Pebrero 12–18: “Nagpuyo Kami suno sa Paagi sang Kalipayan”

2 Nefi 3–5

Sa pagbasa sang 1 Nefi, mahimo nga makabaton ka sang impresyon nga si Nefi katalalupangdon kaayo. “Dako sing tindog” sa pareho pisikal kag espirituhanon (1 Nefi 2:16), daw wala gid sia matay-og sang mga pagtilaw nga iya gin-atubang. Ukon amo ina ang aton ginahunahuna. Pero bisan dalayawon ang pagtuo ni Nefi, ang iya makatalandog nga mga pulong sa 2 Nefi 4 nagapakita nga bisan ang mga matinuohon kon kaisa nagabatyag nga “kailo” kag “madali matublag” sang mga tentasyon. Diri makita naton ang tawo nga nagatinguha, nga gusto magmalipayon, pero ang “tagipusuon nagaugayong tungod sang [iya] mga sala.” Mahangpan naton ini kag ang determinasyon nga puno sang paglaum nga kaupod sini: “Wala’y sapayan sini, nahibal-an ko kon kay sin-o ako nagasalig” (tan-awa sa 2 Nefi 4:15–19).

Samtang natun-an ni Nephi kag sang iya katawhan nga magpangabuhi “suno sa paagi sang kalipayan” (2 Nefi 5:27), natun-an man nila nga ang pag-angkon sang kalipay indi mahapos ukon nga wala ini sing mga tinion sang kasubo. Nagaabot ini sa ulihi tungod sa pagsalig sa Ginuo, “ang bato sang [aton] pagkamatarong” (2 Nefi 4:35).

Mga Ideya sa Pagtuon sa Puluy-an kag sa Simbahan

2 Nefi 3:6–24

Si Joseph Smith ginpili sang Dios nga magpanumbalik sang ebanghelyo.

Gin-istorya ni Lehi sa iya anak nga si Jose ang propesiya nga ginhatag ni Jose sang Egipto. Ang propesiya parte sa palaabuton nga “pinili nga manugtulok,” si Joseph Smith. Ano ang ginahambal sa mga bersikulo 6–24 nga himuon ni Joseph Smith agud bugayan ang katawhan sang Dios? Pamensara kon paano ang buluhaton ni Joseph Smith nangin may “dako sing bili” sa imo? Hunahunaa ang mga pamangkot pareho sini, kag pamensara nga isulat ang imo mga sabat:

• Ano ang imo nahibal-an parte sa Amay nga Langitnon kag kay Jesucristo tungod sa ginpanudlo ni Joseph Smith?

• Sa ano nangin lain ang imo kabuhi bangod sang ginpanumbalik sang Ginuo paagi kay Joseph Smith?

• Nangin ano ayhan ang imo kabuhi kon wala natabo ang Pagpanumbalik?

Isa ka importante nga bahin sang misyon ni Joseph Smith amo ang pagpagwa sang Libro ni Mormon. Ano ang imo matun-an sa sining kapitulo kon ngaa importante ang Libro ni Mormon? Ilabi na gid, pwede mo pangitaon ang mga rason sa mga bersikulo 7, 11–13, 18–24.

Prophet of the Lord [Propeta sang Ginuo], ni David Lindsley

2 Nefi 4:15–35

“O Ginuo, nagasalig ako sa imo.”

Nagsiling ni Nefi nga iya “ginasulat ang mga butang sang iya kalag” (bersikulo 15). Samtang imo ginabasa ang iya ginsulat sa 2 Nefi 4:15–35, pamangkuta ang imo kaugalingon, “Ano ang mga butang sang akon kalag?” Pamensara nga isulat ang mga ini, pareho sang ginhimo ni Nefi, kag ipaambit sa mga tawo nga imo ginapalangga.

Ang makita kon paano si Nefi nakakita sang kaumpawan sang pamatyag niya ginadaug sia kag nagakabalaka makabulig sa imo kon may amo ka man sina nga mga balatyagon. Magpangita sa mga bersikulo 15–35 sang mga dinalan nga makahatag sa imo sang kaumpawan. May kilala ka bala nga mahimo makakita sang kaumpawan sa sining mga dinalan?

tan-awa man sa Ronald A. Rasband, “Ang mga Butang sang Akon Kalag,” Liahona, Nob. 2021, 39–41.

2 Nefi 5

Makakita ako sang kalipayan sa pagpangabuhi sang ebanghelyo ni Jesucristo.

Ano sa banta mo ang kahulugan sang mangin malipayon? Ginsulat ni Nefi nga ang iya katawhan nagpangabuhi “suno sa paagi sang kalipayan” (2 Nefi 5:27 Pwede mo pangitaon ang mga pagpili nga ginhimo ni Nefi kag sang iya katawhan nga nakabulig sa ila nga mangin malipayon (tan-awa halimbawa, sa 2 Nefi 5:6, 10–17). Ano ang makabulig sa imo nga magpatukod sang kabuhi nga may kalipay pareho sang katawhan ni Nefi?

2 Nefi 5:20–21

Ano ang sumpa nga nagtupa sa mga Lamanhon?

Sang panahon ni Nefi ang sumpa sa mga Lamanhon amo nga “[ginsikway] sila sa nahamtangan [sang Ginuo] … tungod sang ila kalautan” (2 Nefi 5:20–21). Ang buot silingon sini amo nga ang Espiritu sang Ginuo nagbiya na sa ila pangabuhi. Sang ginbaton sang ulihi sang mga Lamanhon ang ebanghelyo ni Jesucristo, “ang pagpakamalaut sang Dios wala na sila pagsundi pa” (Alma 23:18).

Ginsiling man sa Libro ni Mormon nga ang tanda sang maitom nga pamanit nag-abot sa mga Lamanhon pagkatapos nga nagseparar ang mga Nefinhon sa ila. Ang kinaiya kag hitsura sining tanda wala gid maintiendihan sing lubos. Sang primero ang tanda ang nagapain sang mga Lamanhon sa mga Nefinhon. Sang ulihi, sang pareho nga nag-agi ang mga Nefinhon kag Lamanhon sa mga panahon sang kalautan kag pagkamatarong, nangin wala na sang kapuslanan ang marka.

Ginapamatud-an sang mga propeta sa aton panahon nga ang maitom nga pamanit indi tanda sang diosnon nga pagkadisgusto ukon sumpa. Si Pangulong Russell M. Nelson nagpahayag: “Ginapasalig ko kamo nga ang inyo estado sa atubang sang Dios wala ginadiktahan sang kolor sang inyo panit. Ang mahamut-an ukon indi mahamut-an sang Dios nagadepende sa inyo debosyon sa Dios kag sa Iya mga kasugoan kag indi sa kolor sang inyo panit” (“Tugoti ang Dios nga Magpangibabaw,” Liahona, Nob. 2020, 94).

Sa gintudlo ni Nefi, ang Ginuo “wala sang ginadumilian nga bisan sin-o nga nagakari sa iya, itom kag puti, ulipon kag hilway, lalaki kag babayi; … ang tanan palareho sa Dios” (2 Nefi 26:33).

Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.

Mga Ideya para sa Pagtudlo sang mga Kabataan

2 Nefi 3:6–24

Si Joseph Smith isa ka propeta.

• Pamensara kon paano mo itudlo sa imo kabataan ang parte sa dako nga buluhaton nga nahimo sang Dios paagi kay Joseph Smith. Sa pagsugod, pwede mo buligan ang imo kabataan nga makita ang tinaga nga “manugtulok” sa 2 Nefi 3:6 kag ipaathag nga ang mga propeta ginatawag nga mga manugtulok tungod ginabuligan sila sang Amay nga Langitnon nga makita ang mga butang nga indi naton makita. Iistorya kon ngaa nagapasalamat ka nga may ara kita sang manugtulok nga nagapamuno sa Simbahan.

• Ang Libro sang mga Larawan nga Pang-Ebanghelyo may pila ka mga litrato nga pwede mo gamiton sa pagtudlo parte sa buluhaton nga ginhimo sang Dios paagi kay Joseph Smith (tan-awa sa mga litrato 89–95). Tugoti ang imo kabataan nga iistorya kon ano ang ila mga nahibal-an parte sa mga litrato. Ngaa ginatawag si Joseph Smith nga “pinili nga manugtulok”? Ano ang ginbuhat ni Joseph Smith nga nangin may “dako sing bili” sa imo? (bersikulo 7).

2 Nefi 4:15–35; 5

Nanamian ako sang “mga butang sang Ginuo.”

• Ano ang nagapalipay sa aton? Pamensara nga basahon sing ululupod ang mga bersikulo sang 2 Nefi 4 para mahibal-an kon ano ang nanamian ni Nefi ukon nagpalipay sa iya (tan-awa sa mga bersikulo 15–16, 20–25, 34–35). Sa iya mensahe nga “Ang mga Butang sang Akon Kalag,” si Elder Ronald A. Rasband nagpaambit sang pito ka “mga butang sang Ginuo” nga malahalon para sa iya (Liahona, Nob. 2021, 39–41). Basi pwede ninyo rebyuhon ang iya listahan sing ululupod kag hambalan ang “mga butang sang Ginuo” nga malahalon para sa inyo.

• Ang 2 Nefi 5 nagalaragway man sang mga butang nga nagbulig sa mga Nefinhon nga magpangabuhi “suno sa paagi sang kalipayan” (bersikulo 27). Pwede ka maghatag sang mga tinaga ukon mga litrato nga nagarepresentar sining mga butang kag buligan ang imo kabataan nga pareson sila sa mga bersikulo sa kapitulo 5. Ang pila ka nga halimbawa nagalakip sang pamilya (bersikulo 6), mga kasuguan sang Dios (bersikulo 10), balaan nga mga kasulatan (bersikulo 12), trabaho (mga bersikulo 15 kag 17), mga templo (bersikulo 16), kag mga calling sa Simbahan (bersikulo 26). Paano ining mga butang nagadala sa aton sang kalipayan?

2 Nefi 5:15–16

Ang templo amo ang balay sang Ginuo.

• Samtang imo ginabasa ang 2 Nefi 5:15–16 sa imo kabataan, pwede sila magdrama-drama nga kuno abi ginabuligan nila si Nefi nga magpatindog sang templo. Pwede ka man magpakita sa ila sang mga litrato sang lainlain nga mga bilding, lakip na ang templo. Ano ang kinalain sang mga templo sa iban nga mga bilding?

Ang bisan ano nga tion mahimo nga mangin tion sa pagtudlo. Indi pagpamensara nga ang pagtudlo sa imo pamilya isa ka butang nga himuon mo lang kis-a sa isa ka semana sa pormal nga leksyon. Pamensara ini bilang butang nga imo ginahimo sa tanan nga oras.

Para sa dugang nga mga ideya, tan-awa sa isyu sang Abyan nga magasin sini nga bulan.

The Temple of Nephi [Ang Templo ni Nefi], ni Michael T. Malm