“22–28 Ianuari: ‘Faaauupegaina i le Amiotonu ma le Mana o le Atua.’ 1 Nifae 11–15,” Sau, Mulimuli Mai ia te A’u —Mo Aiga ma le Ekalesia: Tusi a Mamona 2024 (2024)
“22–28 Ianuari. 1 Nifae 11–15,” Sau, Mulimuli Mai ia te A’u—Mo Aiga ma le Ekalesia: 2024 (2024)
O Le Alofa o le Atua, saunia e Sabrina Squires
22–28 Ianuari: “Faaauupegaina i le Amiotonu ma le Mana o le Atua”
1 Nifae 11–15
Pe a i ai se galuega maoae a le Atua mo Lana perofeta e fai, e masani ona Ia tuuina atu i lena perofeta se faaaliga maoae. O Mose, Ioane, Liae, ma Iosefa Samita na tofu uma ma ni faaaliga faapena—o faaaliga na faalauteleina ai o latou mafaufau ma fesoasoani ia i latou e iloa ai le maoae ma le ofoofogia moni o le galuega a le Atua.
Sa maua foi e Nifae se tasi o nei faaaliga na suia ai le olaga. Sa ia vaai i le galuega a le Faaola, le lumanai o fanau a Liae i le nuu folafolaina, ma le taunuuga o le galuega a le Atua i aso e gata ai. Ina ua mavae lenei faaaliga, sa sili atu ona saunia Nifae mo le galuega o loo i luma atu. Ma o le faitau e uiga i lenei faaaliga e mafai ona fesoasoani e saunia ai foi oe—aua o loo i ai foi i le Atua se galuega mo oe e fai i Lona malo. O loo e i ai faatasi ma le “au paia o le ekalesia a le Tamai Mamoe” na vaai i ai Nifae, “o e sa faataapeapeina i luga o le fogaeleele atoa; ma sa faaauupegaina i latou i le amiotonu ma le mana o le Atua i le mamalu tele” (1 Nifae 14:14).
Tagai foi “Ua Vaai Nifae i se Faaaliga o Mea e Tutupu i le Lumanai” (vitio), Gospel Library.
Ua Vaai Nifae i se Faaaliga o Mea e Tutupu i le Lumanai | 1 Nifae 10-15
O Nifae, o se perofeta anamua a le Atua mai Ierusalema ma Amerika Anamua, ua maua se vaaiga mamao o mea e tutupu i le lumanai, e pei o lona tama, o Liae ma faatasi ai ma se agelu a le Alii.
Manatu mo le Aoaoina i le Aiga ma i le Lotu
Na auina mai e le Atua ia Iesu Keriso o se faailoaga o Lona alofa.
Ina ua fesili Nifae i le agelu e uiga i le uiga o le laau i le faaaliga a Liae, semanu e faigofie lava ona faapea mai le agelu, “E faatusa i le alofa o le Atua.” Nai lo lena, sa ia faaali atu ia Nifae se faasologa o faatusa ma mea na tutupu mai le soifuaga o le Faaola. Vaavaai mo nei faatusa ma mea na tutupu a o e faitau ma mafaufau loloto i le 1 Nifae 11. O le a se mea ua e maua e fesoasoani e te malamalama ai pe aisea ua avea ai Iesu Keriso ma faailoaga sili o le alofa o le Atua?
Atonu e te mafaufau e matamata i Vitio o le Tusi Paia i le Potutusi o le Talalelei lea e ogatusa ma mea na vaaia e Nifae. Na faapefea ona fesoasoani le Faaola ia te oe ia lagona le alofa o lou Tama Faalelagi?
Tagai foi i le Susan H. Porter, “O Le Alofa o le Atua: E Silisili Ona Olioli i le Agaga,” Liahona, Nov. 2021, 33–35.
E mafai ona “faaauupegaina au i le amiotonu” ma le mana.
O le a le ola Nifae e molimauina le tele o mea sa ia vaai i ai i lana faaaliga. Aisea e te manatu ai sa taua ia Nifae ona iloa nei mea? Aisea e taua ai mo oe ona iloa nei mea? Fai atu fesili nei i taimi taitasi e te faitau ai e uiga i se mea na vaai i ai Nifae i lana faaaliga (tagai 1 Nifae 12–14). O a ni uunaiga e te maua e uiga i lau matafaioi i le “galuega tele ma le ofoofogia” a le Alii? (1 Nifae 14:7). O a nisi o mea tetele ma le ofoofogia ua Ia faia mo oe?
Mafaufau faapitoa i le folafolaga i le 1 Nifae 14:14. Na faapefea ona faataunuuina e le Faaola lenei folafolaga i lou olaga? (Mo nisi o faataitaiga, tagai David A. Bednar, “Ma le Mana o le Atua i le Mamalu Tele,” Liahona, Nov. 2021, 28–30, aemaise lava vaega mulimuli e lua.)
O le a le “ekalesia tele ma le inosia” na vaai i ai Nifae?
Sa faamalamalama mai e Peresitene Dallin H. Oaks e faapea “o lenei ekalesia tele ma le inosia” sa faamatalaina e Nifae e faatusa “o soo se filosofia po o se faalapotopotoga e tetee i le talitonuga i le Atua. Ma o le ‘faatagataotauaina’ lea e taumafai lenei ‘ekalesia’ e aumai i ai le au paia, o le a le tele foi se taofiofiga faaletino e pei o le faatagataotauaina i manatu sese” (“Laulaututu e Fai ma Molimau a le Atua,” Liahona, Mat. 2015, 32). E faapefea ona fesoasoani le Faaola ia te oe e aloese—ma solaese mai—le faatagataotauaina i manatu sese?
O le a tali mai le Atua ia te a’u pe a ou ole atu i le faatuatua.
Pe na e lagonaina ea e pei e te le o mauaina se faaaliga patino—faapea sa lei talanoa atu le Atua ia te oe? O le a se fautuaga na tuuina atu e Nifae i ona uso ina ua latou lagona faapena? (Tagai i le 1 Nifae 15:1–11.) E mafai faapefea ona e faaaoga le fautuaga a Nifae i lou olaga?
O le pipii mau i le afioga a le Atua e fesoasoani lea ia te au e tetee atu ai i faatosinaga a Satani.
Sa masani ona i ai ia Nifae ni mea faanatinati e ta’u atu i ona uso. Ae sa foliga mai na faapitoa lava lona faananau i mea na ia ta’u atu ia i latou i le 1 Nifae 15:23–25. O le a le savali a Nifae, ma aisea e te manatu ai sa mamafa lona mafaufau i ai?
Na aoao mai Elder David A. Bednar faapea “o le afioga a le Atua” e mafai ona faasino i tusitusiga paia, i upu a perofeta soifua, ma Iesu Keriso lava Ia. O le a sou manatu i le uiga o le “pipii mau” i tusitusiga paia ma upu a perofeta soifua? Mata o le a le uiga o le “pipii mau” ia Iesu Keriso? E mafai ona e vaavaai mo ni tali talafeagai i nei fesili i le savali a Elder Bednar “Peitai Sa Matou Lē Amanaiaina i Latou” (Liahona, Me 2022, 14–16).
E faapefea e le pipii mau i le afioga a le Atua ona fesoasoani ia te oe e tetee atu ai i le fili? O le faatumuina o se siata faapenei e mafai ona fesoasoani e faatulaga ai ou manatu:
|
… fesoasoani ia te au e faatoilalo le pogisa o faaosoosoga? (tagai 1 Nifae 12:17) |
… fesoasoani ia te a’u ia “lē ua’i atu” i le le aoga ma le faamaualuga o le lalolagi? (1 Nifae 12:18) | |
|
E faapefea e le pipiimau i tusitusiga paia ma upu a perofeta soifua … | ||
|
E faapefea e le pipiimau i le Faaola … |
Tagai foi “The Iron Rod,” Hymns, no. 274; Jorge F. Zeballos, “Fauina o se Olaga e Tetee Atu ai i le Fili,” Liahona, Nov. 2022, 50–52.
O tusitusiga paia e pei o se ai uamea lea e taitai atu ai i tatou i le laau o le ola.
Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .
Manatu mo le Aoaoina o Tamaiti
Na auina mai e le Tama Faalelagi ia Iesu Keriso ona e alofa o Ia ia te au.
-
Ina ia aoao Nifae e uiga i le alofa o le Atua, sa faaali atu e se agelu ia Nifae mea na tutupu mai le soifuaga o le Faaola. E mafai ona e faia foi faapena mo lau fanau—tuu atu ia i latou ni ata o mea na tutupu na vaaia e Nifae i le 1 Nifae 11:20, 24, 27, 31, ma le 33 (tagai Tusi Ata o le Talalelei, nu.30, 35, 39, 42,57). A o e faitauina nei fuaiupu, fesoasoani i lau fanau e sue le ata e fetaui i ai. O a mea ua tatou aoaoina e uiga ia Iesu Keriso mai nei fuaiupu ma ata?
-
O le usuina o se pese e pei ole “Na Ia Auina Mai Lona Alo” (Tusipese a Tamaiti, 20–21) e mafai ona fesoasoani i lau fanau ia lagona le alofa o le Atua. A uma ona outou pepese, fesili i lau fanau po o a mea ua latou aoaoina mai le pese. O le a se isi mea ua tatou aoaoina e uiga i le alofa o le Atua mai le 1 Nifae 11:22–23?
Faaaoga ata e fesoasoani ai i tamaiti e aoao. A e aoaoina tamaiti i se tala faatusipaia, fesoasoani ia i latou e vaai faalemafaufau i ai. E mafai ona e faaaogaina ni ata, vitio, papeti, teuga, ma isi.
O loo aoao mai e le Tusi a Mamona upu moni taua.
-
Ina ia fesoasoani i lau fanau e faataua ia upumoni “manino ma pele” i le Tusi a Mamona, e mafai ona e tusia se ata ma valaaulia lau fanau e sui pe aveese vaega o le ata ina ia foliga ese ai. E mafai ona e faaaogaina lenei mea e aoao atu ai o mea i le Tusi Paia na suia ma aveesea i le aluga o taimi. Faitau faatasi le 1 Nifae 13:40 ma talanoa pe faapefea e le Tusi a Mamona (“talafaamaumau mulimuli nei”) ona fesoasoani tatou te malamalama ai i “mea manino ma pele” ia na leiloloa mai le Tusi Paia (o talafaamaumau “muamua”). O a upumoni “manino ma pele” na aoaoina mai e le Tusi a Mamona?
-
O le vitio “O Le Tusi a Mamona—o se Tusi mai le Atua” (Gospel Library) e mafai ona fesoasoani i lau fanau ia iloa ai pe aisea e taua ai le i ai uma o le Tusi Paia ma le Tusi a Mamona. Atonu e fiafia tamaiti e toe-fatu le ata mai le vitio.
O Le Tusi a Mamona—o se Tusi mai le Atua
Ua faamalamalama mai e Elder Tad R. Callister the taua o le Tusi a Mamona o se soa i le Tusi Paia i le faaalia mai o aoaoga faavae moni a le Atua ma Lana Ekalesia.
Ua toefuatai mai e le Tusi a Mamona ia upumoni na leiloloa i le taimi o le Liliu Ese.
O le pipii mau i le afioga a le Atua e fesoasoani ia te a’u e tetee atu ai i faaosoosoga.
-
Tuu atu i lau fanau se avanoa e faasoa mai ai mea latou te manatua e uiga i le faaaliga a Liae. E ono fesoasoani le faaaoga o se ata, e pei o le ata i le otootoga o le vaiaso ua te’a. O a mea na taofia tagata mai le oʻo atu i le laau? O a mea na fesoasoani ia i latou e oo atu i ai? E mafai ona e fai atu ia i latou e sue le ai uamea i le ata. Faitau faatasi le 1 Nifae 15:23–24 e saili ai po o le a le mea e faatusa i ai le ai uamea ma pe mafai faapefea ona fesoasoani ia i tatou.
Mo nisi manatu, tagai i le lomiga o lenei masina o le mekasini o le Uo .
Faaaliga a Nifae e uiga ia Maria, saunia e James Johnson