29 enero–4 febrero: “Tinkawresi li b’e cheru”

1 Nefi 16–22

Naq lix junkab’al laj Lehi ke’b’eek sa’ xjayal li yeechi’inb’il ch’och’, li Qaawa’ kixyeechi’i a’in reheb’: “Tinkawresi li b’e cheru, wi taa’uxq naq teepaab’ lin taqlahom” (1 Nefi 17:13). Relik chi yaal, li yeechi’ihom a’an maawa’ naq moko ch’a’ajaq ta lix b’eenikeb’—toj ke’xwech’ rib’ chirib’ileb’ rib’ lix komon li junkab’al, ke’toqe’ li roq li tzimaj, ke’ch’a’ajkilo’ ut ke’kam li kristiaan, ut toj ke’teneb’aak chixyiib’ankil jun jukub’ rik’in yal li k’a’aq re ru ke’xtaw sa’ li chaqi ch’och’. A’b’anan, naq li junkab’al kiwan chiruheb’ li ch’a’ajkilal malaj li k’a’ru chanchan ink’a’ naru xb’aanunkil, laj Nefi kixk’e reetal naq li Dios moko najt ta wan. A’an kixnaw naq li Dios “naxch’oolaniheb’ [li tiikeb’ xch’ool], ut naxk’eheb’ xmetz’ew, ut naxk’e li taak’anjelaq re naq te’ruuq chixb’aanunkil li k’a’ru kixtaqlaheb’ wi’” (1 Nefi 17:3). Wi wankeb’ li hoonal naq nakapatz’ k’a’ut naq neke’xk’ul li rahilal li chaab’ileb’ xch’ool, jo’ laj Nefi ut lix junkab’al, maare taataw aana’leb’ chirix a’an sa’eb’ li ch’ol a’in. A’ut li k’a’ru jwal nim wi’chik ru taawil, a’an li k’a’ru neke’xb’aanu li chaab’ileb’ xch’ool naq neke’xk’ul li rahilal.

Li na’leb’ re tzolok sa’ li ochoch ut sa’ li iglees

1 Nefi 16–18

Li Kolonel tinixtenq’a chixnumsinkileb’ li ch’a’ajkilal re li yu’am.

Lix junkab’al laj Nefi ke’xnumsi ninqi ch’a’ajkilal—jo’ naqanumsi chiqajunilo. K’a’ru naru nakatzol rik’in laj Nefi chirix xnumsinkil li ch’a’ajkilal rik’in paab’aal chirix li Jesukristo? Il li ke’xk’ul sa’ 1 Nefi 16:17–32; 16:34–39; 17:7–16; 18:1–4; ut 18:9–22. K’oxla xtz’iib’ankil li nakataw rub’el jolomil aatin jo’eb’ a’in: “Li ch’a’ajkilal,” “K’a’ru kixb’aanu laj Nefi,” ut “Chan ru naq kitenq’an li Qaawa’.” K’a’ru nakatzol li naru nakawoksi sa’eb’ li ch’a’ajkilal nakanumsi?

Chirix xtawb’al aana’leb’ rik’in laj Nefi ut lix junkab’al, naru nakatz’iib’a xkomon chik aana’leb’ rub’el jolomil aatin jo’eb’ a’in: “Lin ch’a’ajkilal,” “K’a’ru tinb’aanu laa’in,” ut “Chan ru naq li Qaawa’ naru tinixtenq’a.” Naq yooqat chixb’aanunkil a’an, naru nakawoksiheb’ li raqal a’in re li loq’laj hu: Mateo 11:28–30; Jwan 14:26–27; Mosiah 24:13–15. Jun b’ich jo’ “B’ar wan xhiilal li waam?” (Eb’ li B’ich, 67), naru naxkawob’resi laa paab’aal chirix li Kolonel ut li tenq’ naxyeechi’i sa’ xq’ehil li yale’k-ix.

Chi’ilmanq ajwi’ Anthony D. Perkins, “Che’jultiko’q aawe eb’ laa santil paab’anel li ra yookeb’ chixk’ulb’al, at qaDios,” Jolomil ch’utub’aj-ib’ re octubre 2021; “Él te brindará ayuda,” “El Señor guía el viaje de Lehi,” “El Señor manda a Nefi construir un barco,” ut “La familia de Lehi navega a la tierra prometida” (eb’ li video), Biblioteca del Evangelio; “Ayuda para la vida,” Biblioteca del Evangelio.

1 Nefi 16:10–16, 23–31; 18:11–22

Li Dios naxk’am inb’e rik’in li k’a’ru ka’ch’in.

Naq li Dios kixk’am xb’e lix junkab’al laj Lehi sa’ li chaqi ch’och’, ink’a’ kixk’e reheb’ jun reetalil ch’och’ li tixk’ut chixjunil li te’xnumsi sa’ xb’eenikeb’. Ruuchil a’an kixk’e reheb’ li Liahona re xk’amb’aleb’ xb’e wulaj wulaj. Naq yooqat chirilb’al 1 Nefi 16:10–16, 23–31 ut 18:10–22, k’oxla xtz’iib’ankileb’ li na’leb’ li neke’xk’ut chan ru naq li Dios naxk’ameb’ xb’e li ralal xk’ajol (jo’ eetalil, 1 Nefi 16:10 naru naxk’ut naq wan naq li Dios naxk’am qab’e chi jalan rik’in li xqoyb’eni). K’a’ru xjuntaq’eetil li Liahona rik’in li Santil Musiq’ej? K’a’ruheb’ li “k’a’ru ka’ch’in” ak xroksi a’an re xk’eeb’al chi uxk “xninqal ru naʼlebʼ” sa’ laa yu’am?

Chi’ilmanq ajwi’ Alma 37:7, 38–47; Tzol’leb’ ut Sumwank 64:33–34.

Wi kawresinb’ilex ink’a’ texxuwaq, xb’aan laj Clark Kelley Price

1 Nefi 17:1–6, 17–22

Lix yalb’al wix naru taawanq choq’ osob’tesink.

Us ta laj Nefi ut eb’ li ras juntaq’eeteb’ li ch’a’ajkilal ke’xnumsi sa’ li yamyookil ch’och’, moko juntaq’eet ta li ke’xk’ul xb’aan a’an. Naru nakak’e reetal chan ru naq jalan li raatin laj Nefi chirix li b’eek chiru li yamyookil ch’och’ (chi’ilmanq 1 Nefi 17:1–6) rik’in li raatineb’ li ras (chi’ilmanq 1 Nefi 17:17–22). K’a’ru kixnaw malaj kixb’aanu laj Nefi li kitenq’ank re chi ilok rik’in paab’aal? K’oxla xtz’iib’ankil resil jun yale’k-ix toje’ xanumsi malaj li toj yookat chixnumsinkil rik’in jun ilok re paab’aal ut b’antioxihom. K’a’ru nakaweek’a chirix malaj nakatzol rik’in a’in?

Chi’ilmanq ajwi’ Amy A. Wright, “Li Kristo naxk’irtesi li toqol,” Jolomil ch’utub’aj-ib’ re abril 2022.

Li ch’anch’ookil hoonal re k’oxlak. Roksinkil aahoonal re tzolok ut tz’ilok-ix sa’ k’a’uxlej naru naxb’oq li musiq’anb’il na’leb’. Xb’aanunkil a’an naru nokoxtenq’a chixk’eeb’al reetal chan ru naq li tzol’leb’ malaj li na’leb’ re li evangelio nak’anjelak sa’ li qayu’am. Naq yookat chi k’utuk, k’e xhoonaleb’ li kristiaan chi k’oxlak ut chixtz’iib’ankileb’ lix k’oxlahom. Naru ajwi’ naxtenq’aheb’ chixwotzb’al li neke’xk’oxla ut neke’reek’a.

1 Nefi 19:22–24; 20–22

Naru “tinjuntaq’eeta chixjunileb’ li loq’laj hu” wik’in.

Ke’tz’iib’aman li loq’laj hu sa’ najter kutan, jo’kan naq maare naqak’oxla naq maak’a’eb’ aj-e sa’ li qayu’am laa’o. A’b’an chaab’il wi’chik xna’leb’ laj Nefi. “Kinjuntaq’eeta chixjunileb’ li loq’laj hu qik’in,” chan, “re naq taawanq choq’ re qachaab’ilal ut qatzolb’al” (1 Nefi 19:23). Xb’aan a’in naq laj Nefi kixtaw naab’al li musiq’ejil wankil sa’eb’ li loq’laj hu.

Naru nakak’oxlaheb’ li patz’om jo’eb’ a’in naq yooqat chirilb’al 1 Nefi 20–22:

1 Nefi 20:1–9K’a’ru neke’xk’ut li raqal a’in chirixeb’ li kristiaan sa’ xkutankil laj Isaias? K’a’ru nakataw li nak’anjelak sa’ laa yu’am?

1 Nefi 20:17–22.K’a’ru neke’xk’ut li raqal a’in chirix li kixb’aanu li qaChoxahil Yuwa’ re xk’amb’aleb’ xb’e li kristiaan sa’ xkutankil laj Isaias? Chan ru naq a’an nakatxb’oq chixtaaqenkil?

K’a’ chik ru nakataw sa’ 1 Nefi 20–22 li naru “nakajuntaq’eeta” aawik’in?

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

1 Nefi 16:10, 28–29; 18:8–13, 20–22

Naq ninpaab’eb’ li taqlahom, li Qaawa’ nikinixb’eresi.

• Wi wan jun laa brujula, jun reetalil ch’och’, malaj junaq chik k’a’aq re ru li nokoxtenq’a chixtawb’al li na’ajej b’ar naqaj xik, naru nakak’ut chiruheb’ laa kok’al. A’in naru nekexxtenq’a chi aatinak chirix li Liahona, li naru nekeril resil sa’ 1 Nefi 16:10, 28–29. K’a’ut raj naq ink’a’ taak’anjelaq jun li brujula malaj reetalil ch’och’? K’a’ut naq ke’wan hoonal naq ink’a’ kik’anjelak li Liahona choq’ re lix junkab’al laj Lehi? (chi’ilmanq 1 Nefi 18:9–12, 20–22). K’a’ru xk’ehom qe li qaChoxahil Yuwa’ sa’ li kutan a’in re xkamb’al qab’e re tooq’ajq rik’in a’an?

• Re xtenq’ankileb’ laa kok’al chixyu’aminkil li te’xtzol chirix li Liahona sa’ 1 Nefi 16:10, 26–31; 18:8–22, naru nakapatz’ reheb’ naq te’xk’oxla jun na’leb’ aajel ru malaj ch’a’aj xsik’b’al ru. K’a’ru naxk’e li Dios qe sa’ li qakutankil li nak’anjelak jo’ li Liahona? (Chi’ilmanq, jo’ eetalil, Alma 37:38–44.) Naru nakawotz jun aanumsihom naq li qaChoxahil Yuwa’ kixk’am aab’e.

1 Nefi 16:21–32

Naru ninwan jo’ jun chaab’il eetalil choq’ re lin junkab’al.

• Naq yooqex chirilb’al 1 Nefi 16:21–32, tenq’aheb’ laa kok’al chixk’eeb’al reetal chan ru naq lix b’aanuhom laj Nefi kirosob’tesi lix junkab’al (chi’ilmanq ajwi’ li video “El Señor guía el viaje de Lehi” [Biblioteca del Evangelio]). A’in naru nekexxtenq’a chi aatinak chirix li wulak jo’ chanru laj Nefi. Patz’ reheb’ laa kok’al naq te’xk’oxla jun na’leb’ naru neke’xb’aanu re xk’utb’al li chaab’ilal chiruheb’ lix junkab’al.

1 Nefi 17:7–19; 18:1–4

Li qaChoxahil Yuwa’ naru nikinixtenq’a chixb’aanunkil li k’a’ru ch’a’aj.

• Eb’ li kok’al nawulak chiruheb’ seraq’ink. Naru nakapatz’ reheb’ naq tate’xtenq’a chixyeeb’al li seraq’ chirix laj Nefi naq kitaqlaak chixyiib’ankil jun li jukub’ (chi’ilmanq 1 Nefi 17:7–19; 18:1–4; chi’ilmanq ajwi’ “Ch’ol 7: Xyiib’ankil li jukub’,” sa’ Eb’ li Esilal sa’ lix Hu laj Mormon, 21–22; malaj li video “El Señor manda a Nefi construir un barco” [Biblioteca del Evangelio]). Naru ajwi’ neke’xb’icha li xkab’ raqal re li b’ich “Kaw lix ch’ool laj Nefi” (B’ichleb’aal choq’ reheb’ li Kok’al, 64–65). K’a’ru kik’ehok xkawil xch’ool laj Nefi naq eb’ li ras ke’reetz’u naq kixyal xyiib’ankil jun li jukub’?

• Laj Nefi ink’a’ kixnaw chan ru xyiib’ankil jun li jukub’, jo’kan naq kiroksi li na’leb’ kixk’e li Qaawa’ re. Chirix rilb’al 1 Nefi 18:1 aawik’in, laa kok’al naru neke’xb’aanu li perel re kok’ k’anjel re’ li xamaan a’in. Naq yooqeb’ chixb’aanunkil a’an, ye reheb’ chan ru naq li qaChoxahil Yuwa’ naru nokoxtenq’a chixb’aanunkil li k’a’ru ch’a’aj, jo’ chanru naq kixtenq’a laj Nefi.

Re xtawb’al xkomon chik li na’leb’, chi’ilmanq li hu Amigos re li po a’in.

K’a’jo’ li rahilal ke’xb’aanu we, xb’aan laj Walter Rane