Liae o Loo Malaga Lata Ane i le Sami Ulaula, saunia e Gary Smith

8–14 Ianuari: “O Le a Ou Alu ma Fai”

1 Nifae 1–5

O loo amata le Tusi a Mamona i se tala o se aiga moni na feagai ma ni tauiviga moni lava. Na tupu i le 600 TLM, ae o loo i ai mea e uiga i lenei tala e ono masani ai aiga i ona po nei. O lenei aiga sa ola i se lalolagi o le amioleaga, ae sa folafola atu e le Alii ia i latou e faapea afai latou te mulimuli ia te Ia, o le a Ia taitaiina i latou i le saogalemu. I le ala sa i ai o taimi lelei ma taimi leaga; faamanuiaga sili ma vavega, ae sa i ai foi ni fetauaiga ma finauga. E seāseā i ai i tusitusiga paia se tala auiliili faapea o se aiga o loo taumafai e ola i le talalelei: o matua o loo tauivi e musuia le faatuatua i o latou aiga ma popole e uiga i lo latou saogalemu, o fanau e filifili pe o le a latou talitonu i o latou matua, ma uso o loo feagai ma le lotoleaga ma finauga—ma o nisi taimi e fefaamagaloai ai le tasi ma le isi. I le aotelega, o loo i ai le mana i faataitaiga o le faatuatua a lenei aiga le atoatoa.

Manatu mo le Aoaoina i le Aiga ma i le Lotu

1 Nifae 1–5

O le afioga a le Atua e “aoga tele” ia te au.

O le savali iloga e tasi i le Tusi a Mamona o le “aoga tele” lea o le afioga a le Atua (1 Nifae 5:21). A o e faitauina le 1 Nifae 1–5, vaavaai mo auala na faamanuiaina tuusao pe le tuusao ai le aiga o Liae e le afioga a le Atua (mo se faataitaiga, tagai 1:11–15; 3:19–20; 5:10–22). O a mea o loo aoao mai e nei mataupu e uiga i le afioga a le Atua? O a ni mea ua e maua e musuia ai oe e suesue i tusitusiga paia?

Tagai foi “A Ou Suesue i Mau Paia,” Viiga, nu. 174; “Talatuu o Tusitusiga Paia” (vitio), Potutusi o le Talalelei.

1 Nifae 2

E mafai ona ou maua ma faamalosia la’u molimau a o ou liliu atu i le Alii.

Ua lauiloa Nifae i lona faatuatua mamana i le Alii, ae na tatau ona ia galue ia maua lana molimau—e faapei ona faia e i tatou uma. O le a se mea ua e faitauina i le 1 Nifae 2 o loo faaalia ai le mafuaaga na mafai ai e Nifae ona maua se molimau e moni upu a lona tama? Aisea na le maua ai e Lamana ma Lemuelu lenei molimau? (Tagai foi 1 Nifae 15:2–11). O anafea na e lagona ai ua faamaluluina e le Alii lou loto?

Tagai foi “Ua Poloaiina e le Alii le Aiga o Liae e Tuua Ierusalema” (vitio), Gospel Library.

1 Nifae 3–4

O le a saunia e le Atua se ala mo a’u e faia ai Lona finagalo.

Ina ua poloaiina e le Alii ia atalii o Liae ia aumai papatusi apamemea, Na te lei tuuina mai ni faatonuga patino i le ala e fai ai. E tele lava ina moni lenei mea i poloaiga tatou te maua mai le Atua, ma e ono foliga mai sa Ia manaomia mai “se mea faigata” (1 Nifae 3:5). O le a se mea e musuia ai oe e uiga i le tali a Nifae i le poloaiga a le Alii i le 1 Nifae 3:7, 15–16?

A o e faitau i le 1 Nifae 3–4, vaavaai mo faigata eseese na feagai ma Nifae. Na faapefea ona “saunia e le Alii se ala” mo Nifae e “faataunuu ai le mea na ia [poloaiina]”? Aisea e taua ai mo oe le iloaina o le mea na faia e le Alii mo Nifae?

O se tasi o auala mamana ua saunia ai i tatou e le Atua e tausi Ana poloaiga o le auina mai lea o Iesu Keriso e avea ma o tatou Faaola. Mafaufau e faitau le saunoaga a Peresitene Dallin H. Oaks “O Le A Le Mea Ua Faia e lo Tatou Faaola mo i Tatou?” (Liahona, Me 2021, 75–77). Ua faapefea ona saunia e Iesu Keriso se ala mo i tatou taitoatasi? O le iloaina ua Ia faatoilaloina mea uma mo oe, o le a se mea ua uunaia oe e “alu ma fai”?

Tagai foi “Ua Taitaia Nifae e le Agaga ia Maua Mai Papatusi Apamemea” (vitio), Gospel Library; Autu o le Talalelei, “Usiusitai,” Potutusi o le Talalelei.

Ua Taitaiina Nifae e le Agaga e Aumai Papatusi Apamemea |1 Nifae 3–5

Ua toe auina atu e Liae ona atalii i Ierusalema ia maua mai faamaumauga paia. Sa faamanuiaina i latou faavavega e ui i luitau ma feteenaiga i totonu o i latou lava.

Faaaoga tala ma faataitaiga e aoao atu ai mataupu faavae o le talalelei. A o e sauni e aoao atu, mafaufau i aafiaga patino e mafai ona faaopoopo ai se molimau lona lua i tala o loo i tusitusiga paia. Mo se faataitaiga, o anafea na saunia ai e le Alii se ala mo oe e faia ai Lona finagalo?

Sa Faatumulia Lo Laua Olioli, saunia e Walter Rane

1 Nifae 4:1–3; 5:1–8

O le manatuaina o galuega a le Atua e mafai ona aumai ai ia te au le faatuatua e usiusitai ai i Ana poloaiga.

I taimi e lagona ai e Lamana ma Lemuelu le fia muimui pe faitio, e masani lava ona lata ane Nifae ma Liae e musuia ma apoapoai atu ia i la’ua. A e lagona le fia muimui, e mafai ona fesoasoani le faitau o upu a Nifae ma Liae. Na faapefea ona taumafai Nifae ma Liae e fesoasoani i isi ina ia fausia le faatuatua i le Atua? (tagai 1 Nifae 4:1–3; 5:1–8; tagai foi 1 Nifae 7:6–21). O le a se mea ua e aoaoina e mafai ona fesoasoani ia te oe pe a faaosoosoina oe e muimui pe faitio?

1 Nifae 4:5–18

“Sa taitai au e le Agaga”

I le 1 Nifae 4:5–18, o le a se mea ua faagaeetia ai oe e uiga i le gafatia o Nifae e iloa ma mulimuli i le Agaga? E mafai ona e suesue i le savali a Peresitene Russell M. Nelson “Faaaliga mo le Ekalesia, Faaaliga mo o Tatou Olaga” (Liahona, Me 2018, 93–96) e aoao atili ai e uiga i le mauaina o faaaliga mai le Alii.

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Manatu mo le Aoaoina o Tamaiti

1 Nifae 2:16

E mafai ona i ai la’u lava molimau.

• Sa faapefea ona iloa e Nifae o mea na aoao atu e lona tama sa moni? Fesoasoani i lau fanau ia maua tali i lenei fesili i le 1 Nifae 2:16, 19. Atonu foi latou te fiafia e tusi ia faatinoga a Nifae i poloka po o isi mea faitino ona fausia lea o se mea i mea faitino. O lenei mea e mafai ona taitai atu ai i se talanoaga e uiga i le auala e fesoasoani ai nei faatinoga ia i tatou e fausia se molimau.

• E mafai ona e faaali atu i lau fanau ni ata po o ni mea faitino e faatusa i mea latou te ono sailia se molimau i ai, e pei o se kopi o le Tusi a Mamona po o se ata o Iesu Keriso, se malumalu, po o se perofeta soifua. Valaaulia i latou e filifili se tasi ma faasoa mai a latou molimau e uiga i lena mea. E mafai foi ona e ta’u atu i lau fanau le auala na e maua ai lau molimau. Aisea tatou te manaomia ai a tatou lava molimau?

1 Nifae 3–4

O le a fesoasoani le Atua ia te au e tausi Ana poloaiga.

• Mafaufau e faaaoga se tasi pe sili atu o nei punaoa e fesoasoani ai i lau fanau e talanoa e uiga i le ala na fesoasoani ai le Atua ia Nifae e aumai papatusi apamemea: 1 Nifae 3–4; itulau o gaoioiga o lenei vaiaso; “Lototele o Nifae” (Tusipese a Tamaiti, 64); ma le “Mataupu 4: O Papatusi Apamemea” (i le Tala o le Tusi a Mamona, 8–12).

• Atonu o le a outou fiafia ma lau fanau e faatino le 1 Nifae 3:2–7. Atonu e mafai ona e faafoliga o Liae ma fai atu i lau fanau e toe foi i Ierusalema e aumai papatusi apamemea. Valaaulia i latou e tali mai i a latou lava upu e pei o i latou o Lamana ma Lemuelu po o Nifae. O a nisi mea ua poloaiina i tatou e le Atua e fai? (tagai ata 103–15 i le Tusi Ata o le Talalelei po o le Mosaea 18:8–10 mo ni manatu). E mafai faapefea ona avea i tatou e pei o Nifae?

1 Nifae 3:19--21; 5:19--22

O tusitusiga paia o se oa sili.

• Sa taua tele tusitusiga paia i le aiga o Liae. Ina ia faamanino lenei mea, e mafai ona e valaaulia lau fanau e fesoasoani ia te oe e faamatala pe faatino mea na faia e Nifae ma ona uso e aumai ai papatusi apamemea: na latou malaga i se mea mamao, lafoai a latou auro ma ario, ma lalafi i totonu o se ana ia faasao ai o latou ola. Ona mafai lea ona e faitauina le 1 Nifae 5:21 ma talanoa pe aisea na taua tele ai tusitusiga paia i le aiga o Liae. Aisea e taua ai ia i tatou? E faapefea ona tatou taulimaina tusitusiga paia ia pei o se oa?

O Nifae ma lona aiga sa faatauaina tusitusiga paia.

1 Nifae 4:6

O le Agaga Paia o le a taʻitaʻi ia te au ao ou saili e faia le finagalo o le Alii.

• Pe a uma ona iloiloina faatasi le 1 Nifae 3 i le auala na taumafai ai Nifae ma ona uso e aumai papatusi apamemea, faitau faatasi ma lau fanau le 1 Nifae 4:6 e saili ai po o le a le mea na faia e Nifae lea na mafai ai ona iu ina faamanuiaina o ia. Ona mafai lea e lau fanau ona fai se lisi o mea e finagalo le Atua latou te faia. E mafai faapefea ona fesoasoani le Agaga Paia ia i tatou i nei tulaga?

Mo nisi manatu, tagai i le lomiga o lenei masina o le mekasini o le Uo .

Sa Ou Usitai i le Siufofoga o le Agaga, saunia e Walter Rane