1–7 Ianuari: O Se Tasi Molimau ia Iesu Keriso

Itulau Tomua o le Tusi a Mamona

Ae e te lei oo i le 1 Nifae mataupu 1, o le a e matauina o le Tusi a Mamona e le pei o isi tusi masani. O ona itulau tomua o loo faamatala mai ai se talaaga e le pei o se isi lava—e aofia ai asiasiga mai i agelu, o se talafaamaumau anamua sa natia mo seneturi i se tafāmauga, ma se alii talavou sa faaliliuina le talafaamaumau e ala i le mana o le Atua. O le Tusi a Mamona e le na o se talafaasolopito o tagata Amerika anamua. E saili e faatalitonu tagata uma “o Iesu o le Keriso” (itulau autu o le Tusi a Mamona), ma na taitaiina e le Atua lava Ia le ala na tusia ai, faasaoina, ma faaavanoa mai ia i tatou. O le tausaga lenei, a o e faitauina le Tusi a Mamona, tatalo e uiga i ai, ma faaaoga ona aoaoga, o le a e valaauliaina le mana o le Faaola i lou olaga. Ma atonu e te lagona le uunaia e fai atu, e pei ona sa faia e Molimau e Toatolu i a latou molimau, “E ofoofogia i [o’u] mata.”

Manatu mo le Aoaoina i le Aiga ma i le Lotu

Itulau autu o le Tusi a Mamona

E mafai e le suesueina o le Tusi a Mamona ona faamalosia lo’u faatuatua ia Iesu Keriso.

O le itulau autu o le Tusi a Mamona o loo aumaia ai mea e sili atu i lo na o se autu. Faatasi ai ma isi mea, o loo lisi mai ai ni faamoemoega o lenei talafaamaumau paia. Vaavaai mo faamoemoega nei i le itulau autu. O fesili faapenei e mafai ona fesoasoani ia te oe a o e mafaufau loloto: Aisea ua tatou maua ai le Tusi a Mamona? E faapefea ona ese le Tusi a Mamona mai isi tusi?

Atonu o se taimi lelei lenei e faia ai se fuafuaga patino pe faaleaiga mo le faitauina o le Tusi a Mamona i lenei tausaga. O afea ma o fea e amata ai? O le a faapefea ona e valaaulia le Agaga i lau suesuega? E i ai se mea patino o le a e sailia a o e suesue? Mo se faataitaiga, e mafai ona e vaavaai mo fuaitau e ausia ai faamoemoega na e mauaina i luga o le itulau autu. E mafai ona e tausia se lisi o fuaiupu e fausia ai lou faatuatua ia Iesu Keriso.

Tagai foi 2 Nifae 25:26; Mosaea 3:5–8; Alema 5:48; 7:10–13; Helamana 5:12; 3 Nifae 9:13–18; 11:6–14; Moronae 10:32–33.

O se folafolaga faaperofeta. Na saunoa Peresitene Russell M. Nelson, “Ou te folafola atu a outou mafaufau loloto i mea tou te suesueina [i le Tusi a Mamona], o le a matala mai pupuni o le lagi, ma o le a outou mauaina tali i a outou lava fesili ma le taitaiga mo o outou lava olaga” (“O Le Tusi a Mamona: Faamata e Faape’i Lou Olaga e aunoa ma Ia?,” Liahona, Nov. 2017, 62–63).

Faatomuaga i le Tusi a Mamona; “O Le Mau a Molimau e Toatolu”; “O Le Mau a Molimau e Toavalu”

E mafai ona avea aʻu ma se molimau o le Tusi a Mamona.

E mafai ona molimau atu ia te oe le Agaga Paia e faapea o le Tusi a Mamona e moni, tusa lava pe e te lei vaai i papatusi auro e pei ona sa vaai i ai Molimau e Toatolu ma Molimau e Toavalu. A o e faitauina a latou upu, mafaufau pe faapefea ona faamalosia lau molimau e a latou molimau.

O le a se mea ua musuia ai oe e uiga i le ala na faasoa atu ai e nei molimau a latou molimau i le Tusi a Mamona? Mafaufau loloto pe mafai faapefea ona e faasoa atu lau molimau i le Tusi a Mamona—ae maise lava o lana molimau ia Iesu Keriso. Mo se faataitaiga, mafaufau faapea o loo e talanoa i se uo e lei faalogo muamua lava i le Tusi a Mamona. O le a se mea o le a e ta’u atu ia te ia e uiga i ai? E faapefea ona e taumafai e musuia lau uo e faitau i ai? Mafaufau e toefaamanatu le Faatomuaga i le Tusi a Mamona. Atonu e te maua ni faamatalaga iina o le a aoga e faasoa atu i lau uo. O vitio nei e mafai foi ona tuuina atu ia te oe ni manatu:

• “Faatomuaga o le Tusi a Mamona”

  Book of Mormon Introduction

  Elder Jeffrey R. Holland explains the background and importance of the Book of Mormon. This book is another testament of Jesus Christ and serves as a companion scripture to the Holy Bible.

• “O le a le Tusi a Mamona? O se Vaaiga Aoao e 60-Sekone”

  What is the Book of Mormon? A 60-Second Overview (Duplicate)

  This video sums up the Book of Mormon in 60 seconds. It answers the questions, “What is the Book of Mormon?” “When did it take place?” “Who is in it?” and “Why is it another book of scripture and testament of Jesus Christ?”

• “O Se Tala o le Tusi a Mamona”

Mafaufau e fai se lisi o mea o le a e faasoa atu i se uo e uiga i le Tusi a Mamona. Taumafai e faasoa atu le Tusi a Mamona e faaaoga ai le polokalama o le Tusi a Mamona.

Tagai foi Ronald A. Rasband, “O Le Aso Nei,” Liahona, Nov. 2022, 25–28; Autu o le Talalelei, “Tusi a Mamona,” Potutusi o le Talalelei; “O Se Agelu mai Luga,” Viiga, nu. 6.

Na tuuina atu e Molimau e Toatolu le molimau i le Tusi a Mamona.

“O Le Molimau a le Perofeta o Iosefa Samita”

O le oo mai o le Tusi a Mamona o se vavega.

Afai e fesili atu se tasi ia te oe pe o fea na sau ai le Tusi a Mamona, o le a sau tala? E faapefea ona e faamatalaina le aao o le Atua i le aumaia o le Tusi a Mamona ia i tatou? A o e faitauina le molimau a Iosefa Samita, taulai atu i le auala na ia faamatalaina ai. E faavae i mea na e faitauina, o le a sou manatu i lagona o le Atua e uiga i le taua o le Tusi a Mamona?

Tagai foi Ulisses Soares, “O Le Oo Mai o le Tusi a Mamona,” Liahona, Me 2020, 32–35; Au Paia, vol. 1, O Le Tagavai o le Upumoni, 21–30; Gospel Topics Essays, “Book of Mormon Translation,” Gospel Library.

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Manatu mo le Aoaoina o Tamaiti

Itulau autu o le Tusi a Mamona

O le faitauina o le Tusi a Mamona e fesoasoani ia te a’u ia faatuatua ia Iesu Keriso.

• Tuu atu i lau fanau e tilotilo i ai ma uu se kopi o le Tusi a Mamona. Fesoasoani ia i latou e faasino i le soa autu, O Se Tasi Molimau ia Iesu Keriso. E mafai foi ona e fesoasoani ia i latou e saili, i luga o le itulau autu, le fasifuaitau “O Iesu o le Keriso, o le Atua Faavavau, ua faaali mai o ia lava i atunuu uma.” Fesoasoani ia latou malamalama o lona uiga ua aoao mai e le Tusi a Mamona i tatou e uiga ia Iesu Keriso. Faamatala faapuupuu atu ia i latou le auala na faamalosia ai e le Tusi a Mamona lou faatuatua ia Iesu Keriso. E mafai foi ona e fesili atu ia i latou e uiga i a latou tala e fiafia i ai o le Tusi a Mamona. O le usuina o le “Tala o le Tusi a Mamona” (Tusipese a Tamaiti, 62) e mafai ona faamanatu atu ai ia i latou nisi o nei tala.

Faatomuaga i le Tusi a Mamona

O le Tusi a Mamona o le maa‘au‘au o la tatou tapuaiga.

• O le itulau o gaoioiga o lenei vaiaso ma le ata o loo i lalo e mafai ona fesoasoani i lau fanau ia malamalama i upu nei a Iosefa Samita i le faatomuaga o le Tusi a Mamona: “O le Tusi a Mamona [o] le maa’au’au o la tatou tapuaiga.” Atonu foi e manaia le fausia pe tusi se ata o se faitotoa faaofuofu ma se maa’au’au i le pito i luga. O le a se mea e ono tupu pe a aveese le maa’au’au? O le a se mea e ono tupu pe ana fai e le o ia i tatou le Tusi a Mamona? Atonu tou te faitauina faatasi le parakalafa mulimuli o le faatomuaga e iloa ai po o a isi mea tatou te aoaoina pe a tatou taliaina le moni o le Tusi a Mamona. E mafai faapefea ona tatou faia le Tusi a Mamona o le maa’au’au o lo tatou faatuatua ia Iesu Keriso?

O le Tusi a Mamona o le maa‘au‘au o la tatou tapuaiga.

“O Le Mau a Molimau e Toatolu”, “O Le Mau a Molimau e Toavalu”

E mafai ona avea aʻu ma se molimau o le Tusi a Mamona.

• Ina ia fesoasoani i lau fanau ia malamalama i le uiga o le avea ma se molimau, e mafai ona e faamatala atu ia i latou se mea na e vaaia latou te lei vaai i ai. Ona tuu atu lea ia i latou e faia lea lava mea e tasi mo oe. O lenei mea e mafai ona taitai atu ai i se talanoaga e uiga i tagata e toa 11 o e na vaai i papatusi auro lea na faaliliu mai ai le Tusi a Mamona. A o outou faitau faatasi i molimau, e mafai ona outou talanoa pe aisea na mananao ai nei molimau i isi tagata ia iloa e uiga i a latou molimau. O ai tatou te mananao e ta’u i ai e uiga i le Tusi a Mamona?

“O Le Molimau a le Perofeta o Iosefa Samita”

O le Tusi a Mamona na tuuina mai ia i tatou e le mana o le Atua.

• Ina ia fesoasoani i lau fanau e aoao pe na faapefea ona tuuina mai e le Atua ia i tatou le Tusi a Mamona, e mafai ona e faitau atu ni vaega “O Le Molimau a le Perofeta o Iosefa Samita” ia i latou. E mafai foi ona e faaaogaina le “Mataupu 1: Na Faapefea Ona Tatou Maua le Tusi a Mamona” (i le Tala o le Tusi a Mamona, 2–4). Atonu foi e fiafia lau fanau e faatino le tala mo ni nai taimi.

Mo nisi manatu, tagai i le lomiga o lenei masina o le mekasini o le Uo .

Ua Tauaao Atu e Moronae ia Papatusi Auro, saunia e Gary L. Kapp