ការប្រជុំក្រុមប្រឹក្សានៅថ្ងៃអាទិត្យសប្តាហ៍ទីមួយ

នៅថ្ងៃអាទិត្យសប្តាហ៍ទីមួយរៀងរាល់ខែ ការប្រជុំកូរ៉ុមអែលឌើរ និងសមាគមសង្គ្រោះ នឹងពុំមានបញ្ចូលមេរៀនមកពីគ្រូបង្រៀនម្នាក់នោះទេ ។ ផ្ទុយទៅវិញ គណៈប្រធានកូរ៉ុមអែលឌើរ និង សមាគមសង្គ្រោះ ដឹកនាំការប្រជុំក្រុមប្រឹក្សា ។ នៅក្នុងការប្រជុំក្រុមប្រឹក្សាថ្ងៃអាទិត្យសប្ដាហ៍ទីមួយទាំងនេះ កូរ៉ុមអែលឌើរ និង សមាគមសង្គ្រោះគ្រប់រូប ប្រឹក្សាជាមួយគ្នាអំពីការទទួលខុសត្រូវ ឳកាស និងឧបសគ្គនានានៅក្នុងមូលដ្ឋាន រៀនសូត្រពីការយល់ដឹង និងបទពិសោធន៍ផ្សេងៗពីគ្នាទៅវិញទៅមក ហើយរៀបចំផែនការដើម្បីឆ្លើយតបចំពោះការបញ្ជាក់ទាំងឡាយដែលបានទទួលមកពីព្រះវិញ្ញាណ ។ ការពិភាក្សាទាំងនេះគួរតែផ្ដោតទៅលើបទគម្ពីរដែលទាក់ទង និងការបង្រៀនរបស់ពួកព្យាការីនៅរស់ ។

ពុំមែនគ្រប់ការប្រជុំក្រុមប្រឹក្សាទាំងអស់នឹងធ្វើដូចៗគ្នានោះទេ ។ ទាំងនេះគឺជាសេចក្ដីណែនាំមួយចំនួនដើម្បីជួយគណៈប្រធានដឹកនាំក្រុមប្រឹក្សាប្រកបដោយជោគជ័យ ។

ពីមុនការប្រជុំក្រុមប្រឹក្សា

អ្វីដែលត្រូវធ្វើ ៖

ស្គាល់ពីតម្រូវការ ឱកាស និងបញ្ហាទាំងឡាយនៅក្នុងមូលដ្ឋាន ។
ជ្រើសរើសប្រធានបទដើម្បីពិភាក្សាប្រកបដោយការអធិស្ឋាន ។
អញ្ជើញសមាជិកកូរ៉ុម ឬបងប្អូនស្ត្រីសមាគមសង្គ្រោះឲ្យមកដោយបានរៀបចំខ្លួនដើម្បីចែកចាយពីគំនិត និងបទពិសោធន៍របស់ពួកគាត់ ។

មិនត្រូវធ្វើ ៖

រៀបចំមេរៀនមួយ ។
មកដោយមានដំណោះស្រាយជាក់លាក់មួយ ឬបានគិតអំពីផែនការសកម្មភាពមួយ ។

អំឡុងពេលការប្រជុំក្រុមប្រឹក្សា

អ្វីដែលត្រូវធ្វើ ៖

អញ្ជើញសមាជិក ចែកចាយបទពិសោធន៍ទាំងឡាយ ដែលពួកគាត់បានធ្វើតាមចំណាប់អារម្មណ៍ និងផែនការកាលពីការប្រជុំលើកមុន ។
ណែនាំអំពីប្រធានបទការប្រជុំ ហើយលើកទឹកចិត្តសមាជិកឲ្យ ប្រឹក្សាជាមួយគ្នា អំពីប្រធានបទនោះ ដោយស្វែងរកដំណោះស្រាយ និងការណែនាំមកពីបទគម្ពីរ ពាក្យសម្ដីរបស់ពួកព្យាការី និងព្រះវិញ្ញាណបរិសុទ្ធ ។
ដាក់ផែនការដើម្បីធ្វើសកម្មភាព ទៅលើអ្វីដែលបានពិភាក្សា ។ ការណ៍នេះអាចនឹងដាក់បញ្ចូលទាំងផែនការក្រុម ឬផែនការដែលបុគ្គលម្នាក់ៗបានដាក់ដោយខ្លួនឯងនោះ ។

មិនត្រូវធ្វើ ៖

គ្រប់គ្រងលើការសន្ទនា ។
ព្យាយាមបញ្ចុះបញ្ចូលអ្នកដទៃអំពីគំនិតយោបល់របស់ខ្លួន ។
ពិភាក្សាអំពីបញ្ហាដែលងាយធ្វើឲ្យអាក់អន់ចិត្ត ឬការសម្ងាត់ ។
បង្រៀនមេរៀនមួយ ។
ដាក់សម្ពាធលើមនុស្សគ្រប់គ្នាដែលបានចូលរួម ។

បន្ទាប់ពីការប្រជុំក្រុមប្រឹក្សា

អ្វីដែលត្រូវធ្វើ ៖

តាមដានផែនការ និងកិច្ចការចាត់តាំងដែលបានធ្វើឡើងអំឡុងការប្រជុំក្រុមប្រឹក្សា ។
ស្វែងរកវិធីដើម្បីដាក់បញ្ចូលអស់អ្នកដែលពុំអាចមកចូលរួមក្នុងការប្រជុំដោយសារតែការហៅបម្រើ ឬមូលហេតុដទៃៗទៀត ។ សូមឲ្យពួកគេដឹងអំពីផែនការដែលនឹងរៀបចំឡើង ។
ផ្ដល់ឱកាសដល់សមាជិកឲ្យចែកចាយបទពិសោធន៍នានានៅក្នុងការប្រជុំនាពេលអនាគត ។

ប្រធានបទនានាសម្រាប់ការប្រជុំក្រុមប្រឹក្សានៅថ្ងៃអាទិត្យសប្តាហ៍ទីមួយ

គំនិតយោបល់សម្រាប់ប្រធានបទការពិភាក្សាក្នុងការប្រជុំក្រុមប្រឹក្សា អាចនឹងបានមកពីការប្រជុំគណៈប្រធាន ការប្រជុំក្រុមប្រឹក្សាវួដ ផែនការតំបន់ ចំណាប់អារម្មណ៍ដែលថ្នាក់ដឹកនាំទទួលបាននៅពេលពួកគាត់បម្រើដល់សមាជិក និងការបំផុសគំនិតមកពីព្រះវិញ្ញាណបរិសុទ្ធ ។ ប្រធានបទខាងក្រោមគ្រាន់តែជាការផ្តល់យោបល់ប៉ុណ្ណោះ ។ ថ្នាក់ដឹកនាំអាចដឹងជាមុននូវតម្រូវការផ្សេងៗទៀតដែលពួកគេបានទទួលការបំផុសឲ្យលើកយកមកពិភាក្សា ។

តើយើងអាចធ្វើអ្វីខ្លះដើម្បីបម្រើដល់អស់អ្នកដែលនៅជុំវិញយើង ? ( សូមមើល ម៉ូសាយ ២៣:១៨) ។
តើយើងអាចដាក់អាទិភាពលើការទទួលខុសត្រូវផ្សេងៗគ្នារបស់យើងតាមរបៀបណា ?
តើយើងនឹងចែកចាយដំណឹងល្អជាមួយមិត្តភក្តិ និង អ្នកជិតខាងដោយរបៀបណា ? ( សូមមើល អាលម៉ា ១៧) ។
តើយើងអាចការពារខ្លួនយើង និងក្រុមគ្រួសារយើងពីប្រព័ន្ធផ្សព្វផ្សាយមិនសមរម្យ ហើយនិងការណ៍អាសគ្រាមដោយរបៀបណា ?
តើយើងនឹងធ្វើអ្វីខ្លះដើម្បីណែនាំ ហើយពង្រឹងដល់កូនចៅយើង និងយុវជននៅក្នុងវួដរបស់យើង ?
តើយើងអាចចូលរួមក្នុងកិច្ចការពង្សប្រវត្តិ និងការថ្វាយបង្គំក្នុងព្រះវិហារបរិសុទ្ធឲ្យបានកាន់តែច្រើនដោយរបៀបណា ?
តើយើងអាចទូលសូមជំនួយពីព្រះអម្ចាស់ នៅពេលយើងស្វែងរកចម្លើយនានាចំពោះសំណួរនៃដំណឹងល្អរបស់យើង និងរៀនសូត្រឲ្យកាន់តែយល់ដឹងជ្រៅជ្រះអំពីដំណឹងល្អដោយរបៀបណា ?
តើយើងអាចពង្រឹងទីបន្ទាល់យើងអំពីព្រះអម្ចាស់ និងដំណឹងល្អរបស់ទ្រង់ ហើយជួយក្រុមគ្រួសារយើងមានភាពខ្លួនទីពឹងខ្លួនខាងព្រលឹងវិញ្ញាណដោយរបៀបណា ?