Pebrero 26–Marso 3: “Tawgon ang Iya Ngalan … Ang Prinsipe sang Paghidaet”

2 Nefi 11–19

Ang pagkurit sa salsalon nga mga lamina indi mahapos, kag ang espasyo sa magagmay nga lamina ni Nefi limitado. Gani ngaa pangabudlayan gid ni Nefi ang pagkopya sang madamo nga sinulatan ni Isaias sa iya rekord? Ginhimo niya ini tungod gusto niya nga magpati kita kay Jesucristo. “Ang akon kalag nagakalipay,” sulat niya, “sa pagpamatuod sa akon katawhan sang kamatuoran sang pagkari ni Cristo” (2 Nefi 11:4). Nakita ni Nefi kon ano ang matabo sa iya katawhan sa palaabuton nga mga henerasyon. Nakita niya nga, wala sapayan sang dalagko nila nga mga bugay, sa gihapon mangin bugalon, palaaway, kag makikalibutanon sila (tan-awa sa 1 Nefi 12; 15:4–6). Nakita man niya ang pareho nga mga problema sa aton panahon (tan-awa sa 1 Nefi 14). Ang mga sinulatan ni Isaias nagapaandam sa amo sini nga mga kalainan. Pero naghatag man ini kay Nefi sang paglaum sa mahimayaon nga palaabuton—ang katapusan sang kalainan, ang pagtililipon sang mga matinuohon, kag ang “dako nga kapawa” para sa mga “naglakat sa kadudulman” (2 Nefi 19:2). Matabo ini tanan tungod “isa ka bata ang [nabun-ag]” nga magatapos sang tanan nga kagamo—“Ang Prinsipe sang Paghidaet” (2 Nefi 19:6).

Mga Ideya sa Pagtuon sa Puluy-an kag sa Simbahan

Paano ko mas maintiendihan ang mga pinanudlo ni Isaias?

Gin-ako ni Nefi nga “ang mga pulong ni Isaias indi maathag” (2 Nefi 25:4). Pero naghatag man sia sang mga ideya para buligan kita nga makita ang kahulugan sang mga sinulatan ni Isaias:

• “Idapat ang iya mga pulong” sa inyo kaugalingon (2 Nefi 11:2). Madamo sa mga pinanudlo ni Isaias ang may pila ka posible nga mga kahulugan kag gamit. Halimbawa, samtang ginabasa mo ang parte sa mga ilistaran sa 2 Nefi 14:5–6, pamensara kon paano ining mga bersikulo madapat sa inyo puluy-an. Pamangkuta ang imo kaugalingon, “Ano ayhan ang gusto sang Amay nga Langitnon nga akon matun-an?”

• Pangitaa ang mga simbolo ni Jesucristo (tan-awa sa 2 Nefi 11:4). Madamo sa mga pinanudlo ni Isaias parte sa Manluluwas ginpahayag paagi sa mga simbolo. Halimbawa, paano ginrepresentar ang Manluluwas sa 2 Nefi 19:2? Ano ang ginatudlo sining simbolo sa imo parte sa Iya?

• “Pangayoa nga “mapuno [ka] sang espiritu sang panagna” (2 Nefi 25:4). Samtang nagatuon ka, magpangamuyo para sa espirituhanon nga giya. Mahimo nga indi mo dayon maintiendihan ang tanan, pero mabuligan ka sang Espiritu nga matun-an ang kinahanglan mo mahibal-an.

  Ang Libro ni Mormon kag Daan nga Katipan nga mga manwal sa institute may dugang nga impormasyon nga makabulig sa imo nga matun-an ang kasaysayan sang mga pinanudlo ni Isaias.

2 Nefi 11–19

Si Isaias nagpamatuod parte kay Jesucristo.

Tungod naggamit si Isaias sang simboliko nga lenggwahe, mahapos nga indi matalupangdan ang iya gamhanan nga saksi kay Jesucristo. Pangitaa ang Manluluwas sa 2 Nefi 13:13; 14:4–6; 15:1–7; 16:1–7; 17:14; 18:14–15; 22:2. Ano ang ginatudlo sa imo sining mga bersikulo parte sa Iya?

Ang propesiya sa 2 Nefi 19:6 nagalista sang pila ka mga titulo ni Jesucristo. Paano Niya gintuman ini nga mga papel sa imo kabuhi?

2 Nefi 12–13; 15

Ang mga bugalon kag makikalibutanon igapaubos.

Nakita na ngadaan ni Nefi nga ang bugal amo ang tunaan sang pag-usmod sang iya katawhan (tan-awa sa 1 Nefi 12:19). Gani indi katingalahan nga ipaambit ni Nefi sa iya katawhan ang sulit-sulit nga pagpaandam ni Isaias parte sa bugal. Sa mga kapitulo 12 kag 13, pangitaa ang mga tinaga nga gingamit ni Isaias agud ilaragway ang pagkabugalon, pareho sang matinaas-taason kag pagkamalabi-labihon. Sa 2 Nefi 15:1–24, pangitaa ang simboliko nga lenggwahe nga nagalaragway sang mga resulta sang bugal. Dayon pwede mo tilawan nga ihambal sa imo kaugalingon nga pulong ang imo ginbasa. Hunahunaa kon paano mo pilion nga mangin mapainubuson.

2 Nefi 12:2–3

Ang templo amo ang balay sang Ginuo.

Gintawag ni Isaias ang templo bilang ang “bukid sang balay sang Ginuo(2 Nefi 12: 2). Ngaa ang bukid isa ka maayo nga simbolo para sa templo?

Paano mo ipaathag sa isa ka tawo kon ngaa kinahanglan naton sang mga templo? Pwede ka makakita sang posible nga mga sabat sa 2 Nefi 12:2–3 kag sa mensahe ni Pangulong Russell M. Nelson “Ang Templo kag ang Inyo Espiritwal nga Pundasyon” (Liahona, Nob. 2021, 93–96.). Base sa imo ginbasa, ano ang gusto sang Ginuo nga imo matun-an kag maeksperiyensyahan sa Iya balaan nga balay? Ano ang imo mga naeksperiyensyahan didto?

Makita mo ang mga pamangkot sa interbyu para sa temple recommend sa mga pahina 36–37 sang Para sa Kusog sang mga Lamharon: Giya sa Paghimo sang mga Pagpili. Pamensara nga basahon ang kada isa kag pamangkuta ang imo kaugalingon, ano ang ginatudlo sining pamangkot sa akon parte sa mga pamaagi sang Ginuo? Paano ako sini ginabuligan nga “maglakat sa iya mga dalanon”?

2 Nefi 11–19

Si Jesucristo magatubos sang Iya katawhan.

Wala sapayan sang kalainan nga iya nakita, nakakita si Isaias sang paglaum sa palaabuton. Pamensara nga tun-an ang tagsa sang masunod nga mga dinalan. Isulat ang isa ukon masobra pa nga mga kamatuoran nga ginatudlo sang tagsa ka dinalan parte sa aton panahon karon: 2 Nefi 12:1–5; 14:2–6; 15:20–26; 19:2–8. Ngaa sa banta mo nga importante para sa aton nga maintiendihan ining mga dinalan?

Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.

Magpangita sang mga sulundan. Sa balaan nga mga kasulatan makakita kita sang mga sulundan nga nagapakita sa aton kon paano ang Ginuo nagahikot. Sa 2 Nefi 11–19, pwede ka magpangita sang mga sulundan kon paano ang Ginuo nagapaandam sa sala kag nagapatawad sang mga tawo nga nagahinulsol.

Mga Ideya para sa Pagtudlo sang mga Kabataan

2 Nefi 12:2–3

Ang templo amo ang balay sang Ginuo.

• Ginlaragway ni Isaias ang templo bilang ang “bukid sang balay sang Ginuo.” Mahimo nga masadyahan ang imo kabataan sa pagdrama-drama nga nagasaka sa bukid samtang ginabasa ninyo ang 2 Nefi 12:2–3. Buligi sila nga magpangita sang mga dinalan sa sining mga bersikulo nga nagalaragway kon ngaa may mga templo kita.

• Para ipaathag ang dinalan nga “magalakat kita sa iya mga banas” sa 2 Nefi 12:3, pwede ka maghimo sang banas sa salog, nga nagapadulong sa litrato sang templo. Samtang nagalakat ang imo kabataan sa banas, pwede nila sambiton ang mga butang nga pwede nila himuon para maglakat sa mga banas sang Ginuo.

• Basi pwede man idrowing sang imo kabataan ang litrato sang ila mga kaugalingon nga nagakadto sa templo.    

2 Nefi 11:4–7; 17:14; 19:6

Si Jesucristo amo ang akon Manluluwas.

• May pila ka ngalan si Jesucristo sa 2 Nefi 11:4–7; 17:14; 19:6. Buligi ang imo kabataan nga makita ang mga ini kag hambali kon ano ang kahulugan sang mga ini. Halimbawa, ang buot silingon sang “Cristo” amo “ang pinili” kag ang “Emmanuel” nagakahulugan “ang Dios upod naton.” Ano ang ginatudlo sa aton sining mga ngalan parte kay Jesucristo?

•       Ano ang aton mabatyagan kon makita naton Sia liwat?

2 Nefi 15:20

Ginatinguhaan ni Satanas nga patalangon ako parte sa maayo kag malain.

• Ipakita sa imo kabataan ang isa ka butang nga mapait ukon maaslom, pareho sang hiniwa nga lemon, nga ara sa sulod sang putos sang dulsi. Basaha sing ululupod ang 2 Nefi 15:20. Paano ginahimulatan ni Satanas nga panamion ang hitsura sang mga butang nga malain?     Paano ginatabunan ni Satanas ang sala? Paano kita ginabuligan ni Jesucristo nga makalikaw nga maintoan ni Satanas?

Para sa dugang nga mga ideya, tan-awa sa isyu sang Abyan nga magasin sini nga bulan.

Templo sa Panama City Panama. “Ang balay sang Ginuo pagatukuron sa putok-putokan sang mga kabukiran, … kag ang tanan nga mga pungsod magadugok sa sini” (2 Nefi 12:2).