Li ch’utam re lixkaa domingo

Sa’ li xkaa domingo rajlal po, eb’ lix molameb’ li xb’eenil ut li Komonil re Tenq’ank te’aatinaq chirix jun na’leb’ sik’b’il ru xb’aan li Xb’eenil Awa’b’ejil ut lix Molameb’ li Kab’laju chi Apostol. Li jolomil na’leb’ re li xkaa domingo taa’ak’ob’resiiq rik’in li junjunq chi jolomil ch’utub’aj-ib’. Chalen chaq anajwan toj sa’ li jolomil ch’utub’aj-ib’ chalel, li jolomil na’leb’ a’an, “Rilb’aleb’ li komon.” Rajlal po, eb’ laj jolominel malaj laj k’utunel naru te’xsik’ xb’eresinkil jun aatinak chirixeb’ li na’leb’ a’in li wankeb’ rilom rik’in rilb’aleb’ li komon.

Re xtawb’al xkomon chik li k’anjeleb’aal re xtenq’ankil li aatinak chirix rilb’aleb’ li komon, chi’ilmanq ministering.lds.org ut eb’ li esil li te’chalq sa’eb’ li Liahona.

K’a’ru naraj naxye rilb’aleb’ li komon?

K’a’ru naraj naxye rilb’aleb’ li komon choq’ reheb’ li komon sa’ li teep malaj uq’ej wankat wi’? Re taanaw k’a’ru neke’xk’oxla, naru taatz’iib’a Rilb’aleb’ li komon sa’ li pizarron, ut taab’oqeb’ li komon chixtz’iib’ankil xkomoneb’ chik li aatin li neke’xk’am rib’ rik’in rilb’aleb’ li komon. Eb’ li komon naru te’xtaw li aatin malaj ch’ol aatin choq’ re a’an sa’eb’ li raqal reheb’ li loq’laj hu, jo’ a’in: Mateo 25:34–40; Lukas 10:25–37; 2 Nefi 25:26; Mosiah 18:8–9; 3 Nefi 18:25; ut Tzol’leb’ ut Sumwank 81:5. K’a’ru naqatzol sa’eb’ li raqal a’in chirix rilb’aleb’ li komon? Maare naru taakanab’eb’ li komon chixwotzb’al reetalil rilb’aleb’ li komon li ak xe’ril. Chan ru naq li qak’anjel re rilb’aleb’ li komon naru tixtenq’aheb’ rik’in li neke’raj ru sa’ musiq’ej ut sa’ tib’elej? Chan ru naru tixtenq’aheb’ li kristiaan chi nach’ok rik’in li Kristo?

Li Kolonel a’an tz’aqal kixk’ut chiqu chan ru rilb’aleb’ li komon.

Re xtzolb’al chirix chan ru rilb’aleb’ li komon chi chaab’il, eb’ li komon naru te’xwotzeb’ li seraq’ sa’eb’ li loq’laj hu b’ar wi’ li Jesukristo kik’anjelak chiru jalaneb’—junjunq eetalil naru te’tawmanq sa’ Jwan 4–6 ut Markos 2:1–12. Eb’ li komon naru te’xwotz li nawulak chiruheb’ sa’eb’ li seraq’ a’in ut li na’leb’ neke’xtzol chirix rilb’aleb’ li komon. Jo’ eetalil, chan ru naq li Jesukristo kik’anjelak tz’aqal chiru li junjunq chi kristiaan? Chan ru kixtuqub’ li rajomeb’ ru li kristiaan sa’ musiq’ej jo’ ajwi’ sa’ tib’elej? Eb’ li komon naru te’xwotz jo’q’e xe’rileb’ kristiaan chiroksinkileb’ li na’leb’ a’in sa’ lix k’anjeleb’ re rilb’aleb’ li komon.

Eekasinb’il li k’anjel re rilb’aleb’ li komon xb’aan li rahok narahok wi’ li Kristo.

Re xtz’ilb’al rix lix wankil rilb’aleb’ li komon chi eek’asinb’il xb’aan li rahok narahok wi’ li Kristo, naru taatz’iib’a li ch’ol aatin a’in sa’ li pizarron ut naru taakanab’eb’ li komon chixyeeb’al chan ru xtz’aqob’resinkil ru: Naq chi yaal ninraheb’ li kristiaan li nink’anjelak wi’, laa’in . Naq jalan li rajom inch’ool naq nink’anjelak, laa’in . K’a’ru naru taqab’aanu re naq li qak’anjel chiruheb’ li qas qiitz’in eekasinb’il xb’aan li rahok narahok wi’ li Kristo? Chan ru taqanimob’resi li qarahom choq’ reheb’ li ani b’oqb’ilo wi’ chi k’anjelak chiru? (chi’ilmanq Moroni 7:45–48). Maare eb’ li komon naru te’xwotz junjunq reetalil rilb’aleb’ li komon li musiq’anb’il xb’aan li rahok narahok wi’ li Kristo.

Li Dios naraj naq chixjunileb’ li ralal xk’ajol te’ile’q ut te’ch’olaniiq.

Li Awa’b’ej Russell M. Nelson xye, “Jun reetalil lix yo’yookil ut yaalil Iglees li Qaawa’ li ink’a’ taajalmanq, a’an li tustuukil k’anjel re rilb’aleb’ chixjunjunqaleb’ li ralal xk’ajol li Dios ut lix junkab’aleb’ ” (“Rilb’aleb’ li komon rik’in li wankil ut li wankilal k’eeb’il xb’aan li Dios,” Jolomil ch’utub’aj-ib’ re abril 2018). K’a’ruheb’ li “tustuukil k’anjel” re li Iglees, jo’ naxk’ut li Awa’b’ej Nelson, li nokohe’xtenq’a chi chaab’ilo’k sa’ xch’olaninkileb’ li junjunq chi komon? K’a’ut naq eb’ li k’anjel a’in a’aneb’ “reetalil lix yo’yookil ut yaalil Iglees li Qaawa’ ”? (chi’ilmanq Mosiah 18:21–22 ut Moroni 6:4–6 re xtawb’al junjunq aana’le’b). K’a’ru junjunq reheb’ li osob’tesink xe’chal sa’ li qayu’am malaj xyu’ameb’ jalan xb’aan naq xe’k’anjelak li komon sa’ lix b’oqb’aleb’ malaj lix k’anjeleb’ sa’ li Iglees.

Nim lix loqʼalebʼ li aamej saʼ rilobʼaal li Dios.

Li k’a’ru ke’xk’ul li ralal laj Mosiah naxk’ut naq chan ru naqileb’ li qas qiitz’in wan rilom rik’in chan ru nokok’anjelak chiruheb’. Naru taatz’iib’a sa’ li pizarron Chan ru naq eb’ laj Nefita ke’rileb’ laj Lamanita ut Chan ru naq eb’ li ralal laj Mosiah ke’rileb’ laj Lamanita. Chirix a’an, b’oqeb’ li komon chixtz’ilb’al rix Mosiah 28:1–3 ut Alma 26:23–26 re xtawb’aleb’ li aatin ut ch’ol aatin re xtz’iib’ankil chirub’el li wiib’ na’leb’ a’in. K’a’ru naxk’ut a’in chiqu chirix chan ru naq naqileb’ li qas qiitz’in wan rilom rik’in chan ru nokok’anjelak chiruheb’? Chan ru naru taqatzol rilb’aleb’ li kristiaan jo’ narileb’ li Dios? (chi’ilmanq Tz. ut S. 18:10–16).

Jun tz’aqal aj ilol re li komon naxjayali rib’ sa’ li rajomeb’ ru li ras riitz’in.

Re xtenq’ankileb’ li komon chixtawb’al chik ru lix chaab’ilal xjayalinkil qib’ sa’ rajomeb’ ru jalaneb’ naq nokok’anjelak chiruheb’, naru taajuntaq’eeta rilb’aleb’ li komon rik’in xk’eeb’aleb’ ut xk’ulb’aleb’ li maatan. Ma xqak’ul jun sut jun chaab’il maatan rik’in anihaq li xnaw chi tz’aqal li k’a’ru ajb’il chiqu malaj li xqaj? Chan ru naq juntaq’eet rilb’aleb’ li komon rik’in xk’eeb’al jun chaab’il maatan? K’oxla aatinak chirixeb’ li seraq’ sa’ li jolomil ch’utub’aj-ib’ toje’ xnume’ li neke’xk’ut chan ru naq junaq xk’anjelak chiruheb’ lix komon a’ yaal jo’ chanru rajomeb’ ru (chi’ilmanq, jo’ eetalil, Jean B. Bingham, “Rilb’aleb’ li komon jo’ naxb’aanu li Kolonel,” Jolomil ch’utub’aj-ib’ re abril 2018). Eb’ li komon naru ajwi’ te’xwotz jalan chik li seraq’ li naxk’ut li na’leb’ a’in.

Chan ru naru taqatzol k’a’ru li rajom ru junaq komon? Kanab’ li junjunq chi komon chixtz’iib’ankil chi tzoltzo xk’ab’a’eb’ li kristiaan li neke’k’anjelak wi’. Chixk’atq li junjunq k’ab’a’ej naru te’xtz’iib’a xsumenkil li patz’om, “K’a’ru naraj ru li kristiaan a’in re naq taanach’oq rik’in li Kristo”? Wi naru, waklesi xch’ooleb’ li komom chixtz’iib’ankileb’ li k’ojob’anb’il k’anjel tento tixk’ul li junjunq chi kristiaan. B’oqeb’ li komon naq ink’a’ te’xkanab’ chixk’oxlankil li patz’om a’in ut naq te’xsik’ li musiq’anb’il na’leb’ re xtenq’ankileb’ chixtuqub’ankil li rajomeb’ ru li ras riitz’ineb’.

Li Qaawa’ naraj naq taqakanab’ naq jalaneb’ te’k’anjelaq chiqu.

Li Elder Robert D. Hales kixye: “Li k’uub’anb’il na’leb’ re li evangelio naxpatz’ naq took’ehoq ut naq took’uluq. … Kok’ aj xsa’, li ani wan xch’a’ajkilal naxye: “Injunes tinb’aanu,” … “Naru tinwil wib’ injunes.” Xyeeman naq maajun q’axal b’ihom re naq ink’a’ raj taaraj ru xtenq’ahom junaq chik, maajun q’axal neb’a’ re naq ink’a’ raj naru tixtenq’a jun li ras riitz’in. Li ajom re xpatz’b’al chi kaw qach’ool naq anihaq taatenq’anq qe, ut li xb’aanunkil rik’in chaab’ilal, tento naq a’anaq tz’aqal qajom laa’o” (“We Can’t Do It Alone,” Ensign, noviembre 1975, 91, 93). K’a’ut naq wan naq ch’a’aj xpatz’b’al qatenq’ankil rik’in junaq chik? Chan ru naq li rajom qach’ool chixk’ulb’al li qatenq’ankil narosob’tesiheb’ li ani neke’k’anjelak chiqu? Kanab’eb’ li komon chi k’oxlak chiru jun k’amok chirix chan ru naru te’xk’ulub’a naq junaq chik taak’anjelaq chiruheb’. K’a’ru naxye 1 Korintios 12:13–21 chirix k’a’ut naq aajel ru naq taqatenq’a qib’ chiqib’il qib’?

Wankeb’ k’iila paay chan ru nokoru chi k’anjelak chiru li qas qiitz’in.

Re xtenq’ankileb’ li komon chixk’oxlankil chan ru naru taqatenq’a qib’ chiqib’il qib’, naru taakanab’eb’ chixtz’ilb’al rix li esil xb’aan li Elder Jeffrey R. Holland, “Wank rik’ineb’ ut xk’eeb’al xkawilaleb’ ” (Jolomil ch’utub’aj-ib’ re abril 2018; che’ilmanq ajwi’ li esil li te’chalq sa’eb’ li hu Liahona). Eb’ li komon naru te’xjach rib’ sa’ kok’ ch’uut, ut li junjunq ch’uut naru tixk’oxla junjunq na’leb’ chirix chan raj ru naq jun kristiaan naraj ru xtenq’ankil. Chirix a’an, naru te’xk’oxla chan raj ru naq xkomoneb’ chik li kristiaan te’ruuq chi k’anjelak chiru a’an sa’ li rajom ru sa’ musiq’ej ut sa’ tib’elej. Patz’ reheb’ li ch’uut naq te’xwotz lix na’leb’eb’ ut naq te’xk’oxla ma us junjunq reheb’ li na’leb’ a’in choq’ reheb’ li komon li neke’ril a’an.