ການປະຊຸມໃນວັນອາທິດ ທີສອງ ແລະ ທີສາມ
ໃນວັນອາທິດທີສອງ ແລະ ທີສາມຂອງແຕ່ລະເດືອນ, ກຸ່ມແອວເດີ ແລະ ສະມາຄົມສະຕີສົງເຄາະ ຈະຮ່ຳຮຽນຈາກຄຳສອນຂອງຜູ້ນຳຂອງສາດສະໜາຈັກ ຈາກກອງປະຊຸມໃຫຍ່ເທື່ອລ່າສຸດ. ໃຫ້ເນັ້ນໜັກຂ່າວສານຈາກສະມາຊິກໃນຝ່າຍປະທານສູງສຸດ ແລະ ກຸ່ມອັກຄະສາວົກສິບສອງ. ເຖິງຢ່າງໃດກໍຕາມ, ອີງຕາມຄວາມຕ້ອງການໃນທ້ອງຖິ່ນ ແລະ ການດົນໃຈຈາກພຣະວິນຍານ, ກໍສາມາດນຳຂ່າວສານໃດໜຶ່ງ ຈາກກອງປະຊຸມໃຫຍ່ເທື່ອລ່າສຸດ ມາສົນທະນາໄດ້.
ເກືອບໃນທຸກກໍລະນີ, ຝ່າຍປະທານກຸ່ມແອວເດີ ຫລື ຝ່າຍປະທານສະມາຄົມສະຕີສົງເຄາະ ຈະເລືອກຂ່າວສານໃດໜຶ່ງຈາກກອງປະຊຸມໃຫຍ່ ເພື່ອສຶກສາ ອີງຕາມຄວາມຕ້ອງການຂອງສະມາຊິກ, ເຖິງແມ່ນວ່າ ອະທິການ ຫລື ປະທານສະເຕກ ອາດໄດ້ໃຫ້ຄວາມຄິດຄວາມເຫັນແລ້ວກໍຕາມ. ຜູ້ນຳສາມາດເລືອກຂ່າວສານໃດໜຶ່ງ ທີ່ກ່ຽວພັນກັບຫົວຂໍ້ ທີ່ໄດ້ສົນທະນາກັນຢູ່ໃນການປະຊຸມສະພາໃນວັນອາທິດທຳອິດ, ຫລື ເຂົາເຈົ້າອາດເລືອກຂ່າວສານຢ່າງອື່ນ ອີງຕາມການດົນໃຈຈາກພຣະວິນຍານ.
ຜູ້ນຳ ແລະ ຄູສອນ ຄວນຫາວິທີທີ່ຈະຊຸກຍູ້ສະມາຊິກ ໃຫ້ອ່ານຂ່າວສານທີ່ໄດ້ຖືກເລືອກໄວ້ລ່ວງໜ້າ ແລະ ມາດ້ວຍຄວາມຕຽມພ້ອມທີ່ຈະແບ່ງປັນຄວາມຈິງຂອງພຣະກິດຕິຄຸນ ແລະ ແນວຄິດກ່ຽວກັບວິທີທີ່ຈະລົງມືປະຕິບັດຕາມນັ້ນ. ກິດຈະກຳເພື່ອຮຽນຮູ້ ທີ່ຖືກແນະນຳໃຫ້ໃຊ້ ຢູ່ຂ້າງລຸ່ມ, ຊຶ່ງອີງຕາມຫລັກທຳ ໃນ ການສິດສອນຕາມວິທີຂອງພຣະຜູ້ຊ່ວຍໃຫ້ລອດ, ສາມາດຊ່ວຍໃຫ້ສະມາຊິກຮຽນຮູ້ຈາກຂ່າວສານຂອງກອງປະຊຸມໃຫຍ່ໄດ້.
M. Russell Ballard, “Precious Gifts from God,” 9–11
ຂ່າວສານຂອງປະທານບາເລີດ ບອກເຖິງຫລາຍຫົວຂໍ້—ຮ່ວມທັງສາດສະດາ, ສັດທາໃນພຣະຄຣິດ, ສິນລະລຶກ, ແລະ ການຮັບໃຊ້—ແລະ ສະມາຊິກຂອງກຸ່ມ ຫລື ສະມາຄົມສະຕີສົງເຄາະ ສາມາດຊອກຫາຫົວຂໍ້ທີ່ແຕກຕ່າງ ຊຶ່ງມີຄວາມໝາຍໃດໜຶ່ງໂດຍສະເພາະ. ເຊື້ອເຊີນສະມາຊິກໃຫ້ແບ່ງປັນບາງສິ່ງ ຈາກຂ່າວສານ ທີ່ໃຫ້ການດົນໃຈແກ່ເຂົາເຈົ້າ. ເຮົາພົບເຫັນພອນຂອງການເຊື້ອເຊີນ ຫລື ຄຳສັນຍາໃດແດ່ ໃນຂ່າວສານຂອງປະທານບາເລີດ? ໃຫ້ເຊື້ອເຊີນສະມາຊິກໃຫ້ໄຕ່ຕອງຈັກສອງສາມນາທີ ກ່ຽວກັບສິ່ງທີ່ເຂົາເຈົ້າຖືກດົນໃຈໃຫ້ເຮັດ ຕາມຜົນຂອງການສົນທະນານີ້.
Gary E. Stevenson, “The Heart of a Prophet,” 17–20
ເພື່ອຊ່ວຍສະມາຊິກ “ໃຫ້ເຂົ້າໃຈຄວາມສຳຄັນ” ຂອງການເອີ້ນຂອງສາດສະດາຄົນໃໝ່, ທ່ານສາມາດເຊື້ອເຊີນສະມາຊິກ ໃຫ້ຄົ້ນຄວ້າຂ່າວສານຂອງແອວເດີ ສະຕີບເວັນສັນ, ຊອກຫາຄວາມຈິງ ແລະ ຄວາມຮູ້ ທີ່ຊ່ວຍເຂົາເຈົ້າ ໃຫ້ເຂົ້າໃຈເຖິງຄວາມສຳຄັນ ແລະ ຄວາມສັກສິດຂອງຂັ້ນຕອນທີ່ສູງສົ່ງນີ້. ເຊື້ອເຊີນສະມາຊິກໃຫ້ແບ່ງປັນສິ່ງທີ່ເຂົາເຈົ້າຮູ້ສຶກ ລະຫວ່າງການຊຸມນຸມທີ່ສັກສິດ ຊຶ່ງໃນນັ້ນປະທານແນວສັນໄດ້ຖືກສະໜັບສະໜູນ ໃຫ້ເປັນປະທານຂອງສາດສະໜາຈັກ. ທ່ານກໍສາມາດແຕ້ມຮູບຫົວໃຈ ໃສ່ເທິງກະດານນຳອີກ ແລະ ຂໍໃຫ້ສະມາຊິກຂຽນຖ້ອຍຄຳ ຫລື ສຳນວນ ທີ່ບັນຍາຍເຖິງຫົວໃຈ ແລະ ບຸກຄະລິກລັກສະນະຂອງປະທານແນວສັນ ໃສ່ໃນຮູບຫົວໃຈນັ້ນ. ເພິ່ນໄດ້ສິດສອນສິ່ງໃດ ທີ່ເປັນພອນໃຫ້ແກ່ເຮົາ?
Neil L. Andersen, “The Prophet of God,” 24–27
ການສົນທະນາກ່ຽວກັບຂ່າວສານຂອງແອວເດີ ແອນເດີເຊັນ ສາມາດເພີ່ມສັດທາໃຫ້ສະມາຊິກໄດ້ ເລື່ອງສາດສະດາທີ່ມີຊີວິດຢູ່. ທ່ານສາມາດເຊື້ອເຊີນເຂົາເຈົ້າໃຫ້ຄົ້ນຄວ້າຂ່າວສານຂອງເພິ່ນ ເພື່ອຊອກຫາບາງສິ່ງທີ່ຊ່ວຍເຂົາເຈົ້າ ໃຫ້ເຂົ້າໃຈເຫດຜົນທີ່ພຣະເຈົ້າໃຫ້ມີສາດສະດາຢູ່ເທິງແຜ່ນດິນໂລກ ແລະ ເຫດຜົນທີ່ເຮົາຕ້ອງຕິດຕາມພວກເພິ່ນ. ເຮົາໄດ້ຮັບພອນແນວໃດແດ່ ເພາະເຮົາມີສາດສະດາ? ສະມາຊິກສາມາດແບ່ງປັນວິທີທີ່ເຂົາເຈົ້າ ໄດ້ຮັບປະຈັກພະຍານວ່າ ປະທານຣະໂຊ ເອັມ ແນວສັນ ເປັນສາດສະດາຂອງພຣະຜູ້ເປັນເຈົ້າ ແລະ ເປັນປະທານຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.
David A. Bednar, “Meek and Lowly of Heart,” 30–33
ເພື່ອໃຫ້ໄດ້ຮັບການດົນໃຈ ໃນການສົນທະນາກ່ຽວກັບຂ່າວສານຂອງແອວເດີ ແບ໊ດນາ, ທ່ານສາມາດຂຽນໃສ່ເທິງກະດານ ຄຳວ່າ ຄວາມອ່ອນໂຍນ … ແລະ ຄວາມອ່ອນໂຍນບໍ່ແມ່ນ … ແລ້ວສະມາຊິກສາມາດຄົ້ນຄວ້າຂ່າວສານຂອງແອວເດີ ແບ໊ດນາ ແລະ ຂຽນສຳນວນທີ່ເຂົາເຈົ້າຊອກເຫັນ ໃສ່ເທິງກະດານ ໃຫ້ປະໂຫຍກນີ້ຄົບຖ້ວນ. ເຮົາຮຽນຮູ້ຫຍັງແດ່ຈາກຂ່າວສານນີ້ ທີ່ດົນໃຈເຮົາໃຫ້ເປັນຄົນອ່ອນໂຍນຫລາຍກວ່າເກົ່າ? ມີຕົວຢ່າງອັນໃດແດ່ກ່ຽວກັບຄວາມອ່ອນໂຍນ ທີ່ເຮົາສາມາດຄິດເຖິງໄດ້? ເຮົາຈະສາມາດນຳໃຊ້ຄຳແນະນຳຂອງແອວເດີ ແບ໊ດນາ ໃນວິທີໃດ ເພື່ອຈະໄດ້ກາຍເປັນຄົນທີ່ອ່ອນໂຍນຫລາຍກວ່າເກົ່າ?
Bonnie L. Oscarson, “Young Women in the Work,” 36–38
ຄຳຖາມເປັນວິທີໜຶ່ງທີ່ເຊື້ອເຊີນໃຫ້ໄຕ່ຕອງ. ໃຫ້ຂຽນຄຳຖາມສອງສາມຄຳໃສ່ເທິງກະດານ ທີ່ຂ່າວສານຂອງຊິດສະເຕີ ອໍສະກາສັນ ໄດ້ຕອບ, ດັ່ງເຊັ່ນ ເຮົາຈະໃຫ້ກຸ່ມຍິງໜຸ່ມມີສ່ວນຮ່ວມໃນວຽກງານຂອງພຣະຜູ້ເປັນເຈົ້າ ໃນວິທີໃດ? ເຊື້ອເຊີນສະມາຊິກໃຫ້ຄົ້ນຄວ້າຂ່າວສານ ເພື່ອຊອກຫາຄຳຕອບຕໍ່ຄຳຖາມເຫລົ່ານີ້ ແລະ ສົນທະນາສິ່ງທີ່ເຂົາເຈົ້າໄດ້ຮຽນຮູ້. ພອນຢ່າງໃດແດ່ທີ່ມາເຖິງ ເມື່ອກຸ່ມຍິງໜຸ່ມມີສ່ວນຮ່ວມໃນການປະຕິບັດສາດສະໜາກິດ? ບາງທີສະມາຊິກໃນຫ້ອງຮຽນ ສາມາດແບ່ງປັນປະສົບການ ທີ່ເຂົາເຈົ້າໄດ້ມີ ໃນການປະຕິບັດສາດສະໜາກິດ ຮ່ວມກັບກຸ່ມຍິງໜຸ່ມ. ອີງຕາມການສົນທະນາຂອງເຮົາ, ເຮົາໄດ້ຮູ້ສຶກຖືກດົນໃຈໃຫ້ເຮັດສິ່ງໃດ?
Dale G. Renlund, “Family History and Temple Work: Sealing and Healing,” 46–49
ແອວເດີ ເຣັນລັນ ໄດ້ກ່າວເຖິງພາບນິມິດຂອງເອເຊກຽນ ກ່ຽວກັບພຣະວິຫານທີ່ມີນ້ຳໄຫລອອກມາຈາກມັນ (ເບິ່ງ ເອເຊກຽນ 47:8–9). ບາງທີສະມາຊິກຄົນໜຶ່ງໃນກຸ່ມ ຫລື ໃນສະມາຄົມສະຕີສົງເຄາະ ສາມາດແຕ້ມຮູບກ່ຽວກັບພາບນິມິດນີ້ ໃສ່ເທິງກະດານ. ພອນຂອງພຣະວິຫານ ແລະ ການສືບປະຫວັດຄອບຄົວ ເປັນເໝືອນດັ່ງພາບນິມິດຂອງເອເຊກຽນແນວໃດ? ທ່ານສາມາດເຊື້ອເຊີນສະມາຊິກໃນຫ້ອງຮຽນ ໃຫ້ແບ່ງປັນພອນຂອງພຣະວິຫານ ແລະ ວຽກງານການສືບປະຫວັດຄອບຄົວ ທີ່ເຂົາເຈົ້າເຄີຍມີປະສົບການ. ເຮົາສາມາດເຮັດຫຍັງໄດ້ແດ່ ເພື່ອເຮັດໃຫ້ການສືບປະຫວັດຄອບຄົວ ແລະ ວຽກງານພຣະວິຫານ ເປັນພາກສ່ວນໜຶ່ງທີ່ເຮົາເຮັດເປັນປະຈຳ ໃນຊີວິດຂອງເຮົາ?
D. Todd Christofferson, “The Elders Quorum,” 55–58
ໃນກຸ່ມແອວເດີ, ທ່ານສາມາດເຊື້ອເຊີນສະມາຊິກໃນກຸ່ມ ໃຫ້ອ່ານພາກໜຶ່ງໃນຂ່າວສານຂອງແອວເດີ ຄຣິສໂຕເຟີສັນ ກ້ອງຫົວຂໍ້ “ຈຸດປະສົງຂອງການປ່ຽນແປງເຫລົ່ານີ້.” ເຮົາຈະເຮັດສິ່ງໃດແດ່ ເພື່ອໃຫ້ແນ່ໃຈວ່າ ເຮົາບັນລຸຈຸດປະສົງເຫລົ່ານີ້? ໃນສະມາຄົມສະຕີສົງເຄາະ, ທ່ານສາມາດຂໍໃຫ້ກ່າວສະຫລຸບການປ່ຽນແປງໃນກຸ່ມຖານະປະໂລຫິດແຫ່ງເມນຄີເສເດັກ ທີ່ແອວເດີ ຄຣິສໂຕເຟີສັນ ໄດ້ບັນຍາຍ. ແລ້ວບັນດາເອື້ອຍນ້ອງສາມາດຊີ້ບອກເຖິງຫລັກທຳ ທີ່ກ່າວເຖິງການປ່ຽນແປງເຫລົ່ານີ້ ທີ່ສາມາດເອົາໄປນຳໃຊ້ ໃນວຽກງານຂອງສະມາຄົມສະຕີສົງເຄາະໄດ້. ໃນກຸ່ມແອວເດີ ຫລື ສະມາຄົມສະຕີສົງເຄາະ, ສະມາຊິກສາມາດສົນທະນາເຖິງສິ່ງທີ່ເຂົາເຈົ້າໄດ້ຮຽນຮູ້ຈາກເລື່ອງລາວຂອງບຣາເດີ ໂກດສ໌ ແລະ ເຖິງວິທີທີ່ຈະນຳມັນເອົາໄປໃຊ້ໃນວຽກງານຂອງເຂົາເຈົ້າ.
Ronald A. Rasband, “Behold! A Royal Army,” 58–61
ບາງທີ ການຮ້ອງເພງ, ຫລື ຟັງ, ຫລື ອ່ານເນື້ອເພງຊື່ວ່າ, “Behold! A Royal Army” (Hymns, no. 251) ນຳກັນ ອາດດົນໃຈການສົນທະນາກ່ຽວກັບຂ່າວສານຂອງແອວເດີ ແຣັສ໌ແບນ. ກຸ່ມຖານະປະໂລຫິດ ແລະ ສະມາຄົມສະຕີສົງເຄາະ ເປັນເໝືອນດັ່ງກອງທັບຂອງພຣະເຈົ້າແນວໃດ? ສະມາຊິກສາມາດຊອກຫາ ແລະ ສົນທະນາກ່ຽວກັບ “ພອນຫລາຍໆຢ່າງ” ທີ່ແອວເດີ ແຣັສ໌ແບນ ກ່າວເຖິງ ທີ່ຈະມາຈາກການກໍ່ສ້າງກຸ່ມຖານະປະໂລຫິດໃໝ່. ມີພອນຢ່າງໃດແດ່ທີ່ເຮົາໄດ້ຮັບ—ຫລື ເຮົາຫວັງທີ່ຈະໄດ້ຮັບ—ຈາກການປະຕິບັດຕາມການປ່ຽນແປງເຫລົ່ານີ້? ສະມາຄົມສະຕີສົງເຄາະ ສາມາດໄດ້ຮັບພອນທີ່ຫລາຍກວ່ານີ້ໄດ້ແນວໃດ ດັ່ງເຊັ່ນ “ຂອງປະທານທີ່ແຕກຕ່າງກັນ” ແລະ “ການໃຫ້ຄຳແນະນຳ”?
Henry B. Eyring, “Inspired Ministering,” 61–64
ປະທານໄອຣິງ ບອກເຖິງຄຳປາໄສຂອງສອງຄົນ ຢູ່ໃນກອງປະຊຸມສິນລະລຶກ ກ່ຽວກັບການປະຕິບັດສາດສະໜາກິດ ທີ່ເພິ່ນປະທັບໃຈຫລາຍ. ບາງທີທ່ານກໍຄວນຂໍໃຫ້ເຄິ່ງກຸ່ມ ຫລື ເຄິ່ງກຸ່ມຂອງສະມາຄົມສະຕີສົງເຄາະ ທົບທວນຖ້ອຍຄຳຂອງຊາຍໜຸ່ມອາຍຸ 14 ປີ ແລະ ອີກເຄິ່ງກຸ່ມໃຫ້ທົບທວນເລື່ອງລາວກ່ຽວກັບຄູສອນປະຈຳບ້ານ. ໃນຂະນະທີ່ເຂົາເຈົ້າກຳລັງອ່ານ, ສະມາຊິກຄວນຄິດກ່ຽວກັບຄຳແນະນຳ ທີ່ເຂົາເຈົ້າຈະມອບໃຫ້ແກ່ຊາຍໜຸ່ມ ຫລື ຍິງໜຸ່ມ ຜູ້ຫາກໍໄດ້ຮັບການມອບໝາຍ ໃຫ້ປະຕິບັດສາດສະໜາກິດຕໍ່ບາງຄົນ. ເຮົາຈະ “ໄດ້ຮັບການດົນໃຈ ແລະ ເປັນຄົນໃຈບຸນຫລາຍຂຶ້ນ ໃນການ … ປະຕິບັດສາດສະໜາກິດຂອງເຮົາແນວໃດ”?
Dallin H. Oaks, “The Powers of the Priesthood,” 65–68
ໃນການເລີ່ມຕົ້ນການສົນທະນາ, ທ່ານຄວນຂຽນຫົວຂໍ້ຂອງສີ່ພາກ ຂອງຂ່າວສານຂອງປະທານໂອກສ໌ ໃສ່ເທິງກະດານ ແລ້ວເຊື້ອເຊີນ ສະມາຊິກແຕ່ລະຄົນໃຫ້ອ່ານໜຶ່ງພາກ ຢູ່ໃນໃຈ ແລະ ແລ້ວໃຫ້ຂຽນປະໂຫຍກໜຶ່ງ ໃສ່ເທິງກະດານ ທີ່ສະຫລຸບເນື້ອຫາຂອງຂ່າວສານ ຂອງພາກນັ້ນ. ແລ້ວສະມາຊິກສາມາດບອກເຖິງຄວາມຮູ້ສຶກທີ່ເຂົາເຈົ້າໄດ້ຮັບຈາກການດົນໃຈ ວ່າໃຫ້ເຮັດສິ່ງໃດ ຈາກສິ່ງທີ່ເຂົາເຈົ້າໄດ້ອ່ານໄປນັ້ນ. ການຮັບໃຊ້ຂອງເຮົາ ໃນຖານະທີ່ເປັນຜູ້ດຳລົງຖານະປະໂລຫິດ ຫລື ເອື້ອຍນ້ອງສະມາຄົມສະຕີສົງເຄາະ ຈະດີຂຶ້ນໄດ້ແນວໃດ ເມື່ອເຮົານຳໃຊ້ຄຳສອນໃນຂ່າວສານຂອງປະທານໂອກສ໌?
Russell M. Nelson, “Ministering with the Power and Authority of God,” 68–75
ປະທານແນວສັນ ເຊື້ອເຊີນຜູ້ດຳລົງຖານະປະໂລຫິດ ໃຫ້ “ລຸກຂຶ້ນ” ແລະ ໃຊ້ຖານະປະໂລຫິດ ເພື່ອເປັນພອນໃຫ້ແກ່ລູກໆຂອງພຣະບິດາເທິງສະຫວັນ ເຊື້ອເຊີນສະມາຊິກຂອງກຸ່ມ ຫລື ສະມາຄົມສະຕີສົງເຄາະ ໃຫ້ຄົ້ນຄວ້າ ເພື່ອຊອກຫາຕົວຢ່າງທີ່ເພິ່ນໄດ້ມອບໃຫ້ ແລະ ສົນທະນາເຖິງວິທີທີ່ມັນຈະຊ່ວຍເຮົາໃຫ້ເຂົ້າໃຈ ວິທີທີ່ຖານະປະໂລຫິດ ສາມາດຖືກນຳໃຊ້ໃຫ້ເປັນພອນແກ່ຄອບຄົວຂອງເຂົາເຈົ້າ ແລະ ຄົນອື່ນ. ມີປະສົບການໃດແດ່ທີ່ເຮົາສາມາດແບ່ງປັນ ເມື່ອເຮົາໄດ້ຮັບພອນ ໂດຍອຳນາດຂອງຖານະປະໂລຫິດ? ເຮົາຈະຊ່ວຍຄົນອື່ນ ຫລື ຕົວເອງໃຫ້ມີສັດທາ ທີ່ຈະໃຊ້ຖານະປະໂລຫິດຂອງພຣະເຈົ້າ ເພື່ອ “ປະຕິບັດສາດສະໜາກິດ ໃນພຣະນາມຂອງພຣະອົງ” ໄດ້ແນວໃດ?
Reyna I. Aburto, “With One Accord,” 78–80
ຂ່າວສານຂອງຊິດສະເຕີອາເບີໂຕ ໃຫ້ໂອກາດສຳລັບກຸ່ມ ຫລື ສະມາຄົມສະຕີສົງເຄາະຂອງທ່ານ ປະເມີນວ່າການທຳງານໃນການເປັນອັນໜຶ່ງອັນດຽວກັນ ໃນການເຮັດວຽກງານຂອງພຣະຜູ້ເປັນເຈົ້າ ມີປະສິດທິພາບຫລາຍປານໃດ. ເພື່ອຊ່ວຍສະມາຊິກໃຫ້ເຮັດສິ່ງນີ້, ທ່ານສາມາດສະແດງຮູບພາບຂອງແມງກະເບື້ອໃຫຍ່, ພຣະຜູ້ຊ່ວຍໃຫ້ລອດໄປຢ້ຽມຢາມຊາວນີໄຟ (ເບິ່ງ Gospel Art Book, 82, 83, 84), ແລະ ການຊ່ວຍເຫລືອມະນຸດສະທຳຂອງສາດສະໜາຈັກ (ເບິ່ງ LDS.org). ສະມາຊິກສາມາດຄົ້ນຄວ້າຂ່າວສານ ແລະ ຊອກຫາວິທີທີ່ຊິດສະເຕີ ອາເບີໂຕ ໄດ້ໃຊ້ຕົວຢ່າງເຫລົ່ານີ້ ເພື່ອສອນກ່ຽວກັບຈຸດປະສົງ ແລະ ພອນຂອງການທຳງານໃນການເປັນອັນໜຶ່ງອັນດຽວກັນ. ເຮັດແນວໃດ ເຮົາຈຶ່ງຈະສາມາດທຳງານ “ດ້ວຍການຮ່ວມໃຈກັນ”?
Henry B. Eyring, “His Spirit to Be with You,” 86–89
ເພື່ອເພີ່ມຄວາມປາດຖະໜາ ແລະ ຄວາມສາມາດຂອງເຮົາ ທີ່ຈະຮັບເອົາພຣະວິນຍານບໍລິສຸດ, ປະທານໄອຣິງ ແບ່ງປັນປະສົບການສ່ວນຕົວຫລາຍຢ່າງ ແລະ ໃຫ້ຄຳແນະນຳໃດໜຶ່ງໂດຍສະເພາະ. ຫລັງຈາກໄດ້ທົບທວນປະສົບການຂອງເພິ່ນແລ້ວ, ມີຄວາມຊົງຈຳອັນໃດແດ່ ທີ່ຄ້າຍຄືກັນນີ້ ທີ່ສະມາຊິກໃນກຸ່ມ ຫລື ໃນສະມາຄົມສະຕີສົງເຄາະ ສາມາດເອົາມາແບ່ງປັນ ເຖິງຕອນທີ່ພຣະວິນຍານບໍລິສຸດ ໄດ້ສຳພັດໃຈຂອງເຂົາເຈົ້າ ຫລື ໄດ້ຢືນຢັນຄວາມຈິງ? ບາງທີສະມາຊິກ ສາມາດຂຽນການຊີ້ນຳທີ່ປະທານໄອຣິງໄດ້ແບ່ງປັນ ໃສ່ເທິງກະດານ ເພື່ອຊ່ວຍ “ເປີດໃຈ ຮັບເອົາການປະຕິບັດສາດສະໜາກິດຂອງພຣະວິນຍານ.” ການເຮັດຕາມການຊີ້ນຳຂອງເພິ່ນ ຊ່ວຍເຮົາ ໃນຊີວິດຂອງເຮົາເອງ ແລະ ຄອບຄົວຂອງເຮົາໄດ້ແນວໃດ? ໃນຊີວິດຂອງກຸ່ມ ຫລື ສະມາຄົມສະຕີສົງເຄາະຂອງເຮົາໄດ້ແນວໃດ?
Dallin H. Oaks, “Small and Simple Things,” 89–92
ຂ່າວສານຂອງປະທານໂອກສ໌ ບັນຈຸຄຳປຽບທຽບ ທີ່ສອນວ່າ ເລື່ອງເລັກນ້ອຍ ແລະ ງ່າຍໆ ສາມາດມີຜົນກະທົບທີ່ມີພະລັງ ໄປໃນທາງທີ່ດີ ຫລື ທາງທີ່ຊົ່ວໄດ້. ຄຳປຽບທຽບເຫລົ່ານີ້ ແມ່ນຮ່ວມທັງຮາກໄມ້, ທີມພາຍເຮືອ, ເສັ້ນຝ້າຍ, ແລະ ນ້ຳຍ້ອຍ. ສະມາຊິກສາມາດອ່ານຄຳປຽບທຽບເຫລົ່ານີ້ ແລະ ສົນທະນາສິ່ງທີ່ຄຳປຽບທຽບສິດສອນກ່ຽວກັບພະລັງຂອງການເຮັດສິ່ງເລັກນ້ອຍ ແລະ ງ່າຍໆເປັນປະຈຳ. ມີເລື່ອງເລັກນ້ອຍ ແລະ ງ່າຍໆຢ່າງໃດແດ່ ທີ່ນຳອິດທິພົນຂອງພຣະວິນຍານບໍລິສຸດມາສູ່ຊີວິດຂອງເຮົາ? ເຊື້ອເຊີນສະມາຊິກໃຫ້ໄຕ່ຕອງສິ່ງທີ່ເຂົາເຈົ້າໄດ້ຮັບຄວາມປະທັບໃຈ ໃຫ້ເຮັດຕາມຄຳແນະນຳຂອງປະທານໂອກສ໌.
Russell M. Nelson, “Revelation for the Church, Revelation for Our Lives,” 93–96
ໃນຂ່າວສານຂອງເພິ່ນ, ປະທານແນວສັນ ຂໍໃຫ້ເຮົາເພີ່ມ “ຄວາມສາມາດທາງວິນຍານ ທີ່ຈະຮັບເອົາການເປີດເຜີຍ.” ເພື່ອຊ່ວຍສະມາຊິກໃຫ້ເຮັດຕາມການຊີ້ນຳຂອງເພິ່ນ, ທ່ານສາມາດຂຽນຄຳຖາມຄືກັນກັບ ດັ່ງຕໍ່ໄປນີ້ ໃສ່ເທິງກະດານ: ເປັນຫຍັງເຮົາຈຶ່ງຕ້ອງການ ການເປີດເຜີຍ? ເຮົາຈະເພີ່ມຄວາມສາມາດຂອງເຮົາ ເພື່ອຮັບເອົາການເປີດເຜີຍ—ທັງເປັນສ່ວນຕົວ ແລະ ເມື່ອເຮົາປຶກສາຫາລືນຳກັນ ໄດ້ແນວໃດ? ມີພອນຢ່າງໃດແດ່ ທີ່ປະທານແນວສັນ ສັນຍາ ຖ້າເຮົາສະແຫວງຫາການເປີດເຜີຍ? ແຍກສະມາຊິກອອກເປັນຫລາຍກຸ່ມ, ແລະ ເຊື້ອເຊີນແຕ່ລະກຸ່ມໃຫ້ຊອກຫາ ແລະ ແບ່ງປັນຄຳຕອບ ໃຫ້ກັບຄຳຖາມຂໍ້ໜຶ່ງ.
Gerrit W. Gong, “Christ the Lord Is Risen Today,” 97–98
ສະມາຊິກຂອງກຸ່ມ ຫລື ສະມາຄົມສະຕີສົງເຄາະຂອງທ່ານ ຮຽນຮູ້ຫຍັງແດ່ ຈາກຂ່າວສານຂອງແອວເດີ ກອງ ກ່ຽວກັບພັນທະສັນຍາຂອງເຮົາ ແລະ ການຊົດໃຊ້ຂອງພຣະເຢຊູຄຣິດ? ທ່ານສາມາດເຊື້ອເຊີນສະມາຊິກໃຫ້ຄົ້ນຄວ້າຂ່າວສານ, ຊອກຫາພອນທີ່ການຊົດໃຊ້ຂອງພຣະຜູ້ຊ່ວຍໃຫ້ລອດ ແລະ ພັນທະສັນຍາຂອງເຮົາ—ທຳງານດ້ວຍກັນ—ທີ່ມີໃຫ້ສຳລັບເຮົາ. ແລ້ວຖາມຄຳຖາມຄືກັນກັບດັ່ງຕໍ່ໄປນີ້ ກ່ຽວກັບສິ່ງທີ່ເຂົາເຈົ້າພົບເຫັນ: ພັນທະສັນຍາຂອງເຮົາ ແລະ ການຊົດໃຊ້ທຳງານດ້ວຍກັນໃນວິທີໃດ ເພື່ອ “ເຮັດໃຫ້ເປັນໄປໄດ້ ແລະ ຍົກລະດັບ” ເຮົາ? ມັນຊ່ວຍເຮົາໃຫ້ຍຶດໝັ້ນ ແລະ ປ່ອຍໄປແນວໃດ?
Ulisses Soares, “Prophets Speak by the Power of the Holy Spirit,” 98–99
ຂ່າວສານຂອງແອວເດີໂຊອາເຣສ໌ ສາມາດດົນໃຈເຮົາໃຫ້ປະຕິບັດໃນສັດທາ ເມື່ອເຮົາຮູ້ສຶກວ່າບໍ່ພຽບພ້ອມ ໃນການເຮັດຕາມພຣະປະສົງຂອງພຣະຜູ້ເປັນເຈົ້າ. ແອວເດີ ໂຊອາເຣສ໌ ໄດ້ຮັບການປອບໂຍນ ແລະ ຄວາມແນ່ນອນໃຈ ໃນວິທີໃດ ເມື່ອເພິ່ນໄດ້ຮັບການເອີ້ນໃໝ່ຂອງເພິ່ນນີ້ ໃຫ້ເປັນອັກຄະສາວົກ? ເພິ່ນໄດ້ຮຽນຮູ້ຫຍັງແດ່ຈາກປະສົບການຂອງເພິ່ນ ເລື່ອງການຖືກເອີ້ນໃຫ້ເປັນປະທານເຜີຍແຜ່? ເຮົາຮຽນຮູ້ຫຍັງແດ່ຈາກປະສົບການຂອງເພິ່ນ? ໃຫ້ເວລາແກ່ສະມາຊິກ ເພື່ອແບ່ງປັນປະສົບການ ຕອນເຂົາເຈົ້າຮູ້ສຶກບໍ່ແນ່ໃຈ ກ່ຽວກັບບາງສິ່ງທີ່ພຣະຜູ້ເປັນເຈົ້າປະສົງໃຫ້ເຂົາເຈົ້າເຮັດ. ເຂົາເຈົ້າໄດ້ເຮັດສິ່ງໃດ ເພື່ອໃຫ້ມີສັດທາທີ່ຈະດຳເນີນໄປໜ້າ?
Jeffrey R. Holland, “Be With and Strengthen Them,” 101–3
ເມື່ອສະມາຊິກຂອງກຸ່ມ ຫລື ສະມາຄົມສະຕີສົງເຄາະຂອງທ່ານ ໄດ້ຮຽນຮູ້ກ່ຽວກັບການປ່ຽນແປງ ສູ່ “ຄວາມຄິດແຫ່ງການປະຕິບັດສາດສະໜາກິດຂອງຖານະປະໂລຫິດ ແລະ ສະມາຄົມສະຕີສົງເຄາະ,” ເຂົາເຈົ້າມີຄຳຖາມຢ່າງໃດແດ່? ຂ່າວສານຂອງແອວເດີ ຮໍແລນ ອາດມີຄຳຕອບໃນນັ້ນ. ສະມາຊິກສາມາດຊອກຫາຫລັກທຳພຣະກິດຕິຄຸນ ທີ່ແອວເດີ ຮໍແລນ ສິດສອນ ທີ່ເປັນພື້ນຖານຂອງການປ່ຽນແປງເຫລົ່ານີ້. ເຮົາພົບເຫັນການເຊື້ອເຊີນແນວໃດແດ່ ໃນຂ່າວສານຂອງເພິ່ນ? ມີພອນຢ່າງໃດແດ່ທີ່ຖືກສັນຍາໄວ້? ການປະຕິບັດສາດສະໜາກິດແບບໃໝ່ນີ້ ສາມາດຊ່ວຍເຮົາກາຍເປັນ “ສານຸສິດທີ່ແທ້ຈິງຂອງພຣະຄຣິດ” ໄດ້ແນວໃດ?
Jean B. Bingham, “Ministering as the Savior Does,” 104–7
ໃນຂ່າວສານຂອງເພິ່ນ, ຊິດສະເຕີບິງກຳ ເຊື້ອເຊີນເຮົາໃຫ້ຖາມຕົວເອງ ໃນຄຳຖາມທີ່ສາມາດຊີ້ນຳເຮົາ ໃນຄວາມພະຍາຍາມປະຕິບັດສາດສະໜາກິດຂອງເຮົາ. ສະມາຊິກສາມາດສົນທະນາເຖິງວິທີທີ່ຄຳຖາມເຫລົ່ານີ້ ສາມາດຊີ້ນຳຄວາມພະຍາຍາມຂອງເຂົາເຈົ້າ ແລະ ແລ້ວຊອກຫາຄຳຕອບໃຫ້ແກ່ຄຳຖາມຂອງຊິດສະເຕີ ບິງກຳ ທີ່ວ່າ, “[ການປະຕິບັດສາດສະໜາກິດ] ຈະປະກົດຂຶ້ນໃນຮູບແບບໃດ?” ທ່ານສາມາດໃຊ້ເວລາທົບທວນບາງຕົວຢ່າງທີ່ຊິດສະເຕີບິງກຳ ແບ່ງປັນ ເຖິງການປະຕິບັດສາດສະໜາກິດເປັນສ່ວນຕົວ ແລະ ເຊື້ອເຊີນສະມາຊິກໃຫ້ແບ່ງປັນຕົວຢ່າງຂອງເຂົາເຈົ້າເອງ. ເຮົາພົບເຫັນຫຍັງແດ່ ໃນຂ່າວສານຂອງຊິດສະເຕີ ບິງກຳ ທີ່ເພີ່ມຄວາມເຂົ້າໃຈໃຫ້ແກ່ເຮົາ ເຖິງເຫດຜົນ ແລະ ວິທີທີ່ເຮົາປະຕິບັດສາດສະໜາກິດ?
Dieter F. Uchtdorf, “Behold the Man!,” 107–10
ວິທີທີ່ເຮົາຊ່ວຍບາງຄົນໃຫ້ເຂົ້າໃຈວ່າ ການເສຍສະລະຊົດໃຊ້ ແລະ ການຟື້ນຄືນພຣະຊົນຂອງພຣະເຢຊູຄຣິດ ເປັນເຫດການທີ່ສຳຄັນທີ່ສຸດ ໃນປະຫວັດສາດຂອງໂລກ? ເຊື້ອເຊີນສະມາຊິກໃຫ້ໄຕ່ຕອງຄຳຖາມຂໍ້ນີ້ ໃນຂະນະທີ່ເຂົາເຈົ້າອ່ານພາກສ່ວນຕ່າງໆ ໃນຂ່າວສານຂອງແອວເດີ ອຸກດອບ. ເຂົາເຈົ້າໄດ້ພົບເຫັນສິ່ງໃດແດ່ ທີ່ອະທິບາຍວ່າ ເປັນຫຍັງເຫດການເຫລົ່ານີ້ ຈຶ່ງສຳຄັນຫລາຍແທ້ໆຕໍ່ເຂົາເຈົ້າ? ຫລັງຈາກການສົນທະນານີ້, ສະມາຊິກໃນຫ້ອງຮຽນສາມາດເວົ້າລົມກັນ ກ່ຽວກັບຄວາມໝາຍຂອງມັນຕໍ່ເຂົາເຈົ້າ ທີ່ຈະ “ເບິ່ງຊາຍຄົນນີ້.” ເຮົາໄດ້ຮຽນຮູ້ຫຍັງແດ່ ທີ່ຈະ “ເບິ່ງຊາຍຄົນນີ້”?
Quentin L. Cook, “Prepare to Meet God,” 114–17
ທ່ານສາມາດເລີ່ມຕົ້ນການສົນທະນາຂອງທ່ານ ກ່ຽວກັບຂ່າວສານຂອງແອວເດີ ຄຸກ ໂດຍການເຊື້ອເຊີນສະມາຊິກໃຫ້ສະຫລຸບຂໍກະແຈແຫ່ງການຟື້ນຟູ ໃນພຣະວິຫານເຄີດແລນ. ອີງຕາມຂ່າວສານຂອງແອວເດີຄຸກ, ມີໜ້າທີ່ຮັບຜິດຊອບໃດແດ່ ທີ່ສາດສະໜາຈັກມີ ທີ່ກ່ຽວພັນກັບຂໍກະແຈເຫລົ່ານີ້? ໜ້າທີ່ຮັບຜິດຊອບເຫລົ່ານີ້ ເຫັນຢູ່ໃນສາດສະໜາຈັກ ໃນທຸກວັນນີ້ແນວໃດ? ຂຽນຄຳວ່າ ຄວາມຊອບທຳ, ການເປັນອັນໜຶ່ງອັນດຽວກັນ, ແລະ ຄວາມສະເໝີພາບ ໃສ່ເທິງກະດານ, ແລະ ຂໍໃຫ້ສະມາຊິກແບ່ງປັນຄວາມຮູ້ທີ່ເຂົາເຈົ້າໄດ້ຮັບ ກ່ຽວກັບຫລັກທຳແຕ່ລະຢ່າງ ຈາກຂ່າວສານຂອງແອວເດີ ຄຸກ. ຫລັກທຳເຫລົ່ານີ້ຊ່ວຍເຮົາໃຫ້ບັນລຸໜ້າທີ່ຮັບຜິດຊອບທີ່ສັກສິດຂອງສາດສະໜາຈັກ ໄດ້ແນວໃດ?