Enero 22–28: ‘Naarmasan sang Pagkamatarong kag sang Gahum sang Dios.’ 1 Nefi 11–15,” Dali, Magsunod sa Akon—Para sa Puluy-an kag Simbahan: Libro ni Mormon 2024 (2024)
“Enero 22–28. 1 Nefi 11–15,” Dali, Magsunod sa Akon—Para sa Puluy-an kag Simbahan: 2024 (2024)
The Love of God [Ang Gugma sang Dios], ni Sabrina Squires
Enero 22–28: “Naarmasan sang Pagkamatarong kag sang Gahum sang Dios”
1 Nefi 11–15
Kon ang Dios may dako nga buluhaton nga ipaobra sa Iya propeta, masami Sia nga nagahatag sang dako nga palanan-awon sa sinang propeta. Sanday Moises, Juan, Lehi, kag Joseph Smith tanan may amo sina nga mga palanan-awon—mga palanan-awon nga nagpasangkad sang ila mga kaisipan kag nagbulig sa ila nga makita kon daw ano kadako kag katahum matuod sang buluhaton sang Dios.
Si Nefi may isa man sining makapabag-o-sang-kabuhi nga mga palanan-awon. Nakita ni Nefi ang pagpangalagad sang Manluluwas, ang palaabuton sang kaliwatan ni Lehi sa ginsaad nga duta, kag ang kapalaran sang bulutahon sang Dios sa ulihing mga adlaw. Pagkatapos sining palanan-awon, nangin mas handa si Nefi sa trabaho nga nagahulat sa iya. Kag ang pagbasa parte sining palanan-awon makabulig man handa sa imo—kay ang Dios may buluhaton man nga ipabuhat sa imo sa Iya ginharian. Isa ka sa “mga santos sang simbahan sang Cordero” nga nakita ni Nefi, “nga nag-alaplaag sa bug-os nga kadaygan sang duta; kag ang ila armas amo ang pagkamatarong kag kaupod ang gahum sang Dios sa dako nga himaya” (1 Nefi 14:14
Mga Ideya sa Pagtuon sa Puluy-an kag sa Simbahan
Ginpadala sang Dios si Jesucristo bilang pagpahayag sang Iya pagpalangga.
Sang ginpamangkot ni Nefi ang anghel parte sa kahulugan sang kahoy sa palanan-awon ni Lehi, pwede man lang kuntani magsiling ang anghel, “Ginarepresentar sini ang gugma sang Dios.” Sa baylo, ginpakita niya kay Nefi ang serye sang mga simbolo kag mga hitabo sa kabuhi sang Manluluwas. Pangitaa ining mga simbolo kag mga hitabo samtang imo ginabasa kag ginabinagbinag ang 1 Nefi 11. Ano ang makita mo nga nagabulig sa imo intiendi kon ngaa si Jesucristo amo ang pinakamataas nga pagpahayag sang pagpalangga sang Dios?
Paano ka ginbuligan sang Manluluwas nga mabatyagan ang pagpalangga sang imo Amay nga Langitnon?
Tan-awa man sa Susan H. Porter, “Gugma sang Dios: Ang Labing Makalilipay sa Kalag,” Liahona, Nob. 2021, 33–35.
Sarang ako “maarmasan sang pagkamatarong” kag gahum.
Indi na masaksihan ni Nefi ang kalabanan sang iya nakita sa iya palanan-awon. Ngaa sa banta mo nga malahalon para kay Nefi nga mahibal-an ining mga butang? Ngaa malahalon sa imo nga mahibal-an ang mga ini? Ipamangkot ini tagsa ka tion nga magbasa ka parte sa nakita ni Nefi sa iya palanan-awon (tan-awa sa 1 Nefi 12–14). Ano nga mga pagpabatyag ang imo nabaton parte sa imo papel sa “dako kag … makatilingala nga buluhaton” sang Ginuo? 1 Nefi 14:7 Ano ang pila sa dalagko kag makahalangyag nga mga butang nga Iya ginhimo para sa imo?
Pamensara ilabi na gid ang promisa sa 1 Nefi 14:14. Paano gintuman sang Manluluwas ini nga promisa sa imo kabuhi? (Para sa mga halimbawa, tan-awa sa David A. Bednar, “Kaupod ang Gahum sang Dios sa Dako nga Himaya,” Liahona, Nob. 2021, 28–30, ilabi na gid sa katapusan nga duha ka seksyon.)
Ano ang “dako kag makangilil-ad nga simbahan” nga nakita ni Nefi?
Si Pangulong Dallin H. Oaks nagpaathag nga ang “dako kag makangilil-ad nga simbahan” nga ginlaragway ni Nefi nagarepresentar sang “bisan ano nga pilosopiya ukon organisasyon nga nagakontra sang pagtuo sa Dios. Kag ang ‘pagkabihag’ nga ginahandum sining ‘simbahan’ nga tugahon sa mga santos indi pisikal nga pagkapriso kundi pagkabihag sa sala nga mga ideya” (“Stand as Witnesses of God,” Ensign, Mar. 2015, 32). Paano ka ginabuligan sang Manluluwas nga makalikaw—kag makapalagyo sa—pagkabihag sa sala nga mga ideya?
Sabton ako sang Dios kon magpangayo ako nga may pagtuo.
Nakabatyag ka na bala nga daw wala ka nagabaton sang personal nga rebelasyon—nga ang Dios wala nagapakighambal sa imo? Ano ang laygay ni Nefi sa iya mga utod sang nagabatyag sila sang amo sini? (Tan-awa sa 1 Nefi 15:1–11.) Paano mo idapat ang laygay ni Nefi sa imo kabuhi?
Ang pagkapyot sing hugot sa pulong sang Dios nagabulig sa akon nga mapakigbatuan ang impluwensya ni Satanas.
Si Nefi masami may importante nga inughambal sa iya mga utod nga lalaki. Pero daw mas mapagsik sia sa iya ginhambal sa ila sa 1 Nefi 15:23–25. Ano ang mensahe ni Nefi, kag ngaa sa banta ninyo nga kakusog gid sang iya nabatyagan parte sini?
Si Elder David A. Bednar nagtudlo nga “ang pulong sang Dios” mahimo nga nagatumod sa balaan nga mga kasulatan, sa mga pulong sang buhi nga mga propeta, kag kay Jesucristo Mismo. Ano sa banta mo ang buot silingon sang “maghawid sing hugot” sa balaan nga mga kasulatan kag sa mga pulong sang buhi nga mga propeta? Ano ayhan ang kahulugan sang “maghawid sing hugot” kay Jesucristo? Pwede ka magpangita sang posible nga mga sabat sa sining mga pamangkot sa mensahe ni Elder Bednar “Apang Wala Namon Sila Pagsapaka” (Liahona, Mayo 2022, 14–16).
Paano ang pagkapyot sing hugot sa pulong sang Dios nagabulig sa imo nga mapakigbatuan ang kaaway? Ang pagsulat sa isa ka tsart nga pareho sini makabulig sa imo nga plastaron ang imo panghunahuna:
|
… nagabulig sa akon nga malampuwasan ang kadulom sang tentasyon? (tan-awa sa 1 Nefi 12:17) |
… nagabulig sa akon nga “indi pagsapakon” ang luho kag bugal sang kalibutan? (1 Nefi 12:18) | |
|
Paano ang paghawid sing hugot sa balaan nga mga kasulatan kag sa mga pulong sang buhi nga mga propeta … | ||
|
Paano ang paghawid sing hugot sa Manluluwas … |
Tan-awa man sa Jorge F. Zeballos, “Pagtukod sang Kabuhi nga Makabato sa Kaaway,” Liahona, Nob. 2022, 50–52.
Ang balaan nga mga kasulatan daw pareho sang barandilya nga salsalon nga nagagiya sa aton padulong sa kahoy sang kabuhi.
Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.
Mga Ideya para sa Pagtudlo sang mga Kabataan
Ginpadala sang Amay nga Langitnon si Jesucristo tungod palangga Niya ako.
-
Para tudloan si Nefi parte sa gugma sang Dios, ginpakita sang anghel kay Nefi ang mga hitabo sa kabuhi sang Manluluwas. Pwede mo man ini himuon sa imo mga kabataan—hatagi sila sang mga litrato sang mga hitabo nga nakita ni Nefi sa 1 Nefi 11:20, 24, 27, 31, kag 33 (tan-awa sa Libro sang mga Larawan nga Pang-Ebanghelyo, mga num. 30, 35, 39, 42, 57). Samtang inyo ginabasa ining mga bersikulo, buligi ang imo kabataan nga makita ang litrato nga bagay sa sini. Ano ang aton matun-an parte kay Jesucristo sa sining mga bersikulo kag mga litrato?
-
Ano pa gid ang aton matun-an parte sa gugma sang Dios sa 1 Nefi 11:22–23?
Maggamit sang art para buligan ang mga kabataan nga magtuon. Kon magtudlo ka sang kabataan sang sugilanon sa balaan nga kasulatan, buligi sila nga mapanan-aw ini. Pwede ka maggamit sang mga litrato, mga video, mga puppet, bayo, kag madamo pa.
Ang Libro ni Mormon nagatudlo sang bilidhon nga mga kamatuoran.
-
Para buligan ang imo kabataan nga hatagan sang bili ang “maathag kag malahalon” nga mga kamatuoran sa Libro ni Mormon, pwede ka magdrowing sang litrato kag agdahon ang imo kabataan nga islan ukon kakason ang mga parte sang litrato para maglain ini lantawon. Pwede mo ini gamiton sa pagtudlo nga ang mga butang sa Biblia gin-islan kag ginkakas sa kadugayon sang panahon. Basaha sing ululupod ang 1 Nefi 13:40 kag hambali kon paano kita ginabuligan sang Libro ni Mormon (“ining katapusan nga mga kasulatan”) nga maintiendihan ang “maathag kag malahalon nga mga butang” nga nadula sa Biblia (ang “nauna” nga mga kasulatan). Ano nga “maathag kag malahalon” nga mga kamatuoran nga imo natun-an sa Libro ni Mormon?
Ang Libro ni Mormon nagapanumbalik sang mga kamatuoran sang ebanghelyo nga nadula sang panahon sang Apostasya.
Ang pagkapyot sing hugot sa pulong sang Dios nagabulig sa akon nga mapakigbatuan ang tentasyon.
-
Hatagi ang imo kabataan sang tsansa nga iistorya ang ila madumduman parte sa palanan-awon ni Lehi. Mahimo nga makabulig ang paggamit sang litrato pareho sang gingamit sa outline sang nagligad nga semana. Ano ang nagpugong sa mga tawo nga makalab-ot sa kahoy? Ano ang nagbulig sa ila nga malab-ot ini? Pwede mo sila pangabayon nga pangitaon ang barandilya nga salsalon sa litrato. Basaha sing ululupod ang 1 Nefi 15:23–24 para mahibal-an kon ano ang ginarepresentar sang barandilya nga salsalon kag paano ini makabulig sa aton.
Para sa dugang nga mga ideya, tan-awa sa isyu sang Abyan nga magasin sini nga bulan.
Nephi’s Vision of Mary [Palanan-awon ni Nefi kay Maria], ni James Johnson