Enero 29–Pebrero 4: “Ihanda Ko ang Alagyan sa Inyo Unahan”

1 Nefi 16–22

Samtang nagabiyahe ang panimalay ni Lehi padulong sa duta nga ginpangako, ang Ginuo naghimo sining pangako sa ila: “Ihanda ko ang alagyan sa inyo unahan, kon lamang tumanon ninyo ang akon mga kasuguan” (1 Nefi 17:13 Maathag, ang ina nga pangako wala nagakahulugan nga mangin mahapos ang biyahe—ang mga miyembro sang pamilya nagbinaisay sa gihapon, nagkalabali ang mga pana, nabudlayan ang mga tawo kag nagkalamatay, kag kinahanglan pa nila nga magpasad sang barko halin sa wala pa maproseso nga materyales. Pero, sang magpangatubang ang pamilya sang kabudlayan ukon daw imposible nga mga buluhaton, ginkilala ni Nefi nga ang Ginuo wala gid nagapalayo. Nakahibalo sia nga ang Dios “nagabatiti [sang matinuohon], kag ginapabakod sila, kag ginahatagan sing mga paagi nga sa sini mahimo nila ang butang nga iya ginasugo sa ila” (1 Nefi 17:3). Kon nagakatingala ka kon ngaa nagakatabo ang malain nga mga butang sa maayo nga mga tawo pareho kanday Nefi kag sa iya pamilya, mahimo nga may makita ka nga sabat sa sining mga kapitulo. Pero basi mas importante, makita mo kon ano ang ginahimo sang maayo nga mga tawo kon matabo ang malain nga mga butang.

Mga Ideya sa Pagtuon sa Puluy-an kag sa Simbahan

1 Nefi 16–18

Ang Manluluwas magabulig sa akon nga atubangon ang mga hangkat sang kabuhi.

Ang pamilya ni Nefi nagpangatubang sang mabudlay nga mga hangkat—pareho man sa aton tanan. Ano ang imo matun-an kay Nefi parte sa pag-atubang sang kabudlayan nga may pagtuo kay Jesucristo? Basaha ang parte sa iya mga eksperiyensya sa 1 Nefi 16:17–32; 16:34–39; 17:7–16; 18:1–4; kag 18:9–22. Pamensara nga isulat ang imo makita sa idalom sang mga tig-ulo pareho sini: “Hangkat,” “Paano Nag-akto si Nefi,” kag “Paano Nagbulig ang Ginuo.” Ano ang imo matun-an nga magamit mo sa mga hangkat nga imo ginaatubang?

Pagkatapos nga magtuon parte kay Nefi kag sa iya pamilya, pwede mo nga isulat ang dugang nga mga panghunahuna sa idalom sining mga tig-ulo: “Ang Akon mga Hangkat,” “Paano Ako Mag-akto,” kag “Paano Ako Mabuligan sang Ginuo.” Samtang ginahimo mo ini, pwede mo basahon ang balaan nga mga kasulatan pareho sang mga ini: Mateo 11:28–30; Juan 14:26–27; Mosias 24:13–15.

1 Nefi 16:10–16, 23–31; 18:11–22

Ang Dios nagagiya sa akon paagi sa magagmay kag simple nga mga butang.

Sang gindala sang Dios ang pamilya ni Lehi sa kamingawan (wilderness), wala Niya sila ginhatagan sang mapa nga nagapakita sang tagsa ka detalye sang biyahe. Kundi, ginhatagan Niya sila sang Liahona para giyahan sila adlaw-adlaw. Samtang imo ginabasa ang 1 Nefi 16:10–16, 23–31, kag 18:10–22, pamensara ang paglista sang mga kamatuoran nga nagapakita kon paano ginagiyahan sang Dios ang Iya mga anak (halimbawa, ang 1 Nefi 16:10 makatudlo nga ang Dios kon kaisa nagagiya sa aton sa mga paagi nga wala ginapaabot). Ano ang mga pagpalareho nga imo makita sa Liahona kag sa Balaan nga Espiritu? Ano ang “yano nga mga butang” nga Iya gingamit para matabo ang “dalagko nga mga butang” sa imo kabuhi?

Tan-awa man sa Alma 37:7, 38–47; Doktrina kag mga Kasugtanan 64:33–34.

If Ye Are Prepared Ye Shall Not Fear [Kon Handa Kamo Indi Kamo Mahadlok], ni Clark Kelley Price

1 Nefi 17:1–6, 17–22

Ang akon mga pagtilaw pwede nga mangin bugay.

Bisan pa nga si Nefi kag ang iya mga utod nga lalaki may pareho nga mga hangkat sa kamingawan, ang ila mga eksperiyensya lainlain katama. Pwede mo ikumparar ang pagsaysay ni Nefi sang pagbiyahe sa kamingawan (tan-awa sa 1 Nefi 17:1–6) sa pagsaysay sang iya mga kauturan (tan-awa sa 1 Nefi 17:17–22). Ano ang nahibal-an ukon ginhimo ni Nefi nga nakabulig sa iya nga mag-angkon sang matinuohon nga panan-aw? Pamensara ang pagsulat parte sa bag-o ukon nagapadayon mo nga pagtilaw halin sa panan-awan nga may pagtuo kag pagpasalamat. Ano ang imo nabatyagan ukon natun-an sa sini?

Malinong nga oras sang pagpamalandong. Ang paghatag sang oras sa pagpamensar, pagpamalandong, ukon pagsulat nagaresulta sa inspirasyon. Makabulig ini sa aton nga makita kon paano ang doktrina ukon mga prinsipyo sang ebanghelyo nagaangot sa aton mga kabuhi. Kon magtudlo ka sa iban, hatagi sila sang oras nga magpanghunahuna kag masulat ang ila mga nabatyagan. Ginadugangan man sini ang ila kahanda sa pagpaambit sang ila mga panghunahuna kag mga balatyagon sa iban.

1 Nefi 19:22–24; 20–22

Mahimo ko “[ibagay] ang tanan nga balaan nga mga kasulatan” sa akon kaugalingon.

Tungod madugay na kaayo nga ginsulat ang balaan nga mga kasulatan, daw pamatyag mo indi na sila magamit sa aton sa karon nga panahon. Pero mas nakahibalo si Nefi. “Gindapat ko ang tanan nga balaan nga mga kasulatan sa aton,” siling niya, “agud nga mangin para ini sa aton kapuslanan kag tinun-an” (1 Nefi 19:23). Amo ini ang isa ka rason nga nakakita si Nefi sang dako kaayo nga espirituhanon nga gahum sa balaan nga mga kasulatan.

Pamensara ang mga pamangkot pareho sang masunod samtang imo ginabasa ang 1 Nefi 20–22:

1 Nefi 20:1–9Ano ang ginatudlo sining mga bersikulo parte sa mga tawo sang panahon ni Isaias? Ano ang nakita mo nga magamit sa imo?

1 Nefi 20:17–22Ano ang ginatudlo sining mga bersikulo parte sa kon paano gingiyahan sang Amay nga Langitnon ang mga tawo sang panahon ni Isaias? Paano ka Niya ginahagad nga magsunod sa Iya?

Ano pa gid ang imo makita sa 1 Nefi 20–22 nga pwede mo “idapat” sa imo kaugalingon ?

Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.

Mga Ideya para sa Pagtudlo sang mga Kabataan

1 Nefi 16:10, 28–29; 18:8–13, 20–22

Kon ginatuman ko ang mga kasuguan, ginagiyahan ako sang Ginuo.

• Kon may ara ka sang kompas, mapa, ukon iban nga butang nga nagabulig sa aton nga makita ang aton alagyan, pwede mo ini ipakita sa imo kabataan. Mangin maayo ini nga paagi sa pagsugod sang diskusyon parte sa Liahona, nga imo mabasa sa 1 Nefi 16:10, 28–29. Ano ang pila ka mga rason nga ang kompas ukon mapa indi magamit? Ngaa nga wala nagaandar ang Liahona kon kis-a para sa pamilya ni Lehi? (tan-awa sa 1 Nefi 18:9–12, 20–22). Ano ang ginhatag sa aton sang Amay nga Langitnon sa karon para giyahan kita pabalik sa Iya?

• Para buligan ang imo kabataan nga ipangabuhi ang ila natun-an parte sa Liahona sa 1 Nefi 16:10, 26–31; 18:8–22, pwede mo sila hagaron nga hunahunaon ang isa ka importante ukon mabudlay nga desisyon. Ano ang ginhatag sang Dios sa aton karon para giyahan kita nga daw pareho man sang Liahona? Tan-awa halimbawa, sa Alma 37:38–44.) Pamensara ang pagpaambit sang isa ka personal nga eksperiyensya kon diin gingiyahan ka sang Amay nga Langitnon.

1 Nefi 16:21–32

Sarang ako mangin maayo nga ehemplo sa akon pamilya.

• Samtang inyo ginabasa ang 1 Nefi 16:21–32 sing ululupod, buligi ang imo kabataan nga madiskubrehan kon paano ginbugayan ni Nefi ang iya pamilya. Mahimo nga magresulta ini sa paghambalanay kon paano kita mangin pareho kay Nefi. Agdaha ang imo kabataan nga magplano sang isa ka butang nga pwede nila himuon para mangin maayo nga impluwensya sa iban nga mga miyembro sang pamilya.

1 Nefi 17:7–19; 18:1–4

Buligan ako sang Amay nga Langitnon nga mahimo ang mabudlay nga mga butang.

• Nanamian ang mga kabataan nga mag-istorya sang mga sugilanon. Pwede mo sila imbitaron nga buligan ka sa pag-istorya sang sugilanon ni Nefi nga ginsugo nga mag-obra sang barko (tan-awa sa 1 Nefi 17:7–19; 18:1–4. Ano ang nakabulig kay Nefi nga mangin maisog sang ginyaguta sia sang iya mga kauturan tungod sang pagpatukod sang barko?

• Indi makahibalo si Nefi kon paano magpatindog sang barko, gani nagsalig sia sa instruksyon halin sa Ginuo. Pagkatapos ninyo nga basahon ang 1 Nefi 18:1 sing ululupod, pwede nga tapuson sang imo kabataan ang pahina para sa kahiwatan sa sini nga semana. Samtang ginahimo nila ini, istoryaha sila kon paano makabulig sa aton ang Amay nga Langitnon sa paghimo sang mabudlay nga mga butang, pareho sang pagbulig Niya kay Nefi.

Para sa dugang nga mga ideya, tan-awa sa isyu sang Abyan nga magasin sini nga bulan.

They Did Treat Me with Much Harshness [Ginpaagyan Nila Ako Sang Tuman nga Kapintas], ni Walter Rane