He Will Lead Thee by the Hand [Pagatuytoyan Ka Niya nga Ginakaptan sa Kamot], ni Sandra Rast

Marso 11–17: “Isa Ka Makahalangyag nga Buluhaton kag Kalatingalahan”

2 Nefi 26–30

“Magapanagna ako sa inyo nahanungod sa katapusan nga mga adlaw,” ginsulat ni Nefi (2 Nefi 26:14). Sa iban nga pulong, nagasulat sia parte sa aton panahon. Kag may rason nga magkabalaka sa iya nakita: mga tawo nga nagapanghiwala sang gahum kag mga milagro sang Dios, lapnagon nga paghinisaay kag kagamo. Pero dugang pa sa sining “mga buluhaton sang kadudulman” (2 Nefi 26:10, 22) nga ginapangunahan sang kaaway, si Nefi naghambal man parte sa “isa ka makahalangyag nga buluhaton kag kalatingalahan” nga ginapangunahan sang Dios Mismo (2 Nefi 27:26). Sentro sinang buluhaton amo ang isa ka libro—isa ka libro nga nagahayag sang mga kabutigan ni Satanas kag nagatipon sang mga matarong. Ina nga libro amo ang Libro ni Mormon, ang makahalangyag nga buluhaton amo ang buluhaton sang Simbahan sang Ginuo sa ulihing mga adlaw, kag ang kalatingalahan—sa kinaubsan—amo nga ginaimbitar kita tanan sang Dios, wala sapayan sang aton mga kahuyang, nga magpartisipar sa pagtipon.

Mga Ideya sa Pagtuon sa Puluy-an kag sa Simbahan

2 Nefi 26–27; 29–30

Ginhanda sang Dios ang Libro ni Mormon para sa aton panahon.

Sa 2 Nefi 26–27, ginsambit ni Nefi ang mas nauna nga propesiya ni Isaias (tan-awa sa Isaias 29) kag gingamit ini sa iya katawhan kag sa ila sinulatan—ang Libro ni Mormon. Nahibal-an niya paagi sa rebelasyon, bisan antes pa nakompleto sulat ang Libro ni Mormon, nga sa pila ka adlaw ini “mangin may dako nga bili sa mga anak sang tawo” (2 Nefi 28:2). Ngaa ang Libro ni Mormon may dako nga bili sa imo? Hunahunaa ang ini nga pamangkot sa imo pagbasa sang 2 Nefi 29–30. Ano ang “makahalangyag nga buluhaton” (2 Nefi 27:26) nga ginahimo sang Dios sa kalibutan kag sa imo kabuhi paagi sa Libro ni Mormon?

Tan-awa man sa Joseph Smith—Kasaysayan 1:62–65.

2 Nefi 26:23–33

Si Jesucristo nagaimbitar sa aton tanan nga magpalapit sa Iya.

Madamo sang matahum nga mga kamatuoran nga dapat binagbinagon sa 2 Nefi 26:23–24. Halimbawa, pwede mo hunahunaon kon ano ang ginhimo ni Jesucristo “para sa benepisyo sang kalibutan”—kag para sa imo. Paano Niya “[gina]butong ang tanan nga mga tawo”—kag ikaw—“palapit sa iya”? Ano ang ginainspirar sa imo nga himuon bilang aksyon sa Iya mga pagpahayag sang pagpalangga?

Padayona ang pagbasa kag pagpangita sang mga kamatuoran parte sa Manluluwas sa mga bersikulo 25–33. Talupangda labi na gid ang Iya mga imbitasyon. Paano mo palip-uton ang mensahe ni Jesucristo sa imo sa isa lang ka dinalan?  

Pamensara kon paano ining mga bersikulo makaimpluwensya sa imo pagpakigbagay sa iban kag paghagad sa ila nga magpalapit kay Cristo. Pwede ka makakita sang pila ka mga ideya sa mensahe ni Elder D. Todd Christofferson nga “Ang Doktrina sang Pagkalakip” (Liahona, Nob. 2022, 53–56).

Tan-awa man sa 3 Nefi 18:30–32; Dallin H. Oaks, “Ano ang Nahimo sang Aton Manluluwas para sa Aton?,” Liahona, Mayo 2021, 75–77.

Indi ka mahadlok sa kahipos. Ang maayo nga mga pamangkot nagakinahanglan sang oras para sabton. Nagapangayo ini sang pagpangita, pagpamensar, kag inspirasyon. Ang oras nga nagahulat ka sang mga sabat sa pamangkot pwede nga mangin sagrado nga oras sang pagbinagbinag. Likawi ang tentasyon nga tapuson ini dayon paagi sa paglumpat sa lain naman nga topiko.

2 Nefi 28

Si Satanas nagahandum nga magpanginto.

Madamo sa mga kabutigan kag taktika ni Satanas ang nahayag sa 2 Nefi 28. Pangitaa ang mga ini sa mga bersikulo 6, 8, 21–23, 29. Ngaa kinahanglan mo nga mahibal-an ang mga kabutigan ni Satanas? Ano ang himuon mo kon ang kontra magatinguha sa pagpatalang sa imo?

Nalista sa idalom ang pila ka balaan nga mga kasulatan nga nagasikway sang mga kabutigan ni Satanas. Tan-awa kon pwede mo ipares ang matuod nga doktrina sa sining mga bersikulo sa butig nga mga doktrina nga ginapaandam sa aton ni Nefi sa 2 Nefi 28:

• 2 Nefi 2:17: may yawa (2 Nefi 28:22: “Indi ako yawa, kay wala sing amo sini”)

• Moroni 7:35–37

• Doktrina kag mga Kasugtanan 1:31

• Doktrina kag mga Kasugtanan 68:31; 82:14

• Mga Artikulo sang Pagtuo 1:9

2 Nefi 28:27–31; 29

Ang Dios padayon nga nagahatag sang rebelasyon para giyahan ang Iya mga anak.

Bilang mga Santos sa Ulihing mga Adlaw, ginbunyagan kita sang kabuganaan sang pulong sang Dios. Pero sa gihapon, paandam ni Nefi, indi gid kita dapat magbatyag nga “hustuhan na ato!” Samtang imo ginabasa ang mga paandam sa 2 Nefi 28:27–31 kag 2 Nefi 29, hunahunaa ang mga pamangkot nga pareho sini:

• Ano ang gusto sang Dios nga batyagon kag himuon ko sa Iya pulong?

• Ngaa ang mga tawo kon kaisa “akig” sa pagbaton sang dugang nga kamatuoran halin sa Dios? (2 Nefi 28:28). Nagabatyag bala ako sang amo sini? Kon amo sini, paano ako magbag-o?

• Ano ang buot silingon sang pagbaton sang pulong sang Dios? Paano ko mapakita sa Iya nga gusto ko magbaton sang dugang nga pulong Niya?

Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.

Mga Ideya para sa Pagtudlo sang mga Kabataan

2 Nefi 26:23–28, 33

Gusto ni Jesucristo nga ang tanan magpalapit sa Iya.

• Para tudloan ang imo kabataan parte sa mga imbitasyon sang Manluluwas sa sining mga bersikulo, pwede mo sila istoryahon parte sa mga tinion nga nanghagad sila sang mga tawo sa espesyal nga kahiwatan, pareho sang selebrasyon sa kaadlawan. Dayon pwede ninyo nga basahon sing ululupod ang 2 Nefi 26:23–28 kag pangitaon kon ano ang ginahagad ni Jesus nga aton himuon. Basi gusto sang imo kabataan nga maghimo sang kard nga nagaimbitar sa isa ka tawo nga magpalapit kay Jesucristo. Paisoga sila nga gamiton ang isa ka dinalan sa sining mga bersikulo sa ila imbitasyon.

• Ang larawan sa katapusan sining outline nagapakita sang mga tawo sa lainlain nga mga ginhalinan. Pwede nga tan-awon sang imo kabataan ini nga larawan samtang imo ginabasa ang 2 Nefi 26:33. Dayon pwede mo suliton ang dinalan nga “Ginaagda ni Jesus ang tanan sa pagkari sa Iya” samtang ginatudlo sang imo kabataan ang kada isa sa larawan—kag dayon ang ila kaugalingon. Paano kita magpalapit kay Jesus?

2 Nefi 28:2; 29:7–11; 30:3–6

Ang Libro ni Mormon isa ka bugay.

• Para buligan ang imo kabataan nga mabatyagan nga ang Libro ni Mormon “may dako nga bili” (2 Nefi 28:2), pwede mo putson ang isa ka kopya bilang regalo kag ipapakot sa ila kon ano ang unod. Pwede sila magpangita sang mga tanda sa 2 Nefi 30:3–6. Sugiri ang imo kabataan kon ngaa dako ang bili sang Libro ni Mormon para sa imo, kag tugoti sila nga ihambal man ang ila mga nabatyagan.

• Pamensara nga pamangkuton ang imo kabataan nga hunahunaon kon may isa ka abyan nga magsiling, “Indi ko kinahanglan nga basahon ang Libro ni Mormon. Nabasa ko na ang Biblia.” Ano ang pwede naton ihambal sa aton abyan? Basaha sing ululupod ang 2 Nefi 29:7–11 para hibaluon kon ngaa gusto sang Dios nga may ara kita sining duha gid ka libro.

2 Nefi 28:30–31

Ang Amay nga Langitnon nagatudlo sa akon sing amat-amat.

• Basi pwede ka magpamensar sang leksyon nga nagagamit sang bagay nga makabulig sa imo kabataan nga maintiendihan kon ano ang buot silingon sang “dinalan sa dinalan.” Halimbawa, pwede nila plastaron ang puzzle ukon maghimo sang isa ka bagay gamit ang mga bloke, amat-amat nga tinag-isaisa. Ukon pwede mo sila tudloan sing amat-amat sang isa ka abilidad, pareho sang paghigot sang laso ukon pagdrowing sang litrato. Dayon pwede ninyo basahon ang 2 Nefi 28:30 kag hambalan kon paano kita ginatudloan sang Amay nga Langitnon sang isa ka kamatuoran sing amat-amat.

• Isa pa ka ideya amo ang magpili sang dinalan halin sa 2 Nefi 28:30 kag magbulos-bulos sa pagsulat sini, sing tag-isaisa ka tinaga. Paano ini nangin pareho sa pamaagi sang Dios sa paghatag sa aton sang kamatuoran? Ngaa ginapahayag sang Dios ang kamatuoran sa aton “dinalan sa dinalan, pagsulundan sa pagsulundan, diutay diri kag diutay didto” imbes nga tingbanay? Paano naton mapakita sa Dios nga gusto pa naton magbaton sang dugang nga kamatuoran halin sa Iya?

Para sa dugang nga mga ideya, tan-awa sa isyu sang Abyan nga magasin sini nga bulan.

Christ in the Midst [Si Cristo sa Tunga], ni Judith A. Mehr