Marso 4–10: “Nagakasadya Kita kay Cristo”

2 Nefi 20–25

Ang mga sinulatan ni Isaias nagalakip sang mabaskog nga mga paandam, pero nagatanyag man ang mga ini sang paglaum kag kalipay. Isa ini ka rason kon ngaa gindala ini ni Nefi sa iya sinulatan: “Kag karon nagasulat ako sang pila sang mga pulong ni Isaias,” siling niya, “nga kon sin-o man … ang makakita sining mga pulong mahimo nga magpagsik sa ila mga tagipusuon kag magkasadya” (2 Nefi 11:8). Buot silingon, ang imbitasyon nga basahon ang mga sinulatan ni Isaias, isa ka imbitasyon nga magkasadya. Mahimo ka nga magkalipay, pareho sa ginhimo ni Nefi, sa mga propesiya ni Isaias parte sa pagtililipon sang Israel, sa pag-abot sang Mesias, kag sa kalinong nga ginpangako sa mga matarong. Pwede ka magkalipay nga mabuhi sa ginpropesiya nga panahon sang ang Ginuo “[nagpatindog] sing isa ka hayahay para sa mga pungsod, kag magapanipon sang mga sinikway sang Israel” (2 Nefi 21:12). Kon ginauhaw ka sa pagkamatarong, pwede ka “upod ang kalipay … magsag-ob sing tubig gikan sa mga bubon sang kaluwasan” (2 Nefi 22:3). Sa iban nga pulong, mahimo ka nga “magkasadya kay Cristo” (2 Nefi 25:26).

Mga Ideya sa Pagtuon sa Puluy-an kag sa Simbahan

2 Nefi 21–22

Makakita ako sang kalinungan kay Jesucristo.

Ang mga kabataan ni Lehi may problema sa pagbinangigay. Mas naglala ina nga problema sa ulihi nga mga henerasyon, nga nagtuga sang pagbahin-bahin, pagkabihag, kasubo, kag kalaglagan. Kag ang pagbinangigay nagapadayon nga isa ka problema sa karon nga panahon.

Nga ginapanumdom ina, pamensara ang mga propesiya sa 2 Nefi 21–22. Pamensara kon paano ginatuman sang Manluluwas ining mga propesiya. Ano ang kahulugan sa imo sang propesiya nga ang lobo “magapuyo upod sa karnero”? (2 Nefi 21:6). Binagbinaga kon ano ang imo mahimo para mangin makigdaeton.

2 Nefi 21:9–12

Ang Ginuo nagatipon sang Iya katawhan.

Nangin saksi si Nefi kag ang iya pamilya sa paglinapta sang Israel (tan-awa sa 2 Nefi 25: 10). Karon pwede ka magpartisipar sa pagtipon sang Israel (tan-awa sa 2 Nefi 21:12). Samtang imo ginabasa ang 2 Nefi 21:9–12, hunahunaa kon paano ka makabulig tuman sang mga propesiya nga ginalaragway sa sining mga bersikulo.

Halimbawa, samtang imo ginabasa ang parte sa “hayahay” (sulundan ukon bandera) nga pagaalsahon para tipunon ang katawhan sang Dios, hunahunaa kon paano mo nakita nga gintipon sang Dios ang Iya katawhyan, sa pisikal kag espirituhanon. Ano ang nagaengganyo sang katawhan sa Ginuo kag sa Iya Simbahan?

Ano ang ginapabatyag sa imo nga imo himuon para magbulig tipon sang katawhan sang Dios?

2 Nefi 23–24

Ang pagkakalibutanon sang Babilonia matumba.

Ang ginharian sang Babilonia isa sadto ka gamhanan nga hangkat sa politika kag militar sa dumaan nga Israel. Pero sa katawhan ni Nefi—kag sa aton sa karon—ang mas dako nga hangkat amo ang ginasimbolo sang Babilonia: ang pagkakalibutanon kag sala. Pamensara kon ano ang nangin epekto sang mga paandam sa 2 Nefi 23–24 sa mga tawo nga nahadlok ukon nagadayaw ukon nagasalig sa manggad kag gahum sang Babilonia (tan-awa halimbawa, sa 23:6–9, 11, 19–22; 24:10–19). Ano ang pila sa pareho nga mga butang nga mahimo ginakahadlukan naton ukon ginadayaw ukon ginasaligan sa karon nga panahon? Ano sa pamatyag mo ang mensahe sang Manluluwas sa imo sa sining mga kapitulo? Hunahunaa kon paano mo ipakita nga “nagakasadya [ka] sa kamahalan [sang Ginuo]” (2 Nefi 23:3).

2 Nefi 25:19–29

“Nagahambal kita nahanungod kay Cristo … nagakasadya kita kay Cristo.”

Bukas si Nefi sa pagpaambit sang iya mga ginapatihan—ilabi na gid sang iya testimonya parte kay Jesucristo. Sa bilog mo nga pagtuon sang 2 Nefi 25, hunahunaa ang handum ni Nefi sa “paglugpay sang [iya] kaanakan … sa pagpati kay Cristo, kag sa pagpakig-uli sa Dios” (bersikulo 23). Ano ang gusto ni Nefi nga mahibal-an sang mga tawo parte sa Manluluwas? (tan-awa sa mga bersikulo 12–13, 16). Paano gintinguhaan ni Nefi nga kumbinsihon ang mga tawo nga magpati sa Iya? (tan-awa sa mga bersikulo 19–29). Tandai ang mga dinalan sa sining kapitulo nga nagakumbinsi sa imo nga magpati kag magsunod kay Jesucristo.

Ang iban sa aton mahimo nga indi pareho kaisog kay Nefi sa paghambal parte kay Cristo. Pero basi may makita ka sa mga pinanudlo ni Nefi sa 2 Nefi 25:23–26 nga magainspirar sa imo nga maghambal sa iban parte sa Iya sing mas hayag. Halimbawa, ang deklarasyon ni Nefi nga “Nagakasadya kita kay Cristo” mahimo nga magtulod sa imo nga hunahunaon kon paano nagadala sang kalipay sa imo ang Manluluwas—kag kon paano mo ipaambit ina nga kalipay sa iban.

Ano ang nabatyagan mo nga dapat mo ihambal sa iban parte kay Cristo? Kon kinahanglan mo sang pila ka mga ideya, pwede mo basahon ang “Ang Buhi nga Cristo: Ang Panaksihon sang mga Apostoles” (Librarya sang Ebanghelyo).

Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.

Mga Ideya para sa Pagtudlo sang mga Kabataan

2 Nefi 21:1–5

Si Jesucristo magahukom sa pagkamatarong.

• Para buligan ang imo kabataan nga mapanan-aw ining mga bersikulo, tan-awa kon may makita ka nga kahoy nga gin-utod ukon sanga nga nagatubo sa puno (ukon gamita ang litrato sa idalom). Kon ang “sanga” sa 2 Nefi 21:1 nagasimbolo kay Jesucristo, ano ang ginatudlo sa aton sang mga bersikulo 2–5 parte sa Iya?

2 Nefi 21:6–9

Si Jesucristo nagadala sang kalinong kag kalipay.

• Ano ang ginatudlo sang 2 Nefi 21:6–9 parte sa mahimo matabo kon ang tanan nagasunod sa Manluluwas? (tan-awa man sa 4 Nefi 1:15–18). Paano naton himuon ang aton puluy-an nga mas pareho sini? Mahimo nga masadyahan ang imo kabataan sa pagtan-aw sa mga litrato sang mga sapat nga ginmitlang sa mga bersikulo 6–7—mga sapat nga kasami kontrahanay pero indi na magsinakitay kon magbalik na liwat si Jesus (tan-awa sa pahina para sa kahiwatan sini nga semana). Pwede man nga idrowing sang imo kabataan ang ila mga kaugalingon kag ining mga sapat nga nagapangabuhi sing malinong upod si Jesus.

2 Nefi 21:11–12; 22

Ang Ginuo nagatipon sang Iya katawhan.

• Si Isaias nagsiling nga ang Ginuo magapatindog sang “hayahay para sa mga pungsod” para buligan ang mga tawo nga magtipon sa Iya (tan-awa sa 2 Nefi 21:11–12). Buligi ang imo kabataan nga maintiendihan nga ang hayahay daw pareho sang bandera. Siguro masadyahan sila sa pagdrowing sang ila kaugalingon nga bandera. Pwede nila ilakip ang mga litrato ukon mga tinaga nga nagarepresentar sang mga rason nga nagapalapit sila kay Jesucristo kag sa Iya Simbahan. Tugoti sila nga mag-istorya parte sa ila mga bandera, kag buligi sila sa pagpamensar kon paano nila buligan ang iban nga “magtipon” kay Jesucristo.

• Pagkatapos nga basahon ang 2 Nefi 22:4–5 sing ululupod, pwede ninyo hambalan upod sa inyo kabataan ang pila sa “maayo nga mga butang” nga ginhimo sang Ginuo. Ano ang pila sa “mga kahimuan [sang Ginuo] sa tunga [naton]” nga pwede naton ideklarar? Para buligan ang inyo kabataan nga hunahunaon ini nga pamangkot, pwede kamo magkanta sang kanta parte sa Manluluwas. Paano naton buligan ang iban nga mga tawo nga mahibal-an kon ano ang ginhimo sang Manluluwas para sa aton?

2 Nefi 25:26

“Nagakasadya kita kay Cristo.”

• Paano mo buligan ang imo kabataan nga “magkasadya kay Cristo”? Basi pwede mo sila sugiran sang istorya parte kay Jesucristo nga nagadala sang kalipay sa iban. Pwede nga isambit sang imo kabataan ang masadya nga mga tinion sa istorya. Dayon, samtang ginabasa ninyo sing ululupod ang 2 Nefi 25:26, pwede nila hambalan kon ngaa “nagakasadya [sila] kay Cristo.”

Magpamatuod parte kay Cristo. Indi maghaumhaum nga nahibal-an sang imo pamilya ang imo nabatyagan parte sa Manluluwas. Sugiri sila, kag tugoti ang imo balatyagon parte sa Manluluwas nga makaimpluwensya sa imo pagpakigbagay sa ila.

Para sa dugang nga mga ideya, tan-awa sa isyu sang Abyan nga magasin sini nga bulan.

Indi sa Kataas sang Bukid [I’ll Go Where You Want Me to Go], ni Ramon Ely Garcia Rivas