esil xb’aan li Elder Cook. Chan ru naq eb’ li xb’eenil na’leb’ a’in nokohe’xtenq’a chixtz’aqob’resinkil ru lix santil teneb’ahom li Iglees?