Si Jesus nga nagatudlo sa Iya mga disipulo

Christ Teaching His Disciples [Si Cristo nga Nagatudlo sa Iya mga Disipulo], ni Justin Kunz

Marso 18–24: “Amo Ini ang Dalan”

2 Nefi 31–33

Upod sa ulihi nga narekord nga mga pulong ni Nefi, makita naton ini nga deklarasyon: “Ginsugo [ako] sang Ginuo, kag kinahanglan gid nga magtuman ako” (2 Nefi 33:15 Maayo ini nga pagsumada sang kabuhi ni Nefi. Gintinguhaan niya nga maintiendihan ang pagbuot sang Dios kag maisog ini nga gintuman—bisan pa nga nagakahulugan ini nga mabutang sa risgo ang iya kabuhi agud makuha ang saway nga mga lamina kay Laban, maghimo sang barko kag magtabok sa dagat, ukon matinuohon nga magtudlo sang doktrina ni Cristo nga may kaathag kag gahum. Sarang si Nefi nga makakumbinsi sang kakinahanglanon nga “magdutdot pasulong upod ang isa ka kalig-on kay Cristo,” sang paglakat sa “makitid kag masipot nga banas nga nagapadulong sa kabuhi nga wala’y katapusan” (2 Nefi 31:20, 18), tungod amo ina ang dalan nga iya ginsunod. Nahibal-an niya paagi sa eksperiyensya nga ang ining dalan, bisan nga mabudlay kon kaisa, makalilipay man, kag “wala na sing iban pa nga dalan ukon ngalan nga ginhatag sa idalom sang langit nga paagi sa sini ang tawo mahimo nga maluwas sa ginharian sang Dios” (2 Nefi 31:21).

Mga Ideya sa Pagtuon sa Puluy-an kag sa Simbahan

2 Nefi 31

Si Jesucristo kag ang Iya doktrina amo lamang ang mga paagi padulong sa kabuhi nga wala katapusan.

Kon imo palip-uton ang dalan padulong sa kabuhi nga wala katapusan sa pila lang ka tinaga, ano ang imo ihambal? Talupangda kon paano ini ginlaragway ni Nefi sa 2 Nefi 31. Pamensara ang pagdrowing sang banas kag isulat sa kilid sang banas ang pila ka mga prinsipyo ukon mga tikang nga imo nakita sa sining mga kapitulo. Pwede mo idugang sa imo drowing ang imo kaugalingon nga pagpalip-ot sang gintudlo ni Nefi parte sa tagsa ka prinsipyo.

Samtang imo ginabasa ang 2 Nefi 31:18–20, taksa ang imo kaugalingon nga mga pagpaninguha sa “pagdutdot pasulong” sa dalan sang ebanghelyo.

pamilya nga nagapangamuyo sing ululupod

Ang pagsunod sang mga pinanudlo ni Jesucristo nagadala sa aton padulong sa kabuhi nga wala katapusan.

2 Nefi 31:4–13

Si Jesucristo nagpahamtang sang perpekto nga ehemplo sang pagkamatinumanon sang Sia ginbunyagan.

Kon ang imo bunyag natabo kahapon ukon 80 katuig na ang nagligad, isa ato ka importante nga hitabo. Nagsulod ka sa wala katapusan nga kasugtanan nga sundon si Jesucristo. Panumduma ang imo bunyag samtang imo ginabasa ang parte sa bunyag sang Manluluwas sa 2 Nefi 31:4–13 Mahimo nga makabulig ang pagsabat sang mga pamangkot pareho sini:

• Ngaa ginbunyagan si Cristo? Ngaa ginpili ko nga magpabunyag?

• Ano nga mga promisa ang akon ginhimo sang ginbunyagan ako? Ano ang ginpromisa sang Ginuo bilang balos? (tan-awa sa mga bersikulo 12–13; tan-awa man sa Mosias 18:10, 13).

• Paano ko mapakita nga dedikado gihapon ako nga magsunod kay Jesucristo?

2 Nefi 31:15–20

“Sia nga magapadayon tubtob sa katapusan, ang amo man maluwas.”

Samtang imo ginabasa ang 2 Nefi 31:15–20, pamangkuta ang imo kaugalingon, “Paano ko mahibal-an kon nagapadayon ako tubtob sa katapusan?” Ano ang imo matun-an kay Nefi nga nagabulig sa imo sa pagsabat sining pamangkot?

Si Elder Dale G. Renlund nagtudlo: “Ang pagpadayon tubtob sa katapusan indi separado nga tikang sa doktrina ni Cristo—nga daw ginakompleto naton ang una nga apat ka mga tikang kag dayon magkuob, mag-ugtom, kag maghulat nga mapatay. Indi, ang pagpadayon tubtob sa katapusan amo ang aktibo kag hungod nga pagsulit-sulit sang mga tikang” (“Lifelong Conversion” [Brigham Young University devotional, Sept. 14, 2021], 2, speeches.byu.edu). Paano mo sulit-suliton ang mga tikang sa doktrina ni Cristo (pagtuo, paghinulsol, bunyag, kag pagbaton sang Balaan nga Espiritu)?

seminary icon

2 Nefi 32; 33:2

Paagi sa mga pulong ni Cristo kag sang Balaan nga Espiritu, mapakita sang Dios sa akon kon ano ang himuon.

Nakabatyag ka na bala nga daw nagapang-alang-alang sa madason mo nga himuon sa imo kabuhi? Ang katawhan ni Nefi may amo man sini nga mga palaligban (tan-awa sa 2 Nefi 32:1). Pangitaa ang sabat ni Nefi sa 2 Nefi 32:2–9. Paano mo ihambal sa kaugalingon mo nga mga pulong ang gintudlo ni Nefi? Ano nga mga eksperiyensya ang nagtudlo sa imo nga matuod ang mga pulong ni Nefi?

Pamensara ang paglista sang mga desisyon ukon sitwasyon (sa karon kag sa palaabuton) kon sa diin kinahanglan mo ang giya sang Dios. Ano ang imo matun-an sa 2 Nefi 32 nga makabulig sa imo nga magmadinalag-on sa pagbaton sang inspirasyon halin sa Iya? Ano ang pwede magtulod sa mga tawo nga “magpatig-a sang ila mga tagipusuon batok sa Balaan nga Espiritu”? 2 Nefi 33:2

Samtang ginabinagbinag mo ang laygay ni Nefi, hunahunaa kon paano mo ginatun-an ang mga pulong sang Manluluwas. Malaragway mo bala ini nga pagkimit-kimit, pagkaon, ukon pagpaayaw? Ano ang kinalain, sa imo pamatyag? Pamensara kon paano mo himuon ang imo eksperiyensya sa mga pulong sang Manluluwas nga daw nagapista. Basi makakuha ka sang mga ideya sa isa ka abyan ukon miyembro sang pamilya.

Magpaayaw sa mga pulong ni Cristo. Madamo sang pamaagi nga magpaayaw sa mga pulong ni Cristo, lakip na ang pagpangamuyo para sa inspirasyon, pagpamangkot antes kag sa tion sang pagtuon, paghatag kahulugan sa mga tinaga, pagbinagbinag, pag-cross-reference, pagsulat sang mga natun-an, pagpangita sang mga kamatuoran sang ebanghelyo, kag pagpangabuhi sang balaan nga mga kasulatan (tan-awa sa 1 Nefi 19:23).

Paano mo imbitaron ang Balaan nga Espiritu nga mangin kaupod pirme sa imo kabuhi, imbes nga panalagsa nga bisita?    

2 Nefi 33

Ang Libro ni Mormon nagaganyat sa aton tanan nga magtuo kay Cristo.

Sa 2 Nefi 33, sa paghingapos ni Nefi sang iya mga sinulatan, ginpaathag niya kon ngaa nagasulat sia. Ano ang mga rason nga nakita mo sa sini nga kapitulo? Binagbinaga ang mga sugilanon kag mga pinanudlo nga nabasa mo sa 1 Nefi kag 2 Nefi. Diin ang nakaimpluwensya gid sa imo kag sa imo pagtuo kay Cristo?

Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.

Mga Ideya para sa Pagtudlo sang mga Kabataan

2 Nefi 31:4–13

Kon magpabunyag ako, ginasunod ko si Jesucristo.

• May litrato ni Jesus nga ginabunyagan sa katapusan sining outline. Basi pwede ini gamiton sang imo kabataan para ihambal sa imo kon ano ang nahibal-an nila parte sa sining hitabo (tan-awa man sa Mateo 3:13–17). Ngaa gusto ni Jesus nga mabunyagan kita pareho sa Iya? Pwede nga pamatian sang imo kabataan ang mga rason samtang ginabasa ninyo sing ululupod ang mga bahin sang 2 Nefi 31:4–13. Basi makabulig kon may ara sang bag-o lang nabunyagan nga mag-istorya sang iya eksperiyensya.

2 Nefi 31

Gintudloan ako ni Jesucristo kon paano magbalik sa Amay nga Langitnon.

• Para buligan ang imo kabataan nga mapanan-aw ang mga pinanudlo sa 2 Nefi 31, pwede sila magdrowing sang banas nga may litrato ni Jesucristo sa punta. Pwede mo sila buligan nga pangitaon ukon drowingon ang mga litrato nga nagasimbolo sang mga tikang sa sina nga banas, pareho sang pagtuo kay Cristo, paghinulsol, bunyag, dulot sang Balaan nga Espiritu, kag pagpadayon tubtob sa katapusan. Pwede nila itudlo ang mga litrato samtang ginabasa ninyo ang 2 Nefi 31:17–20 sing ululupod.

2 Nefi 32:3–5

Pwede ako magpaayaw sa mga pulong ni Cristo.

• Para itudlo ang “pagpaayaw” sa mga pulong ni Cristo, pwede mo pangabayon ang kabataan nga idrama-drama kon paano sila magpaayaw sa paborito nila nga pagkaon. Sa 2 Nefi 32:3, ano ang ginsiling ni Nefi nga dapat kita magpaayaw? Ano ang kinalain sang pagpaayaw sa pulong sang Dios sa simple nga pagbasa sini? Basi pwede nga idrama-drama sang imo kabataan ang mga kinalain. Isugid sa ila ang mga bugay nga imo nabaton sang nagpaayaw ka sa balaan nga mga kasulatan.

2 Nefi 32:8–9

Gusto sang Amay nga Langitnon nga magpangamuyo ako pirme.

• Pagkatapos nga basahon ang 2 Nefi 32:8–9, hambali upod sa imo kabataan kon ngaa indi gusto ni Satanas nga magpangamuyo kita. Ngaa gusto sang Dios nga “magpangamuyo [kita] sing dalayon”? Pwede nga maglista ang imo kabataan ukon magdrowing sang mga sitwasyon nga pwede sila magpangamuyo.       Paano kita ginabugayan sang Dios kon nagapangamuyo kita pirme?

Para sa dugang nga mga ideya, tan-awa sa isyu sang Abyan nga magasin sini nga bulan.

Si Juan Bautista nga Nagabunyag kay Jesus

To Fulfill All Righteousness [Agud Matuman ang Tanan nga Pagkamatarong], ni Liz Lemon Swindle

pahina para sa kahiwatan: pwede ako “magpaayaw sa mga pulong ni Cristo”