Si Jesus nga nagapangamuyo sa Getsemani

Not My Will, but Thine, Be Done [Indi Akon Pagbuot, Kundi ang Imo, Pagatumanon], ni Harry Anderson

Pebrero 19–25: “O Daw Ano Kadako ang Plano sang Aton Dios”

2 Nefi 6–10

May 40 ka tuig na halin sang magbiya ang pamilya ni Lehi sa Jerusalem. Ara sila sa indi kilala kag bag-o nga lugar, tunga sang kalibutan ang kalayuon sa Jerusalem. Napatay na si Lehi, kag ang iya pamilya nagsugod na sang mangin mga-siglo-nga-kalawigon sang pag-ilinaway sa tunga sang mga Nefinhon—“nga nagapati sa mga paandam kag mga [rebelasyon] sang Dios”—kag sang mga Lamanhon, nga wala nagapati (2 Nefi 5:6). Si Jacob, nga manghod ni Nefi kag karon gin-ordinan nga titser sa mga Nefinhon, gusto nga magpahibalo sa katawhan sang kasugtanan nga ang Dios indi gid magkalipat sa ila, gani indi sila dapat malipat sa Iya. Amo ini ang mensahe nga matuod gid nga kinahanglan naton sa karon nga panahon (tan-awa sa Doktrina kag mga Kasugtanan1:15–16). “Dumdumon naton sia … kay wala kita ginsikway. … Dalagko ang mga panaad sang Ginuo,” siling ni Jacob (2 Nefi 10:20–21). Kaupod sining mga pangako, wala na sang mas madako pa sangsa pangako sang isa ka “wala’y dulunan nga pagpasag-uli” agud malampuwasan ang kamatayon kag impiyerno (2 Nefi 9:7 “Gani,” naghingapos si Jacob sa mga pulong, “magkasadya ang inyo mga tagipusuon”! (2 Nefi 10:23).

Mga Ideya sa Pagtuon sa Puluy-an kag sa Simbahan

2 Nefi 6–8

Ang Ginuo maluluy-on sa Iya katawhan kag magatuman sang Iya mga kasugtanan.

Agud buligan ang iya katawhan nga maintiendihan nga kabahin sila sang panimalay sang Israel kag makasalig sa Dios kag sa Iya mga pangako, si Jacob nagsambit sang mga propesiya ni Isaias, nga narekord sa 2 Nefi 6–8. Ina nga mensahe para man sa imo, tungod ang mga Santos sa Ulihing mga Adlaw kabahin man sang katawhan sang Dios sa kasugtanan. Samtang imo ginabasa ang ining mga kapitulo, hunahunaa ang mga pamangkot pareho sa masunod:

• Ano ang akon matun-an parte sa nagatubos nga pagpalangga sang Manluluwas sa akon? Ano nga mga tinaga ukon mga dinalan ang nagapahayag sing maayo sini nga pagpalangga?

• Ano ang ginatanyag sang Manluluwas sa mga tawo nga nagapangita sa Iya?

• Ano ang himuon ko agud mas matutom nga “maghulat” sa Manluluwas kag sa Iya ginpangako nga mga bugay?

seminary icon

2 Nefi 9:1–26

Ginaluwas ako ni Jesucristo gikan sa sala kag kamatayon.

Isa ka paagi nga padalumon ang imo pagpasalamat kay Jesucristo amo ang pagpanumdom kon ano ayhan ang natabo sa aton kon wala Sia. Samtang imo ginabasa ang 2 Nefi 9:1–26, pamensara ang paglista ukon pagmarka sa isa ka kolor sang matabo sa aton kon wala ang Pagbayad-Sala ni Jesucristo. Dayon, sa lain nga listahan ukon kolor, pwede mo ibutang kon ano ang sarang naton batunon paagi sa Pagbayad-sala sang Manluluwas. Base sa imo nabasa, paano mo ipaathag kon ngaa kinahanglan naton ang Pagbayad-Sala ni Jesucristo? Ano ang imo makita nga nagainspirar sa imo nga dayawon ang “kaalam sang Dios, ang iya kaluoy kag grasya”? 2 Nefi 9:8

Dugang sa pagtudlo kon sa ano pa kita ginluwas ni Jesucristo, naghatag man si Jacob sang mga ideya kon paano Niya ini ginhimo. Pamensara nga isulat ang imo makita sa 2 Nefi 9:11–15, 20–24.

Natahuman gid si Jacob sang plano sang pagtubos sang Dios nga nakasinggit sia nga, “O daw ano kadako sang plano sang aton Dios.” Pangitaa ang iya mga ginpangsinggit sa 2 Nefi 9 (kalabanan sini sa ila makita sa mga bersikulo 8–20). Ano ang imo matun-an sa sining mga bersikulo parte sa plano sang Dios? Ano nga mga eksperiyensya ang nakabulig sa imo nga mabatyagan ang pila sa mga nabatyagan ni Jacob? Bilang bahin sang imo pagsimba kag pagtuon, pamensara ang pagpangita sang himno nga mahimo magpahayag sang imo nabatyagan parte sa Iya.

2 Nefi 9:7

Ang Pagbayad-Sala sang Manluluwas wala sang dulonan.

Ano ang pwede mo himuon para mas maintiendihan ang kasangkaron sang “wala’y dulonan nga pagpasag-uli” ni Jesucristo? 2 Nefi 9:7 Basi pwede ka magpangita sang mga butang nga daw wala sing dulonan ang kadamuon—mga dahon sang hilamon sa wayang, mga balas sa baybay, ukon mga bituon sa langit. Paano nangin wala dulunan ang Pagbayad-Sala sang Manluluwas? Paano man ini nangin personal? Ano nga mga dinalan sa 2 Nefi 9 ang nagabulig sa imo nga makabatyag sang kapasalamatan sa ginhimo sang Manluluwas para sa imo?

2 Nefi 9:27–54

Pwede ako magpalapit kay Cristo kag sundon ang plano sang Dios.

Sa 2 Nefi 9, gingamit ni Jacob ang duha ka mabaskog kag nagakontrahanay nga mga dinalan: “maluluy-on nga plano sang dako nga Tagtuga” kag “inang malalangon nga plano sang isa nga malain” (2 Nefi 9:6, 28). Basi pwede ka magdrowing sang banas kag ngalanan ini nga Plano sang Amay nga Langitnon. Dayon usisaon ang 2 Nefi 9:27–52. Pangitaa ang mga paandam kag mga imbitasyon nga ginhatag ni Jacob para buligan kita nga sundon ining plano. Isulat ang imo makita sa tupad sang banas. Paano ginahimulatan ni Satanas nga patalangon kita palayo sa plano sang Dios? Ano ang ginainspirar sa imo nga himuon bilang aksyon sa mga paandam kag mga imbitasyon ni Jacob?

2 Nefi 10:20, 23–25

Ang sakripisyo ni Jesucristo mahimo nga magdala sa akon sang kasadya.

Ang mensahe ni Jacob masinadyahon. “Ginahambal ko sa inyo ining mga butang,” siling niya, “agud nga kamo magkasadya, kag ibayaw ang inyo mga ulo sa wala’y katubtuban” (2 Nefi 9:3). Samtang imo ginabasa ang 2 Nefi 10:20, 23–25, ano ang nakita mo nga nagapasadya sa imo tagipusuon? Ano ang imo himuon agud madumduman ining mga butang kon ginapangluyahan ka?

Tan-awa man sa Juan 16:33; D. Todd Christofferson, “Ang Kalipay sang mga Santos,” Liahona, Nob. 2019, 15–18.

Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.

Mga Ideya para sa Pagtudlo sang mga Kabataan

2 Nefi 9:6–10, 19–24

Si Jesucristo amo ang akon Manluluwas.

• Paano mo buligan ang imo kabataan nga maintiendihan kag mabatyagan nga kinahanglan nila ang Manluluwas nga si Jesucristo? Makabulig ang pahina para sa kahiwatan sini nga semana. Nagagamit ini sang simple nga paanggid sang buho kag sang hagdanan. Pamensara nga gamiton ang 2 Nefi 9:21–22 para hambalan upod sa imo kabataan kon ngaa nagapasalamat ka para kay Jesucristo.

• Isa ka paagi para buligan ang imo kabataan nga maintiendihan kon ngaa kinahanglan naton sang Manluluwas amo ang tudloan sila parte sa Pagkahulog. Pwede mo ipakita ang litrato ni Adan kag Eva, pareho sang Leaving the Garden of Eden [Ang Pagbiya sa Hardin sang Eden] (Librarya sang Ebanghelyo), kag sang litrato ni Jesucristo sa krus. Pamensara nga pamangkuton sila nga ilaragway kon ano ang nagakatabo sa tagsa ka litrato. Sa ano kita nangin pareho kay Adan kag Eva? Basi makabulig sa ila ang 2 Nefi 9:6–10 nga makita kon ano ang ginahimo ni Jesucristo para sa aton. Pamensara nga hagaron ang mga kabataan nga iistorya ang ila mga nabatyagan parte kay Jesucristo.  

Itudlo ang kamatuoran gamit ang mga istorya kag mga halimbawa. Siguroha nga ang mga istorya kag mga halimbawa nga imo ginagamit nagatudlo sang kamatuoran. Halimbawa, nga ginagamit ang pahina para sa kahiwatan sini nga semana, itudlo nga si Jesucristo nagkadto sa “buho” para buligan kita sa tagsa ka tikang nga nagasaka kita pagwa.

2 Nefi 9:20, 28–29, 42–43, 49

“Ang akon tagipusuon nagakalipay sa pagkamatarong.”

• Para papagsikon ang imo kabataan nga “[magkalipay] sa pagkamatarong” ukon malipayon nga magtuman sa Ginuo (2 Nefi 9:49), basi pwede ka maghatag sang mga halimbawa nga ang bata naghimo sang maayo nga pagpili ukon sang malain nga pagpili. Agdaha ang mga kabataan nga magtindog kon ang pagpili nagadala sang kalipay kag magpungko kon ang pagpili nagadala sang kasubo. Sang san-o kita nakabatyag sang kalipay tungod ginpili naton nga sundon si Jesucristo?

• Ang imo kabataan labanlaban nga makigsimpon sa mga tawo (kon wala pa nila ini ginhimo) nga nagapamensar nga ang mga kasuguan sang Ginuo binuang-buang ukon dinumaan na. Pwede ninyo hambalan sang inyo kabataan kon paano ipaathag kon ngaa malipayon kita nga tumanon ang mga kasuguan. Ngaa importante nga magsalig sa laygay sang Dios bisan pa nga wala naton ini lubos nga maintiendihan? Pwede mo sila papagsikon nga magpangita sa 2 Nefi 9:20, 28–29, 42–43 sang bulig sa pagpanumdom kag paghambalanay parte sining mga pamangkot.

Para sa dugang nga mga ideya, tan-awa sa isyu sang Abyan nga magasin sini nga bulan.

Si Jesus nga nagapang-ayo sang mga tawo

He Healed Many of Diverse Diseases [Nagpang-ayo Sia sang Madamo nga Nagkalain-lain nga mga Balatian], ni J. Kirk Richards

pahina para sa kahiwatan: Si Jesucristo nagaluwas sa aton gikan sa sala kag kamatayon