ការប្រជុំនៅថ្ងៃអាទិត្យសប្តាហ៍ទីពីរ និងទីបី
នៅថ្ងៃអាទិត្យទីពីរ និងទីបីជារៀងរាល់ខែ កូរ៉ុមអែលឌើរ និងសមាគមសង្គ្រោះ នឹងរៀនចេញមកពីការបង្រៀនរបស់ថ្នាក់ដឹកនាំសាសនាចក្រមកពីសន្និសីទទូទៅថ្មីៗបំផុត ។ ការគូសបញ្ជាក់គួរតែធ្វើឡើងនៅក្នុងសារលិខិតមកពីសមាជិកនៃគណៈប្រធានទីមួយ និង កូរ៉ុមនៃពួកសាវកដប់ពីរនាក់ ។ រាល់សារលិខិតមកពីសន្និសីទថ្មីៗបំផុតអាចនឹងត្រូវបានពិភាក្សា តែទោះជាយ៉ាងណាក៏ដោយ វាអាស្រ័យទៅលើសេចក្ដីត្រូវការក្នុងមូលដ្ឋាន និងការបំផុសគំនិតមកពីព្រះវិញ្ញាណ ។
នៅក្នុងករណីភាគច្រើនបំផុត គណៈប្រធានកូរ៉ុមអែលឌើរ ឬសមាគមសង្គ្រោះ នឹងជ្រើសរើសសារលិខិតសន្និសីទមួយមកសិក្សាអាស្រ័យទៅលើសេចក្តីត្រូវការរបស់សមាជិក តែទោះជាយ៉ាងណាក៏ដោយ ប៊ីស្សព ឬ ប្រធានស្តេកអាចផ្តល់ជាគំនិតផងដែរ ។ អ្នកដឹកនាំអាចជ្រើសរើសសារលិខិតមួយដែលទាក់ទងនឹងប្រធានបទដែលបានពិភាក្សានៅក្នុងការប្រជុំក្រុមប្រឹក្សាថ្ងៃអាទិត្យសប្តាហ៍ទីមួយថ្មីៗនេះ ឬ ពួកគេអាចជ្រើសរើសសារលិខិតអំពីប្រធានបទផ្សេងទៀតដែលផ្អែកលើការបំផុសមកពីព្រះវិញ្ញាណ ។
អ្នកដឹកនាំ និងគ្រូបង្រៀនទាំងឡាយគួរស្វែងរកនូវវិធីដើម្បីលើកទឹកចិត្តសមាជិកឲ្យអានសារលិខិតដែលបានជ្រើសរើសនោះទុកជាមុន ហើយមកកាន់ព្រះវិហារដោយត្រៀមខ្លួនចែកចាយសេចក្ដីពិតអំពីដំណឹងល្អ និងគំនិតយោបល់អំពីរបៀបអនុវត្តតាមសារលិខិតទាំងនោះ ។ សកម្មភាពរៀនសូត្រដែលបានជាផ្តល់យោបល់ដូចខាងក្រោម ផ្អែកលើគោលការណ៍ទាំងឡាយនៅក្នុង ការបង្រៀនតាមរបៀបរបស់ព្រះអង្គសង្គ្រោះ អាចនាំឲ្យសមាជិករៀនសូត្រមកពីសារលិខិតសន្និសីទទូទៅ ។
អិម រ័សុល បាឡឺដ « អំណោយទានដ៏មានតម្លៃមកពីព្រះ » ទំព័រ ៩–១១
សារលិខិតរបស់ប្រធានបាឡឺដ ថ្លែងអំពីប្រធានបទជាច្រើន—រួមមាន ពួកព្យាការី សេចក្ដីជំនឿទៅលើព្រះគ្រីស្ទ ពិធីសាក្រាម៉ង់ និងការបម្រើ—ហើយសមាជិកក្នុងកូរ៉ុមរបស់បងប្អូន ឬសមាគមសង្គ្រោះ អាចនឹងរកឃើញប្រធានបទផ្សេងពីនេះ ជាពិសេសប្រធានបទដ៏មានអត្ថន័យ ។ អញ្ជើញសមាជិកឲ្យចែកចាយអំពីអ្វីមួយមកពីសារលិខិតនេះដែលបំផុសគំនិតពួកគេ ។ តើមានការអញ្ជើញ ឬពរជ័យដែលបានសន្យាអ្វីខ្លះដែលយើងរកឃើញនៅក្នុងសារលិខិតរបស់ប្រធាន បាឡឺដ ? សូមគិតពីការអញ្ជើញសមាជិកឲ្យពិចារណាពីរបីនាទីអំពីអ្វីដែលពួកគេទទួលអារម្មណ៍បំផុសគំនិតឲ្យធ្វើ ដែលជាលទ្ធផលមកពីការពិភាក្សានេះ ។
ហ្គែរី អ៊ី ស្ទីវ៉ែនសុន «ដួងចិត្តរបស់ព្យាការី, » ទំព័រ ១៧–២០
ដើម្បីជួយសមាជិកឲ្យ « យល់អំពីទំហំ » នៃការហៅព្យាការីថ្មី នោះបងប្អូនអាចអញ្ជើញសមាជិកឲ្យស្រាវជ្រាវនៅក្នុងសារលិខិតរបស់អែលឌើរ ស្ទីវ៉ែនសុន ដោយរកមើលសេចក្ដីពិត និងគំនិតដែលជួយពួកគេឲ្យយល់អំពីសារៈសំខាន់ និងភាពពិសិដ្ឋនៃដំណើរការរបស់ព្រះនេះ ។ សូមគិតពីការអញ្ជើញសមាជិកឲ្យចែកចាយអំពីអ្វីដែលពួកគេទទួលអារម្មណ៍ អំឡុងជំនុំមុតមាំដែលប្រធាន ណិលសុន ត្រូវបានគាំទ្រឲ្យធ្វើជាប្រធានសាសនាចក្រ ។ បងប្អូនក៏អាចគូររូបបេះដូងមួយនៅលើក្ដារខៀន ហើយសុំឲ្យសមាជិកសរសេរវាជាពាក្យ ឬឃ្លាដែលពិពណ៌នាអំពីដួងចិត្ត និងចរិតលក្ខណៈរបស់ប្រធាន ណិលសុនផងដែរ ។ តើលោកបានបង្រៀនអ្វីខ្លះ ដែលបានប្រទានពរដល់យើង ?
នែល អិល អាន់ឌើរសិន « ព្យាការីនៃព្រះ » ទំព័រ ២៤–២៧
ការពិភាក្សាអំពីសារលិខិតរបស់អែលឌើរ អាន់ឌើរសិន អាចពង្រឹងសេចក្ដីជំនឿរបស់សមាជិកទៅលើពួកព្យាការីនៅរស់ ។ បងប្អូនអាចអញ្ជើញពួកគេឲ្យស្រាវជ្រាវនៅក្នុងសារលិខិតរបស់លោករកអ្វីដែលជួយពួកគេយល់ថា ហេតុអ្វីព្រះមានពួកព្យាការីនៅលើផែនដី ហើយហេតុអ្វីក៏យើងធ្វើតាមពួកលោក ។ តើយើងត្រូវបានប្រទានពរដោយសារតែយើងមានព្យាការីយ៉ាងដូចម្ដេច ? សមាជិកអាចចែកចាយអំពីរបៀបដែលពួកគេបានទទួលទីបន្ទាល់មួយថា ប្រធាន រ័សុល អិម ណិលសុន គឺជាព្យាការីរបស់ព្រះអម្ចាស់ និងជាប្រធាននៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។
ដេវីឌ អេ បែដណា « ចូរមានចិត្តស្លូតបូត ហើយសុភាពរាបសា » ទំព័រ ៣០–៣៣
ដើម្បីបំផុសឲ្យមានការពិភាក្សាអំពីសារលិខិតរបស់អែលឌើរ បែដណា បងប្អូនអាចសរសេរនៅលើក្ដារខៀននូវពាក្យ ស្លូតបូតគឺជា… និង ស្លូតបូតពុំមែនជា… បន្ទាប់មកសមាជិកអាចស្រាវជ្រាវនៅក្នុងសារលិខិតរបស់អែលឌើរ បែដណា ហើយសរសេរនៅលើក្ដារខៀននូវឃ្លាទាំងឡាយដែលពួកគេរកឃើញថាជួយបំពេញសេចក្ដីថ្លែងទាំងនោះ ។ តើយើងរៀនអ្វីខ្លះមកពីសារលិខិតនេះដែលបំផុសគំនិតយើងឲ្យកាន់តែស្លូតបូត ? តើគំរូនៃភាពស្លូតបូតអ្វីខ្លះដែលយើងអាចគិតដល់ ? តើយើងអាចអនុវត្តតាមការប្រឹក្សារបស់អែលឌើរ បែដណាដើម្បីកាន់តែស្លូតបូតយ៉ាងដូចម្ដេច ?
បូនី អិល. អូស្ការសុន « យុវនារីនៅក្នុងកិច្ចការ » ទំព័រ ៣៦-៣៨
សំណួរគឺជាវិធីមួយដើម្បីអញ្ជើញឲ្យមានការពិចារណា ។ សូមគិតពីការសរសេរនៅលើក្ដារខៀននូវសំណួរមួយចំនួនដែលសារលិខិតរបស់ស៊ីស្ទើរ អូស្ការសុន ផ្ដល់ចម្លើយ ដូចជាតើយើងអាចឲ្យយុវនារីចូលរួមនៅក្នុងកិច្ចការរបស់ព្រះអម្ចាស់យ៉ាងដូចម្ដេច ? សូមអញ្ជើញសមាជិកឲ្យស្រាវជ្រាវក្នុងសារលិខិតរបស់គាត់រកចម្លើយចំពោះសំណួរទាំងនេះ ហើយពិភាក្សាអំពីអ្វីដែលពួកគេបានរៀន ។ តើមានពរជ័យអ្វីខ្លះកើតមាន នៅពេលយុវនារីចូលរួមនៅក្នុងការងារបម្រើ ? ប្រហែលជាសមាជិកក្នុងថ្នាក់អាចចែកចាយបទពិសោធន៍ដែលពួកគេមានពេលធ្វើការងារបម្រើជាមួយនឹងយុវនារី ។ ផ្អែកទៅលើការពិភាក្សារបស់យើង តើយើងទទួលអារម្មណ៍បំផុសឲ្យធ្វើអ្វីខ្លះ ?
ឌេល ជី រិនឡាន់ « កិច្ចការពង្សប្រវត្តិ និងព្រះវិហារបរិសុទ្ធ ៖ ការផ្សារភ្ជាប់ និងការព្យាបាល » ទំព័រ ៤៦–៤៩
អែលឌើរ រិនឡាន់ ថ្លែងអំពីការនិមិត្តរបស់អេសេគាលស្តីពីព្រះវិហារបរិសុទ្ធមួយដែលមានទឹកហូរចេញពីវានោះ ( សូមមើល អេសេគាល ៤៧:៨–៩ ) ។ ប្រហែលជាសមាជិកម្នាក់ក្នុងកូរ៉ុម ឬសមាគមសង្គ្រោះ អាចគូររូបមួយអំពីការនិមិត្តនេះនៅលើក្ដារខៀន ។ តើពរជ័យនៃព្រះវិហារបរិសុទ្ធ និងកិច្ចការពង្សប្រវត្តិ គឺដូចជាទឹកនៅក្នុងការនិមិត្តរបស់អេសេគាលយ៉ាងដូចម្ដេច ? បងប្អូនអាចអញ្ជើញសមាជិកក្នុងថ្នាក់ឲ្យចែកចាយពរជ័យនៃព្រះវិហារបរិសុទ្ធ និងកិច្ចការពង្សប្រវត្តិ ដែលពួកគេមានបទពិសោធន៍ ។ តើយើងអាចធ្វើអ្វីខ្លះដើម្បីធ្វើឲ្យកិច្ចការពង្សប្រវត្តិ និងកិច្ចការព្រះវិហារបរិសុទ្ធ កាន់តែក្លាយជាចំណែកជាទៀងទាត់មួយនៅក្នុងជីវិតរបស់យើង ?
ឌី ថត គ្រីស្តូហ្វឺសិន « កូរ៉ុមអែលឌើរ » ទំព័រ ៥៥–៥៨
នៅក្នុងកូរ៉ុមអែលឌើរ បងប្អូនអាចអញ្ជើញសមាជិកកូរ៉ុមឲ្យអានវគ្គនៃសារលិខិតរបស់អែលឌើរ គ្រីស្ដូហ្វឺសិន ដែលមានចំណងជើងថា « គោលបំណងនៃការផ្លាស់ប្ដូរទាំងនេះ » តើយើងអាចធ្វើអ្វីខ្លះដើម្បីប្រាកដថា យើងសម្រេចបានគោលបំណងទាំងនេះ ? នៅក្នុងសមាគមសង្គ្រោះ បងប្អូនអាចសុំឲ្យនរណាម្នាក់សង្ខេបអំពីការផ្លាស់ប្ដូរចំពោះកូរ៉ុមបព្វជិតភាពមិលគីស្សាដែក ដែលអែលឌើរ គ្រីស្ដូហ្វឺសិន បានពិពណ៌នា ។ បន្ទាប់មក បងប្អូនស្រីអាចដឹងអំពីគោលការណ៍ដែលបញ្ជាក់នៅក្នុងការផ្លាស់ប្ដូរទាំងនេះ ដែលអាចអនុវត្តទៅក្នុងកិច្ចការរបស់សមាគមសង្គ្រោះរបស់បងប្អូន ។ នៅក្នុងកូរ៉ុមអែលឌើរ ឬសមាគមសង្គ្រោះ សមាជិកទាំងឡាយអាចពិភាក្សាអំពីអ្វីដែលពួកគេរៀនមកពីរឿងរបស់បងប្រុស ហ្គូតេស និងរបៀបដែលវាអនុវត្តចំពោះកិច្ចការរបស់ពួកគេ ។
រ៉ូណល អេ រ៉ាសបាន « មើលចុះ ! ទ័ពហ្លួង » ទំព័រ ៥៨–៦១
ប្រហែលជាច្រៀង ស្ដាប់ ឬអានទំនុកនៃបទ « មើលចុះ ! ទ័ពហ្លួង » (ទំនុកតម្កើង, លេខ ១៥៧ ) ជាមួយគ្នាអាចបំផុសការពិភាក្សាអំពីសារលិខិតរបស់អែលឌើរ រ៉ាសបាន ។ តើកូរ៉ុមបព្វជិតភាព និងសមាគមសង្គ្រោះ ប្រៀបដូចជាទ័ពហ្លួងយ៉ាងដូចម្ដេច ? សមាជិកក៏អាចរកមើល និងពិភាក្សាអំពី « ពរជ័យដ៏ច្រើន » ដែលអែលឌើរ រ៉ាសបាន បានថ្លែង ដែលនឹងកើតមានមកពីការរៀបចំរចនាសម្ព័ន្ធនៃកូរ៉ុមបព្វជិតភាពឡើងវិញ ។ តើពរជ័យដទៃទៀតដែលយើងបានទទួលមានអ្វីខ្លះ—ឬតើយើងសង្ឃឹមថានឹងទទួលបានពរជ័យអ្វីខ្លះ—មកពីការអនុវត្តតាមការផ្លាស់ប្ដូរទាំងនេះ ? តើសមាគមសង្គ្រោះអាចទទួលបានពរជ័យកាន់តែពេញលេញយ៉ាងដូចម្ដេច ដូចជា « អំណោយទានផ្សេងៗគ្នា » និង « ការណែនាំ » នោះ ?
ហិនរី ប៊ី អាវរិង « ការងារបម្រើដ៏បំផុសគំនិត » ទំព័រ ៦១–៦៤
ប្រធាន អាវរិង ប្រាប់អំពីការឡើងនិយាយក្នុងការប្រជុំសាក្រាម៉ង់ចំនួនពីរ អំពីការងារបម្រើដែលបានធ្វើឲ្យគាត់មានចំណាប់អារម្មណ៍ ។ ប្រហែលជាបងប្អូនអាចសួរសមាជិកកូរ៉ុម ឬសមាគមសង្គ្រោះចំនួនពាក់កណ្ដាលថ្នាក់ឲ្យរំឭកពាក្យសម្ដីរបស់កុមារាអាយុ ១៤ ឆ្នាំ និងសមាជិកពាក់កណ្ដាលថ្នាក់ទៀតឲ្យរំឭកអំពីរឿងគ្រូបង្រៀនតាមផ្ទះ ។ នៅពេលពួកគេអាន សមាជិកអាចគិតអំពីដំបូន្មានដែលពួកគេអាចនឹងផ្ដល់ទៅឲ្យយុវជន ឬយុវនារីដែលត្រូវបានចាត់តាំងថ្មីឲ្យធ្វើការងារបម្រើដល់នរណាម្នាក់ ។ តើយើងអាច « ប្រែក្លាយកាន់តែមានការបំផុសគំនិត និងមានសប្បុរសធម៌នៅក្នុងការងារបម្រើរបស់យើង… » យ៉ាងដូចម្ដេច ?
ដាល្លិន អេក អូក « អំណាចបព្វជិតភាព » ទំព័រ ៦៥–៦៨
ដើម្បីចាប់ផ្ដើមការពិភាក្សាមួយ បងប្អូនអាចសរសេរចំណងជើងទាំងបួនវគ្គនៃសារលិខិតរបស់ប្រធាន អូក នៅលើក្ដារខៀន ។ បន្ទាប់មកអញ្ជើញសមាជិកម្នាក់ៗឲ្យអានវគ្គមួយដោយស្ងាត់ស្ងៀម បន្ទាប់មកសរសេរនៅលើក្ដារខៀននូវប្រយោគមួយដែលសង្ខេបសារលិខិតសំខាន់នៃវគ្គនោះ ។ បន្ទាប់មកសមាជិកអាចចែកចាយនូវអ្វីដែលពួកគេទទួលអារម្មណ៍បំផុសគំនិតឲ្យធ្វើ ដោយសារតែអ្វីដែលពួកគេអាន ។ តើការបម្រើរបស់យើង ក្នុងនាមជាអ្នកកាន់បព្វជិតភាព ឬបងប្អូនស្ត្រីសមាគមសង្គ្រោះ នឹងកែលម្អយ៉ាងដូចម្ដេច នៅពេលយើងអនុវត្តការបង្រៀននៅក្នុងសារលិខិតរបស់ប្រធាន អូក ?
រ័សុល អិម ណិលសុន « ការបង្រៀនដោយអំណាច និងសិទ្ធិអំណាចពីព្រះ » ទំព័រ ៦៨–៧៥
ប្រធាន ណិលសុន អញ្ជើញអ្នកកាន់បព្វជិតភាពឲ្យ « ក្រោកឈរឡើង » ហើយប្រើបព្វជិតភាពប្រទានពរដល់បុត្រាបុត្រីរបស់ព្រះវរបិតាសួគ៌ ។ សូមអញ្ជើញសមាជិកក្នុងកូរ៉ុម ឬសមាគមសង្គ្រោះរបស់បងប្អូនឲ្យស្វែងរកឧទាហរណ៍ដែលលោកបានផ្ដល់ឲ្យ ហើយពិភាក្សាអំពីរបៀបដែលឧទាហរណ៍ទាំងនោះ ជួយយើងឲ្យយល់អំពីរបៀបដែលបព្វជិតភាពអាចត្រូវបានប្រើដើម្បីប្រទានពរដល់ក្រុមគ្រួសាររបស់ពួកគេ និងអ្នកដទៃទៀត ។ តើមានបទពិសោធន៍អ្វីខ្លះដែលយើងអាចចែកចាយ នៅពេលយើងត្រូវបានប្រទានពរដោយអំណាចបព្វជិតភាព ? តើយើងអាចជួយអ្នកដទៃ ឬខ្លួនយើងឲ្យមានជំនឿដើម្បីប្រើបព្វជិតភាពរបស់ព្រះ ដើម្បី « បម្រើនៅក្នុងព្រះនាមរបស់ទ្រង់ » យ៉ាងដូចម្ដេច ?
រ៉េណា អ៊ី អាប៊ើតូ « ដោយព្រមព្រៀងគ្នា » ទំព័រ ៧៨–៨០
សារលិខិតរបស់ស៊ីស្ទើរ អាប៊ឺតូ ផ្ដល់ជាឱកាសមួយសម្រាប់កូរ៉ុម ឬសមាគមសង្គ្រោះរបស់បងប្អូនវាយតម្លៃថា តើបងប្អូនកំពុងធ្វើការសាមគ្គីភាពគ្នានៅក្នុងកិច្ចការរបស់ព្រះអម្ចាស់បានល្អកម្រិតណា ។ ដើម្បីជួយសមាជិកឲ្យធ្វើដូចនេះ បងប្អូនអាចបង្ហាញរូបភាពនៃសត្វមេអំបៅពណ៌ចម្រុះ រូបភាពព្រះអង្គសង្គ្រោះយាងទៅជួបនឹងពួកសាសន៍នីហ្វៃ ( សូមមើល សៀវភៅរូបភាពដំណឹងល្អ លេខ ៨២, ៨៣, ៨៤ ) និងរូបភាព កិច្ចការមនុស្សធម៌របស់សាសនាចក្រ ( សូមមើលគេហទំព័រ LDS.org ) ។ សមាជិកអាចស្រាវជ្រាវសារលិខិត និងរុករកមើលថាតើស៊ីស្ទើរ អាប៊ឺតូបានប្រើឧទាហរណ៍ទាំងនេះដើម្បីបង្រៀនអំពីគោលបំណង និងពរជ័យទាំងឡាយនៃការធ្វើការរួមគ្នាយ៉ាងដូចម្ដេចខ្លះ ។ តើយើងអាចធ្វើការ « ដោយព្រមព្រៀងគ្នា » យ៉ាងណា ?
ហិនរី ប៊ី អាវរិង « ព្រះវិញ្ញាណរបស់ទ្រង់នឹងគង់នៅជាមួយអ្នក » ទំព័រ ៨៦–៨៩
ដើម្បីបង្កើនបំណងប្រាថ្នា និងសមត្ថភាពរបស់យើងទទួលយកព្រះវិញ្ញាណបរិសុទ្ធ នោះប្រធាន អាវរិង ចែកចាយបទពិសោធន៍ផ្ទាល់ខ្លួន ហើយផ្ដល់នូវការដឹកនាំជាក់លាក់ជាច្រើន ។ បន្ទាប់ពីមើលបទពិសោធន៍របស់លោក តើការចងចាំស្រដៀងគ្នាអ្វីខ្លះដែលសមាជិកក្នុងកូរ៉ុម ឬសមាគមសង្គ្រោះរបស់បងប្អូនអាចចែកចាយ នៅពេលព្រះវិញ្ញាណបរិសុទ្ធរំជួលដួងចិត្តរបស់ពួកគេ ឬបញ្ជាក់អំពីសេចក្ដីពិតនោះ ? ប្រហែលជាសមាជិកអាចសរសេរនៅលើក្ដារខៀននូវការណែនាំដែលប្រធាន អាវរិង ចែកចាយដើម្បីជួយ « បើកដួងចិត្តរបស់យើងដើម្បីទទួលបានការបម្រើមកពីព្រះវិញ្ញាណ » ។ តើការធ្វើតាមការដឹកនាំរបស់លោកនឹងជួយយើងនៅក្នុងជីវិត និងនៅក្នុងគ្រួសាររបស់យើងយ៉ាងដូចម្ដេច ? នៅក្នុងកូរ៉ុម ឬសមាគសង្គ្រោះរបស់យើងយ៉ាងដូចម្ដេច ?
ដាល្លិន អេក អូក « កិច្ចការតូចតាច និងងាយ » ទំព័រ ៨៩–៩២
សារលិខិតរបស់ប្រធាន អូក មាននូវការប្រៀបធៀបដែលបង្រៀនអំពីកិច្ចការតូចតាច និងងាយ អាចមានឥទ្ធិពលយ៉ាងខ្លាំងសម្រាប់សេចក្ដីល្អ ឬសេចក្ដីអាក្រក់ជាយ៉ាងណា ។ ការប្រៀបធៀបទាំងនេះរួមមាន ឬសឈើ ក្រុមអុំទូក ខ្សែពួរ ការសម្រក់ទឹក ។ សមាជិកអាចអានការប្រៀបធៀបទាំងនេះ ហើយពិភាក្សាអំពីអ្វីដែលរបស់ទាំងនេះបង្រៀនអំពីអំណាចនៃការធ្វើកិច្ចការតូចតាច និងងាយដោយខ្ជាប់ខ្ជួន ។ តើកិច្ចការតូចតាច និងងាយអ្វីខ្លះដែលនាំមកនូវឥទ្ធិពលនៃព្រះវិញ្ញាណបរិសុទ្ធមកក្នុងជីវិតរបស់យើង ? សូមអញ្ជើញសមាជិកឲ្យពិចារណាអំពីអ្វីដែលពួកគេទទួលអារម្មណ៍ឲ្យធ្វើតាមការទូន្មានរបស់ប្រធានអូក ។
រ័សុល អិម ណិលសុន « វិវរណៈសម្រាប់សាសនាចក្រ វិវរណៈសម្រាប់ជីវិតរបស់យើង » ទំព័រ ៩៣–៩៦
នៅក្នុងសារលិខិតនេះ ប្រធាន ណិលសុន សូមអង្វរដល់យើងឲ្យចម្រើន « សមត្ថភាពខាងវិញ្ញាណរបស់យើងដើម្បីទទួលបានវិវរណៈ » ។ ដើម្បីជួយសមាជិកធ្វើតាមការដឹកនាំរបស់លោក បងប្អូនអាចសរសេរសំណួរដូចខាងក្រោមនៅលើក្ដារខៀន ៖ ហេតុអ្វីយើងត្រូវការវិវរណៈ ? តើយើងអាចបង្កើនសមត្ថភាពដើម្បីទទួលវិវរណៈ—ទាំងជាបុគ្គល និងនៅពេលយើងប្រឹក្សាជាមួយគ្នាយ៉ាងដូចម្ដេច ? តើមានពរជ័យអ្វីខ្លះដែលប្រធានណិលសុនបានសន្យា បើយើងនឹងស្វែងរកវិវរណៈនោះ ? សូមបំបែកសមាជិកជាក្រុម ហើយអញ្ជើញក្រុមនីមួយៗឲ្យស្វែងរក និងចែកចាយចម្លើយចំពោះសំណួរមួយ ។
ហ្គើរីត ដបុលយូ ហ្គុង « ព្រះគ្រីស្ទទ្រង់បានរស់ឡើងវិញ » ទំព័រ ៩៧–៩៨
តើសមាជិកកូរ៉ុមឬសមាគមសង្គ្រោះរបស់បងប្អូនរៀនអ្វីខ្លះមកពីសារលិខិតរបស់អែលឌើរ ហ្គង អំពីសេចក្ដីសញ្ញារបស់យើង និងដង្វាយធួនរបស់ព្រះយេស៊ូវគ្រីស្ទ ? បងប្អូនអាចអញ្ជើញសមាជិកឲ្យស្រាវជ្រាវសារលិខិត ដោយស្វែងរកពរជ័យដែលដង្វាយធួនរបស់ព្រះអង្គសង្គ្រោះ និងសេចក្ដីសញ្ញារបស់យើង—ធ្វើការរួមគ្នា—ដើម្បីផ្ដល់ឲ្យយើង ។ បន្ទាប់មកសូមគិតពីការសួរសំណួរដូចខាងក្រោមអំពីអ្វីដែលពួកគេរកឃើញ ៖ តើសេចក្ដីសញ្ញារបស់យើង និងដង្វាយធួនធ្វើការរួមគ្នាដើម្បីយើង « អាចធ្វើបាន ហើយធ្វើឲ្យយើងកាន់តែថ្លៃថ្នូរឡើង » យ៉ាងដូចម្តេច ? តើវាជួយយើងឲ្យបន្ដកាន់ខ្ជាប់ និងបោះបង់ចោលអ្វីខ្លះ ?
អូលីសេស សូរ៉េស « ពួកព្យាការីថ្លែងដោយព្រះចេស្ដានៃព្រះវិញ្ញាណបរិសុទ្ធ » ទំព័រ ៩៨–៩៩
សារលិខិតរបស់អែលឌើរ សូរ៉េស អាចបំផុសគំនិតយើងឲ្យធ្វើសកម្មភាពនៅក្នុងសេចក្ដីជំនឿ នៅពេលយើងមានអារម្មណ៍ពុំល្អគ្រប់គ្រាន់នៅក្នុងការធ្វើតាមព្រះឆន្ទៈរបស់ព្រះអម្ចាស់ ។ តើអែលឌើរ សូរ៉េស ទទួលបានការលួងលោមចិត្ត និងការអះអាងយ៉ាងដូចម្ដេច នៅពេលលោកទទួលបានការហៅបម្រើថ្មី ក្នុងនាមជាសាវកមួយរូបនោះ ? តើលោកបានរៀនអ្វីខ្លះមកពីបទពិសោធន៍របស់លោកកាលត្រូវបានហៅឲ្យបម្រើជាប្រធានបេសកកម្ម ? តើយើងអាចរៀនអ្វីខ្លះមកពីបទពិសោធន៍របស់លោក ? សូមផ្ដល់ពេលដល់សមាជិកឲ្យចែកចាយបទពិសោធន៍នៅពេលដែលពួកគេទទួលអារម្មណ៍ពុំប្រាកដប្រជាអំពីអ្វីដែលព្រះអម្ចាស់សព្វព្រះទ័យឲ្យពួកគេធ្វើ ។ តើពួកគេបានធ្វើអ្វីខ្លះដើម្បីទទួលបានសេចក្ដីជំនឿដើម្បីដើរឆ្ពោះទៅមុខ ?
ជែហ្វ្រី អ័រ ហូឡិន « នៅជាមួយ និងចម្រើនកម្លាំងពួកគេ » ទំព័រ ១០១–៣
នៅពេលសមាជិកកូរ៉ុម ឬសមាគមសង្គ្រោះរបស់បងប្អូនបានរៀនអំពីការផ្លាស់ប្ដូរចំពោះ « គោលគំនិតអំពីការងារបម្រើរបស់បព្វជិតភាព និងសមាគមសង្គ្រោះ » តើពួកគេមានសំណួរអ្វីខ្លះ ? សារលិខិតរបស់អែលឌើរ ហូឡិន អាចផ្ដល់ចម្លើយនោះ ។ សមាជិកអាចស្វែងរកគោលការណ៍ដំណឹងល្អដែលអែលឌើរ ហូឡិន បង្រៀនគឺជាគ្រឹះនៃការផ្លាស់ប្ដូរ ទាំងនេះ ។ តើមានការអញ្ជើញអ្វីខ្លះដែលយើងរកឃើញមាននៅក្នុងសារលិខិតនេះ ? តើមានពរជ័យអ្វីខ្លះដែលបានសន្យា ? តើវិធីថ្មីៗនៃការងារបម្រើទាំងនេះ អាចជួយយើងឲ្យប្រែក្លាយជា « សិស្សពិតរបស់ព្រះគ្រីស្ទ » យ៉ាងដូចម្ដេច ?
ជីន ប៊ី ប៊ីងហាំ « ការងារបម្រើដូចដែលព្រះអង្គសង្គ្រោះបានធ្វើ » ទំព័រ ១០៤–៧
នៅក្នុងសារលិខិតរបស់គាត់ ស៉ីស្ទើរ ប៊ីងហាំ អញ្ជើញពួកយើងឲ្យសួរសំណួរខ្លួនយើងដើម្បីអាចដឹកនាំដល់កិច្ចខិតខំផ្ដល់ការងារបម្រើរបស់យើង ។ សមាជិកអាចពិភាក្សាអំពីរបៀបដែលសំណួរទាំងនេះអាចដឹកនាំការខិតខំរបស់ពួកគេ បន្ទាប់មកស្វែងរកចម្លើយចំពោះសំណួររបស់ស៉ីស្ទើរ ប៊ីងហាំ« ដូច្នេះតើ [ ការងារបម្រើ ] មានលក្ខណៈយ៉ាងណា ? » បងប្អូនអាចចំណាយពេលរំឭកអំពីឧទាហរណ៍មួយចំនួនដែលស៉ីស្ទើរ ប៊ីងហាំ បានចែកចាយអំពីការងារបម្រើរបស់បុគ្គលម្នាក់ៗ ហើយអញ្ជើញសមាជិកឲ្យចែកចាយឧទាហរណ៍ផ្ទាល់ខ្លួនរបស់ពួកគេ ។ តើយើងរកឃើញអ្វីខ្លះនៅក្នុងសារលិខិតរបស់ស៊ីស្ទើរ ប៊ីងហាំ ដែលបង្កើនការយល់ដឹងរបស់យើងអំពីមូលហេតុ និងរបៀបដែលយើងផ្ដល់ការងារបម្រើ ?
ឌៀថើរ អេស្វ អុជដូហ្វ « មើលចុះមនុស្សនេះហើយ ! » ទំព័រ ១០៧–១០
តើយើងនឹងជួយនរណាម្នាក់ឲ្យយល់ថា ពលិកម្មធួន និងការរស់ឡើងវិញរបស់ព្រះយេស៊ូវគ្រីស្ទ គឺជាព្រឹត្តការណ៍សំខាន់បំផុតនៅក្នុងប្រវត្តិសាស្ត្រពិភពលោកយ៉ាងដូចម្ដេច ? សូមអញ្ជើញសមាជិកឲ្យពិចារណាអំពីសំណួរនេះ នៅពេលពួកគេអានផ្នែកនានានៃសារលិខិតរបស់អែលឌើរ អុជដូហ្វ ។ តើពួកគេរកឃើញថា មានអ្វីខ្លះដែលនឹងជួយពន្យល់អំពីមូលហេតុដែលព្រឹត្តការណ៍ទាំងនេះសំខាន់យ៉ាងខ្លាំងចំពោះពួកគេ ? បន្ទាប់ពីការពិភាក្សានេះ សមាជិកក្នុងថ្នាក់អាចពិភាក្សាអំពីអត្ថន័យនៃឃ្លា « មើលចុះមនុស្សនេះហើយ » មានន័យយ៉ាងណាចំពោះពួកគេ ។ តើយើងបានរៀនអំពី « មើលចុះ មនុស្សនេះហើយ » យ៉ាងដូចម្ដេច ?
ឃ្វីនថិន អិល ឃុក « ប្រុងប្រៀបទៅជួបព្រះ » ទំព័រ ១១៤–១៧
បងប្អូនអាចចាប់ផ្ដើមការពិភាក្សារបស់បងប្អូនអំពីសារលិខិតរបស់អែលឌើរ ឃុក ដោយការអញ្ជើញដល់សមាជិកម្នាក់ឲ្យសង្ខេបអំពីការស្ដារឡើងវិញនៃកូនសោបព្វជិតភាពនៅក្នុងព្រះវិហារបរិសុទ្ធខឺតឡង់ ។ យោងតាមសារលិខិតរបស់អែលឌើរ ឃុក តើសាសនាចក្រមានការទទួលខុសត្រូវអ្វីខ្លះទាក់ទងទៅនឹងកូនសោទាំងនេះ ? តើការទទួលខុសត្រូវទាំងនេះបើកសម្ដែងនៅក្នុងសាសនាចក្រសព្វថ្ងៃនេះយ៉ាងដូចម្តេចដែរ ? សូមសរសេរពាក្យ សេចក្តីសុចរិត សាមគ្គីភាព និង សមភាព នៅលើក្ដារខៀន ហើយសូមដល់សមាជិកឲ្យចែកចាយគំនិតយោបល់ដែលពួកគេទទួលបានអំពីគោលការណ៍នីមួយៗទាំងនេះចេញមកពីសារលិខិតរបស់អែលឌើរ ឃុក ។ តើគោលការណ៍ទាំងនេះជួយយើងបំពេញតាមការទទួលខុសត្រូវដ៏ពិសិដ្ឋរបស់សាសនាចក្រយ៉ាងដូចម្ដេច ?