Lehi Traveling Near the Red Sea [Si Lehi Nagabiyahe Malapit sa Dagat nga Pula], ni Gary Smith

Enero 8–14: “Malakat Ako kag Himuon Ko”

1 Nefi 1–5

Ang Libro ni Mormon nagasugod sa kasaysayan sang isa ka matuod-tuod nga pamilya nga nagaeksperiyensya sang matuod-tuod nga mga kabudlayan. Natabo ini sang 600 BC, pero may mga butang sa sining kasaysayan nga mahimo daw pamilyar sa mga pamilya sa karon. Ang ining pamilya nagapuyo sa isa ka kalibutan sang kalainan, pero ang Ginuo nagpromisa sa ila nga kon sila magasunod sa Iya, dalhon Niya sila sa kahilwayan. Samtang nagapanglakaton may maayo kag malain sila nga mga inagihan; dalagko nga mga bugay kag milagro, pero may ara man sila sang mga pagbinaisay kag pagkinagamo. Talagsa lang sa balaan nga kasulatan nga may amo sini kadetalyado nga pagsaysay parte sa isa ka pamilya nga nagatinguha nga magpangabuhi sang ebanghelyo: mga ginikanan nga nagatinguha sa pagpatubo sang pagtuo sa ila pamilya kag nagakabalaka sa ila kaluwasan, mga kabataan nga nagadesisyon kon bala magpati sa ila mga ginikanan, kag mga utod nga lalaki nga nagapangatubang sang kahisa kag kagamo—kag kon kaisa sang pagpatawad sa isa kag isa. Sa kabilogan, may gahum sa mga ehemplo sang pagtuo sining indi perpekto nga pamilya.

Mga Ideya sa Pagtuon sa Puluy-an kag sa Simbahan

1 Nefi 1–5

Ang pulong sang Dios “dako ang bili” para sa akon.

Isa ka maathag nga mensahe sa Libro ni Mormon amo ang “kadako sang bili” sang pulong sang Dios (1 Nefi 5:21). Samtang inyo ginabasa ang 1 Nefi 1–5, pangitaa ang mga paagi nga direkta ukon indi direkta nga nabugayan sang pulong sang Dios ang pamilya ni Lehi (halimbawa, tan-awa sa 1:11–15; 3:19–20; 5:10–22). Ano ang ginatudlo sining mga kapitulo sa imo parte sa pulong sang Dios? Ano ang imo nabasa nga nagainspirar sa imo nga usisaon ang balaan nga mga kasulatan?

1 Nefi 2

Sarang ako magbaton kag magpabakod sang akon testimonya kon magliso ako sa Ginuo.

Si Nefi nakilala sa iya mabaskog nga pagtuo sa Ginuo, pero kinahanglan niya nga pangabudlayan ang pagbaton sang iya testimonya—pareho man sa aton tanan. Ano ang imo nabasa sa 1 Nefi 2 nga nagapakita kon ngaa nakabaton si Nefi sang saksi nga matuod ang mga pulong sang iya amay? Ngaa wala mabaton nanday Laman kag Lemuel ini nga saksi? (Tan-awa man sa 1 Nefi 15:2–11). Sang san-o mo nabatyagan nga ginpahumok sang Ginuo ang imo tagipusuon?

1 Nefi 3–4

Ang Dios magahanda sang paagi para mahimo ko ang Iya pagbuot.

Sang ginsugo sang Ginuo ang mga anak nga lalaki ni Lehi nga kuhaon ang mga lamina nga saway, wala Sia naghatag sang klaro nga instruksyon kon paano ini himuon. Sa masami amo man ini sa mga direksyon nga mabaton naton halin sa Dios, kag mahimo nga pamatyag naton ang Iya ginapangayo daw “isa ka mabudlay nga butang” (1 Nefi 3:5). Ano ang nagainspirar sa imo sa sabat ni Nefi sa sugo sang Ginuo sa 1 Nefi 3:7, 15–16?

Sa imo pagbasa sang 1 Nefi 3–4, pangitaa ang lainlain nga mga kabudlayan nga nasugata ni Nefi. Paano ang Ginuo “naghanda sang paagi” nga “mahimo ni [Nefi] ang butang nga iya [ginsugo]”? Ngaa importante nga imo mahibal-an kon ano ang ginhimo sang Ginuo para kay Nefi?

Isa ka mabaskog nga paagi nga ginhanda kita sang Dios para magtuman sang Iya mga kasuguan amo ang pagpadala kay Jesucristo nga mangin Manluluwas naton. Pamensara nga basahon ang mensahe ni Pangulong Dallin H. Oaks “Ano ang Nahimo sang Aton Manluluwas para sa Aton?“ (Liahona, Mayo 2021, 75–77). Paano ginhanda ni Jesucristo ang paagi para sa kada isa sa aton? Kay nahibal-an nga ginlampuwasan Niya ang tanan nga butang para sa imo, ano ang nabatyagan mo nga “lakton kag himuon”?

Maggamit sang mga istorya kag mga halimbawa para itudlo ang mga prinsipyo sang ebanghelyo. Sa imo paghanda sa pagtudlo, panumduma ang personal nga mga eksperiyensya nga makadugang sang ikaduha nga saksi sa mga panaysayon sa balaan nga mga kasulatan. Halimbawa, sang san-o ginhanda sang Ginuo ang paagi para mahimo mo ang Iya pagbuot?

Their Joy Was Full [Nalubos ang Ila Kalipay], ni Walter Rane

1 Nefi 4:1–3; 5:1–8

Ang pagdumdom sang mga binuhatan sang Dios makahatag sa akon sang pagtuo agud tumanon ang Iya mga kasuguan.

Kon daw gusto ni Laman kag Lemuel nga magkumod ukon magreklamo, masami ara sila ni Nefi kag Lehi sa malapit para paisugon kag suportahan sila. Kon daw gusto mo magkumod, makabulig ang pagbasa sang mga pulong ni Nefi kag Lehi. Paano gintinguhaan ni Nefi kag Lehi nga buligan ang iban nga magpatubo sang pagtuo sa Dios? (tan-awa sa 1 Nefi 4:1–3; 5:1–8; tan-awa man sa 1 Nefi 7:6–21). Ano ang imo natun-an nga makabulig sa imo kon ginatentar ka nga magkumod ukon magreklamo?

1 Nefi 4:5–18

“Gin-ubayan ako sang Espiritu.”

Sa 1 Nefi 4:5–18, ano ang nanamian mo parte sa ikasarang ni Nefi nga makilala kag sundon ang Espiritu?  

Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.

Mga Ideya para sa Pagtudlo sang mga Kabataan

1 Nefi 2:16

Makabaton ako sang akon kaugalingon nga testimonya.

• Paano nahibal-an ni Nefi nga matuod ang gintudlo sang iya amay? Buligi ang imo kabataan nga pangitaon ang mga sabat sa sining pamangkot sa 1 Nefi 2:16, 19. Basi masadyahan man sila sa pagsulat sang mga aksyon ni Nefi sa mga bloke ukon iban pa nga mga bagay dayon pagpatindog sang isa ka butang gamit ang mga ini. Mahimo nga magresulta ini sa paghambalanay kon paano ining mga aksyon makabulig sa aton nga magpatubo sang testimonya.

• Pwede ka magpakita sa imo mga kabataan sang mga litrato ukon mga bagay nga nagarepresentar sang mga butang nga pwede nila pangayoan sang testimonya, pareho sang kopya sang Libro ni Mormon ukon litrato ni Jesucristo, templo, ukon sang buhi nga propeta. Hagara sila nga magpili sang isa kag ipaambit ang ila mga testimonya parte sina nga butang. Pwede mo man sugiran ang imo kabataan kon paano mo nabaton ang imo testimonya. Ngaa kinahanglan naton sang aton kaugalingon nga testimonya?

1 Nefi 3–4

Buligan ako sang Dios nga tumanon ang Iya mga kasuguan.

• Pamensara ang paggamit sang isa ukon mas madamo pa sining mga balasahon para buligan ang imo mga kabataan nga istoryahan kon paano ginbuligan sang Dios si Nefi nga makuha ang saway nga mga lamina: 1 Nefi 3–4; kag sang pahina para sa kahiwatan sini nga semana.

• Mahimo nga masadyahan ka man kag ang imo mga kabataan sa pagdrama-drama sang 1 Nefi 3:2–7. Basi pwede ka mag-arte nga si Lehi kag pangabayon ang imo kabataan nga magbalik sa Jerusalem para kuhaon ang mga lamina nga saway. Agdaha sila nga magsabat sa ila kaugalingon nga mga tinaga nga kuno abi sila sanday Laman kag Lemuel ukon Nefi. Ano ang pila sa mga butang nga ginasugo sang Dios nga aton himuon? (tan-awa sa mga litrato 103–15 sa Libro sang mga Larawan nga Pang-Ebanghelyo ukon Mosias 18:8–10 para sa mga ideya). Paano kita mangin pareho kay Nefi?

1 Nefi 3:19–21; 5:19–22

Ang balaan nga mga kasulatan dako nga manggad.

• Ang balaan nga mga kasulatan importante kaayo sa pamilya ni Lehi. Para ipakita ini, pwede mo hagaron ang imo kabataan nga buligan ka sa pagsugid ukon pagdrama-drama sang ginhimo ni Nefi kag sang iya mga utod nga lalaki para makuha ang mga lamina nga saway: nagbiyahe sila sa malayo, gintugyan ang ila bulawan kag pilak, kag nagpanago sa kuweba para luwason ang ila mga kabuhi. Dayon pwede ninyo basahon ang 1 Nefi 5:21 kag hambalan kon ngaa malahalon kaayo ang balaan nga mga kasulatan sa pamilya ni Lehi. Ngaa importante ang mga ini sa aton? Paano naton kabigon ang balaan nga mga kasulatan nga daw manggad?

Si Nefi kag ang iya pamilya naghatag sang bili sa balaan nga mga kasulatan.

1 Nefi 4:6

Giyahan ako sang Balaan nga Espiritu samtang ginatinguhaan ko nga sundon ang pagbuot sang Ginuo.

• Pagkatapos nga rebyuhon sing ululupod sa 1 Nefi 3 kon paano gintinguhaan ni Nefi kag sang iya mga utod nga lalaki nga makuha ang mga lamina nga saway, basaha upod sa imo kabataan ang 1 Nefi 4:6 para mahibal-an kon ano ang ginhimo ni Nefi para magmadinalag-on gid sa ulihi. Dayon pwede maghimo ang imo kabataan sang lista sang mga butang nga gusto ipahimo sa ila sang Dios. Sa ano makabulig sa aton ang Balaan nga Espiritu sa sining mga sitwasyon?

Para sa dugang nga mga ideya, tan-awa sa isyu sang Abyan nga magasin sini nga bulan.

I Did Obey the Voice of the Spirit [Gintuman Ko ang Tingug sang Espiritu], ni Walter Rane