ການປະຊຸມສະພາ ໃນວັນອາທິດທຳອິດ

ໃນວັນອາທິດທຳອິດຂອງແຕ່ລະເດືອນ, ການປະຊຸມຂອງກຸ່ມແອວເດີ ແລະ ສະມາຄົມສະຕີສົງເຄາ ຈະບໍ່ຮ່ວມບົດຮຽນທີ່ຖືກສິດສອນໂດຍຄູສອນ. ແຕ່ໃຫ້ຝ່າຍປະທານກຸ່ມແອວເດີ ແລະ ຝ່າຍປະທານສະມາຄົມສະຕີສົງເຄາະ ເປັນຜູ້ນຳພາການປະຊຸມສະພາດ້ວຍຕົວເອງ. ໃນການປະຊຸມສະພາ ໃນວັນອາທິດທຳອິດນີ້, ແອວເດີແຕ່ລະກຸ່ມ ແລະ ສະມາຄົມສະຕີສົງເຄາະ ຈະປຶກສາຫາລືນຳກັນ ກ່ຽວກັບໜ້າທີ່ຮັບຜິດຊອບໃນທ້ອງຖິ່ນ, ໂອກາດ, ແລະ ການທ້າທາຍ, ຮຽນຮູ້ຈາກຄວາມຮູ້ ແລະ ປະສົບການຂອງກັນແລະກັນ; ແລະ ວາງແຜນວິທີທີ່ຈະປະຕິບັດຕາມຄວາມປະທັບໃຈທີ່ໄດ້ຮັບຈາກພຣະວິນຍານ. ການສົນທະນາເຫລົ່ານີ້ ຄວນກ່ຽວພັນກັບພຣະຄຳພີ ແລະ ຄຳສອນຂອງສາດສະດາທີ່ມີຊີວິດຢູ່.

ບໍ່ແມ່ນການປະຊຸມສະພາທຸກບ່ອນ ຈະເປັນຄືກັນໝົດ. ຕໍ່ໄປນີ້ແມ່ນແນວທາງຊີ້ນຳ ເພື່ອຊ່ວຍຝ່າຍປະທານນຳພາສະພາໃຫ້ມີປະສິດທິພາບ.

ກ່ອນການປະຊຸມສະພາ

ໃຫ້:

ແຈ້ງບອກເຖິງຄວາມຕ້ອງການ, ໂອກາດ, ແລະ ການທ້າທາຍໃນທ້ອງຖິ່ນ.
ເລືອກຫົວຂໍ້ທີ່ຈະສົນທະນາ ດ້ວຍການອະທິຖານ.
ເຊື້ອເຊີນສະມາຊິກໃນກຸ່ມ ຫລື ເອື້ອຍນ້ອງສະມາຄົມສະຕີສົງເຄາະ ໃຫ້ມາດ້ວຍຄວາມຕຽມພ້ອມ ທີ່ຈະແບ່ງປັນຄວາມຄິດ ແລະ ປະສົບການຂອງເຂົາເຈົ້າ.

ບໍ່ໃຫ້:

ຕຽມບົດຮຽນ.
ມາດ້ວຍຄຳຕອບໃດໜຶ່ງໂດຍສະເພາະ ຫລື ແຜນການທີ່ຈະລົງມືປະຕິບັດ ຢູ່ໃນໃຈ.

ລະຫວ່າງການປະຊຸມສະພາ

ໃຫ້:

ເຊື້ອເຊີນສະມາຊິກໃຫ້ ແບ່ງປັນປະສົບການ ທີ່ເຂົາເຈົ້າໄດ້ປະຕິບັດ ອີງຕາມຄວາມປະທັບໃຈ ທີ່ເຂົາເຈົ້າໄດ້ຮັບ ຈາກການປະຊຸມເທື່ອແລ້ວນີ້.
ບອກກ່າວຫົວຂໍ້ຂອງການປະຊຸມ ແລະ ຊຸກຍູ້ສະມາຊິກໃຫ້ ປຶກສາຫາລືນຳກັນ ກ່ຽວກັບຫົວຂໍ້ນັ້ນ, ຊອກຫາຄຳຕອບ ແລະ ການຊີ້ນຳຈາກພຣະຄຳພີ, ຖ້ອຍຄຳຂອງສາດສະດາ, ແລະ ພຣະວິນຍານບໍລິສຸດ.
ວາງແຜນທີ່ຈະປະຕິບັດ ຕາມສິ່ງທີ່ໄດ້ສົນທະນາ. ສິ່ງນີ້ອາດຮ່ວມດ້ວຍແຜນການທີ່ເປັນກຸ່ມ ຫລື ແຜນການສ່ວນຕົວ.

ບໍ່ໃຫ້:

ໃຊ້ສິດຄວບຄຸມການສົນທະນາ.
ພະຍາຍາມຊັກຊວນຄົນອື່ນໃຫ້ຍອມຮັບແນວຄິດຂອງທ່ານ.
ສົນທະນາເລື່ອງທີ່ແຕະຕ້ອງຈິດໃຈ ຫລື ເລື່ອງທີ່ເປັນຄວາມລັບ.
ສິດສອນບົດຮຽນ.
ກົດດັນຄົນອື່ນໃຫ້ມີສ່ວນຮ່ວມ.

ຫລັງຈາກການປະຊຸມສະພາ

ໃຫ້:

ຕິດຕາມເບິ່ງແຜນການ ແລະ ການມອບໝາຍ ທີ່ໄດ້ເຮັດ ລະຫວ່າງການປະຊຸມສະພາ.
ຊອກຫາວິທີທີ່ຈະຮ່ວມຜູ້ບໍ່ໄດ້ມາຮ່ວມການປະຊຸມ ເພາະການເອີ້ນ ຫລື ເພາະເຫດຜົນອື່ນໆ. ບອກໃຫ້ເຂົາເຈົ້າຮູ້ກ່ຽວກັບແຜນການທີ່ໄດ້ເຮັດ.
ມອບໂອກາດແກ່ສະມາຊິກ ທີ່ຈະແບ່ງປັນປະສົບການ ໃນການປະຊຸມເທື່ອຕໍ່ໄປ.

ຫົວຂໍ້ສຳລັບການປະຊຸມສະພາ ໃນວັນອາທິດທຳອິດ

ແນວຄິດສຳລັບຫົວຂໍ້ທີ່ຈະສົນທະນາໃນການປະຊຸມສະພາ ອາດມາຈາກການປະຊຸມຂອງຝ່າຍປະທານ, ການປະຊຸມສະພາຫວອດ, ແຜນການສຳລັບເຂດ, ຄວາມປະທັບໃຈຂອງຜູ້ນຳ ຈາກການປະຕິບັດສາດສະໜາກິດຕໍ່ສະມາຊິກ, ແລະ ຄວາມປະທັບໃຈຈາກພຣະວິນຍານບໍລິສຸດ. ຫົວຂໍ້ຢູ່ຂ້າງລຸ່ມເປັນພຽງຫົວຂໍ້ແນະນຳເທົ່ານັ້ນ. ຜູ້ນຳອາດຮູ້ຈັກເຖິງຄວາມຕ້ອງການຂອງຄົນອື່ນ ທີ່ເຂົາເຈົ້າຖືກດົນໃຈໃຫ້ກ່າວເຖິງ.

ເຮົາຈະເຮັດສິ່ງໃດແດ່ ເພື່ອປະຕິບັດສາດສະໜາກິດຕໍ່ຜູ້ຄົນທີ່ຢູ່ອ້ອມຮອບເຮົາ? (ເບິ່ງ ໂມໄຊຢາ 23:18).
ເຮົາຈະຈັດລຳດັບຄວາມສຳຄັນຂອງໜ້າທີ່ຮັບຜິດຊອບຂອງເຮົາໃນວິທີໃດ?
ເຮົາຈະແບ່ງປັນພຣະກິດຕິຄຸນກັບໝູ່ເພື່ອນ ແລະ ຄົນບ້ານໃກ້ເຮືອນຄຽງຂອງເຮົາໃນວິທີໃດ? (ເບິ່ງ ແອວມາ 17).
ເຮົາຈະປົກປ້ອງຕົວເອງ ແລະ ຄອບຄົວຂອງເຮົາ ຈາກສື່ສານມວນຊົນທີ່ບໍ່ເໝາະສົມ ແລະ ຮູບພາບລາມົກໃນວິທີໃດ?
ເຮົາຈະເຮັດສິ່ງໃດເພື່ອຊ່ວຍສອນ ແລະ ເພີ່ມຄວາມເຂັ້ມແຂງໃຫ້ແກ່ລູກໆຂອງເຮົາ ແລະ ຊາວໜຸ່ມຢູ່ໃນຫວອດຂອງເຮົາ?
ເຮົາຈະມີພາກສ່ວນໃນວຽກງານການສືບປະຫວັດຄອບຄົວ ແລະ ການນະມັດສະການໃນພຣະວິຫານໃນວິທີໃດ?
ເຮົາຈະເຊື້ອເຊີນໃຫ້ພຣະຜູ້ເປັນເຈົ້າຊ່ວຍເຫລືອໃນວິທີໃດ ໃນຂະນະທີ່ເຮົາສະແຫວງຫາຄຳຕອບໃຫ້ແກ່ຄຳຖາມຂອງເຮົາເລື່ອງພຣະກິດຕິຄຸນ ແລະ ເພື່ອຈະມີຄວາມເຂົ້າໃຈພຣະກິດຕິຄຸນຢ່າງເລິກຊຶ້ງ?
ເຮົາຈະເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງເຮົາ ເຖິງພຣະຜູ້ເປັນເຈົ້າ ແລະ ພຣະກິດຕິຄຸນຂອງພຣະອົງ ແລະ ຊ່ວຍຄອບຄົວຂອງເຮົາ ໃຫ້ເປັນຄົນກຸ້ມຕົວເອງທາງວິນຍານໃນວິທີໃດ?